পিতৃ স্তোত্রং (গরুড পুরাণম্)

পিতৃ স্তোত্রং (গরুড পুরাণম্)

শ্লোক 1

রুচিরুবাচ ।

নমস্যেঽহং পিতৄন্ ভক্ত্যা যে বসন্ত্যধিদেবতাঃ ।

দেবৈরপি হি তর্প্যন্তে যে শ্রাদ্ধেষু স্বধোত্তরৈঃ

শ্লোক 2

নমস্যেঽহং পিতৄন্ স্বর্গে যে তর্প্যন্তে মহর্ষিভিঃ ।

শ্রাদ্ধৈর্মনোমযৈর্ভক্ত্যা ভুক্তিমুক্তিমভীপ্সুভিঃ

॥ 1 ॥

শ্লোক 3

নমস্যেঽহং পিতৄন্ স্বর্গে সিদ্ধাঃ সন্তর্পযন্তি যান্ ।

শ্রাদ্ধেষু দিব্যৈঃ সকলৈরুপহারৈরনুত্তমৈঃ

॥ 2 ॥

শ্লোক 4

নমস্যেঽহং পিতৄন্ ভক্ত্যা যেঽর্চ্যন্তে গুহ্যকৈর্দিবি ।

তন্মযত্বেন বাঞ্ছদ্ভিরৃদ্ধির্যাত্যন্তিকীং পরাম্

॥ 3 ॥

শ্লোক 5

নমস্যেঽহং পিতৄন্ মর্ত্যৈরর্চ্যন্তে ভুবি যে সদা ।

শ্রাদ্ধেষু শ্রদ্ধযাভীষ্টলোকপুষ্টিপ্রদাযিনঃ

॥ 4 ॥

শ্লোক 6

নমস্যেঽহং পিতৄন্ বিপ্রৈরর্চ্যন্তে ভুবি যে সদা ।

বাঞ্ছিতাভীষ্টলাভায প্রাজাপত্যপ্রদাযিনঃ

॥ 5 ॥

শ্লোক 7

নমস্যেঽহং পিতৄন্ যে বৈ তর্প্যন্তেঽরণ্যবাসিভিঃ ।

বন্যৈঃ শ্রাদ্ধৈর্যতাহারৈস্তপোনির্ধূতকল্মষৈঃ

॥ 6 ॥

শ্লোক 8

নমস্যেঽহং পিতৄন্ বিপ্রৈর্নৈষ্ঠিকৈর্ধর্মচারিভিঃ ।

যে সংযতাত্মভির্নিত্যং সন্তর্প্যন্তে সমাধিভিঃ

॥ 7 ॥

শ্লোক 9

নমস্যেঽহং পিতৄন্ শ্রাদ্ধৈ রাজন্যাস্তর্পযন্তি যান্ ।

কব্যৈরশেষৈর্বিধিবল্লোকদ্বযফলপ্রদান্

॥ 8 ॥

শ্লোক 10

নমস্যেঽহং পিতৄন্ বৈশ্যৈরর্চ্যন্তে ভুবি যে সদা ।

স্বকর্মাভিরতৈর্নিত্যং পুষ্পধূপান্নবারিভিঃ

॥ 9 ॥

শ্লোক 11

নমস্যেঽহং পিতৄন্ শ্রাদ্ধে শূদ্রৈরপি চ ভক্তিতঃ ।

সন্তর্প্যন্তে জগত্কৃত্স্নং নাম্না খ্যাতাঃ সুকালিনঃ

॥ 10 ॥

শ্লোক 12

নমস্যেঽহং পিতৄন্ শ্রাদ্ধে পাতালে যে মহাসুরৈঃ ।

সন্তর্প্যন্তে সুধাহারাস্ত্যক্তদম্ভমদৈঃ সদা

॥ 11 ॥

শ্লোক 13

নমস্যেঽহং পিতৄন্ শ্রাদ্ধৈরর্চ্যন্তে যে রসাতলে ।

ভোগৈরশেষৈর্বিধিবন্নাগৈঃ কামানভীপ্সুভিঃ

॥ 12 ॥

শ্লোক 14

নমস্যেঽহং পিতৄন্ শ্রাদ্ধৈঃ সর্পৈঃ সন্তর্পিতান্সদা ।

তত্রৈব বিধিবন্মন্ত্রভোগসম্পত্সমন্বিতৈঃ

॥ 13 ॥

শ্লোক 15

পিতৄন্নমস্যে নিবসন্তি সাক্ষা-

-দ্যে দেবলোকেঽথ মহীতলে বা ।

তথাঽন্তরিক্ষে চ সুরারিপূজ্যা-

-স্তে মে প্রতীচ্ছন্তু মনোপনীতম্

॥ 14 ॥

শ্লোক 16

পিতৄন্নমস্যে পরমার্থভূতা

যে বৈ বিমানে নিবসন্ত্যমূর্তাঃ ।

যজন্তি যানস্তমলৈর্মনোভি-

-র্যোগীশ্বরাঃ ক্লেশবিমুক্তিহেতূন্

॥ 15 ॥

শ্লোক 17

পিতৄন্নমস্যে দিবি যে চ মূর্তাঃ

স্বধাভুজঃ কাম্যফলাভিসন্ধৌ ।

প্রদানশক্তাঃ সকলেপ্সিতানাং

বিমুক্তিদা যেঽনভিসংহিতেষু

॥ 16 ॥

শ্লোক 18

তৃপ্যন্তু তেঽস্মিন্পিতরঃ সমস্তা

ইচ্ছাবতাং যে প্রদিশন্তি কামান্ ।

সুরত্বমিন্দ্রত্বমিতোঽধিকং বা

গজাশ্বরত্নানি মহাগৃহাণি

॥ 17 ॥

শ্লোক 19

সোমস্য যে রশ্মিষু যেঽর্কবিম্বে

শুক্লে বিমানে চ সদা বসন্তি ।

তৃপ্যন্তু তেঽস্মিন্পিতরোঽন্নতোযৈ-

-র্গন্ধাদিনা পুষ্টিমিতো ব্রজন্তু

॥ 18 ॥

শ্লোক 20

যেষাং হুতেঽগ্নৌ হবিষা চ তৃপ্তি-

-র্যে ভুঞ্জতে বিপ্রশরীরসংস্থাঃ ।

যে পিণ্ডদানেন মুদং প্রযান্তি

তৃপ্যন্তু তেঽস্মিন্পিতরোঽন্নতোযৈঃ

॥ 19 ॥

শ্লোক 21

যে খড্গমাংসেন সুরৈরভীষ্টৈঃ

কৃষ্ণৈস্তিলৈর্দিব্য মনোহরৈশ্চ ।

কালেন শাকেন মহর্ষিবর্যৈঃ

সম্প্রীণিতাস্তে মুদমত্র যান্তু

॥ 20 ॥

শ্লোক 22

কব্যান্যশেষাণি চ যান্যভীষ্টা-

-ন্যতীব তেষাং মম পূজিতানাম্ ।

তেষাঞ্চ সান্নিধ্যমিহাস্তু পুষ্প-

-গন্ধাম্বুভোজ্যেষু মযা কৃতেষু

॥ 21 ॥

শ্লোক 23

দিনে দিনে যে প্রতিগৃহ্ণতেঽর্চাং

মাসান্তপূজ্যা ভুবি যেঽষ্টকাসু ।

যে বত্সরান্তেঽভ্যুদযে চ পূজ্যাঃ

প্রযান্তু তে মে পিতরোঽত্র তুষ্টিম্

॥ 22 ॥

শ্লোক 24

পূজ্যা দ্বিজানাং কুমুদেন্দুভাসো

যে ক্ষত্রিযাণাং জ্বলনার্কবর্ণাঃ ।

তথা বিশাং যে কনকাবদাতা

নীলীপ্রভাঃ শূদ্রজনস্য যে চ

॥ 23 ॥

শ্লোক 25

তেঽস্মিন্সমস্তা মম পুষ্পগন্ধ-

-ধূপাম্বুভোজ্যাদিনিবেদনেন ।

তথাঽগ্নিহোমেন চ যান্তি তৃপ্তিং

সদা পিতৃভ্যঃ প্রণতোঽস্মি তেভ্যঃ

॥ 24 ॥

শ্লোক 26

যে দেবপূর্বাণ্যভিতৃপ্তিহেতো-

-রশ্নন্তি কব্যানি শুভাহৃতানি ।

তৃপ্তাশ্চ যে ভূতিসৃজো ভবন্তি

তৃপ্যন্তু তেঽস্মিন্প্রণতোঽস্মি তেভ্যঃ

॥ 25 ॥

শ্লোক 27

রক্ষাংসি ভূতান্যসুরাংস্তথোগ্রা-

-ন্নির্নাশযন্তু ত্বশিবং প্রজানাম্ ।

আদ্যাঃ সুরাণামমরেশপূজ্যা-

-স্তৃপ্যন্তু তেঽস্মিন্প্রণতোঽস্মিতেভ্যঃ

॥ 26 ॥

শ্লোক 28

অগ্নিস্বাত্তা বর্হিষদ আজ্যপাঃ সোমপাস্তথা ।

ব্রজন্তু তৃপ্তিং শ্রাদ্ধেঽস্মিন্পিতরস্তর্পিতা মযা

॥ 27 ॥

শ্লোক 29

অগ্নিস্বাত্তাঃ পিতৃগণাঃ প্রাচীং রক্ষন্তু মে দিশম্ ।

তথা বর্হিষদঃ পান্তু যাম্যাং মে পিতরঃ সদা ।

প্রতীচীমাজ্যপাস্তদ্বদুদীচীমপি সোমপাঃ

॥ 28 ॥

শ্লোক 30

রক্ষোভূতপিশাচেভ্যস্তথৈবাসুরদোষতঃ ।

সর্বতঃ পিতরো রক্ষাং কুর্বন্তু মম নিত্যশঃ

॥ 29 ॥

শ্লোক 31

বিশ্বো বিশ্বভুগারাধ্যো ধর্মো ধন্যঃ শুভাননঃ ।

ভূতিদো ভূতিকৃদ্ভূতিঃ পিতৄণাং যে গণা নব

॥ 30 ॥

শ্লোক 32

কল্যাণঃ কল্যদঃ কর্তা কল্যঃ কল্যতরাশ্রযঃ ।

কল্যতাহেতুরনঘঃ ষডিমে তে গণাঃ স্মৃতাঃ

॥ 31 ॥

শ্লোক 33

বরো বরেণ্যো বরদস্তুষ্টিদঃ পুষ্টিদস্তথা ।

বিশ্বপাতা তথা ধাতা সপ্তৈতে চ গণাঃ স্মৃতাঃ

॥ 32 ॥

শ্লোক 34

মহান্মহাত্মা মহিতো মহিমাবান্মহাবলঃ ।

গণাঃ পঞ্চ তথৈবৈতে পিতৄণাং পাপনাশনাঃ

॥ 33 ॥

শ্লোক 35

সুখদো ধনদশ্চান্যো ধর্মদোঽন্যশ্চ ভূতিদঃ ।

পিতৄণাং কথ্যতে চৈব তথা গণচতুষ্টযম্

॥ 34 ॥

শ্লোক 36

একত্রিংশত্পিতৃগণা যৈর্ব্যাপ্তমখিলং জগত্ ।

ত এবাত্র পিতৃগণাস্তুষ্যন্তু চ মদাহিতম্

॥ 35 ॥

শ্লোক 37

ইতি শ্রী গরুডপুরাণে ঊননবতিতমোঽধ্যাযে রুচিকৃত পিতৃ স্তোত্রম্ ।