Pitru Stotram (Garuda Puranam)

पितृ स्तोत्रं (गरुड पुराणम्)

श्लोक 1

रुचिरुवाच ।

नमस्येऽहं पितॄन् भक्त्या ये वसन्त्यधिदेवताः ।

देवैरपि हि तर्प्यन्ते ये श्राद्धेषु स्वधोत्तरैः

श्लोक 2

नमस्येऽहं पितॄन् स्वर्गे ये तर्प्यन्ते महर्षिभिः ।

श्राद्धैर्मनोमयैर्भक्त्या भुक्तिमुक्तिमभीप्सुभिः

॥ 1 ॥

श्लोक 3

नमस्येऽहं पितॄन् स्वर्गे सिद्धाः सन्तर्पयन्ति यान् ।

श्राद्धेषु दिव्यैः सकलैरुपहारैरनुत्तमैः

॥ 2 ॥

श्लोक 4

नमस्येऽहं पितॄन् भक्त्या येऽर्च्यन्ते गुह्यकैर्दिवि ।

तन्मयत्वेन वाञ्छद्भिरृद्धिर्यात्यन्तिकीं पराम्

॥ 3 ॥

श्लोक 5

नमस्येऽहं पितॄन् मर्त्यैरर्च्यन्ते भुवि ये सदा ।

श्राद्धेषु श्रद्धयाभीष्टलोकपुष्टिप्रदायिनः

॥ 4 ॥

श्लोक 6

नमस्येऽहं पितॄन् विप्रैरर्च्यन्ते भुवि ये सदा ।

वाञ्छिताभीष्टलाभाय प्राजापत्यप्रदायिनः

॥ 5 ॥

श्लोक 7

नमस्येऽहं पितॄन् ये वै तर्प्यन्तेऽरण्यवासिभिः ।

वन्यैः श्राद्धैर्यताहारैस्तपोनिर्धूतकल्मषैः

॥ 6 ॥

श्लोक 8

नमस्येऽहं पितॄन् विप्रैर्नैष्ठिकैर्धर्मचारिभिः ।

ये संयतात्मभिर्नित्यं सन्तर्प्यन्ते समाधिभिः

॥ 7 ॥

श्लोक 9

नमस्येऽहं पितॄन् श्राद्धै राजन्यास्तर्पयन्ति यान् ।

कव्यैरशेषैर्विधिवल्लोकद्वयफलप्रदान्

॥ 8 ॥

श्लोक 10

नमस्येऽहं पितॄन् वैश्यैरर्च्यन्ते भुवि ये सदा ।

स्वकर्माभिरतैर्नित्यं पुष्पधूपान्नवारिभिः

॥ 9 ॥

श्लोक 11

नमस्येऽहं पितॄन् श्राद्धे शूद्रैरपि च भक्तितः ।

सन्तर्प्यन्ते जगत्कृत्स्नं नाम्ना ख्याताः सुकालिनः

॥ 10 ॥

श्लोक 12

नमस्येऽहं पितॄन् श्राद्धे पाताले ये महासुरैः ।

सन्तर्प्यन्ते सुधाहारास्त्यक्तदम्भमदैः सदा

॥ 11 ॥

श्लोक 13

नमस्येऽहं पितॄन् श्राद्धैरर्च्यन्ते ये रसातले ।

भोगैरशेषैर्विधिवन्नागैः कामानभीप्सुभिः

॥ 12 ॥

श्लोक 14

नमस्येऽहं पितॄन् श्राद्धैः सर्पैः सन्तर्पितान्सदा ।

तत्रैव विधिवन्मन्त्रभोगसम्पत्समन्वितैः

॥ 13 ॥

श्लोक 15

पितॄन्नमस्ये निवसन्ति साक्षा-

-द्ये देवलोकेऽथ महीतले वा ।

तथाऽन्तरिक्षे च सुरारिपूज्या-

-स्ते मे प्रतीच्छन्तु मनोपनीतम्

॥ 14 ॥

श्लोक 16

पितॄन्नमस्ये परमार्थभूता

ये वै विमाने निवसन्त्यमूर्ताः ।

यजन्ति यानस्तमलैर्मनोभि-

-र्योगीश्वराः क्लेशविमुक्तिहेतून्

॥ 15 ॥

श्लोक 17

पितॄन्नमस्ये दिवि ये च मूर्ताः

स्वधाभुजः काम्यफलाभिसन्धौ ।

प्रदानशक्ताः सकलेप्सितानां

विमुक्तिदा येऽनभिसंहितेषु

॥ 16 ॥

श्लोक 18

तृप्यन्तु तेऽस्मिन्पितरः समस्ता

इच्छावतां ये प्रदिशन्ति कामान् ।

सुरत्वमिन्द्रत्वमितोऽधिकं वा

गजाश्वरत्नानि महागृहाणि

॥ 17 ॥

श्लोक 19

सोमस्य ये रश्मिषु येऽर्कबिम्बे

शुक्ले विमाने च सदा वसन्ति ।

तृप्यन्तु तेऽस्मिन्पितरोऽन्नतोयै-

-र्गन्धादिना पुष्टिमितो व्रजन्तु

॥ 18 ॥

श्लोक 20

येषां हुतेऽग्नौ हविषा च तृप्ति-

-र्ये भुञ्जते विप्रशरीरसंस्थाः ।

ये पिण्डदानेन मुदं प्रयान्ति

तृप्यन्तु तेऽस्मिन्पितरोऽन्नतोयैः

॥ 19 ॥

श्लोक 21

ये खड्गमांसेन सुरैरभीष्टैः

कृष्णैस्तिलैर्दिव्य मनोहरैश्च ।

कालेन शाकेन महर्षिवर्यैः

सम्प्रीणितास्ते मुदमत्र यान्तु

॥ 20 ॥

श्लोक 22

कव्यान्यशेषाणि च यान्यभीष्टा-

-न्यतीव तेषां मम पूजितानाम् ।

तेषाञ्च सान्निध्यमिहास्तु पुष्प-

-गन्धाम्बुभोज्येषु मया कृतेषु

॥ 21 ॥

श्लोक 23

दिने दिने ये प्रतिगृह्णतेऽर्चां

मासान्तपूज्या भुवि येऽष्टकासु ।

ये वत्सरान्तेऽभ्युदये च पूज्याः

प्रयान्तु ते मे पितरोऽत्र तुष्टिम्

॥ 22 ॥

श्लोक 24

पूज्या द्विजानां कुमुदेन्दुभासो

ये क्षत्रियाणां ज्वलनार्कवर्णाः ।

तथा विशां ये कनकावदाता

नीलीप्रभाः शूद्रजनस्य ये च

॥ 23 ॥

श्लोक 25

तेऽस्मिन्समस्ता मम पुष्पगन्ध-

-धूपाम्बुभोज्यादिनिवेदनेन ।

तथाऽग्निहोमेन च यान्ति तृप्तिं

सदा पितृभ्यः प्रणतोऽस्मि तेभ्यः

॥ 24 ॥

श्लोक 26

ये देवपूर्वाण्यभितृप्तिहेतो-

-रश्नन्ति कव्यानि शुभाहृतानि ।

तृप्ताश्च ये भूतिसृजो भवन्ति

तृप्यन्तु तेऽस्मिन्प्रणतोऽस्मि तेभ्यः

॥ 25 ॥

श्लोक 27

रक्षांसि भूतान्यसुरांस्तथोग्रा-

-न्निर्नाशयन्तु त्वशिवं प्रजानाम् ।

आद्याः सुराणाममरेशपूज्या-

-स्तृप्यन्तु तेऽस्मिन्प्रणतोऽस्मितेभ्यः

॥ 26 ॥

श्लोक 28

अग्निस्वात्ता बर्हिषद आज्यपाः सोमपास्तथा ।

व्रजन्तु तृप्तिं श्राद्धेऽस्मिन्पितरस्तर्पिता मया

॥ 27 ॥

श्लोक 29

अग्निस्वात्ताः पितृगणाः प्राचीं रक्षन्तु मे दिशम् ।

तथा बर्हिषदः पान्तु याम्यां मे पितरः सदा ।

प्रतीचीमाज्यपास्तद्वदुदीचीमपि सोमपाः

॥ 28 ॥

श्लोक 30

रक्षोभूतपिशाचेभ्यस्तथैवासुरदोषतः ।

सर्वतः पितरो रक्षां कुर्वन्तु मम नित्यशः

॥ 29 ॥

श्लोक 31

विश्वो विश्वभुगाराध्यो धर्मो धन्यः शुभाननः ।

भूतिदो भूतिकृद्भूतिः पितॄणां ये गणा नव

॥ 30 ॥

श्लोक 32

कल्याणः कल्यदः कर्ता कल्यः कल्यतराश्रयः ।

कल्यताहेतुरनघः षडिमे ते गणाः स्मृताः

॥ 31 ॥

श्लोक 33

वरो वरेण्यो वरदस्तुष्टिदः पुष्टिदस्तथा ।

विश्वपाता तथा धाता सप्तैते च गणाः स्मृताः

॥ 32 ॥

श्लोक 34

महान्महात्मा महितो महिमावान्महाबलः ।

गणाः पञ्च तथैवैते पितॄणां पापनाशनाः

॥ 33 ॥

श्लोक 35

सुखदो धनदश्चान्यो धर्मदोऽन्यश्च भूतिदः ।

पितॄणां कथ्यते चैव तथा गणचतुष्टयम्

॥ 34 ॥

श्लोक 36

एकत्रिंशत्पितृगणा यैर्व्याप्तमखिलं जगत् ।

त एवात्र पितृगणास्तुष्यन्तु च मदाहितम्

॥ 35 ॥

श्लोक 37

इति श्री गरुडपुराणे ऊननवतितमोऽध्याये रुचिकृत पितृ स्तोत्रम् ।