ಪಿತೃ ಸ್ತೋತ್ರಂ (ಗರುಡ ಪುರಾಣಮ್)

ಪಿತೃ ಸ್ತೋತ್ರಂ (ಗರುಡ ಪುರಾಣಮ್)

ಶ್ಲೋಕ 1

ರುಚಿರುವಾಚ ।

ನಮಸ್ಯೇಽಹಂ ಪಿತೄನ್ ಭಕ್ತ್ಯಾ ಯೇ ವಸನ್ತ್ಯಧಿದೇವತಾಃ ।

ದೇವೈರಪಿ ಹಿ ತರ್ಪ್ಯನ್ತೇ ಯೇ ಶ್ರಾದ್ಧೇಷು ಸ್ವಧೋತ್ತರೈಃ

ಶ್ಲೋಕ 2

ನಮಸ್ಯೇಽಹಂ ಪಿತೄನ್ ಸ್ವರ್ಗೇ ಯೇ ತರ್ಪ್ಯನ್ತೇ ಮಹರ್ಷಿಭಿಃ ।

ಶ್ರಾದ್ಧೈರ್ಮನೋಮಯೈರ್ಭಕ್ತ್ಯಾ ಭುಕ್ತಿಮುಕ್ತಿಮಭೀಪ್ಸುಭಿಃ

॥ 1 ॥

ಶ್ಲೋಕ 3

ನಮಸ್ಯೇಽಹಂ ಪಿತೄನ್ ಸ್ವರ್ಗೇ ಸಿದ್ಧಾಃ ಸನ್ತರ್ಪಯನ್ತಿ ಯಾನ್ ।

ಶ್ರಾದ್ಧೇಷು ದಿವ್ಯೈಃ ಸಕಲೈರುಪಹಾರೈರನುತ್ತಮೈಃ

॥ 2 ॥

ಶ್ಲೋಕ 4

ನಮಸ್ಯೇಽಹಂ ಪಿತೄನ್ ಭಕ್ತ್ಯಾ ಯೇಽರ್ಚ್ಯನ್ತೇ ಗುಹ್ಯಕೈರ್ದಿವಿ ।

ತನ್ಮಯತ್ವೇನ ವಾಞ್ಛದ್ಭಿರೃದ್ಧಿರ್ಯಾತ್ಯನ್ತಿಕೀಂ ಪರಾಮ್

॥ 3 ॥

ಶ್ಲೋಕ 5

ನಮಸ್ಯೇಽಹಂ ಪಿತೄನ್ ಮರ್ತ್ಯೈರರ್ಚ್ಯನ್ತೇ ಭುವಿ ಯೇ ಸದಾ ।

ಶ್ರಾದ್ಧೇಷು ಶ್ರದ್ಧಯಾಭೀಷ್ಟಲೋಕಪುಷ್ಟಿಪ್ರದಾಯಿನಃ

॥ 4 ॥

ಶ್ಲೋಕ 6

ನಮಸ್ಯೇಽಹಂ ಪಿತೄನ್ ವಿಪ್ರೈರರ್ಚ್ಯನ್ತೇ ಭುವಿ ಯೇ ಸದಾ ।

ವಾಞ್ಛಿತಾಭೀಷ್ಟಲಾಭಾಯ ಪ್ರಾಜಾಪತ್ಯಪ್ರದಾಯಿನಃ

॥ 5 ॥

ಶ್ಲೋಕ 7

ನಮಸ್ಯೇಽಹಂ ಪಿತೄನ್ ಯೇ ವೈ ತರ್ಪ್ಯನ್ತೇಽರಣ್ಯವಾಸಿಭಿಃ ।

ವನ್ಯೈಃ ಶ್ರಾದ್ಧೈರ್ಯತಾಹಾರೈಸ್ತಪೋನಿರ್ಧೂತಕಲ್ಮಷೈಃ

॥ 6 ॥

ಶ್ಲೋಕ 8

ನಮಸ್ಯೇಽಹಂ ಪಿತೄನ್ ವಿಪ್ರೈರ್ನೈಷ್ಠಿಕೈರ್ಧರ್ಮಚಾರಿಭಿಃ ।

ಯೇ ಸಂಯತಾತ್ಮಭಿರ್ನಿತ್ಯಂ ಸನ್ತರ್ಪ್ಯನ್ತೇ ಸಮಾಧಿಭಿಃ

॥ 7 ॥

ಶ್ಲೋಕ 9

ನಮಸ್ಯೇಽಹಂ ಪಿತೄನ್ ಶ್ರಾದ್ಧೈ ರಾಜನ್ಯಾಸ್ತರ್ಪಯನ್ತಿ ಯಾನ್ ।

ಕವ್ಯೈರಶೇಷೈರ್ವಿಧಿವಲ್ಲೋಕದ್ವಯಫಲಪ್ರದಾನ್

॥ 8 ॥

ಶ್ಲೋಕ 10

ನಮಸ್ಯೇಽಹಂ ಪಿತೄನ್ ವೈಶ್ಯೈರರ್ಚ್ಯನ್ತೇ ಭುವಿ ಯೇ ಸದಾ ।

ಸ್ವಕರ್ಮಾಭಿರತೈರ್ನಿತ್ಯಂ ಪುಷ್ಪಧೂಪಾನ್ನವಾರಿಭಿಃ

॥ 9 ॥

ಶ್ಲೋಕ 11

ನಮಸ್ಯೇಽಹಂ ಪಿತೄನ್ ಶ್ರಾದ್ಧೇ ಶೂದ್ರೈರಪಿ ಚ ಭಕ್ತಿತಃ ।

ಸನ್ತರ್ಪ್ಯನ್ತೇ ಜಗತ್ಕೃತ್ಸ್ನಂ ನಾಮ್ನಾ ಖ್ಯಾತಾಃ ಸುಕಾಲಿನಃ

॥ 10 ॥

ಶ್ಲೋಕ 12

ನಮಸ್ಯೇಽಹಂ ಪಿತೄನ್ ಶ್ರಾದ್ಧೇ ಪಾತಾಲೇ ಯೇ ಮಹಾಸುರೈಃ ।

ಸನ್ತರ್ಪ್ಯನ್ತೇ ಸುಧಾಹಾರಾಸ್ತ್ಯಕ್ತದಮ್ಭಮದೈಃ ಸದಾ

॥ 11 ॥

ಶ್ಲೋಕ 13

ನಮಸ್ಯೇಽಹಂ ಪಿತೄನ್ ಶ್ರಾದ್ಧೈರರ್ಚ್ಯನ್ತೇ ಯೇ ರಸಾತಲೇ ।

ಭೋಗೈರಶೇಷೈರ್ವಿಧಿವನ್ನಾಗೈಃ ಕಾಮಾನಭೀಪ್ಸುಭಿಃ

॥ 12 ॥

ಶ್ಲೋಕ 14

ನಮಸ್ಯೇಽಹಂ ಪಿತೄನ್ ಶ್ರಾದ್ಧೈಃ ಸರ್ಪೈಃ ಸನ್ತರ್ಪಿತಾನ್ಸದಾ ।

ತತ್ರೈವ ವಿಧಿವನ್ಮನ್ತ್ರಭೋಗಸಮ್ಪತ್ಸಮನ್ವಿತೈಃ

॥ 13 ॥

ಶ್ಲೋಕ 15

ಪಿತೄನ್ನಮಸ್ಯೇ ನಿವಸನ್ತಿ ಸಾಕ್ಷಾ-

-ದ್ಯೇ ದೇವಲೋಕೇಽಥ ಮಹೀತಲೇ ವಾ ।

ತಥಾಽನ್ತರಿಕ್ಷೇ ಚ ಸುರಾರಿಪೂಜ್ಯಾ-

-ಸ್ತೇ ಮೇ ಪ್ರತೀಚ್ಛನ್ತು ಮನೋಪನೀತಮ್

॥ 14 ॥

ಶ್ಲೋಕ 16

ಪಿತೄನ್ನಮಸ್ಯೇ ಪರಮಾರ್ಥಭೂತಾ

ಯೇ ವೈ ವಿಮಾನೇ ನಿವಸನ್ತ್ಯಮೂರ್ತಾಃ ।

ಯಜನ್ತಿ ಯಾನಸ್ತಮಲೈರ್ಮನೋಭಿ-

-ರ್ಯೋಗೀಶ್ವರಾಃ ಕ್ಲೇಶವಿಮುಕ್ತಿಹೇತೂನ್

॥ 15 ॥

ಶ್ಲೋಕ 17

ಪಿತೄನ್ನಮಸ್ಯೇ ದಿವಿ ಯೇ ಚ ಮೂರ್ತಾಃ

ಸ್ವಧಾಭುಜಃ ಕಾಮ್ಯಫಲಾಭಿಸನ್ಧೌ ।

ಪ್ರದಾನಶಕ್ತಾಃ ಸಕಲೇಪ್ಸಿತಾನಾಂ

ವಿಮುಕ್ತಿದಾ ಯೇಽನಭಿಸಂಹಿತೇಷು

॥ 16 ॥

ಶ್ಲೋಕ 18

ತೃಪ್ಯನ್ತು ತೇಽಸ್ಮಿನ್ಪಿತರಃ ಸಮಸ್ತಾ

ಇಚ್ಛಾವತಾಂ ಯೇ ಪ್ರದಿಶನ್ತಿ ಕಾಮಾನ್ ।

ಸುರತ್ವಮಿನ್ದ್ರತ್ವಮಿತೋಽಧಿಕಂ ವಾ

ಗಜಾಶ್ವರತ್ನಾನಿ ಮಹಾಗೃಹಾಣಿ

॥ 17 ॥

ಶ್ಲೋಕ 19

ಸೋಮಸ್ಯ ಯೇ ರಶ್ಮಿಷು ಯೇಽರ್ಕಬಿಮ್ಬೇ

ಶುಕ್ಲೇ ವಿಮಾನೇ ಚ ಸದಾ ವಸನ್ತಿ ।

ತೃಪ್ಯನ್ತು ತೇಽಸ್ಮಿನ್ಪಿತರೋಽನ್ನತೋಯೈ-

-ರ್ಗನ್ಧಾದಿನಾ ಪುಷ್ಟಿಮಿತೋ ವ್ರಜನ್ತು

॥ 18 ॥

ಶ್ಲೋಕ 20

ಯೇಷಾಂ ಹುತೇಽಗ್ನೌ ಹವಿಷಾ ಚ ತೃಪ್ತಿ-

-ರ್ಯೇ ಭುಞ್ಜತೇ ವಿಪ್ರಶರೀರಸಂಸ್ಥಾಃ ।

ಯೇ ಪಿಣ್ಡದಾನೇನ ಮುದಂ ಪ್ರಯಾನ್ತಿ

ತೃಪ್ಯನ್ತು ತೇಽಸ್ಮಿನ್ಪಿತರೋಽನ್ನತೋಯೈಃ

॥ 19 ॥

ಶ್ಲೋಕ 21

ಯೇ ಖಡ್ಗಮಾಂಸೇನ ಸುರೈರಭೀಷ್ಟೈಃ

ಕೃಷ್ಣೈಸ್ತಿಲೈರ್ದಿವ್ಯ ಮನೋಹರೈಶ್ಚ ।

ಕಾಲೇನ ಶಾಕೇನ ಮಹರ್ಷಿವರ್ಯೈಃ

ಸಮ್ಪ್ರೀಣಿತಾಸ್ತೇ ಮುದಮತ್ರ ಯಾನ್ತು

॥ 20 ॥

ಶ್ಲೋಕ 22

ಕವ್ಯಾನ್ಯಶೇಷಾಣಿ ಚ ಯಾನ್ಯಭೀಷ್ಟಾ-

-ನ್ಯತೀವ ತೇಷಾಂ ಮಮ ಪೂಜಿತಾನಾಮ್ ।

ತೇಷಾಞ್ಚ ಸಾನ್ನಿಧ್ಯಮಿಹಾಸ್ತು ಪುಷ್ಪ-

-ಗನ್ಧಾಮ್ಬುಭೋಜ್ಯೇಷು ಮಯಾ ಕೃತೇಷು

॥ 21 ॥

ಶ್ಲೋಕ 23

ದಿನೇ ದಿನೇ ಯೇ ಪ್ರತಿಗೃಹ್ಣತೇಽರ್ಚಾಂ

ಮಾಸಾನ್ತಪೂಜ್ಯಾ ಭುವಿ ಯೇಽಷ್ಟಕಾಸು ।

ಯೇ ವತ್ಸರಾನ್ತೇಽಭ್ಯುದಯೇ ಚ ಪೂಜ್ಯಾಃ

ಪ್ರಯಾನ್ತು ತೇ ಮೇ ಪಿತರೋಽತ್ರ ತುಷ್ಟಿಮ್

॥ 22 ॥

ಶ್ಲೋಕ 24

ಪೂಜ್ಯಾ ದ್ವಿಜಾನಾಂ ಕುಮುದೇನ್ದುಭಾಸೋ

ಯೇ ಕ್ಷತ್ರಿಯಾಣಾಂ ಜ್ವಲನಾರ್ಕವರ್ಣಾಃ ।

ತಥಾ ವಿಶಾಂ ಯೇ ಕನಕಾವದಾತಾ

ನೀಲೀಪ್ರಭಾಃ ಶೂದ್ರಜನಸ್ಯ ಯೇ ಚ

॥ 23 ॥

ಶ್ಲೋಕ 25

ತೇಽಸ್ಮಿನ್ಸಮಸ್ತಾ ಮಮ ಪುಷ್ಪಗನ್ಧ-

-ಧೂಪಾಮ್ಬುಭೋಜ್ಯಾದಿನಿವೇದನೇನ ।

ತಥಾಽಗ್ನಿಹೋಮೇನ ಚ ಯಾನ್ತಿ ತೃಪ್ತಿಂ

ಸದಾ ಪಿತೃಭ್ಯಃ ಪ್ರಣತೋಽಸ್ಮಿ ತೇಭ್ಯಃ

॥ 24 ॥

ಶ್ಲೋಕ 26

ಯೇ ದೇವಪೂರ್ವಾಣ್ಯಭಿತೃಪ್ತಿಹೇತೋ-

-ರಶ್ನನ್ತಿ ಕವ್ಯಾನಿ ಶುಭಾಹೃತಾನಿ ।

ತೃಪ್ತಾಶ್ಚ ಯೇ ಭೂತಿಸೃಜೋ ಭವನ್ತಿ

ತೃಪ್ಯನ್ತು ತೇಽಸ್ಮಿನ್ಪ್ರಣತೋಽಸ್ಮಿ ತೇಭ್ಯಃ

॥ 25 ॥

ಶ್ಲೋಕ 27

ರಕ್ಷಾಂಸಿ ಭೂತಾನ್ಯಸುರಾಂಸ್ತಥೋಗ್ರಾ-

-ನ್ನಿರ್ನಾಶಯನ್ತು ತ್ವಶಿವಂ ಪ್ರಜಾನಾಮ್ ।

ಆದ್ಯಾಃ ಸುರಾಣಾಮಮರೇಶಪೂಜ್ಯಾ-

-ಸ್ತೃಪ್ಯನ್ತು ತೇಽಸ್ಮಿನ್ಪ್ರಣತೋಽಸ್ಮಿತೇಭ್ಯಃ

॥ 26 ॥

ಶ್ಲೋಕ 28

ಅಗ್ನಿಸ್ವಾತ್ತಾ ಬರ್ಹಿಷದ ಆಜ್ಯಪಾಃ ಸೋಮಪಾಸ್ತಥಾ ।

ವ್ರಜನ್ತು ತೃಪ್ತಿಂ ಶ್ರಾದ್ಧೇಽಸ್ಮಿನ್ಪಿತರಸ್ತರ್ಪಿತಾ ಮಯಾ

॥ 27 ॥

ಶ್ಲೋಕ 29

ಅಗ್ನಿಸ್ವಾತ್ತಾಃ ಪಿತೃಗಣಾಃ ಪ್ರಾಚೀಂ ರಕ್ಷನ್ತು ಮೇ ದಿಶಮ್ ।

ತಥಾ ಬರ್ಹಿಷದಃ ಪಾನ್ತು ಯಾಮ್ಯಾಂ ಮೇ ಪಿತರಃ ಸದಾ ।

ಪ್ರತೀಚೀಮಾಜ್ಯಪಾಸ್ತದ್ವದುದೀಚೀಮಪಿ ಸೋಮಪಾಃ

॥ 28 ॥

ಶ್ಲೋಕ 30

ರಕ್ಷೋಭೂತಪಿಶಾಚೇಭ್ಯಸ್ತಥೈವಾಸುರದೋಷತಃ ।

ಸರ್ವತಃ ಪಿತರೋ ರಕ್ಷಾಂ ಕುರ್ವನ್ತು ಮಮ ನಿತ್ಯಶಃ

॥ 29 ॥

ಶ್ಲೋಕ 31

ವಿಶ್ವೋ ವಿಶ್ವಭುಗಾರಾಧ್ಯೋ ಧರ್ಮೋ ಧನ್ಯಃ ಶುಭಾನನಃ ।

ಭೂತಿದೋ ಭೂತಿಕೃದ್ಭೂತಿಃ ಪಿತೄಣಾಂ ಯೇ ಗಣಾ ನವ

॥ 30 ॥

ಶ್ಲೋಕ 32

ಕಲ್ಯಾಣಃ ಕಲ್ಯದಃ ಕರ್ತಾ ಕಲ್ಯಃ ಕಲ್ಯತರಾಶ್ರಯಃ ।

ಕಲ್ಯತಾಹೇತುರನಘಃ ಷಡಿಮೇ ತೇ ಗಣಾಃ ಸ್ಮೃತಾಃ

॥ 31 ॥

ಶ್ಲೋಕ 33

ವರೋ ವರೇಣ್ಯೋ ವರದಸ್ತುಷ್ಟಿದಃ ಪುಷ್ಟಿದಸ್ತಥಾ ।

ವಿಶ್ವಪಾತಾ ತಥಾ ಧಾತಾ ಸಪ್ತೈತೇ ಚ ಗಣಾಃ ಸ್ಮೃತಾಃ

॥ 32 ॥

ಶ್ಲೋಕ 34

ಮಹಾನ್ಮಹಾತ್ಮಾ ಮಹಿತೋ ಮಹಿಮಾವಾನ್ಮಹಾಬಲಃ ।

ಗಣಾಃ ಪಞ್ಚ ತಥೈವೈತೇ ಪಿತೄಣಾಂ ಪಾಪನಾಶನಾಃ

॥ 33 ॥

ಶ್ಲೋಕ 35

ಸುಖದೋ ಧನದಶ್ಚಾನ್ಯೋ ಧರ್ಮದೋಽನ್ಯಶ್ಚ ಭೂತಿದಃ ।

ಪಿತೄಣಾಂ ಕಥ್ಯತೇ ಚೈವ ತಥಾ ಗಣಚತುಷ್ಟಯಮ್

॥ 34 ॥

ಶ್ಲೋಕ 36

ಏಕತ್ರಿಂಶತ್ಪಿತೃಗಣಾ ಯೈರ್ವ್ಯಾಪ್ತಮಖಿಲಂ ಜಗತ್ ।

ತ ಏವಾತ್ರ ಪಿತೃಗಣಾಸ್ತುಷ್ಯನ್ತು ಚ ಮದಾಹಿತಮ್

॥ 35 ॥

ಶ್ಲೋಕ 37

ಇತಿ ಶ್ರೀ ಗರುಡಪುರಾಣೇ ಊನನವತಿತಮೋಽಧ್ಯಾಯೇ ರುಚಿಕೃತ ಪಿತೃ ಸ್ತೋತ್ರಮ್ ।