శ్రీ దేవ్యథర్వశీర్షమ్

శ్రీ దేవ్యథర్వశీర్షమ్

శ్లోక 1

ఓం సర్వే వై దేవా దేవీముపతస్థుః కాసి త్వ-మ్మహాదేవీతి

శ్లోక 2

సా-ఽబ్రవీదహ-మ్బ్రహ్మస్వరూపిణీ ।

మత్తః ప్రకృతిపురుషాత్మక-ఞ్జగత్ ।

శూన్య-ఞ్చాశూన్య-ఞ్చ

॥ 1 ॥

శ్లోక 3

అహమానన్దానానన్దౌ ।

అహం-విఁజ్ఞానావిజ్ఞానే ।

అహ-మ్బ్రహ్మాబ్రహ్మణి వేదితవ్యే ।

అహ-మ్పఞ్చభూతాన్యపఞ్చభూతాని ।

అహమఖిల-ఞ్జగత్

॥ 2 ॥

శ్లోక 4

వేదో-ఽహమవేదో-ఽహమ్ ।

విద్యా-ఽహమవిద్యా-ఽహమ్ ।

అజా-ఽహమనజా-ఽహమ్ ।

అధశ్చోర్ధ్వ-ఞ్చ తిర్యక్చాహమ్

॥ 3 ॥

శ్లోక 5

అహం రుద్రేభిర్వసుభిశ్చరామి ।

అహమాదిత్యైరుత విశ్వదేవైః ।

అహ-మ్మిత్రావరుణావుభౌ బిభర్మి ।

అహమిన్ద్రాగ్నీ అహమశ్వినావుభౌ

॥ 4 ॥

శ్లోక 6

అహం సోమ-న్త్వష్టార-మ్పూషణ-మ్భగ-న్దధామి ।

అహం-విఁష్ణుమురుక్రమ-మ్బ్రహ్మాణముత ప్రజాపతి-న్దధామి

॥ 5 ॥

శ్లోక 7

అ॒హ-న్ద॑ధామి॒ ద్రవి॑ణం హ॒విష్మ॑తే సుప్రా॒వ్యే॒3 యజ॑మానాయ సున్వ॒తే ।

అ॒హం రాష్ట్రీ॑ స॒ఙ్గమ॑నీ॒ వసూ॑నా-ఞ్చికి॒తుషీ॑ ప్రథ॒మా య॒జ్ఞియా॑నామ్ ।

అ॒హం సు॑వే పి॒తర॑మస్య మూ॒ర్ధన్మమ॒ యోని॑ర॒ప్స్వన్త-స్స॑ము॒ద్రే ।

య ఏవం-వేఁద । స దేవీం సమ్పదమాప్నోతి

॥ 6 ॥

శ్లోక 8

తే దేవా అబ్రువన్

నమో దేవ్యై మహాదేవ్యై శివాయై సతత-న్నమః ।

నమః ప్రకృత్యై భద్రాయై నియతాః ప్రణతా-స్స్మ తామ్

॥ 7 ॥

శ్లోక 9

తామ॒గ్నివ॑ర్ణా॒-న్తప॑సా జ్వల॒న్తీం-వైఁ॑రోచ॒నీ-ఙ్క॑ర్మఫ॒లేషు॒ జుష్టా᳚మ్ ।

దు॒ర్గా-న్దే॒వీం శర॑ణ-మ్ప్రప॑ద్యామహే-ఽసురాన్నాశయిత్ర్యై తే నమః

॥ 8 ॥

శ్లోక 10

(ఋ.వే.8.100.11)

దే॒వీం-వాఁచ॑మజనయన్త దే॒వాస్తాం-విఁ॒శ్వరూ॑పాః ప॒శవో॑ వదన్తి ।

సా నో॑ మ॒న్ద్రేష॒మూర్జ॒-న్దుహా॑నా ధే॒నుర్వాగ॒స్మానుప॒ సుష్టు॒తైతు॑

॥ 9 ॥

శ్లోక 11

కాలరాత్రీ-మ్బ్రహ్మస్తుతాం-వైఁష్ణవీం స్కన్దమాతరమ్ ।

సరస్వతీమదితి-న్దక్షదుహితర-న్నమామః పావనాం శివామ్

॥ 10 ॥

శ్లోక 12

మహాలక్ష్మ్యై చ విద్మహే సర్వశక్త్యై చ ధీమహి ।

తన్నో దేవీ ప్రచోదయాత్

॥ 11 ॥

శ్లోక 13

అదితిర్​హ్యజనిష్ట దక్ష యా దుహితా తవ ।

తా-న్దేవా అన్వజాయన్త భద్రా అమృతబన్ధవః

॥ 12 ॥

శ్లోక 14

కామో యోనిః కమలా వజ్రపాణి-

ర్గుహా హసా మాతరిశ్వాభ్రమిన్ద్రః ।

పునర్గుహా సకలా మాయయా చ

పురూచ్యైషా విశ్వమాతాదివిద్యోమ్

॥ 13 ॥

శ్లోక 15

ఏషా-ఽఽత్మశక్తిః ।

ఏషా విశ్వమోహినీ ।

పాశాఙ్కుశధనుర్బాణధరా ।

ఏషా శ్రీమహావిద్యా ।

య ఏవం-వేఁద స శోక-న్తరతి

॥ 14 ॥

శ్లోక 16

నమస్తే అస్తు భగవతి మాతరస్మాన్పాహి సర్వతః

॥ 15 ॥

శ్లోక 17

సైషాష్టౌ వసవః ।

సైషైకాదశ రుద్రాః ।

సైషా ద్వాదశాదిత్యాః ।

సైషా విశ్వేదేవా-స్సోమపా అసోమపాశ్చ ।

సైషా యాతుధానా అసురా రక్షాంసి పిశాచా యక్షా సిద్ధాః ।

సైషా సత్త్వరజస్తమాంసి ।

సైషా బ్రహ్మవిష్ణురుద్రరూపిణీ ।

సైషా ప్రజాపతీన్ద్రమనవః ।

సైషా గ్రహనక్షత్రజ్యోతీంషి । కలాకాష్ఠాదికాలరూపిణీ ।

తామహ-మ్ప్రణౌమి నిత్యమ్ ।

పాపాపహారిణీ-న్దేవీ-మ్భుక్తిముక్తిప్రదాయినీమ్ ।

అనన్తాం-విఁజయాం శుద్ధాం శరణ్యాం శివదాం శివామ్

॥ 16 ॥

శ్లోక 18

వియదీకారసం​యుఁక్తం-వీఁతిహోత్రసమన్వితమ్ ।

అర్ధేన్దులసిత-న్దేవ్యా బీజం సర్వార్థసాధకమ్

॥ 17 ॥

శ్లోక 19

ఏవమేకాక్షర-మ్బ్రహ్మ యతయ-శ్శుద్ధచేతసః ।

ధ్యాయన్తి పరమానన్దమయా జ్ఞానామ్బురాశయః

॥ 18 ॥

శ్లోక 20

వాఙ్మాయా బ్రహ్మసూస్తస్మా-థ్షష్ఠం-వఁక్త్రసమన్వితమ్ ।

సూర్యో-ఽవామశ్రోత్రబిన్దుసం​యుఁక్తష్టాత్తృతీయకః ।

నారాయణేన సమ్మిశ్రో వాయుశ్చాధరయుక్తతః ।

విచ్చే నవార్ణకో-ఽర్ణ-స్స్యాన్మహదానన్దదాయకః

॥ 19 ॥

శ్లోక 21

హృత్పుణ్డరీకమధ్యస్థా-మ్ప్రాతస్సూర్యసమప్రభామ్ ।

పాశాఙ్కుశధరాం సౌమ్యాం-వఁరదాభయహస్తకామ్ ।

త్రినేత్రాం రక్తవసనా-మ్భక్తకామదుఘా-మ్భజే

॥ 20 ॥

శ్లోక 22

నమామి త్వా-మ్మహాదేవీ-మ్మహాభయవినాశినీమ్ ।

మహాదుర్గప్రశమనీ-మ్మహాకారుణ్యరూపిణీమ్

॥ 21 ॥

శ్లోక 23

యస్యా-స్స్వరూప-మ్బ్రహ్మాదయో న జానన్తి తస్మాదుచ్యతే అజ్ఞేయా ।

యస్యా అన్తో న లభ్యతే తస్మాదుచ్యతే అనన్తా ।

యస్యా లక్ష్య-న్నోపలక్ష్యతే తస్మాదుచ్యతే అలక్ష్యా ।

యస్యా జనన-న్నోపలభ్యతే తస్మాదుచ్యతే అజా ।

ఏకైవ సర్వత్ర వర్తతే తస్మాదుచ్యతే ఏకా ।

ఏకైవ విశ్వరూపిణీ తస్మాదుచ్యతే నైకా ।

అత ఏవోచ్యతే అజ్ఞేయానన్తాలక్ష్యాజైకా నైకేతి

॥ 22 ॥

శ్లోక 24

మన్త్రాణా-మ్మాతృకా దేవీ శబ్దానా-ఞ్జ్ఞానరూపిణీ ।

జ్ఞానానా-ఞ్చిన్మయాతీతా శూన్యానాం శూన్యసాక్షిణీ ।

యస్యాః పరతర-న్నాస్తి సైషా దుర్గా ప్రకీర్తితా

॥ 23 ॥

శ్లోక 25

తా-న్దుర్గా-న్దుర్గమా-న్దేవీ-న్దురాచారవిఘాతినీమ్ ।

నమామి భవభీతో-ఽహం సంసారార్ణవతారిణీమ్

॥ 24 ॥

శ్లోక 26

ఇదమథర్వశీర్​షం-యోఁ-ఽధీతే స పఞ్చాథర్వశీర్​షజపఫలమాప్నోతి ।

ఇదమథర్వశీర్​షమజ్ఞాత్వా యో-ఽర్చాం స్థాపయతి ।

శతలక్ష-మ్ప్రజప్త్వా-ఽపి సో-ఽర్చాసిద్ధి-న్న విన్దతి ।

శతమష్టోత్తర-ఞ్చాస్య పురశ్చర్యావిధి-స్స్మృతః ।

దశవార-మ్పఠేద్యస్తు సద్యః పాపైః ప్రముచ్యతే ।

మహాదుర్గాణి తరతి మహాదేవ్యాః ప్రసాదతః । 26 ॥

సాయమధీయానో దివసకృత-మ్పాప-న్నాశయతి ।

ప్రాతరధీయానో రాత్రికృత-మ్పాప-న్నాశయతి ।

సాయ-మ్ప్రాతః ప్రయుఞ్జానో అపాపో భవతి ।

నిశీథే తురీయసన్ధ్యాయా-ఞ్జప్త్వా వాక్సిద్ధిర్భవతి ।

నూతనాయా-మ్ప్రతిమాయా-ఞ్జప్త్వా దేవతాసాన్నిధ్య-మ్భవతి ।

ప్రాణప్రతిష్ఠాయా-ఞ్జప్త్వా ప్రాణానా-మ్ప్రతిష్ఠా భవతి ।

భౌమాశ్విన్యా-మ్మహాదేవీసన్నిధౌ జప్త్వా మహామృత్యు-న్తరతి ।

స మహామృత్యు-న్తరతి ।

య ఏవం-వేఁద ।

ఇత్యుపనిషత్

॥ 25 ॥

శ్లోక 27

ఇతి దేవ్యథర్వశీర్​షమ్ ।