శ్రీ లలితా త్రిశతి స్తోత్రమ్

శ్రీ లలితా త్రిశతి స్తోత్రమ్

శ్లోక 1

అస్య శ్రీలలితా త్రిశతీస్తోత్ర మహామన్త్రస్య, భగవాన్ హయగ్రీవ ఋషిః, అనుష్టుప్ ఛన్దః, శ్రీలలితామహాత్రిపురసున్దరీ దేవతా, ఐం బీజం, సౌః శక్తిః, క్లీం కీలకం, మమ చతుర్విధపురుషార్థఫలసిద్ధ్యర్థే జపే వినియోగః ।

ఐమిత్యాదిభిరఙ్గన్యాసకరన్యాసాః కార్యాః ।

ధ్యానమ్ ।

అతిమధురచాపహస్తా-

-మపరిమితామోదబాణసౌభాగ్యామ్ ।

అరుణామతిశయకరుణా-

-మభినవకులసున్దరీం వన్దే ।

శ్రీ హయగ్రీవ ఉవాచ ।

కకారరూపా కల్యాణీ కల్యాణగుణశాలినీ ।

కల్యాణశైలనిలయా కమనీయా కలావతీ

శ్లోక 2

కమలాక్షీ కల్మషఘ్నీ కరుణామృతసాగరా ।

కదమ్బకాననావాసా కదమ్బకుసుమప్రియా

॥ 1 ॥

శ్లోక 3

కన్దర్పవిద్యా కన్దర్పజనకాపాఙ్గవీక్షణా ।

కర్పూరవీటిసౌరభ్యకల్లోలితకకుప్తటా

॥ 2 ॥

శ్లోక 4

కలిదోషహరా కఞ్జలోచనా కమ్రవిగ్రహా ।

కర్మాదిసాక్షిణీ కారయిత్రీ కర్మఫలప్రదా

॥ 3 ॥

శ్లోక 5

ఏకారరూపా చైకాక్షర్యేకానేకాక్షరాకృతిః ।

ఏతత్తదిత్యనిర్దేశ్యా చైకానన్దచిదాకృతిః

॥ 4 ॥

శ్లోక 6

ఏవమిత్యాగమాబోధ్యా చైకభక్తిమదర్చితా ।

ఏకాగ్రచిత్తనిర్ధ్యాతా చైషణారహితాదృతా

॥ 5 ॥

శ్లోక 7

ఏలాసుగన్ధిచికురా చైనఃకూటవినాశినీ ।

ఏకభోగా చైకరసా చైకైశ్వర్యప్రదాయినీ

॥ 6 ॥

శ్లోక 8

ఏకాతపత్రసామ్రాజ్యప్రదా చైకాన్తపూజితా ।

ఏధమానప్రభా చైజదనేకజగదీశ్వరీ

॥ 7 ॥

శ్లోక 9

ఏకవీరాదిసంసేవ్యా చైకప్రాభవశాలినీ ।

ఈకారరూపా చేశిత్రీ చేప్సితార్థప్రదాయినీ

॥ 8 ॥

శ్లోక 10

ఈదృగిత్యవినిర్దేశ్యా చేశ్వరత్వవిధాయినీ ।

ఈశానాదిబ్రహ్మమయీ చేశిత్వాద్యష్టసిద్ధిదా

॥ 9 ॥

శ్లోక 11

ఈక్షిత్రీక్షణసృష్టాణ్డకోటిరీశ్వరవల్లభా ।

ఈడితా చేశ్వరార్ధాఙ్గశరీరేశాధిదేవతా

॥ 10 ॥

శ్లోక 12

ఈశ్వరప్రేరణకరీ చేశతాణ్డవసాక్షిణీ ।

ఈశ్వరోత్సఙ్గనిలయా చేతిబాధావినాశినీ

॥ 11 ॥

శ్లోక 13

ఈహావిరహితా చేశశక్తిరీషత్స్మితాననా ।

లకారరూపా లలితా లక్ష్మీవాణీనిషేవితా

॥ 12 ॥

శ్లోక 14

లాకినీ లలనారూపా లసద్దాడిమపాటలా ।

లలన్తికాలసత్ఫాలా లలాటనయనార్చితా

॥ 13 ॥

శ్లోక 15

లక్షణోజ్జ్వలదివ్యాఙ్గీ లక్షకోట్యణ్డనాయికా ।

లక్ష్యార్థా లక్షణాగమ్యా లబ్ధకామా లతాతనుః

॥ 14 ॥

శ్లోక 16

లలామరాజదలికా లమ్బిముక్తాలతాఞ్చితా ।

లమ్బోదరప్రసూర్లభ్యా లజ్జాఢ్యా లయవర్జితా

॥ 15 ॥

శ్లోక 17

హ్రీం‍కారరూపా హ్రీం‍కారనిలయా హ్రీం‍పదప్రియా ।

హ్రీం‍కారబీజా హ్రీం‍కారమన్త్రా హ్రీం‍కారలక్షణా

॥ 16 ॥

శ్లోక 18

హ్రీం‍కారజపసుప్రీతా హ్రీం‍మతీ హ్రీం‍విభూషణా ।

హ్రీం‍శీలా హ్రీం‍పదారాధ్యా హ్రీం‍గర్భా హ్రీం‍పదాభిధా

॥ 17 ॥

శ్లోక 19

హ్రీం‍కారవాచ్యా హ్రీం‍కారపూజ్యా హ్రీం‍కారపీఠికా ।

హ్రీం‍కారవేద్యా హ్రీం‍కారచిన్త్యా హ్రీం హ్రీం‍శరీరిణీ

॥ 18 ॥

శ్లోక 20

హకారరూపా హలధృక్పూజితా హరిణేక్షణా ।

హరప్రియా హరారాధ్యా హరిబ్రహ్మేన్ద్రవన్దితా

॥ 19 ॥

శ్లోక 21

హయారూఢాసేవితాఙ్ఘ్రిర్హయమేధసమర్చితా ।

హర్యక్షవాహనా హంసవాహనా హతదానవా

॥ 20 ॥

శ్లోక 22

హత్యాదిపాపశమనీ హరిదశ్వాదిసేవితా ।

హస్తికుమ్భోత్తుఙ్గకుచా హస్తికృత్తిప్రియాఙ్గనా

॥ 21 ॥

శ్లోక 23

హరిద్రాకుఙ్కుమాదిగ్ధా హర్యశ్వాద్యమరార్చితా ।

హరికేశసఖీ హాదివిద్యా హాలామదాలసా

॥ 22 ॥

శ్లోక 24

సకారరూపా సర్వజ్ఞా సర్వేశీ సర్వమఙ్గలా ।

సర్వకర్త్రీ సర్వభర్త్రీ సర్వహన్త్రీ సనాతనా

॥ 23 ॥

శ్లోక 25

సర్వానవద్యా సర్వాఙ్గసున్దరీ సర్వసాక్షిణీ ।

సర్వాత్మికా సర్వసౌఖ్యదాత్రీ సర్వవిమోహినీ

॥ 24 ॥

శ్లోక 26

సర్వాధారా సర్వగతా సర్వావగుణవర్జితా ।

సర్వారుణా సర్వమాతా సర్వభూషణభూషితా

॥ 25 ॥

శ్లోక 27

కకారార్థా కాలహన్త్రీ కామేశీ కామితార్థదా ।

కామసఞ్జీవనీ కల్యా కఠినస్తనమణ్డలా

॥ 26 ॥

శ్లోక 28

కరభోరూః కలానాథముఖీ కచజితామ్బుదా ।

కటాక్షస్యన్దికరుణా కపాలిప్రాణనాయికా

॥ 27 ॥

శ్లోక 29

కారుణ్యవిగ్రహా కాన్తా కాన్తిధూతజపావలిః ।

కలాలాపా కమ్బుకణ్ఠీ కరనిర్జితపల్లవా

॥ 28 ॥

శ్లోక 30

కల్పవల్లీసమభుజా కస్తూరీతిలకాఞ్చితా ।

హకారార్థా హంసగతిర్హాటకాభరణోజ్జ్వలా

॥ 29 ॥

శ్లోక 31

హారహారికుచాభోగా హాకినీ హల్యవర్జితా ।

హరిత్పతిసమారాధ్యా హఠాత్కారహతాసురా

॥ 30 ॥

శ్లోక 32

హర్షప్రదా హవిర్భోక్త్రీ హార్దసన్తమసాపహా ।

హల్లీసలాస్యసన్తుష్టా హంసమన్త్రార్థరూపిణీ

॥ 31 ॥

శ్లోక 33

హానోపాదాననిర్ముక్తా హర్షిణీ హరిసోదరీ ।

హాహాహూహూముఖస్తుత్యా హానివృద్ధివివర్జితా

॥ 32 ॥

శ్లోక 34

హయ్యఙ్గవీనహృదయా హరిగోపారుణాంశుకా ।

లకారాఖ్యా లతాపూజ్యా లయస్థిత్యుద్భవేశ్వరీ

॥ 33 ॥

శ్లోక 35

లాస్యదర్శనసన్తుష్టా లాభాలాభవివర్జితా ।

లఙ్ఘ్యేతరాజ్ఞా లావణ్యశాలినీ లఘుసిద్ధిదా

॥ 34 ॥

శ్లోక 36

లాక్షారససవర్ణాభా లక్ష్మణాగ్రజపూజితా ।

లభ్యేతరా లబ్ధభక్తిసులభా లాఙ్గలాయుధా

॥ 35 ॥

శ్లోక 37

లగ్నచామరహస్తశ్రీశారదాపరివీజితా ।

లజ్జాపదసమారాధ్యా లమ్పటా లకులేశ్వరీ

॥ 36 ॥

శ్లోక 38

లబ్ధమానా లబ్ధరసా లబ్ధసమ్పత్సమున్నతిః ।

హ్రీం‍కారిణీ హ్రీం‍కారాద్యా హ్రీం‍మధ్యా హ్రీం‍శిఖామణిః

॥ 37 ॥

శ్లోక 39

హ్రీం‍కారకుణ్డాగ్నిశిఖా హ్రీం‍కారశశిచన్ద్రికా ।

హ్రీం‍కారభాస్కరరుచిర్హ్రీం‍కారామ్భోదచఞ్చలా

॥ 38 ॥

శ్లోక 40

హ్రీం‍కారకన్దాఙ్కురికా హ్రీం‍కారైకపరాయణా ।

హ్రీం‍కారదీర్ఘికాహంసీ హ్రీం‍కారోద్యానకేకినీ

॥ 39 ॥

శ్లోక 41

హ్రీం‍కారారణ్యహరిణీ హ్రీం‍కారావాలవల్లరీ ।

హ్రీం‍కారపఞ్జరశుకీ హ్రీం‍కారాఙ్గణదీపికా

॥ 40 ॥

శ్లోక 42

హ్రీం‍కారకన్దరాసింహీ హ్రీం‍కారామ్భోజభృఙ్గికా ।

హ్రీం‍కారసుమనోమాధ్వీ హ్రీం‍కారతరుమఞ్జరీ

॥ 41 ॥

శ్లోక 43

సకారాఖ్యా సమరసా సకలాగమసంస్తుతా ।

సర్వవేదాన్తతాత్పర్యభూమిః సదసదాశ్రయా

॥ 42 ॥

శ్లోక 44

సకలా సచ్చిదానన్దా సాధ్యా సద్గతిదాయినీ ।

సనకాదిమునిధ్యేయా సదాశివకుటుమ్బినీ

॥ 43 ॥

శ్లోక 45

సకాలాధిష్ఠానరూపా సత్యరూపా సమాకృతిః ।

సర్వప్రపఞ్చనిర్మాత్రీ సమనాధికవర్జితా

॥ 44 ॥

శ్లోక 46

సర్వోత్తుఙ్గా సఙ్గహీనా సగుణా సకలేష్టదా ।

కకారిణీ కావ్యలోలా కామేశ్వరమనోహరా

॥ 45 ॥

శ్లోక 47

కామేశ్వరప్రాణనాడీ కామేశోత్సఙ్గవాసినీ ।

కామేశ్వరాలిఙ్గితాఙ్గీ కామేశ్వరసుఖప్రదా

॥ 46 ॥

శ్లోక 48

కామేశ్వరప్రణయినీ కామేశ్వరవిలాసినీ ।

కామేశ్వరతపఃసిద్ధిః కామేశ్వరమనఃప్రియా

॥ 47 ॥

శ్లోక 49

కామేశ్వరప్రాణనాథా కామేశ్వరవిమోహినీ ।

కామేశ్వరబ్రహ్మవిద్యా కామేశ్వరగృహేశ్వరీ

॥ 48 ॥

శ్లోక 50

కామేశ్వరాహ్లాదకరీ కామేశ్వరమహేశ్వరీ ।

కామేశ్వరీ కామకోటినిలయా కాఙ్క్షితార్థదా

॥ 49 ॥

శ్లోక 51

లకారిణీ లబ్ధరూపా లబ్ధధీర్లబ్ధవాఞ్ఛితా ।

లబ్ధపాపమనోదూరా లబ్ధాహఙ్కారదుర్గమా

॥ 50 ॥

శ్లోక 52

లబ్ధశక్తిర్లబ్ధదేహా లబ్ధైశ్వర్యసమున్నతిః ।

లబ్ధవృద్ధిర్లబ్ధలీలా లబ్ధయౌవనశాలినీ

॥ 51 ॥

శ్లోక 53

లబ్ధాతిశయసర్వాఙ్గసౌన్దర్యా లబ్ధవిభ్రమా ।

లబ్ధరాగా లబ్ధపతిర్లబ్ధనానాగమస్థితిః

॥ 52 ॥

శ్లోక 54

లబ్ధభోగా లబ్ధసుఖా లబ్ధహర్షాభిపూరితా ।

హ్రీం‍కారమూర్తిర్హ్రీం‍కారసౌధశృఙ్గకపోతికా

॥ 53 ॥

శ్లోక 55

హ్రీం‍కారదుగ్ధాబ్ధిసుధా హ్రీం‍కారకమలేన్దిరా ।

హ్రీం‍కారమణిదీపార్చిర్హ్రీం‍కారతరుశారికా

॥ 54 ॥

శ్లోక 56

హ్రీం‍కారపేటకమణిర్హ్రీం‍కారాదర్శబిమ్బితా ।

హ్రీం‍కారకోశాసిలతా హ్రీం‍కారాస్థాననర్తకీ

॥ 55 ॥

శ్లోక 57

హ్రీం‍కారశుక్తికాముక్తామణిర్హ్రీం‍కారబోధితా ।

హ్రీం‍కారమయసౌవర్ణస్తమ్భవిద్రుమపుత్రికా

॥ 56 ॥

శ్లోక 58

హ్రీం‍కారవేదోపనిషద్ హ్రీం‍కారాధ్వరదక్షిణా ।

హ్రీం‍కారనన్దనారామనవకల్పకవల్లరీ

॥ 57 ॥

శ్లోక 59

హ్రీం‍కారహిమవద్గఙ్గా హ్రీం‍కారార్ణవకౌస్తుభా ।

హ్రీం‍కారమన్త్రసర్వస్వా హ్రీం‍కారపరసౌఖ్యదా

॥ 58 ॥

శ్లోక 60

ఉత్తరపీఠికా (ఫలశృతిః)

హయగ్రీవ ఉవాచ ।

ఇత్యేవం తే మయాఖ్యాతం దేవ్యా నామశతత్రయమ్ ।

రహస్యాతిరహస్యత్వాద్గోపనీయం త్వయా మునే

॥ 59 ॥

శ్లోక 61

శివవర్ణాని నామాని శ్రీదేవ్యా కథితాని హి ।

శక్త్యక్షరాణి నామాని కామేశకథితాని చ

॥ 1 ॥

శ్లోక 62

ఉభయాక్షరనామాని హ్యుభాభ్యాం కథితాని వై ।

తదన్యైర్గ్రథితం స్తోత్రమేతస్య సదృశం కిము

॥ 2 ॥

శ్లోక 63

నానేన సదృశం స్తోత్రం శ్రీదేవీప్రీతిదాయకమ్ ।

లోకత్రయేఽపి కల్యాణం సమ్భవేన్నాత్ర సంశయః

॥ 3 ॥

శ్లోక 64

సూత ఉవాచ ।

ఇతి హయముఖగీతం స్తోత్రరాజం నిశమ్య

ప్రగలితకలుషోఽభూచ్చిత్తపర్యాప్తిమేత్య ।

నిజగురుమథ నత్వా కుమ్భజన్మా తదుక్తం

పునరధికరహస్యం జ్ఞాతుమేవం జగాద

॥ 4 ॥

శ్లోక 65

అగస్త్య ఉవాచ ।

అశ్వానన మహాభాగ రహస్యమపి మే వద ।

శివవర్ణాని కాన్యత్ర శక్తివర్ణాని కాని హి

॥ 5 ॥

శ్లోక 66

ఉభయోరపి వర్ణాని కాని వా వద దేశిక ।

ఇతి పృష్టః కుమ్భజేన హయగ్రీవోఽవదత్పునః

॥ 6 ॥

శ్లోక 67

హయగ్రీవ ఉవాచ ।

తవ గోప్యం కిమస్తీహ సాక్షాదమ్బానుశాసనాత్ ।

ఇదం త్వతిరహస్యం తే వక్ష్యామి శృణు కుమ్భజ

॥ 7 ॥

శ్లోక 68

ఏతద్విజ్ఞానమాత్రేణ శ్రీవిద్యా సిద్ధిదా భవేత్ ।

కత్రయం హద్వయం చైవ శైవో భాగః ప్రకీర్తితః

॥ 8 ॥

శ్లోక 69

శక్త్యక్షరాణి శేషాణి హ్రీఙ్కార ఉభయాత్మకః ।

ఏవం విభాగమజ్ఞాత్వా యే విద్యాజపశాలినః

॥ 9 ॥

శ్లోక 70

న తేషాం సిద్ధిదా విద్యా కల్పకోటిశతైరపి ।

చతుర్భిః శివచక్రైశ్చ శక్తిచక్రైశ్చ పఞ్చభిః

॥ 10 ॥

శ్లోక 71

నవచక్రైశ్చ సంసిద్ధం శ్రీచక్రం శివయోర్వపుః ।

త్రికోణమష్టకోణం చ దశకోణద్వయం తథా

॥ 11 ॥

శ్లోక 72

చతుర్దశారం చైతాని శక్తిచక్రాణి పఞ్చ చ ।

బిన్దుశ్చాష్టదలం పద్మం పద్మం షోడశపత్రకమ్

॥ 12 ॥

శ్లోక 73

చతురశ్రం చ చత్వారి శివచక్రాణ్యనుక్రమాత్ ।

త్రికోణే బైన్దవం శ్లిష్టం అష్టారేఽష్టదలామ్బుజమ్

॥ 13 ॥

శ్లోక 74

దశారయోః షోడశారం భూగృహం భువనాశ్రకే ।

శైవానామపి శాక్తానాం చక్రాణాం చ పరస్పరమ్

॥ 14 ॥

శ్లోక 75

అవినాభావసమ్బన్ధం యో జానాతి స చక్రవిత్ ।

త్రికోణరూపిణీ శక్తిర్బిన్దురూపపరః శివః

॥ 15 ॥

శ్లోక 76

అవినాభావసమ్బన్ధం తస్మాద్బిన్దుత్రికోణయోః ।

ఏవం విభాగమజ్ఞాత్వా శ్రీచక్రం యః సమర్చయేత్

॥ 16 ॥

శ్లోక 77

న తత్ఫలమవాప్నోతి లలితామ్బా న తుష్యతి ।

యే చ జానన్తి లోకేఽస్మిన్ శ్రీవిద్యాచక్రవేదినః

॥ 17 ॥

శ్లోక 78

సామన్యవేదినః సర్వే విశేషజ్ఞోఽతిదుర్లభః ।

స్వయంవిద్యావిశేషజ్ఞో విశేషజ్ఞం సమర్చయేత్

॥ 18 ॥

శ్లోక 79

తస్మై దేయం తతో గ్రాహ్యమశక్తస్తస్య దాపయేత్ ।

అన్ధం తమః ప్రవిశన్తి యేఽవిద్యాం సముపాసతే

॥ 19 ॥

శ్లోక 80

ఇతి శ్రుతిరపాహైతానవిద్యోపాసకాన్పునః ।

విద్యాన్యోపాసకానేవ నిన్దత్యారుణికీ శ్రుతిః

॥ 20 ॥

శ్లోక 81

అశ్రుతా సశ్రుతాసశ్చ యజ్వానో యేఽప్యయజ్వనః ।

స్వర్యన్తో నాపేక్షన్తే ఇన్ద్రమగ్నిం చ యే విదుః

॥ 21 ॥

శ్లోక 82

సికతా ఇవ సంయన్తి రశ్మిభిః సముదీరితాః ।

అస్మాల్లోకాదముష్మాచ్చేత్యాహ చారణ్యకశ్రుతిః

॥ 22 ॥

శ్లోక 83

యస్య నో పశ్చిమం జన్మ యది వా శఙ్కరః స్వయమ్ ।

తేనైవ లభ్యతే విద్యా శ్రీమత్పఞ్చదశాక్షరీ

॥ 23 ॥

శ్లోక 84

ఇతి మన్త్రేషు బహుధా విద్యాయా మహిమోచ్యతే ।

మోక్షైకహేతువిద్యా తు శ్రీవిద్యా నాత్ర సంశయః

॥ 24 ॥

శ్లోక 85

న శిల్పాదిజ్ఞానయుక్తే విద్వచ్ఛబ్ధః ప్రయుజ్యతే ।

మోక్షైకహేతువిద్యా సా శ్రీవిద్యైవ న సంశయః

॥ 25 ॥

శ్లోక 86

తస్మాద్విద్యావిదేవాత్ర విద్వాన్విద్వానితీర్యతే ।

స్వయం విద్యావిదే దద్యాత్ఖ్యాపయేత్తద్గుణాన్సుధీః

॥ 26 ॥

శ్లోక 87

స్వయంవిద్యారహస్యజ్ఞో విద్యామాహాత్మ్యవేద్యపి ।

విద్యావిదం నార్చయేచ్చేత్కో వా తం పూజయేజ్జనః

॥ 27 ॥

శ్లోక 88

ప్రసఙ్గాదిదముక్తం తే ప్రకృతం శృణు కుమ్భజ ।

యః కీర్తయేత్సకృద్భక్త్యా దివ్యనామశతత్రయమ్

॥ 28 ॥

శ్లోక 89

తస్య పుణ్యమహం వక్ష్యే శృణు త్వం కుమ్భసమ్భవ ।

రహస్యనామసాహస్రపాఠే యత్ఫలమీరితమ్

॥ 29 ॥

శ్లోక 90

తత్ఫలం కోటిగుణితమేకనామజపాద్భవేత్ ।

కామేశ్వరీకామేశాభ్యాం కృతం నామశతత్రయమ్

॥ 30 ॥

శ్లోక 91

నాన్యేన తులయేదేతత్ స్తోత్రేణాన్యకృతేన చ ।

శ్రియః పరమ్పరా యస్య భావి వా చోత్తరోత్తరమ్

॥ 31 ॥

శ్లోక 92

తేనైవ లభ్యతే చైతత్పశ్చాచ్ఛ్రేయః పరీక్షయేత్ ।

అస్యా నామ్నాం త్రిశత్యాస్తు మహిమా కేన వర్ణ్యతే

॥ 32 ॥

శ్లోక 93

యా స్వయం శివయోర్వక్త్రపద్మాభ్యాం పరినిఃసృతా ।

నిత్యం షోడశసఙ్ఖ్యాకాన్విప్రానాదౌ తు భోజయేత్

॥ 33 ॥

శ్లోక 94

అభ్యక్తాంస్తిలతైలేన స్నాతానుష్ణేన వారిణా ।

అభ్యర్చ్య గన్ధపుష్పాద్యైః కామేశ్వర్యాదినామభిః

॥ 34 ॥

శ్లోక 95

సూపాపూపైః శర్కరాద్యైః పాయసైః ఫలసంయుతైః ।

విద్యావిదో విశేషేణ భోజయేత్షోడశ ద్విజాన్

॥ 35 ॥

శ్లోక 96

ఏవం నిత్యార్చనం కుర్యాదాదౌ బ్రాహ్మణభోజనమ్ ।

త్రిశతీనామభిః పశ్చాద్బ్రాహ్మణాన్క్రమశోఽర్చయేత్

॥ 36 ॥

శ్లోక 97

తైలాభ్యఙ్గాదికం దత్వా విభవే సతి భక్తితః ।

శుక్లప్రతిపదారభ్య పౌర్ణమాస్యవధి క్రమాత్

॥ 37 ॥

శ్లోక 98

దివసే దివసే విప్రా భోజ్యా వింశతిసఙ్ఖ్యయా ।

దశభిః పఞ్చభిర్వాపి త్రిభిరేకేన వా దినైః

॥ 38 ॥

శ్లోక 99

త్రింశత్షష్టిః శతం విప్రాః సమ్భోజ్యాస్త్రిశతం క్రమాత్ ।

ఏవం యః కురుతే భక్త్యా జన్మమధ్యే సకృన్నరః

॥ 39 ॥

శ్లోక 100

తస్యైవ సఫలం జన్మ ముక్తిస్తస్య కరే స్థిరా ।

రహస్యనామసాహస్రభోజనేఽప్యేవమేవ హి

॥ 40 ॥

శ్లోక 101

ఆదౌ నిత్యబలిం కుర్యాత్పశ్చాద్బ్రాహ్మణభోజనమ్ ।

రహస్యనామసాహస్రమహిమా యో మయోదితః

॥ 41 ॥

శ్లోక 102

స శీకరాణురత్నైకనామ్నో మహిమవారిధేః ।

వాగ్దేవీరచితే నామసాహస్రే యద్యదీరితమ్

॥ 42 ॥

శ్లోక 103

తత్ఫలం కోటిగుణితం నామ్నోఽప్యేకస్య కీర్తనాత్ ।

ఏతదన్యైర్జపైః స్తోత్రైరర్చనైర్యత్ఫలం భవేత్

॥ 43 ॥

శ్లోక 104

తత్ఫలం కోటిగుణితం భవేన్నామశతత్రయాత్ ।

వాగ్దేవీరచితే స్తోత్రే తాదృశో మహిమా యది

॥ 44 ॥

శ్లోక 105

సాక్షాత్కామేశకామేశీకృతేఽస్మిన్గృహ్యతామితి ।

సకృత్సఙ్కీర్తనాదేవ నామ్నామస్మిన్ శతత్రయే

॥ 45 ॥

శ్లోక 106

భవేచ్చిత్తస్య పర్యాప్తిర్న్యూనమన్యానపేక్షిణీ ।

న జ్ఞాతవ్యమితోఽప్యన్యత్ర జప్తవ్యం చ కుమ్భజ

॥ 46 ॥

శ్లోక 107

యద్యత్సాధ్యతమం కార్యం తత్తదర్థమిదం జపేత్ ।

తత్తత్ఫలమవాప్నోతి పశ్చాత్కార్యం పరీక్షయేత్

॥ 47 ॥

శ్లోక 108

యే యే ప్రయోగాస్తన్త్రేషు తైస్తైర్యత్సాధ్యతే ఫలమ్ ।

తత్సర్వం సిధ్యతి క్షిప్రం నామత్రిశతకీర్తనాత్

॥ 48 ॥

శ్లోక 109

ఆయుష్కరం పుష్టికరం పుత్రదం వశ్యకారకమ్ ।

విద్యాప్రదం కీర్తికరం సుకవిత్వప్రదాయకమ్

॥ 49 ॥

శ్లోక 110

సర్వసమ్పత్ప్రదం సర్వభోగదం సర్వసౌఖ్యదమ్ ।

సర్వాభీష్టప్రదం చైవ దేవ్యా నామశతత్రయమ్

॥ 50 ॥

శ్లోక 111

ఏతజ్జపపరో భూయాన్నాన్యదిచ్ఛేత్కదాచన ।

ఏతత్కీర్తనసన్తుష్టా శ్రీదేవీ లలితామ్బికా

॥ 51 ॥

శ్లోక 112

భక్తస్య యద్యదిష్టం స్యాత్తత్తత్పూరయతే ధ్రువమ్ ।

తస్మాత్కుమ్భోద్భవ మునే కీర్తయ త్వమిదం సదా

॥ 52 ॥

శ్లోక 113

నాపరం కిఞ్చిదపి తే బోద్ధవ్యమవశిష్యతే ।

ఇతి తే కథితం స్తోత్రం లలితాప్రీతిదాయకమ్

॥ 53 ॥

శ్లోక 114

నావిద్యావేదినే బ్రూయాన్నాభక్తాయ కదాచన ।

న శఠాయ న దుష్టాయ నావిశ్వాసాయ కర్హిచిత్

॥ 54 ॥

శ్లోక 115

యో బ్రూయాత్త్రిశతీం నామ్నాం తస్యానర్థో మహాన్భవేత్ ।

ఇత్యాజ్ఞా శాఙ్కరీ ప్రోక్తా తస్మాద్గోప్యమిదం త్వయా

॥ 56 ॥

శ్లోక 116

లలితాప్రేరితేనైవ మయోక్తం స్తోత్రముత్తమమ్ ।

రహస్యనామసాహస్రాదపి గోప్యమిదం మునే

॥ 57 ॥

శ్లోక 117

సూత ఉవాచ ।

ఏవముక్త్వా హయగ్రీవః కుమ్భజం తాపసోత్తమమ్ ।

స్తోత్రేణానేన లలితాం స్తుత్వా త్రిపురసున్దరీమ్ ।

ఆనన్దలహరీమగ్నమానసః సమవర్తత

॥ 58 ॥

శ్లోక 118

ఇతి బ్రహ్మాణ్డపురాణే ఉత్తరఖణ్డే హయగ్రీవాగస్త్యసంవాదే లలితోపాఖ్యానే స్తోత్రఖణ్డే శ్రీలలితాత్రిశతీస్తోత్రరత్నమ్ ।