మూక పఞ్చ శతి 5 - మన్దస్మిత శతకమ్

మూక పఞ్చ శతి 5 - మన్దస్మిత శతకమ్

శ్లోక 1

బధ్నీమో వయమఞ్జలిం ప్రతిదినం బన్ధచ్ఛిదే దేహినాం

కన్దర్పాగమతన్త్రమూలగురవే కల్యాణకేలీభువే ।

కామాక్ష్యా ఘనసారపుఞ్జరజసే కామద్రుహశ్చక్షుషాం

మన్దారస్తబకప్రభామదముషే మన్దస్మితజ్యోతిషే

శ్లోక 2

సధ్రీచే నవమల్లికాసుమనసాం నాసాగ్రముక్తామణే-

రాచార్యాయ మృణాలకాణ్డమహసాం నైసర్గికాయ ద్విషే ।

స్వర్ధున్యా సహ యుధ్వేన హిమరుచేరర్ధాసనాధ్యాసినే

కామాక్ష్యాః స్మితమఞ్జరీధవలిమాద్వైతాయ తస్మై నమః

॥1॥

శ్లోక 3

కర్పూరద్యుతిచాతురీమతితరామల్పీయసీం కుర్వతీ

దౌర్భాగ్యోదయమేవ సంవిదధతీ దౌషాకరీణాం త్విషామ్ ।

క్షుల్లానేవ మనోజ్ఞమల్లినికరాన్ఫుల్లానపి వ్యఞ్జతీ

కామాక్ష్యా మృదులస్మితాంశులహరీ కామప్రసూరస్తు మే

॥2॥

శ్లోక 4

యా పీనస్తనమణ్డలోపరి లసత్కర్పూరలేపాయతే

యా నీలేక్షణరాత్రికాన్తితతిషు జ్యోత్స్నాప్రరోహాయతే ।

యా సౌన్దర్యధునీతరఙ్గతతిషు వ్యాలోలహంసాయతే

కామాక్ష్యాః శిశిరీకరోతు హృదయం సా మే స్మితప్రాచురీ

॥3॥

శ్లోక 5

యేషాం గచ్ఛతి పూర్వపక్షసరణిం కౌముద్వతః శ్వేతిమా

యేషాం సన్తతమారురుక్షతి తులాకక్ష్యాం శరచ్చన్ద్రమాః ।

యేషామిచ్ఛతి కమ్బురప్యసులభామన్తేవసత్ప్రక్రియాం

కామాక్ష్యా మమతాం హరన్తు మమ తే హాసత్విషామఙ్కురాః

॥4॥

శ్లోక 6

ఆశాసీమసు సన్తతం విదధతీ నైశాకరీం వ్యాక్రియాం

కాశానామభిమానభఙ్గకలనాకౌశల్యమాబిభ్రతీ ।

ఈశానేన విలోకితా సకుతుకం కామాక్షి తే కల్మష-

క్లేశాపాయకరీ చకాస్తి లహరీ మన్దస్మితజ్యోతిషామ్

॥5॥

శ్లోక 7

ఆరూఢస్య సమున్నతస్తనతటీసామ్రాజ్యసింహాసనం

కన్దర్పస్య విభోర్జగత్త్రయప్రాకట్యముద్రానిధేః ।

యస్యాశ్చామరచాతురీం కలయతే రశ్మిచ్ఛటా చఞ్చలా

సా మన్దస్మితమఞ్జరీ భవతు నః కామాయ కామాక్షి తే

॥6॥

శ్లోక 8

శమ్భోర్యా పరిరమ్భసమ్భ్రమవిధౌ నైర్మల్యసీమానిధిః

గైర్వాణీవ తరఙ్గిణీ కృతమృదుస్యన్దాం కలిన్దాత్మజామ్ ।

కల్మాషీకురుతే కలఙ్కసుషమాం కణ్ఠస్థలీచుమ్బినీం

కామాక్ష్యాః స్మితకన్దలీ భవతు నః కల్యాణసన్దోహినీ

॥7॥

శ్లోక 9

జేతుం హారలతామివ స్తనతటీం సఞ్జగ్ముషీ సన్తతం

గన్తుం నిర్మలతామివ ద్విగుణితాం మగ్నా కృపాస్త్రోతసి ।

లబ్ధుం విస్మయనీయతామివ హరం రాగాకులం కుర్వతీ

మఞ్జుస్తే స్మితమఞ్జరీ భవభయం మథ్నాతు కామాక్షి మే

॥8॥

శ్లోక 10

శ్వేతాపి ప్రకటం నిశాకరరుచాం మాలిన్యమాతన్వతీ

శీతాపి స్మరపావకం పశుపతేః సన్ధుక్షయన్తీ సదా ।

స్వాభావ్యాదధరాశ్రితాపి నమతాముచ్చైర్దిశన్తీ గతిం

కామాక్షి స్ఫుటమన్తరా స్ఫురతు నస్త్వన్మన్దహాసప్రభా

॥9॥

శ్లోక 11

వక్త్రశ్రీసరసీజలే తరలితభ్రూవల్లికల్లోలితే

కాలిమ్నా దధతీ కటాక్షజనుషా మాధువ్రతీం వ్యాపృతిమ్ ।

నిర్నిద్రామలపుణ్డరీకకుహనాపాణ్డిత్యమాబిభ్రతీ

కామాక్ష్యాః స్మితచాతురీ మమ మనః కాతర్యమున్మూలయేత్

॥10॥

శ్లోక 12

నిత్యం బాధితబన్ధుజీవమధరం మైత్రీజుషం పల్లవైః

శుద్ధస్య ద్విజమణ్డలస్య చ తిరస్కర్తారమప్యాశ్రితా ।

యా వైమల్యవతీ సదైవ నమతాం చేతః పునీతేతరాం

కామాక్ష్యా హృదయం ప్రసాదయతు మే సా మన్దహాసప్రభా

॥11॥

శ్లోక 13

ద్రుహ్యన్తీ తమసే ముహుః కుముదినీసాహాయ్యమాబిభ్రతీ

యాన్తీ చన్ద్రకిశోరశేఖరవపుఃసౌధాఙ్గణే ప్రేఙ్ఖణమ్ ।

జ్ఞానామ్భోనిధివీచికాం సుమనసాం కూలఙ్కషాం కుర్వతీ

కామాక్ష్యాః స్మితకౌముదీ హరతు మే సంసారతాపోదయమ్

॥12॥

శ్లోక 14

కాశ్మీరద్రవధాతుకర్దమరుచా కల్మాషతాం బిభ్రతీ

హంసౌధైరివ కుర్వతీ పరిచితిం హారీకృతైర్మౌక్తికైః ।

వక్షోజన్మతుషారశైలకటకే సఞ్చారమాతన్వతీ

కామాక్ష్యా మృదులస్మితద్యుతిమయీ భాగీరథీ భాసతే

॥13॥

శ్లోక 15

కమ్బోర్వంశపరమ్పరా ఇవ కృపాసన్తానవల్లీభువః

సమ్ఫుల్లస్తబకా ఇవ ప్రసృమరా మూర్తాః ప్రసాదా ఇవ ।

వాక్పీయూషకణా ఇవ త్రిపథగాపర్యాయభేదా ఇవ

భ్రాజన్తే తవ మన్దహాసకిరణాః కాఞ్చీపురీనాయికే

॥14॥

శ్లోక 16

వక్షోజే ఘనసారపత్రరచనాభఙ్గీసపత్నాయితా

కణ్ఠే మౌక్తికహారయష్టికిరణవ్యాపారముద్రాయితా ।

ఓష్ఠశ్రీనికురుమ్బపల్లవపుటే ప్రేఙ్ఖత్ప్రసూనాయితా

కామాక్షి స్ఫురతాం మదీయహృదయే త్వన్మన్దహాసప్రభా

॥15॥

శ్లోక 17

యేషాం బిన్దురివోపరి ప్రచలితో నాసాగ్రముక్తామణిః

యేషాం దీన ఇవాధికణ్ఠమయతే హారః కరాలమ్బనమ్ ।

యేషాం బన్ధురివోష్ఠయోరరుణిమా ధత్తే స్వయం రఞ్జనం

కామాక్ష్యాః ప్రభవన్తు తే మమ శివోల్లాసాయ హాసాఙ్కురాః

॥16॥

శ్లోక 18

యా జాడ్యామ్బునిధిం క్షిణోతి భజతాం వైరాయతే కైరవైః

నిత్యం యాం నియమేన యా చ యతతే కర్తుం త్రిణేత్రోత్సవమ్ ।

బిమ్బం చాన్ద్రమసం చ వఞ్చయతి యా గర్వేణ సా తాదృశీ

కామాక్షి స్మితమఞ్జరీ తవ కథం జ్యోత్స్నేత్యసౌ కీర్త్యతే

॥17॥

శ్లోక 19

ఆరుఢా రభసాత్పురః పురరిపోరాశ్లేషణోపక్రమే

యా తే మాతరుపైతి దివ్యతటినీశఙ్కాకరీ తత్క్షణమ్ ।

ఓష్ఠౌ వేపయతి భ్రువౌ కుటిలయత్యానమ్రయత్యాననం

తాం వన్దే మృదుహాసపూరసుషమామేకామ్రనాథప్రియే

॥18॥

శ్లోక 20

వక్త్రేన్దోస్తవ చన్ద్రికా స్మితతతిర్వల్గు స్ఫురన్తీ సతాం

స్యాచ్చేద్యుక్తిమిదం చకోరమనసాం కామాక్షి కౌతూహలమ్ ।

ఏతచ్చిత్రమహర్నిశం యదధికామేషా రుచిం గాహతే

బిమ్బోష్ఠద్యుమణిప్రభాస్వపి చ యద్బిబ్బోకమాలమ్బతే

॥19॥

శ్లోక 21

సాదృశ్యం కలశామ్బుధేర్వహతి యత్కామాక్షి మన్దస్మితం

శోభామోష్ఠరుచామ్బ విద్రుమభవామేతాద్భిదాం బ్రూమహే ।

ఏకస్మాదుదితం పురా కిల పపౌ శర్వః పురాణః పుమాన్

ఏతన్మధ్యసముద్భవం రసయతే మాధుర్యరూపం రసమ్

॥20॥

శ్లోక 22

ఉత్తుఙ్గస్తనకుమ్భశైలకటకే విస్తారికస్తూరికా-

పత్రశ్రీజుషి చఞ్చలాః స్మితరుచః కామాక్షి తే కోమలాః ।

సన్ధ్యాదీధితిరఞ్జితా ఇవ ముహుః సాన్ద్రాధరజ్యోతిషా

వ్యాలోలామలశారదాభ్రశకలవ్యాపారమాతన్వతే

॥21॥

శ్లోక 23

క్షీరం దూరత ఏవ తిష్ఠతు కథం వైమల్యమాత్రాదిదం

మాతస్తే సహపాఠవీథిమయతాం మన్దస్మితైర్మఞ్జులైః ।

కిం చేయం తు భిదాస్తి దోహనవశాదేకం తు సఞ్జాయతే

కామాక్షి స్వయమర్థితం ప్రణమతామన్యత్తు దోదుహ్యతే

॥22॥

శ్లోక 24

కర్పూరైరమృతైర్జగజ్జనని తే కామాక్షి చన్ద్రాతపైః

ముక్తాహారగుణైర్మృణాలవలయైర్ముగ్ధస్మితశ్రీరియమ్ ।

శ్రీకాఞ్చీపురనాయికే సమతయా సంస్తూయతే సజ్జనైః

తత్తాదృఙ్మమ తాపశాన్తివిధయే కిం దేవి మన్దాయతే

॥23॥

శ్లోక 25

మధ్యేగర్భితమఞ్జువాక్యలహరీమాధ్వీఝరీశీతలా

మన్దారస్తబకాయతే జనని తే మన్దస్మితాంశుచ్ఛటా ।

యస్యా వర్ధయితుం ముహుర్వికసనం కామాక్షి కామద్రుహో

వల్గుర్వీక్షణవిభ్రమవ్యతికరో వాసన్తమాసాయతే

॥24॥

శ్లోక 26

బిమ్బోష్ఠద్యుతిపుఞ్జరఞ్జితరుచిస్త్వన్మన్దహాసచ్ఛటా ।

కల్యాణం గిరిసార్వభౌమతనయే కల్లోలయత్వాశు మే ।

ఫుల్లన్మల్లిపినద్ధహల్లకమయీ మాలేవ యా పేశలా

శ్రీకాఞ్చీశ్వరి మారమర్దితురురోమధ్యే ముహుర్లమ్బతే

॥25॥

శ్లోక 27

బిభ్రాణా శరదభ్రవిభ్రమదశాం విద్యోతమానాప్యసో

కామాక్షి స్మితమఞ్జరీ కిరతి తే కారుణ్యధారారసమ్ ।

ఆశ్చర్యం శిశిరీకరోతి జగతీశ్చాలోక్య చైనామహో

కామం ఖేలతి నీలకణ్ఠహృదయం కౌతూహలాన్దోలితమ్

॥26॥

శ్లోక 28

ప్రేఙ్ఖత్ప్రౌఢకటాక్షకుఞ్జకుహరేష్వత్యచ్ఛగుచ్ఛాయితం

వక్త్రేన్దుచ్ఛవిసిన్ధువీచినిచయే ఫేనప్రతానాయితమ్ ।

నైరన్తర్యవిజృమ్భితస్తనతటే నైచోలపట్టాయితం

కాలుష్యం కబలీకరోతు మమ తే కామాక్షి మన్దస్మితమ్

॥27॥

శ్లోక 29

పీయూషం తవ మన్థరస్మితమితి వ్యర్థైవ సాపప్రథా

కామాక్షి ధ్రువమీదృశం యది భవేదేతత్కథం వా శివే ।

మన్దారస్య కథాలవం న సహతే మథ్నాతి మన్దాకినీ-

మిన్దుం నిన్దతి కీర్తితేఽపి కలశీపాథోధిమీర్ష్యాయతే

॥28॥

శ్లోక 30

విశ్వేషాం నయనోత్సవం వితనుతాం విద్యోతతాం చన్ద్రమా

విఖ్యాతో మదనాన్తకేన ముకుటీమధ్యే చ సమ్మాన్యతామ్ ।

ఆః కిం జాతమనేన హాససుషమామాలోక్య కామాక్షి తే

కాలఙ్కీమవలమ్బతే ఖలు దశాం కల్మాషహీనోఽప్యసౌ

॥29॥

శ్లోక 31

చేతః శీతలయన్తు నః పశుపతేరానన్దజీవాతవో

నమ్రాణాం నయనాధ్వసీమసు శరచ్చన్ద్రాతపోపక్రమాః ।

సంసారాఖ్యసరోరుహాకరఖలీకారే తుషారోత్కరాః

కామాక్షి స్మరకీర్తిబీజనికరాస్త్వన్మన్దహాసాఙ్కురాః

॥30॥

శ్లోక 32

కర్మౌఘాఖ్యతమఃకచాకచికరాన్కామాక్షి సఞ్చిన్తయే

త్వన్మన్దస్మితరోచిషాం త్రిభువనక్షేమఙ్కరానఙ్కురాన్ ।

యే వక్త్రం శిశిరశ్రియో వికసితం చన్ద్రాతపామ్భోరుహ-

ద్వేషోద్ధేషోణచాతురీమివ తిరస్కర్తుం పరిష్కుర్వతే

॥31॥

శ్లోక 33

కుర్యుర్నః కులశైలరాజతనయే కూలఙ్కషం మఙ్గలం

కున్దస్పర్ధనచుఞ్చవస్తవ శివే మన్దస్మితప్రక్రమాః ।

యే కామాక్షి సమస్తసాక్షినయనం సన్తోషయన్తీశ్వరం

కర్పూరప్రకరా ఇవ ప్రసృమరాః పుంసామసాధారణాః

॥32॥

శ్లోక 34

కమ్రేణ స్నపయస్వ కర్మకుహనాచోరేణ మారాగమ-

వ్యాఖ్యాశిక్షణదీక్షితేన విదుషామక్షీణలక్ష్మీపుషా ।

కామాక్షి స్మితకన్దలేన కలుషస్ఫోటక్రియాచుఞ్చునా

కారుణ్యామృతవీచికావిహరణప్రాచుర్యధుర్యేణ మామ్

॥33॥

శ్లోక 35

త్వన్మన్దస్మితకన్దలస్య నియతం కామాక్షి శఙ్కామహే

బిమ్బః కశ్చన నూతనః ప్రచలితో నైశాకరః శీకరః ।

కిఞ్చ క్షీరపయోనిధిః ప్రతినిధిః స్వర్వాహినీవీచికా-

బిబ్వోకోఽపి విడమ్బ ఏవ కుహనా మల్లీమతల్లీరుచః

॥34॥

శ్లోక 36

దుష్కర్మార్కనిసర్గకర్కశమహస్సమ్పర్కతపతం మిల-

త్పఙ్కం శఙ్కరవల్లభే మమ మనః కాఞ్చీపురాలఙ్క్రియే ।

అమ్బ త్వన్మృదులస్మితామృతరసే మఙ్క్త్వా విధూయ వ్యథా-

మానన్దోదయసౌధశృఙ్గపదవీమారోఢుమాకాఙ్క్షతి

॥35॥

శ్లోక 37

నమ్రాణాం నగరాజశేఖరసుతే నాకాలయానాం పురః

కామాక్షి త్వరయా విపత్ప్రశమేన కారుణ్యధారాః కిరన్ ।

ఆగచ్ఛన్తమనుగ్రహం ప్రకటయన్నానన్దబీజాని తే

నాసీరే మృదుహాస ఏవ తనుతే నాథే సుధాశీతలః

॥36॥

శ్లోక 38

కామాక్షి ప్రథమానవిభ్రమనిధిః కన్దర్పదర్పప్రసూః

ముగ్ధస్తే మృదుహాస ఏవ గిరిజే ముష్ణాతు మే కిల్బిషమ్ ।

యం ద్రష్టుం విహితే కరగ్రహ ఉమే శమ్భుస్త్రపామీలితం

స్వైరం కారయతి స్మ తాణ్డవవినోదానన్దినా తణ్డునా

॥37॥

శ్లోక 39

క్షుణ్ణం కేనచిదేవ ధీరమనసా కుత్రాపి నానాజనైః

కర్మగ్రన్థినియన్త్రితైరసుగమం కామాక్షి సామాన్యతః ।

ముగ్ధైర్ద్రుష్టుమశక్యమేవ మనసా మూఢసయ మే మౌక్తికం

మార్గం దర్శయతు ప్రదీప ఇవ తే మన్దస్మితశ్రీరియమ్

॥38॥

శ్లోక 40

జ్యోత్స్నాకాన్తిభిరేవ నిర్మలతరం నైశాకరం మణ్డలం

హంసైరేవ శరద్విలాససమయే వ్యాకోచమమ్భోరుహమ్ ।

స్వచ్ఛైరేవ వికస్వరైరుడుగుణైః కామాక్షి బిమ్బం దివః

పుణ్యైరేవ మృదుస్మితైస్తవ ముఖం పుష్ణాతి శోభాభరమ్

॥39॥

శ్లోక 41

మానగ్రన్థివిధున్తుదేన రభసాదాస్వాద్యమానే నవ-

ప్రేమాడమ్బరపూర్ణిమాహిమకరే కామాక్షి తే తత్క్షణమ్ ।

ఆలోక్య స్మితచన్ద్రికాం పునరిమామున్మీలనం జగ్ముషీం

చేతః శీలయతే చకోరచరితం చన్ద్రార్ధచూడామణేః

॥40॥

శ్లోక 42

కామాక్షి స్మితమఞ్జరీం తవ భజే యస్యాస్త్విషామఙ్కురా-

నాపీనస్తనపానలాలసతయా నిశ్శఙ్కమఙ్కేశయః ।

ఊర్ధ్వం వీక్ష్య వికర్షతి ప్రసృమరానుద్దామయా శుణ్డయా

సూనుసుతే బిసశఙ్కయాశు కుహనాదన్తావలగ్రామణీః

॥41॥

శ్లోక 43

గాఢాశ్లేషవిమర్దసమ్భ్రమవశాదుద్దామముక్తాగుణ-

ప్రాలమ్బే కుచకుమ్భయోర్విగలితే దక్షద్విషో వక్షసి ।

యా సఖ్యేన పినహ్యతి ప్రచురయా భాసా తదీయాం దశాం

సా మే ఖేలతు కామకోటి హృదయే సాన్ద్రస్మితాంశుచ్ఛటా

॥42॥

శ్లోక 44

మన్దారే తవ మన్థరస్మితరుచాం మాత్సర్యమాలోక్యతే

కామాక్షి స్మరశాసనే చ నియతో రాగోదయో లక్ష్యతే ।

చాన్ద్రీషు ద్యుతిమఞ్జరీషు చ మహాన్ద్వేషాఙ్కురో దృశ్యతే

శుద్ధానాం కథమీదృశీ గిరిసుతేఽతిశుద్ధా దశా కథ్యతామ్

॥43॥

శ్లోక 45

పీయూషం ఖలు పీయతే సురజనైర్దుగ్ధామ్బుధిర్మథ్యతే

మాహేశైశ్చ జటాకలాపనిగడైర్మన్దాకినీ నహ్యతే ।

శీతాంశుః పరిభూయతే చ తమసా తస్మాదనేతాదృశీ

కామాక్షి స్మితమఞ్జరీ తవ వచోవైదగ్ధ్యముల్లఙ్ఘతే

॥44॥

శ్లోక 46

ఆశఙ్కే తవ మన్దహాసలహరీమన్యాదృశీం చన్ద్రికా-

మేకామ్రేశకుటుమ్బిని ప్రతిపదం యస్యాః ప్రభాసఙ్గమే ।

వక్షోజామ్బురుహే న తే రచయతః కాఞ్చిద్దశాం కౌఙ్మలీ-

మాస్యామ్భోరుహమమ్బ కిఞ్చ శనకైరాలమ్బతే ఫుల్లతామ్

॥45॥

శ్లోక 47

ఆస్తీర్ణాధరకాన్తిపల్లవచయే పాతం ముహుర్జగ్ముషీ

మారద్రోహిణి కన్దలత్స్మరశరజ్వాలావలీర్వ్యఞ్జతీ ।

నిన్దన్తీ ఘనసారహారవలయజ్యోత్స్నామృణాలాని తే

కామాక్షి స్మితచాతురీ విరహిణీరీతిం జగాహేతరామ్

॥46॥

శ్లోక 48

సూర్యాలోకవిధౌ వికాసమధికం యాన్తీ హరన్తీ తమ-

స్సన్దోహం నమతాం నిజస్మరణతో దోషాకరద్వేషిణీ ।

నిర్యాన్తీ వదనారవిన్దకుహరాన్నిర్ధూతజాడ్యా నృణాం

శ్రీకామాక్షి తవ స్మితద్యుతిమయీ చిత్రీయతే చన్ద్రికా

॥47॥

శ్లోక 49

కుణ్ఠీకుర్యురమీ కుబోధఘటనామస్మన్మనోమాథినీం

శ్రీకామాక్షి శివఙ్కరాస్తవ శివే శ్రీమన్దహాసాఙ్కురాః ।

యే తన్వన్తి నిరన్తరం తరుణిమస్తమ్బేరమగ్రామణీ-

కుమ్భద్వన్ద్వవిడమ్బిని స్తనతటే ముక్తాకుథాడమ్బరమ్

॥48॥

శ్లోక 50

ప్రేఙ్ఖన్తః శరదమ్బుదా ఇవ శనైః ప్రేమానిలైః ప్రేరితా

మజ్జన్తో మన్దనారికణ్ఠసుషమాసిన్ధౌ ముహుర్మన్థరమ్ ।

శ్రీకామాక్షి తవ స్మితాంశునికరాః శ్యామాయమానశ్రియో

నీలామ్భోధరనైపుణీం తత ఇతో నిర్నిద్రయన్త్యఞ్జసా

॥49॥

శ్లోక 51

వ్యాపారం చతురాననైకవిహృతౌ వ్యాకుర్వతీ కుర్వతీ

రుద్రాక్షగ్రహణం మహేశి సతతం వాగూర్మికల్లోలితా ।

ఉత్ఫుల్లం ధవలారవిన్దమధరీకృత్య స్ఫురన్తీ సదా

శ్రీకామాక్షి సరస్వతీ విజయతే త్వన్మన్దహాసప్రభా

॥50॥

శ్లోక 52

కర్పూరద్యుతితస్కరేణ మహసా కల్మాషయత్యాననం

శ్రీకాఞ్చీపురనాయికే పతిరివ శ్రీమన్దహాసోఽపి తే ।

ఆలిఙ్గత్యతిపీవరాం స్తనతటీం బిమ్బాధరం చుమ్బతి

ప్రౌఢం రాగభరం వ్యనక్తి మనసో ధైర్యం ధునీతేతరామ్

॥51॥

శ్లోక 53

వైశద్యేన చ విశ్వతాపహరణక్రీడాపటీయస్తయా

పాణ్డిత్యేన పచేలిమేన జగతాం నేత్రోత్సవోత్పాదేన ।

కామాక్షి స్మితకన్దలైస్తవ తులామారోఢుముద్యోగినీ

జ్యోత్స్నాసౌ జలరాశిపోషణతయా దూష్యాం ప్రపన్నా దశామ్

॥52॥

శ్లోక 54

లావణ్యామ్బుజినీమృణాలవలయైః శృఙ్గారగన్ధద్విప-

గ్రామణ్యః శ్రుతిచామరైస్తరుణిమస్వారాజ్యతేజోఙ్కురైః ।

ఆనన్దామృతసిన్ధువీచిపృషతైరాస్యాబ్జహంసైస్తవ

శ్రీకామాక్షి మథాన మన్దహసితైర్మత్కం మనఃకల్మషమ్

॥53॥

శ్లోక 55

ఉత్తుఙ్గస్తనమణ్డలీపరిచలన్మాణిక్యహారచ్ఛటా-

చఞ్చచ్ఛోణిమపుఞ్జమధ్యసరణిం మాతః పరిష్కుర్వతీ ।

యా వైదగ్ధ్యముపైతి శఙ్కరజటాకాన్తారవాటీపత-

త్స్వర్వాపీపయసః స్మితద్యుతిరసౌ కామాక్షి తే మఞ్జులా

॥54॥

శ్లోక 56

సన్నామైకజుషా జనేన సులభం సంసూచయన్తీ శనై-

రుత్తుఙ్గస్య చిరాదనుగ్రహతరోరుత్పత్స్యమానం ఫలమ్ ।

ప్రాథమ్యేన వికస్వరా కుసుమవత్ప్రాగల్భ్యమభ్యేయుషీ

కామాక్షి స్మితచాతురీ తవ మమ క్షేమఙ్కరీ కల్పతామ్

॥55॥

శ్లోక 57

ధానుష్కాగ్రసరస్య లోలకుటిలభ్రూలేఖయా బిభ్రతో

లీలాలోకశిలీముఖం నవవయస్సామ్రాజ్యలక్ష్మీపుషః ।

జేతుం మన్మథమర్దినం జనని తే కామాక్షి హాసః స్వయం

వల్గుర్విభ్రమభూభృతో వితనుతే సేనాపతిప్రక్రియామ్

॥56॥

శ్లోక 58

యన్నాకమ్పత కాలకూటకబలీకారే చుచుమ్బే న యద్-

గ్లాన్యా చక్షుషి రూషితానలశిఖే రుద్రస్య తత్తాదృశమ్ ।

చేతో యత్ప్రసభం స్మరజ్వరశిఖిజ్వాలేన లేలిహ్యతే

తత్కామాక్షి తవ స్మితాంశుకలికాహేలాభవం ప్రాభవమ్

॥57॥

శ్లోక 59

సమ్భిన్నేవ సుపర్వలోకతటినీ వీచీచయైర్యామునైః

సమ్మిశ్రేవ శశాఙ్కదీప్తిలహరీ నీలైర్మహానీరదైః ।

కామాక్షి స్ఫురితా తవ స్మితరుచిః కాలాఞ్జనస్పర్ధినా

కాలిమ్నా కచరోచిషాం వ్యతికరే కాఞ్చిద్దశామశ్నుతే

॥58॥

శ్లోక 60

జానీమో జగదీశ్వరప్రణయిని త్వన్మన్దహాసప్రభాం

శ్రీకామాక్షి సరోజినీమభినవామేషా యతః సర్వదా ।

ఆస్యేన్దోరవలోకేన పశుపతేరభ్యేతి సమ్ఫుల్లతాం

తన్ద్రాలుస్తదభావ ఏవ తనుతే తద్వైపరీత్యక్రమమ్

॥59॥

శ్లోక 61

యాన్తీ లోహితిమానమభ్రతటినీ ధాతుచ్ఛటాకర్దమైః

భాన్తీ బాలగభస్తిమాలికిరణైర్మేఘావలీ శారదీ ।

బిమ్బోష్ఠద్యుతిపుఞ్జచుమ్బనకలాశోణాయమానేన తే

కామాక్షి స్మితరోచిషా సమదశామారోఢుమాకాఙ్క్షతే

॥60॥

శ్లోక 62

శ్రీకామాక్షి ముఖేన్దుభూషణమిదం మన్దస్మితం తావకం

నేత్రానన్దకరం తథా హిమకరో గచ్ఛేద్యథా తిగ్మతామ్ ।

శీతం దేవి తథా యథా హిమజలం సన్తాపముద్రాస్పదం

శ్వేతం కిఞ్చ తథా యథా మలినతాం ధత్తే చ ముక్తామణిః

॥61॥

శ్లోక 63

త్వన్మన్దస్మితమఞ్జరీం ప్రసృమరాం కామాక్షి చన్ద్రాతపం

సన్తః సన్తతమామనన్త్యమలతా తల్లక్షణం లక్ష్యతే ।

అస్మాకం న ధునోతి తాపకమధికం ధూనోతి నాభ్యన్తరం

ధ్వాన్తం తత్ఖలు దుఃఖినో వయమిదం కేనోతి నో విద్మహే

॥62॥

శ్లోక 64

నమ్రస్య ప్రణయప్రరూఢకలహచ్ఛేదాయ పాదాబ్జయోః

మన్దం చన్ద్రకిశోరశేఖరమణేః కామాక్షి రాగేణ తే ।

బన్ధూకప్రసవశ్రియం జితవతో బంహీయసీం తాదృశీం

బిమ్బోష్ఠస్య రుచిం నిరస్య హసితజ్యోత్స్నా వయస్యాయతే

॥63॥

శ్లోక 65

ముక్తానాం పరిమోచనం విదధతస్తత్ప్రీతినిష్పాదినీ

భూయో దూరత ఏవ ధూతమరుతస్తత్పాలనం తన్వతీ ।

ఉద్భూతస్య జలాన్తరాదవిరతం తద్దూరతాం జగ్ముషీ

కామాక్షి స్మితమఞ్జరీ తవ కథం కమ్బోస్తులామశ్నుతే

॥64॥

శ్లోక 66

శ్రీకామాక్షి తవ స్మితద్యుతిఝరీవైదగ్ధ్యలీలాయితం

పశ్యన్తోఽపి నిరన్తరం సువిమలమ్మన్యా జగన్మణ్డలే ।

లోకం హాసయితుం కిమర్థమనిశం ప్రాకాశ్యమాతన్వతే

మన్దాక్షం విరహయ్య మఙ్గలతరం మన్దారచన్ద్రాదయః

॥65॥

శ్లోక 67

క్షీరాబ్ధేరపి శైలరాజతనయే త్వన్మన్దహాసస్య చ

శ్రీకామాక్షి వలక్షిమోదయనిధేః కిఞ్చిద్భిదాం బ్రూమహే ।

ఏకస్మై పురుషాయ దేవి స దదౌ లక్ష్మీం కదాచిత్పురా

సర్వేభ్యోఽపి దదాత్యసౌ తు సతతం లక్ష్మీం చ వాగీశ్వరీమ్

॥66॥

శ్లోక 68

శ్రీకాఞ్చీపురరత్నదీపకలికే తాన్యేవ మేనాత్మజే

చాకోరాణి కులాని దేవి సుతరాం ధన్యాని మన్యామహే ।

కమ్పాతీరకుటుమ్బచఙ్క్రమకలాచుఞ్చూని చఞ్చూపుటైః

నిత్యం యాని తవ స్మితేన్దుమహసామాస్వాదమాతన్వతే

॥67॥

శ్లోక 69

శైత్యప్రక్రమమాశ్రితోఽపి నమతాం జాడ్యప్రథాం ధూనయన్

నైర్మల్యం పరమం గతోఽపి గిరిశం రాగాకులం చారయన్ ।

లీలాలాపపురస్సరోఽపి సతతం వాచంయమాన్ప్రీణయన్

కామాక్షి స్మితరోచిషాం తవ సముల్లాసః కథం వర్ణ్యతే

॥68॥

శ్లోక 70

శ్రోణీచఞ్చలమేఖలాముఖరితం లీలాగతం మన్థరం

భ్రూవల్లీచలనం కటాక్షవలనం మన్దాక్షవీక్షాచణమ్ ।

యద్వైదగ్ధ్యముఖేన మన్మథరిపుం సమ్మోహయన్త్యఞ్జసా

శ్రీకామాక్షి తవ స్మితాయ సతతం తస్మై నమ్సకుర్మహే

॥69॥

శ్లోక 71

శ్రీకామాక్షి మనోజ్ఞమన్దహసితజ్యోతిష్ప్రరోహే తవ

స్ఫీతశ్వేతిమసార్వభౌమసరణిప్రాగల్భ్యమభ్యేయుషి ।

చన్ద్రోఽయం యువరాజతాం కలయతే చేటీధురం చన్ద్రికా

శుద్ధా సా చ సుధాఝరీ సహచరీసాధర్మ్యమాలమ్బతే

॥70॥

శ్లోక 72

జ్యోత్స్నా కిం తనుతే ఫలం తనుమతామౌష్ణ్యప్రశాన్తిం వినా

త్వన్మన్దస్మితరోచిషా తనుమతాం కామాక్షి రోచిష్ణునా ।

సన్తాపో వినివార్యతే నవవయఃప్రాచుర్యమఙ్కూర్యతే

సౌన్దర్యం పరిపూర్యతే జగతి సా కీర్తిశ్చ సఞ్చార్యతే

॥71॥

శ్లోక 73

వైమల్యం కుముదశ్రియాం హిమరుచః కాన్త్యైవ సన్ధుక్ష్యతే

జ్యోత్స్నారోచిరపి ప్రదోషసమయం ప్రాప్యైవ సమ్పద్యతే ।

స్వచ్ఛత్వం నవమౌక్తికస్య పరమం సంస్కారతో దృశ్యతే

కామాక్ష్యాః స్మితదీధితేర్విశదిమా నైసర్గికో భాసతే

॥72॥

శ్లోక 74

ప్రాకాశ్యం పరమేశ్వరప్రణయిని త్వన్మన్దహాసశ్రియః

శ్రీకామాక్షి మమ క్షిణోతు మమతావైచక్షణీమక్షయామ్ ।

యద్భీత్యేవ నిలీయతే హిమకరో మేఘోదరే శుక్తికా-

గర్భే మౌక్తికమణ్డలీ చ సరసీమధ్యే మృణాలీ చ సా

॥73॥

శ్లోక 75

హేరమ్బే చ గుహే హర్షభరితం వాత్సల్యమఙ్కూరయత్

మారద్రోహిణి పూరుషే సహభువం ప్రేమాఙ్కురం వ్యఞ్జయత్ ।

ఆనమ్రేషు జనేషు పూర్ణకరుణావైదగ్ధ్యముత్తాలయత్

కామాక్షి స్మితమఞ్జసా తవ కథఙ్కారం మయా కథ్యతే

॥74॥

శ్లోక 76

సఙ్క్రుద్ధద్విజరాజకోఽప్యవిరతం కుర్వన్ద్విజైః సఙ్గమం

వాణీపద్ధతిదూరగోఽపి సతతం తత్సాహచర్యం వహన్ ।

అశ్రాన్తం పశుదుర్లభోఽపి కలయన్పత్యౌ పశూనాం రతిం

శ్రీకామాక్షి తవ స్మితామృతరసస్యన్దో మయి స్పన్దతామ్

॥75॥

శ్లోక 77

శ్రీకామాక్షి మహేశ్వరే నిరుపమప్రేమాఙ్కురప్రక్రమమం

నిత్యం యః ప్రకటీకరోతి సహజామున్నిద్రయన్మాధురీమ్ ।

తత్తాదృక్తవ మన్దహాసమహిమా మాతః కథం మానితాం

తన్మూర్ధ్నా సురనిమ్నగాం చ కలికామిన్దోశ్చ తాం నిన్దతి

॥76॥

శ్లోక 78

యే మాధుర్యవిహారమణ్టపభువో యే శైత్యముద్రాకరా

యే వైశద్యదశావిశేషసుభగాస్తే మన్దహాసాఙ్కురాః ।

కామాక్ష్యాః సహజం గుణత్రయమిదం పర్యాయతః కుర్వతాం

వాణీగుమ్ఫనడమ్బరే చ హృదయే కీర్తిప్రరోహే చ మే

॥77॥

శ్లోక 79

కామాక్ష్యా మృదులస్మితాంశునికరా దక్షాన్తకే వీక్షణే

మన్దాక్షగ్రహిలా హిమద్యుతిమయూఖాక్షేపదీక్షాఙ్కురాః ।

దాక్ష్యం పక్ష్మలయన్తు మాక్షికగుడద్రాక్షాభవం వాక్షు మే

సూక్ష్మం మోక్షపథం నిరీక్షితుమపి ప్రక్షాలయేయుర్మనః

॥78॥

శ్లోక 80

జాత్యా శీతశీతలాని మధురాణ్యేతాని పూతాని తే

గాఙ్గానీవ పయాంసి దేవి పటలాన్యల్పస్మితజ్యోతిషామ్ ।

ఏనఃపఙ్కపరమ్పరామలినితామేకామ్రనాథప్రియే

ప్రజ్ఞానాత్సుతరాం మదీయధిషణాం ప్రక్షాలయన్తు క్షణాత్

॥79॥

శ్లోక 81

అశ్రాన్తం పరతన్త్రితః పశుపతిస్త్వన్మన్దహాసాఙ్కురైః

శ్రీకామాక్షి తదీయవర్ణసమతాసఙ్గేన శఙ్కామహే ।

ఇన్దుం నాకధునీం చ శేఖరయతే మాలాం చ ధత్తే నవైః

వైకుణ్ఠైరవకుణ్ఠనం చ కురుతే ధూలీచయైర్భాస్మనైః

॥80॥

శ్లోక 82

శ్రీకాఞ్చీపురదేవతే మృదువచస్సౌరభ్యముద్రాస్పదం

ప్రౌఢప్రేమలతానవీనకుసుమం మన్దస్మితం తావకమ్ ।

మన్దం కన్దలతి ప్రియస్య వదనాలోకే సమాభాషణే

శ్లక్ష్ణే కుఙ్మలతి ప్రరూఢపులకే చాశ్లోషణే ఫుల్లతి

॥81॥

శ్లోక 83

కిం త్రైస్రోతసమమ్బికే పరిణతం స్రోతశ్చతుర్థం నవం

పీయూషస్య సమస్తతాపహరణం కింవా ద్వితీయం వపుః ।

కింస్విత్త్వన్నికటం గతం మధురిమాభ్యాసాయ గవ్యం పయః

శ్రీకాఞ్చీపురనాయకప్రియతమే మన్దస్మితం తావకమ్

॥82॥

శ్లోక 84

భూషా వక్త్రసరోరుహస్య సహజా వాచాం సఖీ శాశ్వతీ

నీవీ విభ్రమసన్తతేః పశుపతేః సౌధీ దృశాం పారణా ।

జీవాతుర్మదనశ్రియః శశిరుచేరుచ్చాటనీ దేవతా

శ్రీకామాక్షి గిరామభూమిమయతే హాసప్రభామఞ్జరీ

॥83॥

శ్లోక 85

సూతిః శ్వేతిమకన్దలస్య వసతిః శృఙ్గారసారశ్రియః

పూర్తిః సూక్తిఝరీరసస్య లహరీ కారుణ్యపాథోనిధేః ।

వాటీ కాచన కౌసుమీ మధురిమస్వారాజ్యలక్ష్మ్యాస్తవ

శ్రీకామాక్షి మమాస్తు మఙ్గలకరీ హాసప్రభాచాతురీ

॥84॥

శ్లోక 86

జన్తూనాం జనిదుఃఖమృత్యులహరీసన్తాపనం కృన్తతః

ప్రౌఢానుగ్రహపూర్ణశీతలరుచో నిత్యోదయం బిభ్రతః ।

శ్రీకామాక్షి విసృత్వరా ఇవ కరా హాసాఙ్కురాస్తే హఠా-

దాలోకేన నిహన్యురన్ధతమసస్తోమస్య మే సన్తతిమ్

॥85॥

శ్లోక 87

ఉత్తుఙ్గస్తనమణ్డలస్య విలసల్లావణ్యలీలానటీ-

రఙ్గస్య స్ఫుటమూర్ధ్వసీమని ముహుః ప్రాకాశ్యమభ్యేయుషీ ।

శ్రీకామాక్షి తవ స్మితద్యుతితతిర్బిమ్బోష్ఠకాన్త్యఙ్కురైః

చిత్రాం విద్రుమముద్రితాం వితనుతే మౌక్తీం వితానశ్రియమ్

॥86॥

శ్లోక 88

స్వాభావ్యాత్తవ వక్త్రమేవ లలితం సన్తోషసమ్పాదనం

శమ్భోః కిం పునరఞ్చితస్మితరుచః పాణ్డిత్యపాత్రీకృతమ్ ।

అమ్భోజం స్వత ఏవ సర్వజగతాం చక్షుఃప్రియమ్భావుకం

కామాక్షి స్ఫురితే శరద్వికసితే కీదృగ్విధం భ్రాజతే

॥87॥

శ్లోక 89

పుమ్భిర్నిర్మలమానసౌర్విదధతే మైత్రీం దృఢం నిర్మలాం

లబ్ధ్వా కర్మలయం చ నిర్మలతరాం కీర్తిం లభన్తేతరామ్ ।

సూక్తిం పక్ష్మలయన్తి నిర్మలతమాం యత్తావకాః సేవకాః

తత్కామాక్షి తవ స్మితస్య కలయా నైర్మల్యసీమానిధేః

॥88॥

శ్లోక 90

ఆకర్షన్నయనాని నాకిసదసాం శైత్యేన సంస్తమ్భయ-

న్నిన్దుం కిఞ్చ విమోహయన్పశుపతిం విశ్వార్తిముచ్చాటయన్ ।

హింసత్సంసృతిడమ్బరం తవ శివే హాసాహ్వయో మాన్త్రికః

శ్రీకామాక్షి మదీయమానసతమోవిద్వేషణే చేష్టతామ్

॥89॥

శ్లోక 91

క్షేపీయః క్షపయన్తు కల్మషభయాన్యస్మాకమల్పస్మిత-

జ్యోతిర్మణ్డలచఙ్క్రమాస్తవ శివే కామాక్షి రోచిష్ణవః ।

పీడాకర్మఠకర్మఘర్మసమయవ్యాపారతాపానల-

శ్రీపాతా నవహర్షవర్షణసుధాస్రోతస్వినీశీకరాః

॥90॥

శ్లోక 92

శ్రీకామాక్షి తవ స్మితైన్దవమహఃపూరే పరిమ్ఫూర్జతి

ప్రౌఢాం వారిధిచాతురీం కలయతే భక్తాత్మనాం ప్రాతిభమ్ ।

దౌర్గత్యప్రసరాస్తమఃపటలికాసాధర్మ్యమాబిభ్రతే

సర్వం కైరవసాహచర్యపదవీరీతిం విధత్తే పరమ్

॥91॥

శ్లోక 93

మన్దారాదిషు మన్మథారిమహిషి ప్రాకాశ్యరీతిం నిజాం

కాదాచిత్కతయా విశఙ్క్య బహుశో వైశద్యముద్రాగుణః ।

సాతత్యేన తవ స్మితే వితనుతే స్వైరాసనావాసనామ్

॥92॥

శ్లోక 94

ఇన్ధానే భవవీతిహోత్రనివహే కర్మౌఘచణ్డానిల-

ప్రౌఢిమ్నా బహులీకృతే నిపతితం సన్తాపచిన్తాకులమ్ ।

మాతర్మాం పరిషిఞ్చ కిఞ్చిదమలైః పీయూషవర్షైరివ

శ్రీకామాక్షి తవ స్మితద్యుతికణైః శైశిర్యలీలాకరైః

॥93॥

శ్లోక 95

భాషాయా రసనాగ్రఖేలనజుషః శృఙ్గారముద్రాసఖీ-

లీలాజాతరతేః సుఖేన నియమస్నానాయ మేనాత్మజే ।

శ్రీకామాక్షి సుధామయీవ శిశిరా స్రోతస్వినీ తావకీ

గాఢానన్దతరఙ్గితా విజయతే హాసప్రభాచాతురీ

॥94॥

శ్లోక 96

సన్తాపం విరలీకరోతు సకలం కామాక్షి మచ్చేతనా

మజ్జన్తీ మధురస్మితామరధునీకల్లోలజాలేషు తే ।

నైరన్తర్యముపేత్య మన్మథమరుల్లోలేషు యేషు స్ఫుటం

ప్రేమేన్దుః ప్రతిబిమ్బితో వితనుతే కౌతూహలం ధూర్జటేః

॥95॥

శ్లోక 97

చేతఃక్షీరపయోధిమన్థరచలద్రాగాఖ్యమన్థాచల-

క్షోభవ్యాపృతిసమ్భవాం జనని తే మన్దస్మితశ్రీసుధామ్ ।

స్వాదంస్వాదముదీతకౌతుకరసా నేత్రత్రయీ శాఙ్కరీ

శ్రీకామాక్షి నిరన్తరం పరిణమత్యానన్దవీచీమయీ

॥96॥

శ్లోక 98

ఆలోకే తవ పఞ్చసాయకరిపోరుద్దామకౌతూహల-

ప్రేఙ్ఖన్మారుతఘట్టనప్రచలితాదానన్దదుగ్ధామ్బుధేః ।

కాచిద్వీచిరుదఞ్చతి ప్రతినవా సంవిత్ప్రరోహాత్మికా

తాం కామాక్షి కవీశ్వరాః స్మితమితి వ్యాకుర్వతే సర్వదా

॥97॥

శ్లోక 99

సూక్తిః శీలయతే కిమద్రితనయే మన్దస్మితాత్తే ముహుః

మాధుర్యాగమసమ్ప్రదాయమథవా సూక్తేర్ను మన్దస్మితమ్ ।

ఇత్థం కామపి గాహతే మమ మనః సన్దేహమార్గభ్రమిం

శ్రీకామాక్షి న పారమార్థ్యసరణిస్ఫూర్తౌ నిధత్తే పదమ్

॥98॥

శ్లోక 100

క్రీడాలోలకృపాసరోరుహముఖీసౌధాఙ్గణేభ్యః కవి-

శ్రేణీవాక్పరిపాటికామృతఝరీసూతీగృహేభ్యః శివే ।

నిర్వాణాఙ్కురసార్వభౌమపదవీసింహాసనేభ్యస్తవ

శ్రీకామాక్షి మనోజ్ఞమన్దహసితజ్యోతిష్కణేభ్యో నమః

॥99॥

శ్లోక 101

ఆర్యామేవ విభావయన్మనసి యః పాదారవిన్దం పురః

పశ్యన్నారభతే స్తుతిం స నియతం లబ్ధ్వా కటాక్షచ్ఛవిమ్ ।

కామాక్ష్యా మృదులస్మితాంశులహరీజ్యోత్స్నావయస్యాన్వితామ్

ఆరోహత్యపవర్గసౌధవలభీమానన్దవీచీమయీమ్

॥100॥

శ్లోక 102

॥ ఇతి మన్దస్మితశతకం సమ్పూర్ణమ్ ॥

॥ ఇతి శ్రీ మూకపఞ్చశతీ సమ్పూర్ణా ॥

॥ఔం తత్ సత్ ॥