പിതൃ സ്തോത്രം (ഗരുഡ പുരാണമ്)

പിതൃ സ്തോത്രം (ഗരുഡ പുരാണമ്)

ശ്ലോക 1

രുചിരുവാച ।

നമസ്യേഽഹം പിതൄന് ഭക്ത്യാ യേ വസന്ത്യധിദേവതാഃ ।

ദേവൈരപി ഹി തര്പ്യന്തേ യേ ശ്രാദ്ധേഷു സ്വധോത്തരൈഃ

ശ്ലോക 2

നമസ്യേഽഹം പിതൄന് സ്വര്ഗേ യേ തര്പ്യന്തേ മഹര്ഷിഭിഃ ।

ശ്രാദ്ധൈര്മനോമയൈര്ഭക്ത്യാ ഭുക്തിമുക്തിമഭീപ്സുഭിഃ

॥ 1 ॥

ശ്ലോക 3

നമസ്യേഽഹം പിതൄന് സ്വര്ഗേ സിദ്ധാഃ സന്തര്പയന്തി യാന് ।

ശ്രാദ്ധേഷു ദിവ്യൈഃ സകലൈരുപഹാരൈരനുത്തമൈഃ

॥ 2 ॥

ശ്ലോക 4

നമസ്യേഽഹം പിതൄന് ഭക്ത്യാ യേഽര്ച്യന്തേ ഗുഹ്യകൈര്ദിവി ।

തന്മയത്വേന വാഞ്ഛദ്ഭിരൃദ്ധിര്യാത്യന്തികീം പരാമ്

॥ 3 ॥

ശ്ലോക 5

നമസ്യേഽഹം പിതൄന് മര്ത്യൈരര്ച്യന്തേ ഭുവി യേ സദാ ।

ശ്രാദ്ധേഷു ശ്രദ്ധയാഭീഷ്ടലോകപുഷ്ടിപ്രദായിനഃ

॥ 4 ॥

ശ്ലോക 6

നമസ്യേഽഹം പിതൄന് വിപ്രൈരര്ച്യന്തേ ഭുവി യേ സദാ ।

വാഞ്ഛിതാഭീഷ്ടലാഭായ പ്രാജാപത്യപ്രദായിനഃ

॥ 5 ॥

ശ്ലോക 7

നമസ്യേഽഹം പിതൄന് യേ വൈ തര്പ്യന്തേഽരണ്യവാസിഭിഃ ।

വന്യൈഃ ശ്രാദ്ധൈര്യതാഹാരൈസ്തപോനിര്ധൂതകല്മഷൈഃ

॥ 6 ॥

ശ്ലോക 8

നമസ്യേഽഹം പിതൄന് വിപ്രൈര്നൈഷ്ഠികൈര്ധര്മചാരിഭിഃ ।

യേ സംയതാത്മഭിര്നിത്യം സന്തര്പ്യന്തേ സമാധിഭിഃ

॥ 7 ॥

ശ്ലോക 9

നമസ്യേഽഹം പിതൄന് ശ്രാദ്ധൈ രാജന്യാസ്തര്പയന്തി യാന് ।

കവ്യൈരശേഷൈര്വിധിവല്ലോകദ്വയഫലപ്രദാന്

॥ 8 ॥

ശ്ലോക 10

നമസ്യേഽഹം പിതൄന് വൈശ്യൈരര്ച്യന്തേ ഭുവി യേ സദാ ।

സ്വകര്മാഭിരതൈര്നിത്യം പുഷ്പധൂപാന്നവാരിഭിഃ

॥ 9 ॥

ശ്ലോക 11

നമസ്യേഽഹം പിതൄന് ശ്രാദ്ധേ ശൂദ്രൈരപി ച ഭക്തിതഃ ।

സന്തര്പ്യന്തേ ജഗത്കൃത്സ്നം നാമ്നാ ഖ്യാതാഃ സുകാലിനഃ

॥ 10 ॥

ശ്ലോക 12

നമസ്യേഽഹം പിതൄന് ശ്രാദ്ധേ പാതാലേ യേ മഹാസുരൈഃ ।

സന്തര്പ്യന്തേ സുധാഹാരാസ്ത്യക്തദമ്ഭമദൈഃ സദാ

॥ 11 ॥

ശ്ലോക 13

നമസ്യേഽഹം പിതൄന് ശ്രാദ്ധൈരര്ച്യന്തേ യേ രസാതലേ ।

ഭോഗൈരശേഷൈര്വിധിവന്നാഗൈഃ കാമാനഭീപ്സുഭിഃ

॥ 12 ॥

ശ്ലോക 14

നമസ്യേഽഹം പിതൄന് ശ്രാദ്ധൈഃ സര്പൈഃ സന്തര്പിതാന്സദാ ।

തത്രൈവ വിധിവന്മന്ത്രഭോഗസമ്പത്സമന്വിതൈഃ

॥ 13 ॥

ശ്ലോക 15

പിതൄന്നമസ്യേ നിവസന്തി സാക്ഷാ-

-ദ്യേ ദേവലോകേഽഥ മഹീതലേ വാ ।

തഥാഽന്തരിക്ഷേ ച സുരാരിപൂജ്യാ-

-സ്തേ മേ പ്രതീച്ഛന്തു മനോപനീതമ്

॥ 14 ॥

ശ്ലോക 16

പിതൄന്നമസ്യേ പരമാര്ഥഭൂതാ

യേ വൈ വിമാനേ നിവസന്ത്യമൂര്താഃ ।

യജന്തി യാനസ്തമലൈര്മനോഭി-

-ര്യോഗീശ്വരാഃ ക്ലേശവിമുക്തിഹേതൂന്

॥ 15 ॥

ശ്ലോക 17

പിതൄന്നമസ്യേ ദിവി യേ ച മൂര്താഃ

സ്വധാഭുജഃ കാമ്യഫലാഭിസന്ധൌ ।

പ്രദാനശക്താഃ സകലേപ്സിതാനാം

വിമുക്തിദാ യേഽനഭിസംഹിതേഷു

॥ 16 ॥

ശ്ലോക 18

തൃപ്യന്തു തേഽസ്മിന്പിതരഃ സമസ്താ

ഇച്ഛാവതാം യേ പ്രദിശന്തി കാമാന് ।

സുരത്വമിന്ദ്രത്വമിതോഽധികം വാ

ഗജാശ്വരത്നാനി മഹാഗൃഹാണി

॥ 17 ॥

ശ്ലോക 19

സോമസ്യ യേ രശ്മിഷു യേഽര്കബിമ്ബേ

ശുക്ലേ വിമാനേ ച സദാ വസന്തി ।

തൃപ്യന്തു തേഽസ്മിന്പിതരോഽന്നതോയൈ-

-ര്ഗന്ധാദിനാ പുഷ്ടിമിതോ വ്രജന്തു

॥ 18 ॥

ശ്ലോക 20

യേഷാം ഹുതേഽഗ്നൌ ഹവിഷാ ച തൃപ്തി-

-ര്യേ ഭുഞ്ജതേ വിപ്രശരീരസംസ്ഥാഃ ।

യേ പിണ്ഡദാനേന മുദം പ്രയാന്തി

തൃപ്യന്തു തേഽസ്മിന്പിതരോഽന്നതോയൈഃ

॥ 19 ॥

ശ്ലോക 21

യേ ഖഡ്ഗമാംസേന സുരൈരഭീഷ്ടൈഃ

കൃഷ്ണൈസ്തിലൈര്ദിവ്യ മനോഹരൈശ്ച ।

കാലേന ശാകേന മഹര്ഷിവര്യൈഃ

സമ്പ്രീണിതാസ്തേ മുദമത്ര യാന്തു

॥ 20 ॥

ശ്ലോക 22

കവ്യാന്യശേഷാണി ച യാന്യഭീഷ്ടാ-

-ന്യതീവ തേഷാം മമ പൂജിതാനാമ് ।

തേഷാഞ്ച സാന്നിധ്യമിഹാസ്തു പുഷ്പ-

-ഗന്ധാമ്ബുഭോജ്യേഷു മയാ കൃതേഷു

॥ 21 ॥

ശ്ലോക 23

ദിനേ ദിനേ യേ പ്രതിഗൃഹ്ണതേഽര്ചാം

മാസാന്തപൂജ്യാ ഭുവി യേഽഷ്ടകാസു ।

യേ വത്സരാന്തേഽഭ്യുദയേ ച പൂജ്യാഃ

പ്രയാന്തു തേ മേ പിതരോഽത്ര തുഷ്ടിമ്

॥ 22 ॥

ശ്ലോക 24

പൂജ്യാ ദ്വിജാനാം കുമുദേന്ദുഭാസോ

യേ ക്ഷത്രിയാണാം ജ്വലനാര്കവര്ണാഃ ।

തഥാ വിശാം യേ കനകാവദാതാ

നീലീപ്രഭാഃ ശൂദ്രജനസ്യ യേ ച

॥ 23 ॥

ശ്ലോക 25

തേഽസ്മിന്സമസ്താ മമ പുഷ്പഗന്ധ-

-ധൂപാമ്ബുഭോജ്യാദിനിവേദനേന ।

തഥാഽഗ്നിഹോമേന ച യാന്തി തൃപ്തിം

സദാ പിതൃഭ്യഃ പ്രണതോഽസ്മി തേഭ്യഃ

॥ 24 ॥

ശ്ലോക 26

യേ ദേവപൂര്വാണ്യഭിതൃപ്തിഹേതോ-

-രശ്നന്തി കവ്യാനി ശുഭാഹൃതാനി ।

തൃപ്താശ്ച യേ ഭൂതിസൃജോ ഭവന്തി

തൃപ്യന്തു തേഽസ്മിന്പ്രണതോഽസ്മി തേഭ്യഃ

॥ 25 ॥

ശ്ലോക 27

രക്ഷാംസി ഭൂതാന്യസുരാംസ്തഥോഗ്രാ-

-ന്നിര്നാശയന്തു ത്വശിവം പ്രജാനാമ് ।

ആദ്യാഃ സുരാണാമമരേശപൂജ്യാ-

-സ്തൃപ്യന്തു തേഽസ്മിന്പ്രണതോഽസ്മിതേഭ്യഃ

॥ 26 ॥

ശ്ലോക 28

അഗ്നിസ്വാത്താ ബര്ഹിഷദ ആജ്യപാഃ സോമപാസ്തഥാ ।

വ്രജന്തു തൃപ്തിം ശ്രാദ്ധേഽസ്മിന്പിതരസ്തര്പിതാ മയാ

॥ 27 ॥

ശ്ലോക 29

അഗ്നിസ്വാത്താഃ പിതൃഗണാഃ പ്രാചീം രക്ഷന്തു മേ ദിശമ് ।

തഥാ ബര്ഹിഷദഃ പാന്തു യാമ്യാം മേ പിതരഃ സദാ ।

പ്രതീചീമാജ്യപാസ്തദ്വദുദീചീമപി സോമപാഃ

॥ 28 ॥

ശ്ലോക 30

രക്ഷോഭൂതപിശാചേഭ്യസ്തഥൈവാസുരദോഷതഃ ।

സര്വതഃ പിതരോ രക്ഷാം കുര്വന്തു മമ നിത്യശഃ

॥ 29 ॥

ശ്ലോക 31

വിശ്വോ വിശ്വഭുഗാരാധ്യോ ധര്മോ ധന്യഃ ശുഭാനനഃ ।

ഭൂതിദോ ഭൂതികൃദ്ഭൂതിഃ പിതൄണാം യേ ഗണാ നവ

॥ 30 ॥

ശ്ലോക 32

കല്യാണഃ കല്യദഃ കര്താ കല്യഃ കല്യതരാശ്രയഃ ।

കല്യതാഹേതുരനഘഃ ഷഡിമേ തേ ഗണാഃ സ്മൃതാഃ

॥ 31 ॥

ശ്ലോക 33

വരോ വരേണ്യോ വരദസ്തുഷ്ടിദഃ പുഷ്ടിദസ്തഥാ ।

വിശ്വപാതാ തഥാ ധാതാ സപ്തൈതേ ച ഗണാഃ സ്മൃതാഃ

॥ 32 ॥

ശ്ലോക 34

മഹാന്മഹാത്മാ മഹിതോ മഹിമാവാന്മഹാബലഃ ।

ഗണാഃ പഞ്ച തഥൈവൈതേ പിതൄണാം പാപനാശനാഃ

॥ 33 ॥

ശ്ലോക 35

സുഖദോ ധനദശ്ചാന്യോ ധര്മദോഽന്യശ്ച ഭൂതിദഃ ।

പിതൄണാം കഥ്യതേ ചൈവ തഥാ ഗണചതുഷ്ടയമ്

॥ 34 ॥

ശ്ലോക 36

ഏകത്രിംശത്പിതൃഗണാ യൈര്വ്യാപ്തമഖിലം ജഗത് ।

ത ഏവാത്ര പിതൃഗണാസ്തുഷ്യന്തു ച മദാഹിതമ്

॥ 35 ॥

ശ്ലോക 37

ഇതി ശ്രീ ഗരുഡപുരാണേ ഊനനവതിതമോഽധ്യായേ രുചികൃത പിതൃ സ്തോത്രമ് ।