മൂക പഞ്ച ശതി 5 - മന്ദസ്മിത ശതകമ്

മൂക പഞ്ച ശതി 5 - മന്ദസ്മിത ശതകമ്

ശ്ലോക 1

ബധ്നീമോ വയമഞ്ജലിം പ്രതിദിനം ബന്ധച്ഛിദേ ദേഹിനാം

കന്ദര്പാഗമതന്ത്രമൂലഗുരവേ കല്യാണകേലീഭുവേ ।

കാമാക്ഷ്യാ ഘനസാരപുഞ്ജരജസേ കാമദ്രുഹശ്ചക്ഷുഷാം

മന്ദാരസ്തബകപ്രഭാമദമുഷേ മന്ദസ്മിതജ്യോതിഷേ

ശ്ലോക 2

സധ്രീചേ നവമല്ലികാസുമനസാം നാസാഗ്രമുക്താമണേ-

രാചാര്യായ മൃണാലകാണ്ഡമഹസാം നൈസര്ഗികായ ദ്വിഷേ ।

സ്വര്ധുന്യാ സഹ യുധ്വേന ഹിമരുചേരര്ധാസനാധ്യാസിനേ

കാമാക്ഷ്യാഃ സ്മിതമഞ്ജരീധവലിമാദ്വൈതായ തസ്മൈ നമഃ

॥1॥

ശ്ലോക 3

കര്പൂരദ്യുതിചാതുരീമതിതരാമല്പീയസീം കുര്വതീ

ദൌര്ഭാഗ്യോദയമേവ സംവിദധതീ ദൌഷാകരീണാം ത്വിഷാമ് ।

ക്ഷുല്ലാനേവ മനോജ്ഞമല്ലിനികരാന്ഫുല്ലാനപി വ്യഞ്ജതീ

കാമാക്ഷ്യാ മൃദുലസ്മിതാംശുലഹരീ കാമപ്രസൂരസ്തു മേ

॥2॥

ശ്ലോക 4

യാ പീനസ്തനമണ്ഡലോപരി ലസത്കര്പൂരലേപായതേ

യാ നീലേക്ഷണരാത്രികാന്തിതതിഷു ജ്യോത്സ്നാപ്രരോഹായതേ ।

യാ സൌന്ദര്യധുനീതരങ്ഗതതിഷു വ്യാലോലഹംസായതേ

കാമാക്ഷ്യാഃ ശിശിരീകരോതു ഹൃദയം സാ മേ സ്മിതപ്രാചുരീ

॥3॥

ശ്ലോക 5

യേഷാം ഗച്ഛതി പൂര്വപക്ഷസരണിം കൌമുദ്വതഃ ശ്വേതിമാ

യേഷാം സന്തതമാരുരുക്ഷതി തുലാകക്ഷ്യാം ശരച്ചന്ദ്രമാഃ ।

യേഷാമിച്ഛതി കമ്ബുരപ്യസുലഭാമന്തേവസത്പ്രക്രിയാം

കാമാക്ഷ്യാ മമതാം ഹരന്തു മമ തേ ഹാസത്വിഷാമങ്കുരാഃ

॥4॥

ശ്ലോക 6

ആശാസീമസു സന്തതം വിദധതീ നൈശാകരീം വ്യാക്രിയാം

കാശാനാമഭിമാനഭങ്ഗകലനാകൌശല്യമാബിഭ്രതീ ।

ഈശാനേന വിലോകിതാ സകുതുകം കാമാക്ഷി തേ കല്മഷ-

ക്ലേശാപായകരീ ചകാസ്തി ലഹരീ മന്ദസ്മിതജ്യോതിഷാമ്

॥5॥

ശ്ലോക 7

ആരൂഢസ്യ സമുന്നതസ്തനതടീസാമ്രാജ്യസിംഹാസനം

കന്ദര്പസ്യ വിഭോര്ജഗത്ത്രയപ്രാകട്യമുദ്രാനിധേഃ ।

യസ്യാശ്ചാമരചാതുരീം കലയതേ രശ്മിച്ഛടാ ചഞ്ചലാ

സാ മന്ദസ്മിതമഞ്ജരീ ഭവതു നഃ കാമായ കാമാക്ഷി തേ

॥6॥

ശ്ലോക 8

ശമ്ഭോര്യാ പരിരമ്ഭസമ്ഭ്രമവിധൌ നൈര്മല്യസീമാനിധിഃ

ഗൈര്വാണീവ തരങ്ഗിണീ കൃതമൃദുസ്യന്ദാം കലിന്ദാത്മജാമ് ।

കല്മാഷീകുരുതേ കലങ്കസുഷമാം കണ്ഠസ്ഥലീചുമ്ബിനീം

കാമാക്ഷ്യാഃ സ്മിതകന്ദലീ ഭവതു നഃ കല്യാണസന്ദോഹിനീ

॥7॥

ശ്ലോക 9

ജേതും ഹാരലതാമിവ സ്തനതടീം സഞ്ജഗ്മുഷീ സന്തതം

ഗന്തും നിര്മലതാമിവ ദ്വിഗുണിതാം മഗ്നാ കൃപാസ്ത്രോതസി ।

ലബ്ധും വിസ്മയനീയതാമിവ ഹരം രാഗാകുലം കുര്വതീ

മഞ്ജുസ്തേ സ്മിതമഞ്ജരീ ഭവഭയം മഥ്നാതു കാമാക്ഷി മേ

॥8॥

ശ്ലോക 10

ശ്വേതാപി പ്രകടം നിശാകരരുചാം മാലിന്യമാതന്വതീ

ശീതാപി സ്മരപാവകം പശുപതേഃ സന്ധുക്ഷയന്തീ സദാ ।

സ്വാഭാവ്യാദധരാശ്രിതാപി നമതാമുച്ചൈര്ദിശന്തീ ഗതിം

കാമാക്ഷി സ്ഫുടമന്തരാ സ്ഫുരതു നസ്ത്വന്മന്ദഹാസപ്രഭാ

॥9॥

ശ്ലോക 11

വക്ത്രശ്രീസരസീജലേ തരലിതഭ്രൂവല്ലികല്ലോലിതേ

കാലിമ്നാ ദധതീ കടാക്ഷജനുഷാ മാധുവ്രതീം വ്യാപൃതിമ് ।

നിര്നിദ്രാമലപുണ്ഡരീകകുഹനാപാണ്ഡിത്യമാബിഭ്രതീ

കാമാക്ഷ്യാഃ സ്മിതചാതുരീ മമ മനഃ കാതര്യമുന്മൂലയേത്

॥10॥

ശ്ലോക 12

നിത്യം ബാധിതബന്ധുജീവമധരം മൈത്രീജുഷം പല്ലവൈഃ

ശുദ്ധസ്യ ദ്വിജമണ്ഡലസ്യ ച തിരസ്കര്താരമപ്യാശ്രിതാ ।

യാ വൈമല്യവതീ സദൈവ നമതാം ചേതഃ പുനീതേതരാം

കാമാക്ഷ്യാ ഹൃദയം പ്രസാദയതു മേ സാ മന്ദഹാസപ്രഭാ

॥11॥

ശ്ലോക 13

ദ്രുഹ്യന്തീ തമസേ മുഹുഃ കുമുദിനീസാഹായ്യമാബിഭ്രതീ

യാന്തീ ചന്ദ്രകിശോരശേഖരവപുഃസൌധാങ്ഗണേ പ്രേങ്ഖണമ് ।

ജ്ഞാനാമ്ഭോനിധിവീചികാം സുമനസാം കൂലങ്കഷാം കുര്വതീ

കാമാക്ഷ്യാഃ സ്മിതകൌമുദീ ഹരതു മേ സംസാരതാപോദയമ്

॥12॥

ശ്ലോക 14

കാശ്മീരദ്രവധാതുകര്ദമരുചാ കല്മാഷതാം ബിഭ്രതീ

ഹംസൌധൈരിവ കുര്വതീ പരിചിതിം ഹാരീകൃതൈര്മൌക്തികൈഃ ।

വക്ഷോജന്മതുഷാരശൈലകടകേ സഞ്ചാരമാതന്വതീ

കാമാക്ഷ്യാ മൃദുലസ്മിതദ്യുതിമയീ ഭാഗീരഥീ ഭാസതേ

॥13॥

ശ്ലോക 15

കമ്ബോര്വംശപരമ്പരാ ഇവ കൃപാസന്താനവല്ലീഭുവഃ

സമ്ഫുല്ലസ്തബകാ ഇവ പ്രസൃമരാ മൂര്താഃ പ്രസാദാ ഇവ ।

വാക്പീയൂഷകണാ ഇവ ത്രിപഥഗാപര്യായഭേദാ ഇവ

ഭ്രാജന്തേ തവ മന്ദഹാസകിരണാഃ കാഞ്ചീപുരീനായികേ

॥14॥

ശ്ലോക 16

വക്ഷോജേ ഘനസാരപത്രരചനാഭങ്ഗീസപത്നായിതാ

കണ്ഠേ മൌക്തികഹാരയഷ്ടികിരണവ്യാപാരമുദ്രായിതാ ।

ഓഷ്ഠശ്രീനികുരുമ്ബപല്ലവപുടേ പ്രേങ്ഖത്പ്രസൂനായിതാ

കാമാക്ഷി സ്ഫുരതാം മദീയഹൃദയേ ത്വന്മന്ദഹാസപ്രഭാ

॥15॥

ശ്ലോക 17

യേഷാം ബിന്ദുരിവോപരി പ്രചലിതോ നാസാഗ്രമുക്താമണിഃ

യേഷാം ദീന ഇവാധികണ്ഠമയതേ ഹാരഃ കരാലമ്ബനമ് ।

യേഷാം ബന്ധുരിവോഷ്ഠയോരരുണിമാ ധത്തേ സ്വയം രഞ്ജനം

കാമാക്ഷ്യാഃ പ്രഭവന്തു തേ മമ ശിവോല്ലാസായ ഹാസാങ്കുരാഃ

॥16॥

ശ്ലോക 18

യാ ജാഡ്യാമ്ബുനിധിം ക്ഷിണോതി ഭജതാം വൈരായതേ കൈരവൈഃ

നിത്യം യാം നിയമേന യാ ച യതതേ കര്തും ത്രിണേത്രോത്സവമ് ।

ബിമ്ബം ചാന്ദ്രമസം ച വഞ്ചയതി യാ ഗര്വേണ സാ താദൃശീ

കാമാക്ഷി സ്മിതമഞ്ജരീ തവ കഥം ജ്യോത്സ്നേത്യസൌ കീര്ത്യതേ

॥17॥

ശ്ലോക 19

ആരുഢാ രഭസാത്പുരഃ പുരരിപോരാശ്ലേഷണോപക്രമേ

യാ തേ മാതരുപൈതി ദിവ്യതടിനീശങ്കാകരീ തത്ക്ഷണമ് ।

ഓഷ്ഠൌ വേപയതി ഭ്രുവൌ കുടിലയത്യാനമ്രയത്യാനനം

താം വന്ദേ മൃദുഹാസപൂരസുഷമാമേകാമ്രനാഥപ്രിയേ

॥18॥

ശ്ലോക 20

വക്ത്രേന്ദോസ്തവ ചന്ദ്രികാ സ്മിതതതിര്വല്ഗു സ്ഫുരന്തീ സതാം

സ്യാച്ചേദ്യുക്തിമിദം ചകോരമനസാം കാമാക്ഷി കൌതൂഹലമ് ।

ഏതച്ചിത്രമഹര്നിശം യദധികാമേഷാ രുചിം ഗാഹതേ

ബിമ്ബോഷ്ഠദ്യുമണിപ്രഭാസ്വപി ച യദ്ബിബ്ബോകമാലമ്ബതേ

॥19॥

ശ്ലോക 21

സാദൃശ്യം കലശാമ്ബുധേര്വഹതി യത്കാമാക്ഷി മന്ദസ്മിതം

ശോഭാമോഷ്ഠരുചാമ്ബ വിദ്രുമഭവാമേതാദ്ഭിദാം ബ്രൂമഹേ ।

ഏകസ്മാദുദിതം പുരാ കില പപൌ ശര്വഃ പുരാണഃ പുമാന്

ഏതന്മധ്യസമുദ്ഭവം രസയതേ മാധുര്യരൂപം രസമ്

॥20॥

ശ്ലോക 22

ഉത്തുങ്ഗസ്തനകുമ്ഭശൈലകടകേ വിസ്താരികസ്തൂരികാ-

പത്രശ്രീജുഷി ചഞ്ചലാഃ സ്മിതരുചഃ കാമാക്ഷി തേ കോമലാഃ ।

സന്ധ്യാദീധിതിരഞ്ജിതാ ഇവ മുഹുഃ സാന്ദ്രാധരജ്യോതിഷാ

വ്യാലോലാമലശാരദാഭ്രശകലവ്യാപാരമാതന്വതേ

॥21॥

ശ്ലോക 23

ക്ഷീരം ദൂരത ഏവ തിഷ്ഠതു കഥം വൈമല്യമാത്രാദിദം

മാതസ്തേ സഹപാഠവീഥിമയതാം മന്ദസ്മിതൈര്മഞ്ജുലൈഃ ।

കിം ചേയം തു ഭിദാസ്തി ദോഹനവശാദേകം തു സഞ്ജായതേ

കാമാക്ഷി സ്വയമര്ഥിതം പ്രണമതാമന്യത്തു ദോദുഹ്യതേ

॥22॥

ശ്ലോക 24

കര്പൂരൈരമൃതൈര്ജഗജ്ജനനി തേ കാമാക്ഷി ചന്ദ്രാതപൈഃ

മുക്താഹാരഗുണൈര്മൃണാലവലയൈര്മുഗ്ധസ്മിതശ്രീരിയമ് ।

ശ്രീകാഞ്ചീപുരനായികേ സമതയാ സംസ്തൂയതേ സജ്ജനൈഃ

തത്താദൃങ്മമ താപശാന്തിവിധയേ കിം ദേവി മന്ദായതേ

॥23॥

ശ്ലോക 25

മധ്യേഗര്ഭിതമഞ്ജുവാക്യലഹരീമാധ്വീഝരീശീതലാ

മന്ദാരസ്തബകായതേ ജനനി തേ മന്ദസ്മിതാംശുച്ഛടാ ।

യസ്യാ വര്ധയിതും മുഹുര്വികസനം കാമാക്ഷി കാമദ്രുഹോ

വല്ഗുര്വീക്ഷണവിഭ്രമവ്യതികരോ വാസന്തമാസായതേ

॥24॥

ശ്ലോക 26

ബിമ്ബോഷ്ഠദ്യുതിപുഞ്ജരഞ്ജിതരുചിസ്ത്വന്മന്ദഹാസച്ഛടാ ।

കല്യാണം ഗിരിസാര്വഭൌമതനയേ കല്ലോലയത്വാശു മേ ।

ഫുല്ലന്മല്ലിപിനദ്ധഹല്ലകമയീ മാലേവ യാ പേശലാ

ശ്രീകാഞ്ചീശ്വരി മാരമര്ദിതുരുരോമധ്യേ മുഹുര്ലമ്ബതേ

॥25॥

ശ്ലോക 27

ബിഭ്രാണാ ശരദഭ്രവിഭ്രമദശാം വിദ്യോതമാനാപ്യസോ

കാമാക്ഷി സ്മിതമഞ്ജരീ കിരതി തേ കാരുണ്യധാരാരസമ് ।

ആശ്ചര്യം ശിശിരീകരോതി ജഗതീശ്ചാലോക്യ ചൈനാമഹോ

കാമം ഖേലതി നീലകണ്ഠഹൃദയം കൌതൂഹലാന്ദോലിതമ്

॥26॥

ശ്ലോക 28

പ്രേങ്ഖത്പ്രൌഢകടാക്ഷകുഞ്ജകുഹരേഷ്വത്യച്ഛഗുച്ഛായിതം

വക്ത്രേന്ദുച്ഛവിസിന്ധുവീചിനിചയേ ഫേനപ്രതാനായിതമ് ।

നൈരന്തര്യവിജൃമ്ഭിതസ്തനതടേ നൈചോലപട്ടായിതം

കാലുഷ്യം കബലീകരോതു മമ തേ കാമാക്ഷി മന്ദസ്മിതമ്

॥27॥

ശ്ലോക 29

പീയൂഷം തവ മന്ഥരസ്മിതമിതി വ്യര്ഥൈവ സാപപ്രഥാ

കാമാക്ഷി ധ്രുവമീദൃശം യദി ഭവേദേതത്കഥം വാ ശിവേ ।

മന്ദാരസ്യ കഥാലവം ന സഹതേ മഥ്നാതി മന്ദാകിനീ-

മിന്ദും നിന്ദതി കീര്തിതേഽപി കലശീപാഥോധിമീര്ഷ്യായതേ

॥28॥

ശ്ലോക 30

വിശ്വേഷാം നയനോത്സവം വിതനുതാം വിദ്യോതതാം ചന്ദ്രമാ

വിഖ്യാതോ മദനാന്തകേന മുകുടീമധ്യേ ച സമ്മാന്യതാമ് ।

ആഃ കിം ജാതമനേന ഹാസസുഷമാമാലോക്യ കാമാക്ഷി തേ

കാലങ്കീമവലമ്ബതേ ഖലു ദശാം കല്മാഷഹീനോഽപ്യസൌ

॥29॥

ശ്ലോക 31

ചേതഃ ശീതലയന്തു നഃ പശുപതേരാനന്ദജീവാതവോ

നമ്രാണാം നയനാധ്വസീമസു ശരച്ചന്ദ്രാതപോപക്രമാഃ ।

സംസാരാഖ്യസരോരുഹാകരഖലീകാരേ തുഷാരോത്കരാഃ

കാമാക്ഷി സ്മരകീര്തിബീജനികരാസ്ത്വന്മന്ദഹാസാങ്കുരാഃ

॥30॥

ശ്ലോക 32

കര്മൌഘാഖ്യതമഃകചാകചികരാന്കാമാക്ഷി സഞ്ചിന്തയേ

ത്വന്മന്ദസ്മിതരോചിഷാം ത്രിഭുവനക്ഷേമങ്കരാനങ്കുരാന് ।

യേ വക്ത്രം ശിശിരശ്രിയോ വികസിതം ചന്ദ്രാതപാമ്ഭോരുഹ-

ദ്വേഷോദ്ധേഷോണചാതുരീമിവ തിരസ്കര്തും പരിഷ്കുര്വതേ

॥31॥

ശ്ലോക 33

കുര്യുര്നഃ കുലശൈലരാജതനയേ കൂലങ്കഷം മങ്ഗലം

കുന്ദസ്പര്ധനചുഞ്ചവസ്തവ ശിവേ മന്ദസ്മിതപ്രക്രമാഃ ।

യേ കാമാക്ഷി സമസ്തസാക്ഷിനയനം സന്തോഷയന്തീശ്വരം

കര്പൂരപ്രകരാ ഇവ പ്രസൃമരാഃ പുംസാമസാധാരണാഃ

॥32॥

ശ്ലോക 34

കമ്രേണ സ്നപയസ്വ കര്മകുഹനാചോരേണ മാരാഗമ-

വ്യാഖ്യാശിക്ഷണദീക്ഷിതേന വിദുഷാമക്ഷീണലക്ഷ്മീപുഷാ ।

കാമാക്ഷി സ്മിതകന്ദലേന കലുഷസ്ഫോടക്രിയാചുഞ്ചുനാ

കാരുണ്യാമൃതവീചികാവിഹരണപ്രാചുര്യധുര്യേണ മാമ്

॥33॥

ശ്ലോക 35

ത്വന്മന്ദസ്മിതകന്ദലസ്യ നിയതം കാമാക്ഷി ശങ്കാമഹേ

ബിമ്ബഃ കശ്ചന നൂതനഃ പ്രചലിതോ നൈശാകരഃ ശീകരഃ ।

കിഞ്ച ക്ഷീരപയോനിധിഃ പ്രതിനിധിഃ സ്വര്വാഹിനീവീചികാ-

ബിബ്വോകോഽപി വിഡമ്ബ ഏവ കുഹനാ മല്ലീമതല്ലീരുചഃ

॥34॥

ശ്ലോക 36

ദുഷ്കര്മാര്കനിസര്ഗകര്കശമഹസ്സമ്പര്കതപതം മില-

ത്പങ്കം ശങ്കരവല്ലഭേ മമ മനഃ കാഞ്ചീപുരാലങ്ക്രിയേ ।

അമ്ബ ത്വന്മൃദുലസ്മിതാമൃതരസേ മങ്ക്ത്വാ വിധൂയ വ്യഥാ-

മാനന്ദോദയസൌധശൃങ്ഗപദവീമാരോഢുമാകാങ്ക്ഷതി

॥35॥

ശ്ലോക 37

നമ്രാണാം നഗരാജശേഖരസുതേ നാകാലയാനാം പുരഃ

കാമാക്ഷി ത്വരയാ വിപത്പ്രശമേന കാരുണ്യധാരാഃ കിരന് ।

ആഗച്ഛന്തമനുഗ്രഹം പ്രകടയന്നാനന്ദബീജാനി തേ

നാസീരേ മൃദുഹാസ ഏവ തനുതേ നാഥേ സുധാശീതലഃ

॥36॥

ശ്ലോക 38

കാമാക്ഷി പ്രഥമാനവിഭ്രമനിധിഃ കന്ദര്പദര്പപ്രസൂഃ

മുഗ്ധസ്തേ മൃദുഹാസ ഏവ ഗിരിജേ മുഷ്ണാതു മേ കില്ബിഷമ് ।

യം ദ്രഷ്ടും വിഹിതേ കരഗ്രഹ ഉമേ ശമ്ഭുസ്ത്രപാമീലിതം

സ്വൈരം കാരയതി സ്മ താണ്ഡവവിനോദാനന്ദിനാ തണ്ഡുനാ

॥37॥

ശ്ലോക 39

ക്ഷുണ്ണം കേനചിദേവ ധീരമനസാ കുത്രാപി നാനാജനൈഃ

കര്മഗ്രന്ഥിനിയന്ത്രിതൈരസുഗമം കാമാക്ഷി സാമാന്യതഃ ।

മുഗ്ധൈര്ദ്രുഷ്ടുമശക്യമേവ മനസാ മൂഢസയ മേ മൌക്തികം

മാര്ഗം ദര്ശയതു പ്രദീപ ഇവ തേ മന്ദസ്മിതശ്രീരിയമ്

॥38॥

ശ്ലോക 40

ജ്യോത്സ്നാകാന്തിഭിരേവ നിര്മലതരം നൈശാകരം മണ്ഡലം

ഹംസൈരേവ ശരദ്വിലാസസമയേ വ്യാകോചമമ്ഭോരുഹമ് ।

സ്വച്ഛൈരേവ വികസ്വരൈരുഡുഗുണൈഃ കാമാക്ഷി ബിമ്ബം ദിവഃ

പുണ്യൈരേവ മൃദുസ്മിതൈസ്തവ മുഖം പുഷ്ണാതി ശോഭാഭരമ്

॥39॥

ശ്ലോക 41

മാനഗ്രന്ഥിവിധുന്തുദേന രഭസാദാസ്വാദ്യമാനേ നവ-

പ്രേമാഡമ്ബരപൂര്ണിമാഹിമകരേ കാമാക്ഷി തേ തത്ക്ഷണമ് ।

ആലോക്യ സ്മിതചന്ദ്രികാം പുനരിമാമുന്മീലനം ജഗ്മുഷീം

ചേതഃ ശീലയതേ ചകോരചരിതം ചന്ദ്രാര്ധചൂഡാമണേഃ

॥40॥

ശ്ലോക 42

കാമാക്ഷി സ്മിതമഞ്ജരീം തവ ഭജേ യസ്യാസ്ത്വിഷാമങ്കുരാ-

നാപീനസ്തനപാനലാലസതയാ നിശ്ശങ്കമങ്കേശയഃ ।

ഊര്ധ്വം വീക്ഷ്യ വികര്ഷതി പ്രസൃമരാനുദ്ദാമയാ ശുണ്ഡയാ

സൂനുസുതേ ബിസശങ്കയാശു കുഹനാദന്താവലഗ്രാമണീഃ

॥41॥

ശ്ലോക 43

ഗാഢാശ്ലേഷവിമര്ദസമ്ഭ്രമവശാദുദ്ദാമമുക്താഗുണ-

പ്രാലമ്ബേ കുചകുമ്ഭയോര്വിഗലിതേ ദക്ഷദ്വിഷോ വക്ഷസി ।

യാ സഖ്യേന പിനഹ്യതി പ്രചുരയാ ഭാസാ തദീയാം ദശാം

സാ മേ ഖേലതു കാമകോടി ഹൃദയേ സാന്ദ്രസ്മിതാംശുച്ഛടാ

॥42॥

ശ്ലോക 44

മന്ദാരേ തവ മന്ഥരസ്മിതരുചാം മാത്സര്യമാലോക്യതേ

കാമാക്ഷി സ്മരശാസനേ ച നിയതോ രാഗോദയോ ലക്ഷ്യതേ ।

ചാന്ദ്രീഷു ദ്യുതിമഞ്ജരീഷു ച മഹാന്ദ്വേഷാങ്കുരോ ദൃശ്യതേ

ശുദ്ധാനാം കഥമീദൃശീ ഗിരിസുതേഽതിശുദ്ധാ ദശാ കഥ്യതാമ്

॥43॥

ശ്ലോക 45

പീയൂഷം ഖലു പീയതേ സുരജനൈര്ദുഗ്ധാമ്ബുധിര്മഥ്യതേ

മാഹേശൈശ്ച ജടാകലാപനിഗഡൈര്മന്ദാകിനീ നഹ്യതേ ।

ശീതാംശുഃ പരിഭൂയതേ ച തമസാ തസ്മാദനേതാദൃശീ

കാമാക്ഷി സ്മിതമഞ്ജരീ തവ വചോവൈദഗ്ധ്യമുല്ലങ്ഘതേ

॥44॥

ശ്ലോക 46

ആശങ്കേ തവ മന്ദഹാസലഹരീമന്യാദൃശീം ചന്ദ്രികാ-

മേകാമ്രേശകുടുമ്ബിനി പ്രതിപദം യസ്യാഃ പ്രഭാസങ്ഗമേ ।

വക്ഷോജാമ്ബുരുഹേ ന തേ രചയതഃ കാഞ്ചിദ്ദശാം കൌങ്മലീ-

മാസ്യാമ്ഭോരുഹമമ്ബ കിഞ്ച ശനകൈരാലമ്ബതേ ഫുല്ലതാമ്

॥45॥

ശ്ലോക 47

ആസ്തീര്ണാധരകാന്തിപല്ലവചയേ പാതം മുഹുര്ജഗ്മുഷീ

മാരദ്രോഹിണി കന്ദലത്സ്മരശരജ്വാലാവലീര്വ്യഞ്ജതീ ।

നിന്ദന്തീ ഘനസാരഹാരവലയജ്യോത്സ്നാമൃണാലാനി തേ

കാമാക്ഷി സ്മിതചാതുരീ വിരഹിണീരീതിം ജഗാഹേതരാമ്

॥46॥

ശ്ലോക 48

സൂര്യാലോകവിധൌ വികാസമധികം യാന്തീ ഹരന്തീ തമ-

സ്സന്ദോഹം നമതാം നിജസ്മരണതോ ദോഷാകരദ്വേഷിണീ ।

നിര്യാന്തീ വദനാരവിന്ദകുഹരാന്നിര്ധൂതജാഡ്യാ നൃണാം

ശ്രീകാമാക്ഷി തവ സ്മിതദ്യുതിമയീ ചിത്രീയതേ ചന്ദ്രികാ

॥47॥

ശ്ലോക 49

കുണ്ഠീകുര്യുരമീ കുബോധഘടനാമസ്മന്മനോമാഥിനീം

ശ്രീകാമാക്ഷി ശിവങ്കരാസ്തവ ശിവേ ശ്രീമന്ദഹാസാങ്കുരാഃ ।

യേ തന്വന്തി നിരന്തരം തരുണിമസ്തമ്ബേരമഗ്രാമണീ-

കുമ്ഭദ്വന്ദ്വവിഡമ്ബിനി സ്തനതടേ മുക്താകുഥാഡമ്ബരമ്

॥48॥

ശ്ലോക 50

പ്രേങ്ഖന്തഃ ശരദമ്ബുദാ ഇവ ശനൈഃ പ്രേമാനിലൈഃ പ്രേരിതാ

മജ്ജന്തോ മന്ദനാരികണ്ഠസുഷമാസിന്ധൌ മുഹുര്മന്ഥരമ് ।

ശ്രീകാമാക്ഷി തവ സ്മിതാംശുനികരാഃ ശ്യാമായമാനശ്രിയോ

നീലാമ്ഭോധരനൈപുണീം തത ഇതോ നിര്നിദ്രയന്ത്യഞ്ജസാ

॥49॥

ശ്ലോക 51

വ്യാപാരം ചതുരാനനൈകവിഹൃതൌ വ്യാകുര്വതീ കുര്വതീ

രുദ്രാക്ഷഗ്രഹണം മഹേശി സതതം വാഗൂര്മികല്ലോലിതാ ।

ഉത്ഫുല്ലം ധവലാരവിന്ദമധരീകൃത്യ സ്ഫുരന്തീ സദാ

ശ്രീകാമാക്ഷി സരസ്വതീ വിജയതേ ത്വന്മന്ദഹാസപ്രഭാ

॥50॥

ശ്ലോക 52

കര്പൂരദ്യുതിതസ്കരേണ മഹസാ കല്മാഷയത്യാനനം

ശ്രീകാഞ്ചീപുരനായികേ പതിരിവ ശ്രീമന്ദഹാസോഽപി തേ ।

ആലിങ്ഗത്യതിപീവരാം സ്തനതടീം ബിമ്ബാധരം ചുമ്ബതി

പ്രൌഢം രാഗഭരം വ്യനക്തി മനസോ ധൈര്യം ധുനീതേതരാമ്

॥51॥

ശ്ലോക 53

വൈശദ്യേന ച വിശ്വതാപഹരണക്രീഡാപടീയസ്തയാ

പാണ്ഡിത്യേന പചേലിമേന ജഗതാം നേത്രോത്സവോത്പാദേന ।

കാമാക്ഷി സ്മിതകന്ദലൈസ്തവ തുലാമാരോഢുമുദ്യോഗിനീ

ജ്യോത്സ്നാസൌ ജലരാശിപോഷണതയാ ദൂഷ്യാം പ്രപന്നാ ദശാമ്

॥52॥

ശ്ലോക 54

ലാവണ്യാമ്ബുജിനീമൃണാലവലയൈഃ ശൃങ്ഗാരഗന്ധദ്വിപ-

ഗ്രാമണ്യഃ ശ്രുതിചാമരൈസ്തരുണിമസ്വാരാജ്യതേജോങ്കുരൈഃ ।

ആനന്ദാമൃതസിന്ധുവീചിപൃഷതൈരാസ്യാബ്ജഹംസൈസ്തവ

ശ്രീകാമാക്ഷി മഥാന മന്ദഹസിതൈര്മത്കം മനഃകല്മഷമ്

॥53॥

ശ്ലോക 55

ഉത്തുങ്ഗസ്തനമണ്ഡലീപരിചലന്മാണിക്യഹാരച്ഛടാ-

ചഞ്ചച്ഛോണിമപുഞ്ജമധ്യസരണിം മാതഃ പരിഷ്കുര്വതീ ।

യാ വൈദഗ്ധ്യമുപൈതി ശങ്കരജടാകാന്താരവാടീപത-

ത്സ്വര്വാപീപയസഃ സ്മിതദ്യുതിരസൌ കാമാക്ഷി തേ മഞ്ജുലാ

॥54॥

ശ്ലോക 56

സന്നാമൈകജുഷാ ജനേന സുലഭം സംസൂചയന്തീ ശനൈ-

രുത്തുങ്ഗസ്യ ചിരാദനുഗ്രഹതരോരുത്പത്സ്യമാനം ഫലമ് ।

പ്രാഥമ്യേന വികസ്വരാ കുസുമവത്പ്രാഗല്ഭ്യമഭ്യേയുഷീ

കാമാക്ഷി സ്മിതചാതുരീ തവ മമ ക്ഷേമങ്കരീ കല്പതാമ്

॥55॥

ശ്ലോക 57

ധാനുഷ്കാഗ്രസരസ്യ ലോലകുടിലഭ്രൂലേഖയാ ബിഭ്രതോ

ലീലാലോകശിലീമുഖം നവവയസ്സാമ്രാജ്യലക്ഷ്മീപുഷഃ ।

ജേതും മന്മഥമര്ദിനം ജനനി തേ കാമാക്ഷി ഹാസഃ സ്വയം

വല്ഗുര്വിഭ്രമഭൂഭൃതോ വിതനുതേ സേനാപതിപ്രക്രിയാമ്

॥56॥

ശ്ലോക 58

യന്നാകമ്പത കാലകൂടകബലീകാരേ ചുചുമ്ബേ ന യദ്-

ഗ്ലാന്യാ ചക്ഷുഷി രൂഷിതാനലശിഖേ രുദ്രസ്യ തത്താദൃശമ് ।

ചേതോ യത്പ്രസഭം സ്മരജ്വരശിഖിജ്വാലേന ലേലിഹ്യതേ

തത്കാമാക്ഷി തവ സ്മിതാംശുകലികാഹേലാഭവം പ്രാഭവമ്

॥57॥

ശ്ലോക 59

സമ്ഭിന്നേവ സുപര്വലോകതടിനീ വീചീചയൈര്യാമുനൈഃ

സമ്മിശ്രേവ ശശാങ്കദീപ്തിലഹരീ നീലൈര്മഹാനീരദൈഃ ।

കാമാക്ഷി സ്ഫുരിതാ തവ സ്മിതരുചിഃ കാലാഞ്ജനസ്പര്ധിനാ

കാലിമ്നാ കചരോചിഷാം വ്യതികരേ കാഞ്ചിദ്ദശാമശ്നുതേ

॥58॥

ശ്ലോക 60

ജാനീമോ ജഗദീശ്വരപ്രണയിനി ത്വന്മന്ദഹാസപ്രഭാം

ശ്രീകാമാക്ഷി സരോജിനീമഭിനവാമേഷാ യതഃ സര്വദാ ।

ആസ്യേന്ദോരവലോകേന പശുപതേരഭ്യേതി സമ്ഫുല്ലതാം

തന്ദ്രാലുസ്തദഭാവ ഏവ തനുതേ തദ്വൈപരീത്യക്രമമ്

॥59॥

ശ്ലോക 61

യാന്തീ ലോഹിതിമാനമഭ്രതടിനീ ധാതുച്ഛടാകര്ദമൈഃ

ഭാന്തീ ബാലഗഭസ്തിമാലികിരണൈര്മേഘാവലീ ശാരദീ ।

ബിമ്ബോഷ്ഠദ്യുതിപുഞ്ജചുമ്ബനകലാശോണായമാനേന തേ

കാമാക്ഷി സ്മിതരോചിഷാ സമദശാമാരോഢുമാകാങ്ക്ഷതേ

॥60॥

ശ്ലോക 62

ശ്രീകാമാക്ഷി മുഖേന്ദുഭൂഷണമിദം മന്ദസ്മിതം താവകം

നേത്രാനന്ദകരം തഥാ ഹിമകരോ ഗച്ഛേദ്യഥാ തിഗ്മതാമ് ।

ശീതം ദേവി തഥാ യഥാ ഹിമജലം സന്താപമുദ്രാസ്പദം

ശ്വേതം കിഞ്ച തഥാ യഥാ മലിനതാം ധത്തേ ച മുക്താമണിഃ

॥61॥

ശ്ലോക 63

ത്വന്മന്ദസ്മിതമഞ്ജരീം പ്രസൃമരാം കാമാക്ഷി ചന്ദ്രാതപം

സന്തഃ സന്തതമാമനന്ത്യമലതാ തല്ലക്ഷണം ലക്ഷ്യതേ ।

അസ്മാകം ന ധുനോതി താപകമധികം ധൂനോതി നാഭ്യന്തരം

ധ്വാന്തം തത്ഖലു ദുഃഖിനോ വയമിദം കേനോതി നോ വിദ്മഹേ

॥62॥

ശ്ലോക 64

നമ്രസ്യ പ്രണയപ്രരൂഢകലഹച്ഛേദായ പാദാബ്ജയോഃ

മന്ദം ചന്ദ്രകിശോരശേഖരമണേഃ കാമാക്ഷി രാഗേണ തേ ।

ബന്ധൂകപ്രസവശ്രിയം ജിതവതോ ബംഹീയസീം താദൃശീം

ബിമ്ബോഷ്ഠസ്യ രുചിം നിരസ്യ ഹസിതജ്യോത്സ്നാ വയസ്യായതേ

॥63॥

ശ്ലോക 65

മുക്താനാം പരിമോചനം വിദധതസ്തത്പ്രീതിനിഷ്പാദിനീ

ഭൂയോ ദൂരത ഏവ ധൂതമരുതസ്തത്പാലനം തന്വതീ ।

ഉദ്ഭൂതസ്യ ജലാന്തരാദവിരതം തദ്ദൂരതാം ജഗ്മുഷീ

കാമാക്ഷി സ്മിതമഞ്ജരീ തവ കഥം കമ്ബോസ്തുലാമശ്നുതേ

॥64॥

ശ്ലോക 66

ശ്രീകാമാക്ഷി തവ സ്മിതദ്യുതിഝരീവൈദഗ്ധ്യലീലായിതം

പശ്യന്തോഽപി നിരന്തരം സുവിമലമ്മന്യാ ജഗന്മണ്ഡലേ ।

ലോകം ഹാസയിതും കിമര്ഥമനിശം പ്രാകാശ്യമാതന്വതേ

മന്ദാക്ഷം വിരഹയ്യ മങ്ഗലതരം മന്ദാരചന്ദ്രാദയഃ

॥65॥

ശ്ലോക 67

ക്ഷീരാബ്ധേരപി ശൈലരാജതനയേ ത്വന്മന്ദഹാസസ്യ ച

ശ്രീകാമാക്ഷി വലക്ഷിമോദയനിധേഃ കിഞ്ചിദ്ഭിദാം ബ്രൂമഹേ ।

ഏകസ്മൈ പുരുഷായ ദേവി സ ദദൌ ലക്ഷ്മീം കദാചിത്പുരാ

സര്വേഭ്യോഽപി ദദാത്യസൌ തു സതതം ലക്ഷ്മീം ച വാഗീശ്വരീമ്

॥66॥

ശ്ലോക 68

ശ്രീകാഞ്ചീപുരരത്നദീപകലികേ താന്യേവ മേനാത്മജേ

ചാകോരാണി കുലാനി ദേവി സുതരാം ധന്യാനി മന്യാമഹേ ।

കമ്പാതീരകുടുമ്ബചങ്ക്രമകലാചുഞ്ചൂനി ചഞ്ചൂപുടൈഃ

നിത്യം യാനി തവ സ്മിതേന്ദുമഹസാമാസ്വാദമാതന്വതേ

॥67॥

ശ്ലോക 69

ശൈത്യപ്രക്രമമാശ്രിതോഽപി നമതാം ജാഡ്യപ്രഥാം ധൂനയന്

നൈര്മല്യം പരമം ഗതോഽപി ഗിരിശം രാഗാകുലം ചാരയന് ।

ലീലാലാപപുരസ്സരോഽപി സതതം വാചംയമാന്പ്രീണയന്

കാമാക്ഷി സ്മിതരോചിഷാം തവ സമുല്ലാസഃ കഥം വര്ണ്യതേ

॥68॥

ശ്ലോക 70

ശ്രോണീചഞ്ചലമേഖലാമുഖരിതം ലീലാഗതം മന്ഥരം

ഭ്രൂവല്ലീചലനം കടാക്ഷവലനം മന്ദാക്ഷവീക്ഷാചണമ് ।

യദ്വൈദഗ്ധ്യമുഖേന മന്മഥരിപും സമ്മോഹയന്ത്യഞ്ജസാ

ശ്രീകാമാക്ഷി തവ സ്മിതായ സതതം തസ്മൈ നമ്സകുര്മഹേ

॥69॥

ശ്ലോക 71

ശ്രീകാമാക്ഷി മനോജ്ഞമന്ദഹസിതജ്യോതിഷ്പ്രരോഹേ തവ

സ്ഫീതശ്വേതിമസാര്വഭൌമസരണിപ്രാഗല്ഭ്യമഭ്യേയുഷി ।

ചന്ദ്രോഽയം യുവരാജതാം കലയതേ ചേടീധുരം ചന്ദ്രികാ

ശുദ്ധാ സാ ച സുധാഝരീ സഹചരീസാധര്മ്യമാലമ്ബതേ

॥70॥

ശ്ലോക 72

ജ്യോത്സ്നാ കിം തനുതേ ഫലം തനുമതാമൌഷ്ണ്യപ്രശാന്തിം വിനാ

ത്വന്മന്ദസ്മിതരോചിഷാ തനുമതാം കാമാക്ഷി രോചിഷ്ണുനാ ।

സന്താപോ വിനിവാര്യതേ നവവയഃപ്രാചുര്യമങ്കൂര്യതേ

സൌന്ദര്യം പരിപൂര്യതേ ജഗതി സാ കീര്തിശ്ച സഞ്ചാര്യതേ

॥71॥

ശ്ലോക 73

വൈമല്യം കുമുദശ്രിയാം ഹിമരുചഃ കാന്ത്യൈവ സന്ധുക്ഷ്യതേ

ജ്യോത്സ്നാരോചിരപി പ്രദോഷസമയം പ്രാപ്യൈവ സമ്പദ്യതേ ।

സ്വച്ഛത്വം നവമൌക്തികസ്യ പരമം സംസ്കാരതോ ദൃശ്യതേ

കാമാക്ഷ്യാഃ സ്മിതദീധിതേര്വിശദിമാ നൈസര്ഗികോ ഭാസതേ

॥72॥

ശ്ലോക 74

പ്രാകാശ്യം പരമേശ്വരപ്രണയിനി ത്വന്മന്ദഹാസശ്രിയഃ

ശ്രീകാമാക്ഷി മമ ക്ഷിണോതു മമതാവൈചക്ഷണീമക്ഷയാമ് ।

യദ്ഭീത്യേവ നിലീയതേ ഹിമകരോ മേഘോദരേ ശുക്തികാ-

ഗര്ഭേ മൌക്തികമണ്ഡലീ ച സരസീമധ്യേ മൃണാലീ ച സാ

॥73॥

ശ്ലോക 75

ഹേരമ്ബേ ച ഗുഹേ ഹര്ഷഭരിതം വാത്സല്യമങ്കൂരയത്

മാരദ്രോഹിണി പൂരുഷേ സഹഭുവം പ്രേമാങ്കുരം വ്യഞ്ജയത് ।

ആനമ്രേഷു ജനേഷു പൂര്ണകരുണാവൈദഗ്ധ്യമുത്താലയത്

കാമാക്ഷി സ്മിതമഞ്ജസാ തവ കഥങ്കാരം മയാ കഥ്യതേ

॥74॥

ശ്ലോക 76

സങ്ക്രുദ്ധദ്വിജരാജകോഽപ്യവിരതം കുര്വന്ദ്വിജൈഃ സങ്ഗമം

വാണീപദ്ധതിദൂരഗോഽപി സതതം തത്സാഹചര്യം വഹന് ।

അശ്രാന്തം പശുദുര്ലഭോഽപി കലയന്പത്യൌ പശൂനാം രതിം

ശ്രീകാമാക്ഷി തവ സ്മിതാമൃതരസസ്യന്ദോ മയി സ്പന്ദതാമ്

॥75॥

ശ്ലോക 77

ശ്രീകാമാക്ഷി മഹേശ്വരേ നിരുപമപ്രേമാങ്കുരപ്രക്രമമം

നിത്യം യഃ പ്രകടീകരോതി സഹജാമുന്നിദ്രയന്മാധുരീമ് ।

തത്താദൃക്തവ മന്ദഹാസമഹിമാ മാതഃ കഥം മാനിതാം

തന്മൂര്ധ്നാ സുരനിമ്നഗാം ച കലികാമിന്ദോശ്ച താം നിന്ദതി

॥76॥

ശ്ലോക 78

യേ മാധുര്യവിഹാരമണ്ടപഭുവോ യേ ശൈത്യമുദ്രാകരാ

യേ വൈശദ്യദശാവിശേഷസുഭഗാസ്തേ മന്ദഹാസാങ്കുരാഃ ।

കാമാക്ഷ്യാഃ സഹജം ഗുണത്രയമിദം പര്യായതഃ കുര്വതാം

വാണീഗുമ്ഫനഡമ്ബരേ ച ഹൃദയേ കീര്തിപ്രരോഹേ ച മേ

॥77॥

ശ്ലോക 79

കാമാക്ഷ്യാ മൃദുലസ്മിതാംശുനികരാ ദക്ഷാന്തകേ വീക്ഷണേ

മന്ദാക്ഷഗ്രഹിലാ ഹിമദ്യുതിമയൂഖാക്ഷേപദീക്ഷാങ്കുരാഃ ।

ദാക്ഷ്യം പക്ഷ്മലയന്തു മാക്ഷികഗുഡദ്രാക്ഷാഭവം വാക്ഷു മേ

സൂക്ഷ്മം മോക്ഷപഥം നിരീക്ഷിതുമപി പ്രക്ഷാലയേയുര്മനഃ

॥78॥

ശ്ലോക 80

ജാത്യാ ശീതശീതലാനി മധുരാണ്യേതാനി പൂതാനി തേ

ഗാങ്ഗാനീവ പയാംസി ദേവി പടലാന്യല്പസ്മിതജ്യോതിഷാമ് ।

ഏനഃപങ്കപരമ്പരാമലിനിതാമേകാമ്രനാഥപ്രിയേ

പ്രജ്ഞാനാത്സുതരാം മദീയധിഷണാം പ്രക്ഷാലയന്തു ക്ഷണാത്

॥79॥

ശ്ലോക 81

അശ്രാന്തം പരതന്ത്രിതഃ പശുപതിസ്ത്വന്മന്ദഹാസാങ്കുരൈഃ

ശ്രീകാമാക്ഷി തദീയവര്ണസമതാസങ്ഗേന ശങ്കാമഹേ ।

ഇന്ദും നാകധുനീം ച ശേഖരയതേ മാലാം ച ധത്തേ നവൈഃ

വൈകുണ്ഠൈരവകുണ്ഠനം ച കുരുതേ ധൂലീചയൈര്ഭാസ്മനൈഃ

॥80॥

ശ്ലോക 82

ശ്രീകാഞ്ചീപുരദേവതേ മൃദുവചസ്സൌരഭ്യമുദ്രാസ്പദം

പ്രൌഢപ്രേമലതാനവീനകുസുമം മന്ദസ്മിതം താവകമ് ।

മന്ദം കന്ദലതി പ്രിയസ്യ വദനാലോകേ സമാഭാഷണേ

ശ്ലക്ഷ്ണേ കുങ്മലതി പ്രരൂഢപുലകേ ചാശ്ലോഷണേ ഫുല്ലതി

॥81॥

ശ്ലോക 83

കിം ത്രൈസ്രോതസമമ്ബികേ പരിണതം സ്രോതശ്ചതുര്ഥം നവം

പീയൂഷസ്യ സമസ്തതാപഹരണം കിംവാ ദ്വിതീയം വപുഃ ।

കിംസ്വിത്ത്വന്നികടം ഗതം മധുരിമാഭ്യാസായ ഗവ്യം പയഃ

ശ്രീകാഞ്ചീപുരനായകപ്രിയതമേ മന്ദസ്മിതം താവകമ്

॥82॥

ശ്ലോക 84

ഭൂഷാ വക്ത്രസരോരുഹസ്യ സഹജാ വാചാം സഖീ ശാശ്വതീ

നീവീ വിഭ്രമസന്തതേഃ പശുപതേഃ സൌധീ ദൃശാം പാരണാ ।

ജീവാതുര്മദനശ്രിയഃ ശശിരുചേരുച്ചാടനീ ദേവതാ

ശ്രീകാമാക്ഷി ഗിരാമഭൂമിമയതേ ഹാസപ്രഭാമഞ്ജരീ

॥83॥

ശ്ലോക 85

സൂതിഃ ശ്വേതിമകന്ദലസ്യ വസതിഃ ശൃങ്ഗാരസാരശ്രിയഃ

പൂര്തിഃ സൂക്തിഝരീരസസ്യ ലഹരീ കാരുണ്യപാഥോനിധേഃ ।

വാടീ കാചന കൌസുമീ മധുരിമസ്വാരാജ്യലക്ഷ്മ്യാസ്തവ

ശ്രീകാമാക്ഷി മമാസ്തു മങ്ഗലകരീ ഹാസപ്രഭാചാതുരീ

॥84॥

ശ്ലോക 86

ജന്തൂനാം ജനിദുഃഖമൃത്യുലഹരീസന്താപനം കൃന്തതഃ

പ്രൌഢാനുഗ്രഹപൂര്ണശീതലരുചോ നിത്യോദയം ബിഭ്രതഃ ।

ശ്രീകാമാക്ഷി വിസൃത്വരാ ഇവ കരാ ഹാസാങ്കുരാസ്തേ ഹഠാ-

ദാലോകേന നിഹന്യുരന്ധതമസസ്തോമസ്യ മേ സന്തതിമ്

॥85॥

ശ്ലോക 87

ഉത്തുങ്ഗസ്തനമണ്ഡലസ്യ വിലസല്ലാവണ്യലീലാനടീ-

രങ്ഗസ്യ സ്ഫുടമൂര്ധ്വസീമനി മുഹുഃ പ്രാകാശ്യമഭ്യേയുഷീ ।

ശ്രീകാമാക്ഷി തവ സ്മിതദ്യുതിതതിര്ബിമ്ബോഷ്ഠകാന്ത്യങ്കുരൈഃ

ചിത്രാം വിദ്രുമമുദ്രിതാം വിതനുതേ മൌക്തീം വിതാനശ്രിയമ്

॥86॥

ശ്ലോക 88

സ്വാഭാവ്യാത്തവ വക്ത്രമേവ ലലിതം സന്തോഷസമ്പാദനം

ശമ്ഭോഃ കിം പുനരഞ്ചിതസ്മിതരുചഃ പാണ്ഡിത്യപാത്രീകൃതമ് ।

അമ്ഭോജം സ്വത ഏവ സര്വജഗതാം ചക്ഷുഃപ്രിയമ്ഭാവുകം

കാമാക്ഷി സ്ഫുരിതേ ശരദ്വികസിതേ കീദൃഗ്വിധം ഭ്രാജതേ

॥87॥

ശ്ലോക 89

പുമ്ഭിര്നിര്മലമാനസൌര്വിദധതേ മൈത്രീം ദൃഢം നിര്മലാം

ലബ്ധ്വാ കര്മലയം ച നിര്മലതരാം കീര്തിം ലഭന്തേതരാമ് ।

സൂക്തിം പക്ഷ്മലയന്തി നിര്മലതമാം യത്താവകാഃ സേവകാഃ

തത്കാമാക്ഷി തവ സ്മിതസ്യ കലയാ നൈര്മല്യസീമാനിധേഃ

॥88॥

ശ്ലോക 90

ആകര്ഷന്നയനാനി നാകിസദസാം ശൈത്യേന സംസ്തമ്ഭയ-

ന്നിന്ദും കിഞ്ച വിമോഹയന്പശുപതിം വിശ്വാര്തിമുച്ചാടയന് ।

ഹിംസത്സംസൃതിഡമ്ബരം തവ ശിവേ ഹാസാഹ്വയോ മാന്ത്രികഃ

ശ്രീകാമാക്ഷി മദീയമാനസതമോവിദ്വേഷണേ ചേഷ്ടതാമ്

॥89॥

ശ്ലോക 91

ക്ഷേപീയഃ ക്ഷപയന്തു കല്മഷഭയാന്യസ്മാകമല്പസ്മിത-

ജ്യോതിര്മണ്ഡലചങ്ക്രമാസ്തവ ശിവേ കാമാക്ഷി രോചിഷ്ണവഃ ।

പീഡാകര്മഠകര്മഘര്മസമയവ്യാപാരതാപാനല-

ശ്രീപാതാ നവഹര്ഷവര്ഷണസുധാസ്രോതസ്വിനീശീകരാഃ

॥90॥

ശ്ലോക 92

ശ്രീകാമാക്ഷി തവ സ്മിതൈന്ദവമഹഃപൂരേ പരിമ്ഫൂര്ജതി

പ്രൌഢാം വാരിധിചാതുരീം കലയതേ ഭക്താത്മനാം പ്രാതിഭമ് ।

ദൌര്ഗത്യപ്രസരാസ്തമഃപടലികാസാധര്മ്യമാബിഭ്രതേ

സര്വം കൈരവസാഹചര്യപദവീരീതിം വിധത്തേ പരമ്

॥91॥

ശ്ലോക 93

മന്ദാരാദിഷു മന്മഥാരിമഹിഷി പ്രാകാശ്യരീതിം നിജാം

കാദാചിത്കതയാ വിശങ്ക്യ ബഹുശോ വൈശദ്യമുദ്രാഗുണഃ ।

സാതത്യേന തവ സ്മിതേ വിതനുതേ സ്വൈരാസനാവാസനാമ്

॥92॥

ശ്ലോക 94

ഇന്ധാനേ ഭവവീതിഹോത്രനിവഹേ കര്മൌഘചണ്ഡാനില-

പ്രൌഢിമ്നാ ബഹുലീകൃതേ നിപതിതം സന്താപചിന്താകുലമ് ।

മാതര്മാം പരിഷിഞ്ച കിഞ്ചിദമലൈഃ പീയൂഷവര്ഷൈരിവ

ശ്രീകാമാക്ഷി തവ സ്മിതദ്യുതികണൈഃ ശൈശിര്യലീലാകരൈഃ

॥93॥

ശ്ലോക 95

ഭാഷായാ രസനാഗ്രഖേലനജുഷഃ ശൃങ്ഗാരമുദ്രാസഖീ-

ലീലാജാതരതേഃ സുഖേന നിയമസ്നാനായ മേനാത്മജേ ।

ശ്രീകാമാക്ഷി സുധാമയീവ ശിശിരാ സ്രോതസ്വിനീ താവകീ

ഗാഢാനന്ദതരങ്ഗിതാ വിജയതേ ഹാസപ്രഭാചാതുരീ

॥94॥

ശ്ലോക 96

സന്താപം വിരലീകരോതു സകലം കാമാക്ഷി മച്ചേതനാ

മജ്ജന്തീ മധുരസ്മിതാമരധുനീകല്ലോലജാലേഷു തേ ।

നൈരന്തര്യമുപേത്യ മന്മഥമരുല്ലോലേഷു യേഷു സ്ഫുടം

പ്രേമേന്ദുഃ പ്രതിബിമ്ബിതോ വിതനുതേ കൌതൂഹലം ധൂര്ജടേഃ

॥95॥

ശ്ലോക 97

ചേതഃക്ഷീരപയോധിമന്ഥരചലദ്രാഗാഖ്യമന്ഥാചല-

ക്ഷോഭവ്യാപൃതിസമ്ഭവാം ജനനി തേ മന്ദസ്മിതശ്രീസുധാമ് ।

സ്വാദംസ്വാദമുദീതകൌതുകരസാ നേത്രത്രയീ ശാങ്കരീ

ശ്രീകാമാക്ഷി നിരന്തരം പരിണമത്യാനന്ദവീചീമയീ

॥96॥

ശ്ലോക 98

ആലോകേ തവ പഞ്ചസായകരിപോരുദ്ദാമകൌതൂഹല-

പ്രേങ്ഖന്മാരുതഘട്ടനപ്രചലിതാദാനന്ദദുഗ്ധാമ്ബുധേഃ ।

കാചിദ്വീചിരുദഞ്ചതി പ്രതിനവാ സംവിത്പ്രരോഹാത്മികാ

താം കാമാക്ഷി കവീശ്വരാഃ സ്മിതമിതി വ്യാകുര്വതേ സര്വദാ

॥97॥

ശ്ലോക 99

സൂക്തിഃ ശീലയതേ കിമദ്രിതനയേ മന്ദസ്മിതാത്തേ മുഹുഃ

മാധുര്യാഗമസമ്പ്രദായമഥവാ സൂക്തേര്നു മന്ദസ്മിതമ് ।

ഇത്ഥം കാമപി ഗാഹതേ മമ മനഃ സന്ദേഹമാര്ഗഭ്രമിം

ശ്രീകാമാക്ഷി ന പാരമാര്ഥ്യസരണിസ്ഫൂര്തൌ നിധത്തേ പദമ്

॥98॥

ശ്ലോക 100

ക്രീഡാലോലകൃപാസരോരുഹമുഖീസൌധാങ്ഗണേഭ്യഃ കവി-

ശ്രേണീവാക്പരിപാടികാമൃതഝരീസൂതീഗൃഹേഭ്യഃ ശിവേ ।

നിര്വാണാങ്കുരസാര്വഭൌമപദവീസിംഹാസനേഭ്യസ്തവ

ശ്രീകാമാക്ഷി മനോജ്ഞമന്ദഹസിതജ്യോതിഷ്കണേഭ്യോ നമഃ

॥99॥

ശ്ലോക 101

ആര്യാമേവ വിഭാവയന്മനസി യഃ പാദാരവിന്ദം പുരഃ

പശ്യന്നാരഭതേ സ്തുതിം സ നിയതം ലബ്ധ്വാ കടാക്ഷച്ഛവിമ് ।

കാമാക്ഷ്യാ മൃദുലസ്മിതാംശുലഹരീജ്യോത്സ്നാവയസ്യാന്വിതാമ്

ആരോഹത്യപവര്ഗസൌധവലഭീമാനന്ദവീചീമയീമ്

॥100॥

ശ്ലോക 102

॥ ഇതി മന്ദസ്മിതശതകം സമ്പൂര്ണമ് ॥

॥ ഇതി ശ്രീ മൂകപഞ്ചശതീ സമ്പൂര്ണാ ॥

॥ഔം തത് സത് ॥