Sankshepa Ramayanam

সঙ্ক্ষেপ রামাযণম্

শ্লোক 1

শ্রীমদ্বাল্মীকীয রামাযণে বালকাণ্ডম্ ।

অথ প্রথমস্সর্গঃ ।

তপস্স্বাধ্যাযনিরতং তপস্বী বাগ্বিদাং বরম্ ।

নারদং পরিপপ্রচ্ছ বাল্মীকির্মুনিপুঙ্গবম্

শ্লোক 2

কোঽন্বস্মিন্সাম্প্রতং লোকে গুণবান্ কশ্চ বীর্যবান্ ।

ধর্মজ্ঞশ্চ কৃতজ্ঞশ্চ সত্যবাক্যো দৃঢব্রতঃ

॥ 1 ॥

শ্লোক 3

চারিত্রেণ চ কো যুক্তঃ সর্বভূতেষু কো হিতঃ ।

বিদ্বান্ কঃ কঃ সমর্থশ্চ কশ্চৈকপ্রিযদর্শনঃ

॥ 2 ॥

শ্লোক 4

আত্মবান্ কো জিতক্রোধো দ্যুতিমান্ কোঽনসূযকঃ ।

কস্য বিভ্যতি দেবাশ্চ জাতরোষস্য সংযুগে

॥ 3 ॥

শ্লোক 5

এতদিচ্ছাম্যহং শ্রোতুং পরং কৌতূহলং হি মে ।

মহর্ষে ত্বং সমর্থোঽসি জ্ঞাতুমেবংবিধং নরম্

॥ 4 ॥

শ্লোক 6

শ্রুত্বা চৈতত্ত্রিলোকজ্ঞো বাল্মীকের্নারদো বচঃ ।

শ্রূযতামিতি চামন্ত্র্য প্রহৃষ্টো বাক্যমব্রবীত্

॥ 5 ॥

শ্লোক 7

বহবো দুর্লভাশ্চৈব যে ত্বযা কীর্তিতা গুণাঃ ।

মুনে বক্ষ্যাম্যহং বুদ্ধ্বা তৈর্যুক্তঃ শ্রূযতাং নরঃ

॥ 6 ॥

শ্লোক 8

ইক্ষ্বাকুবংশপ্রভবো রামো নাম জনৈঃ শ্রুতঃ ।

নিযতাত্মা মহাবীর্যো দ্যুতিমান্ ধৃতিমান্ বশী

॥ 7 ॥

শ্লোক 9

বুদ্ধিমান্ নীতিমান্ বাগ্মী শ্রীমান্ শত্রুনিবর্হণঃ ।

বিপুলাংসো মহাবাহুঃ কম্বুগ্রীবো মহাহনুঃ

॥ 8 ॥

শ্লোক 10

মহোরস্কো মহেষ্বাসো গূঢজত্রুররিন্দমঃ ।

আজানুবাহুঃ সুশিরাঃ সুললাটঃ সুবিক্রমঃ

॥ 9 ॥

শ্লোক 11

সমঃ সমবিভক্তাঙ্গঃ স্নিগ্ধবর্ণঃ প্রতাপবান্ ।

পীনবক্ষা বিশালাক্ষো লক্ষ্মীবান্ শুভলক্ষণঃ

॥ 10 ॥

শ্লোক 12

ধর্মজ্ঞঃ সত্যসন্ধশ্চ প্রজানাং চ হিতে রতঃ ।

যশস্বী জ্ঞানসম্পন্নঃ শুচির্বশ্যঃ সমাধিমান্

॥ 11 ॥

শ্লোক 13

প্রজাপতিসমঃ শ্রীমান্ ধাতা রিপুনিষূদনঃ ।

রক্ষিতা জীবলোকস্য ধর্মস্য পরিরক্ষিতা

॥ 12 ॥

শ্লোক 14

রক্ষিতা স্বস্য ধর্মস্য স্বজনস্য চ রক্ষিতা ।

বেদবেদাঙ্গতত্ত্বজ্ঞো ধনুর্বেদে চ নিষ্ঠিতঃ

॥ 13 ॥

শ্লোক 15

সর্বশাস্ত্রার্থতত্ত্বজ্ঞো স্মৃতিমান্প্রতিভানবান্ ।

সর্বলোকপ্রিযঃ সাধুরদীনাত্মা বিচক্ষণঃ

॥ 14 ॥

শ্লোক 16

সর্বদাভিগতঃ সদ্ভিঃ সমুদ্র ইব সিন্ধুভিঃ ।

আর্যঃ সর্বসমশ্চৈব সদৈকপ্রিযদর্শনঃ

॥ 15 ॥

শ্লোক 17

স চ সর্বগুণোপেতঃ কৌসল্যানন্দবর্ধনঃ ।

সমুদ্র ইব গাম্ভীর্যে ধৈর্যেণ হিমবানিব

॥ 16 ॥

শ্লোক 18

বিষ্ণুনা সদৃশো বীর্যে সোমবত্প্রিযদর্শনঃ ।

কালাগ্নিসদৃশঃ ক্রোধে ক্ষমযা পৃথিবীসমঃ

॥ 17 ॥

শ্লোক 19

ধনদেন সমস্ত্যাগে সত্যে ধর্ম ইবাপরঃ ।

তমেবং গুণসম্পন্নং রামং সত্যপরাক্রমম্

॥ 18 ॥

শ্লোক 20

জ্যেষ্ঠং শ্রেষ্ঠগুণৈর্যুক্তং প্রিযং দশরথঃ সুতম্ ।

প্রকৃতীনাং হিতৈর্যুক্তং প্রকৃতি প্রিয কাম্যযা

॥ 19 ॥

শ্লোক 21

যৌবরাজ্যেন সংযোক্তুমৈচ্ছত্প্রীত্যা মহীপতিঃ ।

তস্যাভিষেকসম্ভারান্ দৃষ্ট্বা ভার্যাঽথ কৈকযী

॥ 20 ॥

শ্লোক 22

পূর্বং দত্তবরা দেবী বরমেনমযাচত ।

বিবাসনং চ রামস্য ভরতস্যাভিষেচনম্

॥ 21 ॥

শ্লোক 23

স সত্যবচনাদ্রাজা ধর্মপাশেন সংযতঃ ।

বিবাসযামাস সুতং রামং দশরথঃ প্রিযম্

॥ 22 ॥

শ্লোক 24

স জগাম বনং বীরঃ প্রতিজ্ঞামনুপালযন্ ।

পিতুর্বচননির্দেশাত্কৈকেয্যাঃ প্রিযকারণাত্

॥ 23 ॥

শ্লোক 25

তং ব্রজন্তং প্রিযো ভ্রাতা লক্ষ্মণোঽনুজগাম হ ।

স্নেহাদ্বিনযসম্পন্নঃ সুমিত্রানন্দবর্ধনঃ

॥ 24 ॥

শ্লোক 26

ভ্রাতরং দযিতো ভ্রাতুঃ সৌভ্রাত্রমনুদর্শযন্ ।

রামস্য দযিতা ভার্যা নিত্যং প্রাণসমাহিতা

॥ 25 ॥

শ্লোক 27

জনকস্য কুলে জাতা দেবমাযেব নির্মিতা ।

সর্বলক্ষণসম্পন্না নারীণামুত্তমা বধূঃ

॥ 26 ॥

শ্লোক 28

সীতাঽপ্যনুগতা রামং শশিনং রোহিণী যথা ।

পৌরৈরনুগতো দূরং পিত্রা দশরথেন চ

॥ 27 ॥

শ্লোক 29

শৃঙ্গিবেরপুরে সূতং গঙ্গাকূলে ব্যসর্জযত্ ।

গুহমাসাদ্য ধর্মাত্মা নিষাদাধিপতিং প্রিযম্

॥ 28 ॥

শ্লোক 30

গুহেন সহিতো রামঃ লক্ষ্মণেন চ সীতযা ।

তে বনেন বনং গত্বা নদীস্তীর্ত্বা বহূদকাঃ

॥ 29 ॥

শ্লোক 31

চিত্রকূটমনুপ্রাপ্য ভরদ্বাজস্য শাসনাত্ ।

রম্যমাবসথং কৃত্বা রমমাণা বনে ত্রযঃ

॥ 30 ॥

শ্লোক 32

দেবগন্ধর্বসঙ্কাশাস্তত্র তে ন্যবসন্সুখম্ ।

চিত্রকূটং গতে রামে পুত্রশোকাতুরস্তথা

॥ 31 ॥

শ্লোক 33

রাজা দশরথঃ স্বর্গং জগাম বিলপন্সুতম্ ।

মৃতে তু তস্মিন্ভরতো বসিষ্ঠপ্রমুখৈর্দ্বিজৈঃ

॥ 32 ॥

শ্লোক 34

নিযুজ্যমানো রাজ্যায নৈচ্ছদ্রাজ্যং মহাবলঃ ।

স জগাম বনং বীরো রামপাদপ্রসাদকঃ

॥ 33 ॥

শ্লোক 35

গত্বা তু স মহাত্মানং রামং সত্যপরাক্রমম্ ।

অযাচদ্ভ্রাতরং রামং আর্যভাবপুরস্কৃতঃ

॥ 34 ॥

শ্লোক 36

ত্বমেব রাজা ধর্মজ্ঞ ইতি রামং বচোঽব্রবীত্ ।

রামোঽপি পরমোদারঃ সুমুখস্সুমহাযশাঃ

॥ 35 ॥

শ্লোক 37

ন চৈচ্ছত্পিতুরাদেশাদ্রাজ্যং রামো মহাবলঃ ।

পাদুকে চাস্য রাজ্যায ন্যাসং দত্ত্বা পুনঃ পুনঃ

॥ 36 ॥

শ্লোক 38

নিবর্তযামাস ততো ভরতং ভরতাগ্রজঃ ।

স কামমনবাপ্যৈব রামপাদাবুপস্পৃশন্

॥ 37 ॥

শ্লোক 39

নন্দিগ্রামেঽকরোদ্রাজ্যং রামাগমনকাঙ্ক্ষযা ।

গতে তু ভরতে শ্রীমান্ সত্যসন্ধো জিতেন্দ্রিযঃ

॥ 38 ॥

শ্লোক 40

রামস্তু পুনরালক্ষ্য নাগরস্য জনস্য চ ।

তত্রাগমনমেকাগ্রো দণ্ডকান্প্রবিবেশ হ

॥ 39 ॥

শ্লোক 41

প্রবিশ্য তু মহারণ্যং রামো রাজীবলোচনঃ ।

বিরাধং রাক্ষসং হত্বা শরভঙ্গং দদর্শ হ

॥ 40 ॥

শ্লোক 42

সুতীক্ষ্ণং চাপ্যগস্ত্যং চ অগস্ত্যভ্রাতরং তথা ।

অগস্ত্যবচনাচ্চৈব জগ্রাহৈন্দ্রং শরাসনম্

॥ 41 ॥

শ্লোক 43

খড্গং চ পরমপ্রীতস্তূণী চাক্ষযসাযকৌ ।

বসতস্তস্য রামস্য বনে বনচরৈঃ সহ

॥ 42 ॥

শ্লোক 44

ঋষযোঽভ্যাগমন্সর্বে বধাযাসুররক্ষসাম্ ।

স তেষাং প্রতিশুশ্রাব রাক্ষসানাং তথা বনে

॥ 43 ॥

শ্লোক 45

প্রতিজ্ঞাতশ্চ রামেণ বধঃ সংযতি রক্ষসাম্ ।

ঋষীণামগ্নিকল্পানাং দণ্ডকারণ্যবাসিনাম্

॥ 44 ॥

শ্লোক 46

তেন তত্রৈব বসতা জনস্থাননিবাসিনী ।

বিরূপিতা শূর্পণখা রাক্ষসী কামরূপিণী

॥ 45 ॥

শ্লোক 47

ততঃ শূর্পণখাবাক্যাদুদ্যুক্তান্সর্বরাক্ষসান্ ।

খরং ত্রিশিরসং চৈব দূষণং চৈব রাক্ষসম্

॥ 46 ॥

শ্লোক 48

নিজঘান রণে রামস্তেষাং চৈব পদানুগান্ ।

বনে তস্মিন্নিবসতা জনস্থাননিবাসিনাম্

॥ 47 ॥

শ্লোক 49

রক্ষসাং নিহতান্যাসন্সহস্রাণি চতুর্দশ ।

ততো জ্ঞাতিবধং শ্রুত্বা রাবণঃ ক্রোধমূর্ছিতঃ

॥ 48 ॥

শ্লোক 50

সহাযং বরযামাস মারীচং নাম রাক্ষসম্ ।

বার্যমাণঃ সুবহুশো মারীচেন স রাবণঃ

॥ 49 ॥

শ্লোক 51

ন বিরোধো বলবতা ক্ষমো রাবণ তেন তে ।

অনাদৃত্য তু তদ্বাক্যং রাবণঃ কালচোদিতঃ

॥ 50 ॥

শ্লোক 52

জগাম সহমারীচঃ তস্যাশ্রমপদং তদা ।

তেন মাযাবিনা দূরমপবাহ্য নৃপাত্মজৌ

॥ 51 ॥

শ্লোক 53

জহার ভার্যাং রামস্য গৃধ্রং হত্বা জটাযুষম্ ।

গৃধ্রং চ নিহতং দৃষ্ট্বা হৃতাং শ্রুত্বা চ মৈথিলীম্

॥ 52 ॥

শ্লোক 54

রাঘবঃ শোকসন্তপ্তো বিললাপাকুলেন্দ্রিযঃ ।

ততস্তেনৈব শোকেন গৃধ্রং দগ্ধ্বা জটাযুষম্

॥ 53 ॥

শ্লোক 55

মার্গমাণো বনে সীতাং রাক্ষসং সন্দদর্শ হ ।

কবন্ধং নাম রূপেণ বিকৃতং ঘোরদর্শনম্

॥ 54 ॥

শ্লোক 56

তং নিহত্য মহাবাহুঃ দদাহ স্বর্গতশ্চ সঃ ।

স চাস্য কথযামাস শবরীং ধর্মচারিণীম্

॥ 55 ॥

শ্লোক 57

শ্রমণীং ধর্মনিপুণামভিগচ্ছেতি রাঘবম্ ।

সোঽভ্যগচ্ছন্মহাতেজাঃ শবরীং শত্রুসূদনঃ

॥ 56 ॥

শ্লোক 58

শবর্যা পূজিতঃ সম্যগ্রামো দশরথাত্মজঃ ।

পম্পাতীরে হনুমতা সঙ্গতো বানরেণ হ

॥ 57 ॥

শ্লোক 59

হনুমদ্বচনাচ্চৈব সুগ্রীবেণ সমাগতঃ ।

সুগ্রীবায চ তত্সর্বং শংসদ্রামো মহাবলঃ

॥ 58 ॥

শ্লোক 60

আদিতস্তদ্যথাবৃত্তং সীতযাশ্চ বিশেষতঃ ।

সুগ্রীবশ্চাপি তত্সর্বং শ্রুত্বা রামস্য বানরঃ

॥ 59 ॥

শ্লোক 61

চকার সখ্যং রামেণ প্রীতশ্চৈবাগ্নিসাক্ষিকম্ ।

ততো বানররাজেন বৈরানুকথনং প্রতি

॥ 60 ॥

শ্লোক 62

রামাযাবেদিতং সর্বং প্রণযাদ্দুঃখিতেন চ ।

প্রতিজ্ঞাতং চ রামেণ তদা বালিবধং প্রতি

॥ 61 ॥

শ্লোক 63

বালিনশ্চ বলং তত্র কথযামাস বানরঃ ।

সুগ্রীবঃ শঙ্কিতশ্চাসীন্নিত্যং বীর্যেণ রাঘবে

॥ 62 ॥

শ্লোক 64

রাঘবঃ প্রত্যযার্থং তু দুন্দুভেঃ কাযমুত্তমম্ ।

দর্শযামাস সুগ্রীবো মহাপর্বত সন্নিভম্

॥ 63 ॥

শ্লোক 65

উত্স্মযিত্বা মহাবাহুঃ প্রেক্ষ্য চাস্থি মহাবলঃ ।

পাদাঙ্গুষ্ঠেন চিক্ষেপ সম্পূর্ণং দশযোজনম্

॥ 64 ॥

শ্লোক 66

বিভেদ চ পুনঃ সালান্সপ্তৈকেন মহেষুণা ।

গিরিং রসাতলং চৈব জনযন্ প্রত্যযং তদা

॥ 65 ॥

শ্লোক 67

ততঃ প্রীতমনাস্তেন বিশ্বস্তঃ স মহাকপিঃ ।

কিষ্কিন্ধাং রামসহিতো জগাম চ গুহাং তদা

॥ 66 ॥

শ্লোক 68

ততোঽগর্জদ্ধরিবরঃ সুগ্রীবো হেমপিঙ্গলঃ ।

তেন নাদেন মহতা নির্জগাম হরীশ্বরঃ

॥ 67 ॥

শ্লোক 69

অনুমান্য তদা তারাং সুগ্রীবেণ সমাগতঃ ।

নিজঘান চ তত্রৈনং শরেণৈকেন রাঘবঃ

॥ 68 ॥

শ্লোক 70

ততঃ সুগ্রীববচনাদ্ধত্বা বালিনমাহবে ।

সুগ্রীবমেব তদ্রাজ্যে রাঘবঃ প্রত্যপাদযত্

॥ 69 ॥

শ্লোক 71

স চ সর্বান্সমানীয বানরান্বানরর্ষভঃ ।

দিশঃ প্রস্থাপযামাস দিদৃক্ষুর্জনকাত্মজাম্

॥ 70 ॥

শ্লোক 72

ততো গৃধ্রস্য বচনাত্সম্পাতের্হনুমান্বলী ।

শতযোজনবিস্তীর্ণং পুপ্লুবে লবণার্ণবম্

॥ 71 ॥

শ্লোক 73

তত্র লঙ্কাং সমাসাদ্য পুরীং রাবণপালিতাম্ ।

দদর্শ সীতাং ধ্যাযন্তীং অশোকবনিকাং গতাম্

॥ 72 ॥

শ্লোক 74

নিবেদযিত্বাঽভিজ্ঞানং প্রবৃত্তিং চ নিবেদ্য চ ।

সমাশ্বাস্য চ বৈদেহীং মর্দযামাস তোরণম্

॥ 73 ॥

শ্লোক 75

পঞ্চ সেনাগ্রগান্হত্বা সপ্ত মন্ত্রিসুতানপি ।

শূরমক্ষং চ নিষ্পিষ্য গ্রহণং সমুপাগমত্

॥ 74 ॥

শ্লোক 76

অস্ত্রেণোন্মুক্তমাত্মানং জ্ঞাত্বা পৈতামহাদ্বরাত্ ।

মর্ষযন্রাক্ষসান্বীরো যন্ত্রিণস্তান্যদৃচ্ছযা

॥ 75 ॥

শ্লোক 77

ততো দগ্ধ্বা পুরীং লঙ্কাং ঋতে সীতাং চ মৈথিলীম্ ।

রামায প্রিযমাখ্যাতুং পুনরাযান্মহাকপিঃ

॥ 76 ॥

শ্লোক 78

সোঽভিগম্য মহাত্মানং কৃত্বা রামং প্রদক্ষিণম্ ।

ন্যবেদযদমেযাত্মা দৃষ্টা সীতেতি তত্ত্বতঃ

॥ 77 ॥

শ্লোক 79

ততঃ সুগ্রীবসহিতো গত্বা তীরং মহোদধেঃ ।

সমুদ্রং ক্ষোভযামাস শরৈরাদিত্যসন্নিভৈঃ

॥ 78 ॥

শ্লোক 80

দর্শযামাস চাত্মানং সমুদ্রঃ সরিতাং পতিঃ ।

সমুদ্রবচনাচ্চৈব নলং সেতুমকারযত্

॥ 79 ॥

শ্লোক 81

তেন গত্বা পুরীং লঙ্কাং হত্বা রাবণমাহবে ।

রামঃ সীতামনুপ্রাপ্য পরাং ব্রীডামুপাগমত্

॥ 80 ॥

শ্লোক 82

তামুবাচ ততো রামঃ পরুষং জনসংসদি ।

অমৃষ্যমাণা সা সীতা বিবেশ জ্বলনং সতী

॥ 81 ॥

শ্লোক 83

ততোঽগ্নিবচনাত্সীতাং জ্ঞাত্বা বিগতকল্মষাম্ ।

বভৌ রামঃ সম্প্রহৃষ্টঃ পূজিতঃ সর্বদৈবতৈঃ

॥ 82 ॥

শ্লোক 84

কর্মণা তেন মহতা ত্রৈলোক্যং সচরাচরম্ ।

সদেবর্ষিগণং তুষ্টং রাঘবস্য মহাত্মনঃ

॥ 83 ॥

শ্লোক 85

অভিষিচ্য চ লঙ্কাযাং রাক্ষসেন্দ্রং বিভীষণম্ ।

কৃতকৃত্যস্তদা রামো বিজ্বরঃ প্রমুমোদ হ

॥ 84 ॥

শ্লোক 86

দেবতাভ্যো বরং প্রাপ্য সমুত্থাপ্য চ বানরান্ ।

অযোধ্যাং প্রস্থিতো রামঃ পুষ্পকেণ সুহৃদ্বৃতঃ

॥ 85 ॥

শ্লোক 87

ভরদ্বাজাশ্রমং গত্বা রামঃ সত্যপরাক্রমঃ ।

ভরতস্যান্তিকং রামো হনূমন্তং ব্যসর্জযত্

॥ 86 ॥

শ্লোক 88

পুনরাখ্যাযিকাং জল্পন্সুগ্রীবসহিতশ্চ সঃ ।

পুষ্পকং তত্সমারুহ্য নন্দিগ্রামং যযৌ তদা

॥ 87 ॥

শ্লোক 89

নন্দিগ্রামে জটাং হিত্বা ভ্রাতৃভিঃ সহিতোঽনঘঃ ।

রামঃ সীতামনুপ্রাপ্য রাজ্যং পুনরবাপ্তবান্

॥ 88 ॥

শ্লোক 90

প্রহৃষ্টমুদিতো লোকস্তুষ্টঃ পুষ্টঃ সুধার্মিকঃ ।

নিরামযো হ্যরোগশ্চ দুর্ভিক্ষ ভযবর্জিতঃ

॥ 89 ॥

শ্লোক 91

ন পুত্রমরণং কিঞ্চিদ্দ্রক্ষ্যন্তি পুরুষাঃ ক্বচিত্ ।

নার্যশ্চাবিধবা নিত্যং ভবিষ্যন্তি পতিব্রতাঃ

॥ 90 ॥

শ্লোক 92

ন চাগ্নিজং ভযং কিঞ্চিন্নাপ্সু মজ্জন্তি জন্তবঃ ।

ন বাতজং ভযং কিঞ্চিন্নাপি জ্বরকৃতং তথা

॥ 91 ॥

শ্লোক 93

ন চাপি ক্ষুদ্ভযং তত্র ন তস্করভযং তথা ।

নগরাণি চ রাষ্ট্রাণি ধনধান্যযুতানি চ

॥ 92 ॥

শ্লোক 94

নিত্যং প্রমুদিতাঃ সর্বে যথা কৃতযুগে তথা ।

অশ্বমেধশতৈরিষ্ট্বা তথা বহুসুবর্ণকৈঃ

॥ 93 ॥

শ্লোক 95

গবাং কোট্যযুতং দত্বা ব্রহ্মলোকং প্রযাস্যতি ।

অসঙ্খ্যেযং ধনং দত্বা ব্রাহ্মণেভ্যো মহাযশাঃ

॥ 94 ॥

শ্লোক 96

রাজবংশান্ শতগুণান্ স্থাপযিষ্যতি রাঘবঃ ।

চাতুর্বর্ণ্যং চ লোকেঽস্মিন্ স্বে স্বে ধর্মে নিযোক্ষ্যতি

॥ 95 ॥

শ্লোক 97

দশবর্ষসহস্রাণি দশবর্ষশতানি চ ।

রামো রাজ্যমুপাসিত্বা ব্রহ্মলোকং গমিষ্যতি

॥ 96 ॥

শ্লোক 98

ইদং পবিত্রং পাপঘ্নং পুণ্যং বেদৈশ্চ সম্মিতম্ ।

যঃ পঠেদ্রামচরিতং সর্বপাপৈঃ প্রমুচ্যতে

॥ 97 ॥

শ্লোক 99

এতদাখ্যানমাযুষ্যং পঠন্রামাযণং নরঃ ।

সপুত্রপৌত্রঃ সগণঃ প্রেত্য স্বর্গে মহীযতে

॥ 98 ॥

শ্লোক 100

পঠন্ দ্বিজো বাগৃষভত্বমীযাত্

স্যাত্ ক্ষত্রিযো ভূমিপতিত্বমীযাত্ ।

বণিগ্জনঃ পণ্যফলত্বমীযাত্

জনশ্চ শূদ্রোঽপি মহত্ত্বমীযাত্

॥ 99 ॥

শ্লোক 101

ইত্যার্ষে শ্রীমদ্রামাযণে বাল্মীকীযে আদিকাব্যে বালকাণ্ডে নারদবাক্যং নাম প্রথমঃ সর্গঃ ॥