মূক পঞ্চ শতি 5 - মন্দস্মিত শতকম্

মূক পঞ্চ শতি 5 - মন্দস্মিত শতকম্

শ্লোক 1

বধ্নীমো বযমঞ্জলিং প্রতিদিনং বন্ধচ্ছিদে দেহিনাং

কন্দর্পাগমতন্ত্রমূলগুরবে কল্যাণকেলীভুবে ।

কামাক্ষ্যা ঘনসারপুঞ্জরজসে কামদ্রুহশ্চক্ষুষাং

মন্দারস্তবকপ্রভামদমুষে মন্দস্মিতজ্যোতিষে

শ্লোক 2

সধ্রীচে নবমল্লিকাসুমনসাং নাসাগ্রমুক্তামণে-

রাচার্যায মৃণালকাণ্ডমহসাং নৈসর্গিকায দ্বিষে ।

স্বর্ধুন্যা সহ যুধ্বেন হিমরুচেরর্ধাসনাধ্যাসিনে

কামাক্ষ্যাঃ স্মিতমঞ্জরীধবলিমাদ্বৈতায তস্মৈ নমঃ

॥1॥

শ্লোক 3

কর্পূরদ্যুতিচাতুরীমতিতরামল্পীযসীং কুর্বতী

দৌর্ভাগ্যোদযমেব সংবিদধতী দৌষাকরীণাং ত্বিষাম্ ।

ক্ষুল্লানেব মনোজ্ঞমল্লিনিকরান্ফুল্লানপি ব্যঞ্জতী

কামাক্ষ্যা মৃদুলস্মিতাংশুলহরী কামপ্রসূরস্তু মে

॥2॥

শ্লোক 4

যা পীনস্তনমণ্ডলোপরি লসত্কর্পূরলেপাযতে

যা নীলেক্ষণরাত্রিকান্তিততিষু জ্যোত্স্নাপ্ররোহাযতে ।

যা সৌন্দর্যধুনীতরঙ্গততিষু ব্যালোলহংসাযতে

কামাক্ষ্যাঃ শিশিরীকরোতু হৃদযং সা মে স্মিতপ্রাচুরী

॥3॥

শ্লোক 5

যেষাং গচ্ছতি পূর্বপক্ষসরণিং কৌমুদ্বতঃ শ্বেতিমা

যেষাং সন্ততমারুরুক্ষতি তুলাকক্ষ্যাং শরচ্চন্দ্রমাঃ ।

যেষামিচ্ছতি কম্বুরপ্যসুলভামন্তেবসত্প্রক্রিযাং

কামাক্ষ্যা মমতাং হরন্তু মম তে হাসত্বিষামঙ্কুরাঃ

॥4॥

শ্লোক 6

আশাসীমসু সন্ততং বিদধতী নৈশাকরীং ব্যাক্রিযাং

কাশানামভিমানভঙ্গকলনাকৌশল্যমাবিভ্রতী ।

ঈশানেন বিলোকিতা সকুতুকং কামাক্ষি তে কল্মষ-

ক্লেশাপাযকরী চকাস্তি লহরী মন্দস্মিতজ্যোতিষাম্

॥5॥

শ্লোক 7

আরূঢস্য সমুন্নতস্তনতটীসাম্রাজ্যসিংহাসনং

কন্দর্পস্য বিভোর্জগত্ত্রযপ্রাকট্যমুদ্রানিধেঃ ।

যস্যাশ্চামরচাতুরীং কলযতে রশ্মিচ্ছটা চঞ্চলা

সা মন্দস্মিতমঞ্জরী ভবতু নঃ কামায কামাক্ষি তে

॥6॥

শ্লোক 8

শম্ভোর্যা পরিরম্ভসম্ভ্রমবিধৌ নৈর্মল্যসীমানিধিঃ

গৈর্বাণীব তরঙ্গিণী কৃতমৃদুস্যন্দাং কলিন্দাত্মজাম্ ।

কল্মাষীকুরুতে কলঙ্কসুষমাং কণ্ঠস্থলীচুম্বিনীং

কামাক্ষ্যাঃ স্মিতকন্দলী ভবতু নঃ কল্যাণসন্দোহিনী

॥7॥

শ্লোক 9

জেতুং হারলতামিব স্তনতটীং সঞ্জগ্মুষী সন্ততং

গন্তুং নির্মলতামিব দ্বিগুণিতাং মগ্না কৃপাস্ত্রোতসি ।

লব্ধুং বিস্মযনীযতামিব হরং রাগাকুলং কুর্বতী

মঞ্জুস্তে স্মিতমঞ্জরী ভবভযং মথ্নাতু কামাক্ষি মে

॥8॥

শ্লোক 10

শ্বেতাপি প্রকটং নিশাকররুচাং মালিন্যমাতন্বতী

শীতাপি স্মরপাবকং পশুপতেঃ সন্ধুক্ষযন্তী সদা ।

স্বাভাব্যাদধরাশ্রিতাপি নমতামুচ্চৈর্দিশন্তী গতিং

কামাক্ষি স্ফুটমন্তরা স্ফুরতু নস্ত্বন্মন্দহাসপ্রভা

॥9॥

শ্লোক 11

বক্ত্রশ্রীসরসীজলে তরলিতভ্রূবল্লিকল্লোলিতে

কালিম্না দধতী কটাক্ষজনুষা মাধুব্রতীং ব্যাপৃতিম্ ।

নির্নিদ্রামলপুণ্ডরীককুহনাপাণ্ডিত্যমাবিভ্রতী

কামাক্ষ্যাঃ স্মিতচাতুরী মম মনঃ কাতর্যমুন্মূলযেত্

॥10॥

শ্লোক 12

নিত্যং বাধিতবন্ধুজীবমধরং মৈত্রীজুষং পল্লবৈঃ

শুদ্ধস্য দ্বিজমণ্ডলস্য চ তিরস্কর্তারমপ্যাশ্রিতা ।

যা বৈমল্যবতী সদৈব নমতাং চেতঃ পুনীতেতরাং

কামাক্ষ্যা হৃদযং প্রসাদযতু মে সা মন্দহাসপ্রভা

॥11॥

শ্লোক 13

দ্রুহ্যন্তী তমসে মুহুঃ কুমুদিনীসাহায্যমাবিভ্রতী

যান্তী চন্দ্রকিশোরশেখরবপুঃসৌধাঙ্গণে প্রেঙ্খণম্ ।

জ্ঞানাম্ভোনিধিবীচিকাং সুমনসাং কূলঙ্কষাং কুর্বতী

কামাক্ষ্যাঃ স্মিতকৌমুদী হরতু মে সংসারতাপোদযম্

॥12॥

শ্লোক 14

কাশ্মীরদ্রবধাতুকর্দমরুচা কল্মাষতাং বিভ্রতী

হংসৌধৈরিব কুর্বতী পরিচিতিং হারীকৃতৈর্মৌক্তিকৈঃ ।

বক্ষোজন্মতুষারশৈলকটকে সঞ্চারমাতন্বতী

কামাক্ষ্যা মৃদুলস্মিতদ্যুতিমযী ভাগীরথী ভাসতে

॥13॥

শ্লোক 15

কম্বোর্বংশপরম্পরা ইব কৃপাসন্তানবল্লীভুবঃ

সম্ফুল্লস্তবকা ইব প্রসৃমরা মূর্তাঃ প্রসাদা ইব ।

বাক্পীযূষকণা ইব ত্রিপথগাপর্যাযভেদা ইব

ভ্রাজন্তে তব মন্দহাসকিরণাঃ কাঞ্চীপুরীনাযিকে

॥14॥

শ্লোক 16

বক্ষোজে ঘনসারপত্ররচনাভঙ্গীসপত্নাযিতা

কণ্ঠে মৌক্তিকহারযষ্টিকিরণব্যাপারমুদ্রাযিতা ।

ওষ্ঠশ্রীনিকুরুম্বপল্লবপুটে প্রেঙ্খত্প্রসূনাযিতা

কামাক্ষি স্ফুরতাং মদীযহৃদযে ত্বন্মন্দহাসপ্রভা

॥15॥

শ্লোক 17

যেষাং বিন্দুরিবোপরি প্রচলিতো নাসাগ্রমুক্তামণিঃ

যেষাং দীন ইবাধিকণ্ঠমযতে হারঃ করালম্বনম্ ।

যেষাং বন্ধুরিবোষ্ঠযোররুণিমা ধত্তে স্বযং রঞ্জনং

কামাক্ষ্যাঃ প্রভবন্তু তে মম শিবোল্লাসায হাসাঙ্কুরাঃ

॥16॥

শ্লোক 18

যা জাড্যাম্বুনিধিং ক্ষিণোতি ভজতাং বৈরাযতে কৈরবৈঃ

নিত্যং যাং নিযমেন যা চ যততে কর্তুং ত্রিণেত্রোত্সবম্ ।

বিম্বং চান্দ্রমসং চ বঞ্চযতি যা গর্বেণ সা তাদৃশী

কামাক্ষি স্মিতমঞ্জরী তব কথং জ্যোত্স্নেত্যসৌ কীর্ত্যতে

॥17॥

শ্লোক 19

আরুঢা রভসাত্পুরঃ পুররিপোরাশ্লেষণোপক্রমে

যা তে মাতরুপৈতি দিব্যতটিনীশঙ্কাকরী তত্ক্ষণম্ ।

ওষ্ঠৌ বেপযতি ভ্রুবৌ কুটিলযত্যানম্রযত্যাননং

তাং বন্দে মৃদুহাসপূরসুষমামেকাম্রনাথপ্রিযে

॥18॥

শ্লোক 20

বক্ত্রেন্দোস্তব চন্দ্রিকা স্মিতততির্বল্গু স্ফুরন্তী সতাং

স্যাচ্চেদ্যুক্তিমিদং চকোরমনসাং কামাক্ষি কৌতূহলম্ ।

এতচ্চিত্রমহর্নিশং যদধিকামেষা রুচিং গাহতে

বিম্বোষ্ঠদ্যুমণিপ্রভাস্বপি চ যদ্বিব্বোকমালম্বতে

॥19॥

শ্লোক 21

সাদৃশ্যং কলশাম্বুধের্বহতি যত্কামাক্ষি মন্দস্মিতং

শোভামোষ্ঠরুচাম্ব বিদ্রুমভবামেতাদ্ভিদাং ব্রূমহে ।

একস্মাদুদিতং পুরা কিল পপৌ শর্বঃ পুরাণঃ পুমান্

এতন্মধ্যসমুদ্ভবং রসযতে মাধুর্যরূপং রসম্

॥20॥

শ্লোক 22

উত্তুঙ্গস্তনকুম্ভশৈলকটকে বিস্তারিকস্তূরিকা-

পত্রশ্রীজুষি চঞ্চলাঃ স্মিতরুচঃ কামাক্ষি তে কোমলাঃ ।

সন্ধ্যাদীধিতিরঞ্জিতা ইব মুহুঃ সান্দ্রাধরজ্যোতিষা

ব্যালোলামলশারদাভ্রশকলব্যাপারমাতন্বতে

॥21॥

শ্লোক 23

ক্ষীরং দূরত এব তিষ্ঠতু কথং বৈমল্যমাত্রাদিদং

মাতস্তে সহপাঠবীথিমযতাং মন্দস্মিতৈর্মঞ্জুলৈঃ ।

কিং চেযং তু ভিদাস্তি দোহনবশাদেকং তু সঞ্জাযতে

কামাক্ষি স্বযমর্থিতং প্রণমতামন্যত্তু দোদুহ্যতে

॥22॥

শ্লোক 24

কর্পূরৈরমৃতৈর্জগজ্জননি তে কামাক্ষি চন্দ্রাতপৈঃ

মুক্তাহারগুণৈর্মৃণালবলযৈর্মুগ্ধস্মিতশ্রীরিযম্ ।

শ্রীকাঞ্চীপুরনাযিকে সমতযা সংস্তূযতে সজ্জনৈঃ

তত্তাদৃঙ্মম তাপশান্তিবিধযে কিং দেবি মন্দাযতে

॥23॥

শ্লোক 25

মধ্যেগর্ভিতমঞ্জুবাক্যলহরীমাধ্বীঝরীশীতলা

মন্দারস্তবকাযতে জননি তে মন্দস্মিতাংশুচ্ছটা ।

যস্যা বর্ধযিতুং মুহুর্বিকসনং কামাক্ষি কামদ্রুহো

বল্গুর্বীক্ষণবিভ্রমব্যতিকরো বাসন্তমাসাযতে

॥24॥

শ্লোক 26

বিম্বোষ্ঠদ্যুতিপুঞ্জরঞ্জিতরুচিস্ত্বন্মন্দহাসচ্ছটা ।

কল্যাণং গিরিসার্বভৌমতনযে কল্লোলযত্বাশু মে ।

ফুল্লন্মল্লিপিনদ্ধহল্লকমযী মালেব যা পেশলা

শ্রীকাঞ্চীশ্বরি মারমর্দিতুরুরোমধ্যে মুহুর্লম্বতে

॥25॥

শ্লোক 27

বিভ্রাণা শরদভ্রবিভ্রমদশাং বিদ্যোতমানাপ্যসো

কামাক্ষি স্মিতমঞ্জরী কিরতি তে কারুণ্যধারারসম্ ।

আশ্চর্যং শিশিরীকরোতি জগতীশ্চালোক্য চৈনামহো

কামং খেলতি নীলকণ্ঠহৃদযং কৌতূহলান্দোলিতম্

॥26॥

শ্লোক 28

প্রেঙ্খত্প্রৌঢকটাক্ষকুঞ্জকুহরেষ্বত্যচ্ছগুচ্ছাযিতং

বক্ত্রেন্দুচ্ছবিসিন্ধুবীচিনিচযে ফেনপ্রতানাযিতম্ ।

নৈরন্তর্যবিজৃম্ভিতস্তনতটে নৈচোলপট্টাযিতং

কালুষ্যং কবলীকরোতু মম তে কামাক্ষি মন্দস্মিতম্

॥27॥

শ্লোক 29

পীযূষং তব মন্থরস্মিতমিতি ব্যর্থৈব সাপপ্রথা

কামাক্ষি ধ্রুবমীদৃশং যদি ভবেদেতত্কথং বা শিবে ।

মন্দারস্য কথালবং ন সহতে মথ্নাতি মন্দাকিনী-

মিন্দুং নিন্দতি কীর্তিতেঽপি কলশীপাথোধিমীর্ষ্যাযতে

॥28॥

শ্লোক 30

বিশ্বেষাং নযনোত্সবং বিতনুতাং বিদ্যোততাং চন্দ্রমা

বিখ্যাতো মদনান্তকেন মুকুটীমধ্যে চ সম্মান্যতাম্ ।

আঃ কিং জাতমনেন হাসসুষমামালোক্য কামাক্ষি তে

কালঙ্কীমবলম্বতে খলু দশাং কল্মাষহীনোঽপ্যসৌ

॥29॥

শ্লোক 31

চেতঃ শীতলযন্তু নঃ পশুপতেরানন্দজীবাতবো

নম্রাণাং নযনাধ্বসীমসু শরচ্চন্দ্রাতপোপক্রমাঃ ।

সংসারাখ্যসরোরুহাকরখলীকারে তুষারোত্করাঃ

কামাক্ষি স্মরকীর্তিবীজনিকরাস্ত্বন্মন্দহাসাঙ্কুরাঃ

॥30॥

শ্লোক 32

কর্মৌঘাখ্যতমঃকচাকচিকরান্কামাক্ষি সঞ্চিন্তযে

ত্বন্মন্দস্মিতরোচিষাং ত্রিভুবনক্ষেমঙ্করানঙ্কুরান্ ।

যে বক্ত্রং শিশিরশ্রিযো বিকসিতং চন্দ্রাতপাম্ভোরুহ-

দ্বেষোদ্ধেষোণচাতুরীমিব তিরস্কর্তুং পরিষ্কুর্বতে

॥31॥

শ্লোক 33

কুর্যুর্নঃ কুলশৈলরাজতনযে কূলঙ্কষং মঙ্গলং

কুন্দস্পর্ধনচুঞ্চবস্তব শিবে মন্দস্মিতপ্রক্রমাঃ ।

যে কামাক্ষি সমস্তসাক্ষিনযনং সন্তোষযন্তীশ্বরং

কর্পূরপ্রকরা ইব প্রসৃমরাঃ পুংসামসাধারণাঃ

॥32॥

শ্লোক 34

কম্রেণ স্নপযস্ব কর্মকুহনাচোরেণ মারাগম-

ব্যাখ্যাশিক্ষণদীক্ষিতেন বিদুষামক্ষীণলক্ষ্মীপুষা ।

কামাক্ষি স্মিতকন্দলেন কলুষস্ফোটক্রিযাচুঞ্চুনা

কারুণ্যামৃতবীচিকাবিহরণপ্রাচুর্যধুর্যেণ মাম্

॥33॥

শ্লোক 35

ত্বন্মন্দস্মিতকন্দলস্য নিযতং কামাক্ষি শঙ্কামহে

বিম্বঃ কশ্চন নূতনঃ প্রচলিতো নৈশাকরঃ শীকরঃ ।

কিঞ্চ ক্ষীরপযোনিধিঃ প্রতিনিধিঃ স্বর্বাহিনীবীচিকা-

বিব্বোকোঽপি বিডম্ব এব কুহনা মল্লীমতল্লীরুচঃ

॥34॥

শ্লোক 36

দুষ্কর্মার্কনিসর্গকর্কশমহস্সম্পর্কতপতং মিল-

ত্পঙ্কং শঙ্করবল্লভে মম মনঃ কাঞ্চীপুরালঙ্ক্রিযে ।

অম্ব ত্বন্মৃদুলস্মিতামৃতরসে মঙ্ক্ত্বা বিধূয ব্যথা-

মানন্দোদযসৌধশৃঙ্গপদবীমারোঢুমাকাঙ্ক্ষতি

॥35॥

শ্লোক 37

নম্রাণাং নগরাজশেখরসুতে নাকালযানাং পুরঃ

কামাক্ষি ত্বরযা বিপত্প্রশমেন কারুণ্যধারাঃ কিরন্ ।

আগচ্ছন্তমনুগ্রহং প্রকটযন্নানন্দবীজানি তে

নাসীরে মৃদুহাস এব তনুতে নাথে সুধাশীতলঃ

॥36॥

শ্লোক 38

কামাক্ষি প্রথমানবিভ্রমনিধিঃ কন্দর্পদর্পপ্রসূঃ

মুগ্ধস্তে মৃদুহাস এব গিরিজে মুষ্ণাতু মে কিল্বিষম্ ।

যং দ্রষ্টুং বিহিতে করগ্রহ উমে শম্ভুস্ত্রপামীলিতং

স্বৈরং কারযতি স্ম তাণ্ডববিনোদানন্দিনা তণ্ডুনা

॥37॥

শ্লোক 39

ক্ষুণ্ণং কেনচিদেব ধীরমনসা কুত্রাপি নানাজনৈঃ

কর্মগ্রন্থিনিযন্ত্রিতৈরসুগমং কামাক্ষি সামান্যতঃ ।

মুগ্ধৈর্দ্রুষ্টুমশক্যমেব মনসা মূঢসয মে মৌক্তিকং

মার্গং দর্শযতু প্রদীপ ইব তে মন্দস্মিতশ্রীরিযম্

॥38॥

শ্লোক 40

জ্যোত্স্নাকান্তিভিরেব নির্মলতরং নৈশাকরং মণ্ডলং

হংসৈরেব শরদ্বিলাসসমযে ব্যাকোচমম্ভোরুহম্ ।

স্বচ্ছৈরেব বিকস্বরৈরুডুগুণৈঃ কামাক্ষি বিম্বং দিবঃ

পুণ্যৈরেব মৃদুস্মিতৈস্তব মুখং পুষ্ণাতি শোভাভরম্

॥39॥

শ্লোক 41

মানগ্রন্থিবিধুন্তুদেন রভসাদাস্বাদ্যমানে নব-

প্রেমাডম্বরপূর্ণিমাহিমকরে কামাক্ষি তে তত্ক্ষণম্ ।

আলোক্য স্মিতচন্দ্রিকাং পুনরিমামুন্মীলনং জগ্মুষীং

চেতঃ শীলযতে চকোরচরিতং চন্দ্রার্ধচূডামণেঃ

॥40॥

শ্লোক 42

কামাক্ষি স্মিতমঞ্জরীং তব ভজে যস্যাস্ত্বিষামঙ্কুরা-

নাপীনস্তনপানলালসতযা নিশ্শঙ্কমঙ্কেশযঃ ।

ঊর্ধ্বং বীক্ষ্য বিকর্ষতি প্রসৃমরানুদ্দামযা শুণ্ডযা

সূনুসুতে বিসশঙ্কযাশু কুহনাদন্তাবলগ্রামণীঃ

॥41॥

শ্লোক 43

গাঢাশ্লেষবিমর্দসম্ভ্রমবশাদুদ্দামমুক্তাগুণ-

প্রালম্বে কুচকুম্ভযোর্বিগলিতে দক্ষদ্বিষো বক্ষসি ।

যা সখ্যেন পিনহ্যতি প্রচুরযা ভাসা তদীযাং দশাং

সা মে খেলতু কামকোটি হৃদযে সান্দ্রস্মিতাংশুচ্ছটা

॥42॥

শ্লোক 44

মন্দারে তব মন্থরস্মিতরুচাং মাত্সর্যমালোক্যতে

কামাক্ষি স্মরশাসনে চ নিযতো রাগোদযো লক্ষ্যতে ।

চান্দ্রীষু দ্যুতিমঞ্জরীষু চ মহান্দ্বেষাঙ্কুরো দৃশ্যতে

শুদ্ধানাং কথমীদৃশী গিরিসুতেঽতিশুদ্ধা দশা কথ্যতাম্

॥43॥

শ্লোক 45

পীযূষং খলু পীযতে সুরজনৈর্দুগ্ধাম্বুধির্মথ্যতে

মাহেশৈশ্চ জটাকলাপনিগডৈর্মন্দাকিনী নহ্যতে ।

শীতাংশুঃ পরিভূযতে চ তমসা তস্মাদনেতাদৃশী

কামাক্ষি স্মিতমঞ্জরী তব বচোবৈদগ্ধ্যমুল্লঙ্ঘতে

॥44॥

শ্লোক 46

আশঙ্কে তব মন্দহাসলহরীমন্যাদৃশীং চন্দ্রিকা-

মেকাম্রেশকুটুম্বিনি প্রতিপদং যস্যাঃ প্রভাসঙ্গমে ।

বক্ষোজাম্বুরুহে ন তে রচযতঃ কাঞ্চিদ্দশাং কৌঙ্মলী-

মাস্যাম্ভোরুহমম্ব কিঞ্চ শনকৈরালম্বতে ফুল্লতাম্

॥45॥

শ্লোক 47

আস্তীর্ণাধরকান্তিপল্লবচযে পাতং মুহুর্জগ্মুষী

মারদ্রোহিণি কন্দলত্স্মরশরজ্বালাবলীর্ব্যঞ্জতী ।

নিন্দন্তী ঘনসারহারবলযজ্যোত্স্নামৃণালানি তে

কামাক্ষি স্মিতচাতুরী বিরহিণীরীতিং জগাহেতরাম্

॥46॥

শ্লোক 48

সূর্যালোকবিধৌ বিকাসমধিকং যান্তী হরন্তী তম-

স্সন্দোহং নমতাং নিজস্মরণতো দোষাকরদ্বেষিণী ।

নির্যান্তী বদনারবিন্দকুহরান্নির্ধূতজাড্যা নৃণাং

শ্রীকামাক্ষি তব স্মিতদ্যুতিমযী চিত্রীযতে চন্দ্রিকা

॥47॥

শ্লোক 49

কুণ্ঠীকুর্যুরমী কুবোধঘটনামস্মন্মনোমাথিনীং

শ্রীকামাক্ষি শিবঙ্করাস্তব শিবে শ্রীমন্দহাসাঙ্কুরাঃ ।

যে তন্বন্তি নিরন্তরং তরুণিমস্তম্বেরমগ্রামণী-

কুম্ভদ্বন্দ্ববিডম্বিনি স্তনতটে মুক্তাকুথাডম্বরম্

॥48॥

শ্লোক 50

প্রেঙ্খন্তঃ শরদম্বুদা ইব শনৈঃ প্রেমানিলৈঃ প্রেরিতা

মজ্জন্তো মন্দনারিকণ্ঠসুষমাসিন্ধৌ মুহুর্মন্থরম্ ।

শ্রীকামাক্ষি তব স্মিতাংশুনিকরাঃ শ্যামাযমানশ্রিযো

নীলাম্ভোধরনৈপুণীং তত ইতো নির্নিদ্রযন্ত্যঞ্জসা

॥49॥

শ্লোক 51

ব্যাপারং চতুরাননৈকবিহৃতৌ ব্যাকুর্বতী কুর্বতী

রুদ্রাক্ষগ্রহণং মহেশি সততং বাগূর্মিকল্লোলিতা ।

উত্ফুল্লং ধবলারবিন্দমধরীকৃত্য স্ফুরন্তী সদা

শ্রীকামাক্ষি সরস্বতী বিজযতে ত্বন্মন্দহাসপ্রভা

॥50॥

শ্লোক 52

কর্পূরদ্যুতিতস্করেণ মহসা কল্মাষযত্যাননং

শ্রীকাঞ্চীপুরনাযিকে পতিরিব শ্রীমন্দহাসোঽপি তে ।

আলিঙ্গত্যতিপীবরাং স্তনতটীং বিম্বাধরং চুম্বতি

প্রৌঢং রাগভরং ব্যনক্তি মনসো ধৈর্যং ধুনীতেতরাম্

॥51॥

শ্লোক 53

বৈশদ্যেন চ বিশ্বতাপহরণক্রীডাপটীযস্তযা

পাণ্ডিত্যেন পচেলিমেন জগতাং নেত্রোত্সবোত্পাদেন ।

কামাক্ষি স্মিতকন্দলৈস্তব তুলামারোঢুমুদ্যোগিনী

জ্যোত্স্নাসৌ জলরাশিপোষণতযা দূষ্যাং প্রপন্না দশাম্

॥52॥

শ্লোক 54

লাবণ্যাম্বুজিনীমৃণালবলযৈঃ শৃঙ্গারগন্ধদ্বিপ-

গ্রামণ্যঃ শ্রুতিচামরৈস্তরুণিমস্বারাজ্যতেজোঙ্কুরৈঃ ।

আনন্দামৃতসিন্ধুবীচিপৃষতৈরাস্যাব্জহংসৈস্তব

শ্রীকামাক্ষি মথান মন্দহসিতৈর্মত্কং মনঃকল্মষম্

॥53॥

শ্লোক 55

উত্তুঙ্গস্তনমণ্ডলীপরিচলন্মাণিক্যহারচ্ছটা-

চঞ্চচ্ছোণিমপুঞ্জমধ্যসরণিং মাতঃ পরিষ্কুর্বতী ।

যা বৈদগ্ধ্যমুপৈতি শঙ্করজটাকান্তারবাটীপত-

ত্স্বর্বাপীপযসঃ স্মিতদ্যুতিরসৌ কামাক্ষি তে মঞ্জুলা

॥54॥

শ্লোক 56

সন্নামৈকজুষা জনেন সুলভং সংসূচযন্তী শনৈ-

রুত্তুঙ্গস্য চিরাদনুগ্রহতরোরুত্পত্স্যমানং ফলম্ ।

প্রাথম্যেন বিকস্বরা কুসুমবত্প্রাগল্ভ্যমভ্যেযুষী

কামাক্ষি স্মিতচাতুরী তব মম ক্ষেমঙ্করী কল্পতাম্

॥55॥

শ্লোক 57

ধানুষ্কাগ্রসরস্য লোলকুটিলভ্রূলেখযা বিভ্রতো

লীলালোকশিলীমুখং নববযস্সাম্রাজ্যলক্ষ্মীপুষঃ ।

জেতুং মন্মথমর্দিনং জননি তে কামাক্ষি হাসঃ স্বযং

বল্গুর্বিভ্রমভূভৃতো বিতনুতে সেনাপতিপ্রক্রিযাম্

॥56॥

শ্লোক 58

যন্নাকম্পত কালকূটকবলীকারে চুচুম্বে ন যদ্-

গ্লান্যা চক্ষুষি রূষিতানলশিখে রুদ্রস্য তত্তাদৃশম্ ।

চেতো যত্প্রসভং স্মরজ্বরশিখিজ্বালেন লেলিহ্যতে

তত্কামাক্ষি তব স্মিতাংশুকলিকাহেলাভবং প্রাভবম্

॥57॥

শ্লোক 59

সম্ভিন্নেব সুপর্বলোকতটিনী বীচীচযৈর্যামুনৈঃ

সম্মিশ্রেব শশাঙ্কদীপ্তিলহরী নীলৈর্মহানীরদৈঃ ।

কামাক্ষি স্ফুরিতা তব স্মিতরুচিঃ কালাঞ্জনস্পর্ধিনা

কালিম্না কচরোচিষাং ব্যতিকরে কাঞ্চিদ্দশামশ্নুতে

॥58॥

শ্লোক 60

জানীমো জগদীশ্বরপ্রণযিনি ত্বন্মন্দহাসপ্রভাং

শ্রীকামাক্ষি সরোজিনীমভিনবামেষা যতঃ সর্বদা ।

আস্যেন্দোরবলোকেন পশুপতেরভ্যেতি সম্ফুল্লতাং

তন্দ্রালুস্তদভাব এব তনুতে তদ্বৈপরীত্যক্রমম্

॥59॥

শ্লোক 61

যান্তী লোহিতিমানমভ্রতটিনী ধাতুচ্ছটাকর্দমৈঃ

ভান্তী বালগভস্তিমালিকিরণৈর্মেঘাবলী শারদী ।

বিম্বোষ্ঠদ্যুতিপুঞ্জচুম্বনকলাশোণাযমানেন তে

কামাক্ষি স্মিতরোচিষা সমদশামারোঢুমাকাঙ্ক্ষতে

॥60॥

শ্লোক 62

শ্রীকামাক্ষি মুখেন্দুভূষণমিদং মন্দস্মিতং তাবকং

নেত্রানন্দকরং তথা হিমকরো গচ্ছেদ্যথা তিগ্মতাম্ ।

শীতং দেবি তথা যথা হিমজলং সন্তাপমুদ্রাস্পদং

শ্বেতং কিঞ্চ তথা যথা মলিনতাং ধত্তে চ মুক্তামণিঃ

॥61॥

শ্লোক 63

ত্বন্মন্দস্মিতমঞ্জরীং প্রসৃমরাং কামাক্ষি চন্দ্রাতপং

সন্তঃ সন্ততমামনন্ত্যমলতা তল্লক্ষণং লক্ষ্যতে ।

অস্মাকং ন ধুনোতি তাপকমধিকং ধূনোতি নাভ্যন্তরং

ধ্বান্তং তত্খলু দুঃখিনো বযমিদং কেনোতি নো বিদ্মহে

॥62॥

শ্লোক 64

নম্রস্য প্রণযপ্ররূঢকলহচ্ছেদায পাদাব্জযোঃ

মন্দং চন্দ্রকিশোরশেখরমণেঃ কামাক্ষি রাগেণ তে ।

বন্ধূকপ্রসবশ্রিযং জিতবতো বংহীযসীং তাদৃশীং

বিম্বোষ্ঠস্য রুচিং নিরস্য হসিতজ্যোত্স্না বযস্যাযতে

॥63॥

শ্লোক 65

মুক্তানাং পরিমোচনং বিদধতস্তত্প্রীতিনিষ্পাদিনী

ভূযো দূরত এব ধূতমরুতস্তত্পালনং তন্বতী ।

উদ্ভূতস্য জলান্তরাদবিরতং তদ্দূরতাং জগ্মুষী

কামাক্ষি স্মিতমঞ্জরী তব কথং কম্বোস্তুলামশ্নুতে

॥64॥

শ্লোক 66

শ্রীকামাক্ষি তব স্মিতদ্যুতিঝরীবৈদগ্ধ্যলীলাযিতং

পশ্যন্তোঽপি নিরন্তরং সুবিমলম্মন্যা জগন্মণ্ডলে ।

লোকং হাসযিতুং কিমর্থমনিশং প্রাকাশ্যমাতন্বতে

মন্দাক্ষং বিরহয্য মঙ্গলতরং মন্দারচন্দ্রাদযঃ

॥65॥

শ্লোক 67

ক্ষীরাব্ধেরপি শৈলরাজতনযে ত্বন্মন্দহাসস্য চ

শ্রীকামাক্ষি বলক্ষিমোদযনিধেঃ কিঞ্চিদ্ভিদাং ব্রূমহে ।

একস্মৈ পুরুষায দেবি স দদৌ লক্ষ্মীং কদাচিত্পুরা

সর্বেভ্যোঽপি দদাত্যসৌ তু সততং লক্ষ্মীং চ বাগীশ্বরীম্

॥66॥

শ্লোক 68

শ্রীকাঞ্চীপুররত্নদীপকলিকে তান্যেব মেনাত্মজে

চাকোরাণি কুলানি দেবি সুতরাং ধন্যানি মন্যামহে ।

কম্পাতীরকুটুম্বচঙ্ক্রমকলাচুঞ্চূনি চঞ্চূপুটৈঃ

নিত্যং যানি তব স্মিতেন্দুমহসামাস্বাদমাতন্বতে

॥67॥

শ্লোক 69

শৈত্যপ্রক্রমমাশ্রিতোঽপি নমতাং জাড্যপ্রথাং ধূনযন্

নৈর্মল্যং পরমং গতোঽপি গিরিশং রাগাকুলং চারযন্ ।

লীলালাপপুরস্সরোঽপি সততং বাচংযমান্প্রীণযন্

কামাক্ষি স্মিতরোচিষাং তব সমুল্লাসঃ কথং বর্ণ্যতে

॥68॥

শ্লোক 70

শ্রোণীচঞ্চলমেখলামুখরিতং লীলাগতং মন্থরং

ভ্রূবল্লীচলনং কটাক্ষবলনং মন্দাক্ষবীক্ষাচণম্ ।

যদ্বৈদগ্ধ্যমুখেন মন্মথরিপুং সম্মোহযন্ত্যঞ্জসা

শ্রীকামাক্ষি তব স্মিতায সততং তস্মৈ নম্সকুর্মহে

॥69॥

শ্লোক 71

শ্রীকামাক্ষি মনোজ্ঞমন্দহসিতজ্যোতিষ্প্ররোহে তব

স্ফীতশ্বেতিমসার্বভৌমসরণিপ্রাগল্ভ্যমভ্যেযুষি ।

চন্দ্রোঽযং যুবরাজতাং কলযতে চেটীধুরং চন্দ্রিকা

শুদ্ধা সা চ সুধাঝরী সহচরীসাধর্ম্যমালম্বতে

॥70॥

শ্লোক 72

জ্যোত্স্না কিং তনুতে ফলং তনুমতামৌষ্ণ্যপ্রশান্তিং বিনা

ত্বন্মন্দস্মিতরোচিষা তনুমতাং কামাক্ষি রোচিষ্ণুনা ।

সন্তাপো বিনিবার্যতে নববযঃপ্রাচুর্যমঙ্কূর্যতে

সৌন্দর্যং পরিপূর্যতে জগতি সা কীর্তিশ্চ সঞ্চার্যতে

॥71॥

শ্লোক 73

বৈমল্যং কুমুদশ্রিযাং হিমরুচঃ কান্ত্যৈব সন্ধুক্ষ্যতে

জ্যোত্স্নারোচিরপি প্রদোষসমযং প্রাপ্যৈব সম্পদ্যতে ।

স্বচ্ছত্বং নবমৌক্তিকস্য পরমং সংস্কারতো দৃশ্যতে

কামাক্ষ্যাঃ স্মিতদীধিতের্বিশদিমা নৈসর্গিকো ভাসতে

॥72॥

শ্লোক 74

প্রাকাশ্যং পরমেশ্বরপ্রণযিনি ত্বন্মন্দহাসশ্রিযঃ

শ্রীকামাক্ষি মম ক্ষিণোতু মমতাবৈচক্ষণীমক্ষযাম্ ।

যদ্ভীত্যেব নিলীযতে হিমকরো মেঘোদরে শুক্তিকা-

গর্ভে মৌক্তিকমণ্ডলী চ সরসীমধ্যে মৃণালী চ সা

॥73॥

শ্লোক 75

হেরম্বে চ গুহে হর্ষভরিতং বাত্সল্যমঙ্কূরযত্

মারদ্রোহিণি পূরুষে সহভুবং প্রেমাঙ্কুরং ব্যঞ্জযত্ ।

আনম্রেষু জনেষু পূর্ণকরুণাবৈদগ্ধ্যমুত্তালযত্

কামাক্ষি স্মিতমঞ্জসা তব কথঙ্কারং মযা কথ্যতে

॥74॥

শ্লোক 76

সঙ্ক্রুদ্ধদ্বিজরাজকোঽপ্যবিরতং কুর্বন্দ্বিজৈঃ সঙ্গমং

বাণীপদ্ধতিদূরগোঽপি সততং তত্সাহচর্যং বহন্ ।

অশ্রান্তং পশুদুর্লভোঽপি কলযন্পত্যৌ পশূনাং রতিং

শ্রীকামাক্ষি তব স্মিতামৃতরসস্যন্দো মযি স্পন্দতাম্

॥75॥

শ্লোক 77

শ্রীকামাক্ষি মহেশ্বরে নিরুপমপ্রেমাঙ্কুরপ্রক্রমমং

নিত্যং যঃ প্রকটীকরোতি সহজামুন্নিদ্রযন্মাধুরীম্ ।

তত্তাদৃক্তব মন্দহাসমহিমা মাতঃ কথং মানিতাং

তন্মূর্ধ্না সুরনিম্নগাং চ কলিকামিন্দোশ্চ তাং নিন্দতি

॥76॥

শ্লোক 78

যে মাধুর্যবিহারমণ্টপভুবো যে শৈত্যমুদ্রাকরা

যে বৈশদ্যদশাবিশেষসুভগাস্তে মন্দহাসাঙ্কুরাঃ ।

কামাক্ষ্যাঃ সহজং গুণত্রযমিদং পর্যাযতঃ কুর্বতাং

বাণীগুম্ফনডম্বরে চ হৃদযে কীর্তিপ্ররোহে চ মে

॥77॥

শ্লোক 79

কামাক্ষ্যা মৃদুলস্মিতাংশুনিকরা দক্ষান্তকে বীক্ষণে

মন্দাক্ষগ্রহিলা হিমদ্যুতিমযূখাক্ষেপদীক্ষাঙ্কুরাঃ ।

দাক্ষ্যং পক্ষ্মলযন্তু মাক্ষিকগুডদ্রাক্ষাভবং বাক্ষু মে

সূক্ষ্মং মোক্ষপথং নিরীক্ষিতুমপি প্রক্ষালযেযুর্মনঃ

॥78॥

শ্লোক 80

জাত্যা শীতশীতলানি মধুরাণ্যেতানি পূতানি তে

গাঙ্গানীব পযাংসি দেবি পটলান্যল্পস্মিতজ্যোতিষাম্ ।

এনঃপঙ্কপরম্পরামলিনিতামেকাম্রনাথপ্রিযে

প্রজ্ঞানাত্সুতরাং মদীযধিষণাং প্রক্ষালযন্তু ক্ষণাত্

॥79॥

শ্লোক 81

অশ্রান্তং পরতন্ত্রিতঃ পশুপতিস্ত্বন্মন্দহাসাঙ্কুরৈঃ

শ্রীকামাক্ষি তদীযবর্ণসমতাসঙ্গেন শঙ্কামহে ।

ইন্দুং নাকধুনীং চ শেখরযতে মালাং চ ধত্তে নবৈঃ

বৈকুণ্ঠৈরবকুণ্ঠনং চ কুরুতে ধূলীচযৈর্ভাস্মনৈঃ

॥80॥

শ্লোক 82

শ্রীকাঞ্চীপুরদেবতে মৃদুবচস্সৌরভ্যমুদ্রাস্পদং

প্রৌঢপ্রেমলতানবীনকুসুমং মন্দস্মিতং তাবকম্ ।

মন্দং কন্দলতি প্রিযস্য বদনালোকে সমাভাষণে

শ্লক্ষ্ণে কুঙ্মলতি প্ররূঢপুলকে চাশ্লোষণে ফুল্লতি

॥81॥

শ্লোক 83

কিং ত্রৈস্রোতসমম্বিকে পরিণতং স্রোতশ্চতুর্থং নবং

পীযূষস্য সমস্ততাপহরণং কিংবা দ্বিতীযং বপুঃ ।

কিংস্বিত্ত্বন্নিকটং গতং মধুরিমাভ্যাসায গব্যং পযঃ

শ্রীকাঞ্চীপুরনাযকপ্রিযতমে মন্দস্মিতং তাবকম্

॥82॥

শ্লোক 84

ভূষা বক্ত্রসরোরুহস্য সহজা বাচাং সখী শাশ্বতী

নীবী বিভ্রমসন্ততেঃ পশুপতেঃ সৌধী দৃশাং পারণা ।

জীবাতুর্মদনশ্রিযঃ শশিরুচেরুচ্চাটনী দেবতা

শ্রীকামাক্ষি গিরামভূমিমযতে হাসপ্রভামঞ্জরী

॥83॥

শ্লোক 85

সূতিঃ শ্বেতিমকন্দলস্য বসতিঃ শৃঙ্গারসারশ্রিযঃ

পূর্তিঃ সূক্তিঝরীরসস্য লহরী কারুণ্যপাথোনিধেঃ ।

বাটী কাচন কৌসুমী মধুরিমস্বারাজ্যলক্ষ্ম্যাস্তব

শ্রীকামাক্ষি মমাস্তু মঙ্গলকরী হাসপ্রভাচাতুরী

॥84॥

শ্লোক 86

জন্তূনাং জনিদুঃখমৃত্যুলহরীসন্তাপনং কৃন্ততঃ

প্রৌঢানুগ্রহপূর্ণশীতলরুচো নিত্যোদযং বিভ্রতঃ ।

শ্রীকামাক্ষি বিসৃত্বরা ইব করা হাসাঙ্কুরাস্তে হঠা-

দালোকেন নিহন্যুরন্ধতমসস্তোমস্য মে সন্ততিম্

॥85॥

শ্লোক 87

উত্তুঙ্গস্তনমণ্ডলস্য বিলসল্লাবণ্যলীলানটী-

রঙ্গস্য স্ফুটমূর্ধ্বসীমনি মুহুঃ প্রাকাশ্যমভ্যেযুষী ।

শ্রীকামাক্ষি তব স্মিতদ্যুতিততির্বিম্বোষ্ঠকান্ত্যঙ্কুরৈঃ

চিত্রাং বিদ্রুমমুদ্রিতাং বিতনুতে মৌক্তীং বিতানশ্রিযম্

॥86॥

শ্লোক 88

স্বাভাব্যাত্তব বক্ত্রমেব ললিতং সন্তোষসম্পাদনং

শম্ভোঃ কিং পুনরঞ্চিতস্মিতরুচঃ পাণ্ডিত্যপাত্রীকৃতম্ ।

অম্ভোজং স্বত এব সর্বজগতাং চক্ষুঃপ্রিযম্ভাবুকং

কামাক্ষি স্ফুরিতে শরদ্বিকসিতে কীদৃগ্বিধং ভ্রাজতে

॥87॥

শ্লোক 89

পুম্ভির্নির্মলমানসৌর্বিদধতে মৈত্রীং দৃঢং নির্মলাং

লব্ধ্বা কর্মলযং চ নির্মলতরাং কীর্তিং লভন্তেতরাম্ ।

সূক্তিং পক্ষ্মলযন্তি নির্মলতমাং যত্তাবকাঃ সেবকাঃ

তত্কামাক্ষি তব স্মিতস্য কলযা নৈর্মল্যসীমানিধেঃ

॥88॥

শ্লোক 90

আকর্ষন্নযনানি নাকিসদসাং শৈত্যেন সংস্তম্ভয-

ন্নিন্দুং কিঞ্চ বিমোহযন্পশুপতিং বিশ্বার্তিমুচ্চাটযন্ ।

হিংসত্সংসৃতিডম্বরং তব শিবে হাসাহ্বযো মান্ত্রিকঃ

শ্রীকামাক্ষি মদীযমানসতমোবিদ্বেষণে চেষ্টতাম্

॥89॥

শ্লোক 91

ক্ষেপীযঃ ক্ষপযন্তু কল্মষভযান্যস্মাকমল্পস্মিত-

জ্যোতির্মণ্ডলচঙ্ক্রমাস্তব শিবে কামাক্ষি রোচিষ্ণবঃ ।

পীডাকর্মঠকর্মঘর্মসমযব্যাপারতাপানল-

শ্রীপাতা নবহর্ষবর্ষণসুধাস্রোতস্বিনীশীকরাঃ

॥90॥

শ্লোক 92

শ্রীকামাক্ষি তব স্মিতৈন্দবমহঃপূরে পরিম্ফূর্জতি

প্রৌঢাং বারিধিচাতুরীং কলযতে ভক্তাত্মনাং প্রাতিভম্ ।

দৌর্গত্যপ্রসরাস্তমঃপটলিকাসাধর্ম্যমাবিভ্রতে

সর্বং কৈরবসাহচর্যপদবীরীতিং বিধত্তে পরম্

॥91॥

শ্লোক 93

মন্দারাদিষু মন্মথারিমহিষি প্রাকাশ্যরীতিং নিজাং

কাদাচিত্কতযা বিশঙ্ক্য বহুশো বৈশদ্যমুদ্রাগুণঃ ।

সাতত্যেন তব স্মিতে বিতনুতে স্বৈরাসনাবাসনাম্

॥92॥

শ্লোক 94

ইন্ধানে ভববীতিহোত্রনিবহে কর্মৌঘচণ্ডানিল-

প্রৌঢিম্না বহুলীকৃতে নিপতিতং সন্তাপচিন্তাকুলম্ ।

মাতর্মাং পরিষিঞ্চ কিঞ্চিদমলৈঃ পীযূষবর্ষৈরিব

শ্রীকামাক্ষি তব স্মিতদ্যুতিকণৈঃ শৈশির্যলীলাকরৈঃ

॥93॥

শ্লোক 95

ভাষাযা রসনাগ্রখেলনজুষঃ শৃঙ্গারমুদ্রাসখী-

লীলাজাতরতেঃ সুখেন নিযমস্নানায মেনাত্মজে ।

শ্রীকামাক্ষি সুধামযীব শিশিরা স্রোতস্বিনী তাবকী

গাঢানন্দতরঙ্গিতা বিজযতে হাসপ্রভাচাতুরী

॥94॥

শ্লোক 96

সন্তাপং বিরলীকরোতু সকলং কামাক্ষি মচ্চেতনা

মজ্জন্তী মধুরস্মিতামরধুনীকল্লোলজালেষু তে ।

নৈরন্তর্যমুপেত্য মন্মথমরুল্লোলেষু যেষু স্ফুটং

প্রেমেন্দুঃ প্রতিবিম্বিতো বিতনুতে কৌতূহলং ধূর্জটেঃ

॥95॥

শ্লোক 97

চেতঃক্ষীরপযোধিমন্থরচলদ্রাগাখ্যমন্থাচল-

ক্ষোভব্যাপৃতিসম্ভবাং জননি তে মন্দস্মিতশ্রীসুধাম্ ।

স্বাদংস্বাদমুদীতকৌতুকরসা নেত্রত্রযী শাঙ্করী

শ্রীকামাক্ষি নিরন্তরং পরিণমত্যানন্দবীচীমযী

॥96॥

শ্লোক 98

আলোকে তব পঞ্চসাযকরিপোরুদ্দামকৌতূহল-

প্রেঙ্খন্মারুতঘট্টনপ্রচলিতাদানন্দদুগ্ধাম্বুধেঃ ।

কাচিদ্বীচিরুদঞ্চতি প্রতিনবা সংবিত্প্ররোহাত্মিকা

তাং কামাক্ষি কবীশ্বরাঃ স্মিতমিতি ব্যাকুর্বতে সর্বদা

॥97॥

শ্লোক 99

সূক্তিঃ শীলযতে কিমদ্রিতনযে মন্দস্মিতাত্তে মুহুঃ

মাধুর্যাগমসম্প্রদাযমথবা সূক্তের্নু মন্দস্মিতম্ ।

ইত্থং কামপি গাহতে মম মনঃ সন্দেহমার্গভ্রমিং

শ্রীকামাক্ষি ন পারমার্থ্যসরণিস্ফূর্তৌ নিধত্তে পদম্

॥98॥

শ্লোক 100

ক্রীডালোলকৃপাসরোরুহমুখীসৌধাঙ্গণেভ্যঃ কবি-

শ্রেণীবাক্পরিপাটিকামৃতঝরীসূতীগৃহেভ্যঃ শিবে ।

নির্বাণাঙ্কুরসার্বভৌমপদবীসিংহাসনেভ্যস্তব

শ্রীকামাক্ষি মনোজ্ঞমন্দহসিতজ্যোতিষ্কণেভ্যো নমঃ

॥99॥

শ্লোক 101

আর্যামেব বিভাবযন্মনসি যঃ পাদারবিন্দং পুরঃ

পশ্যন্নারভতে স্তুতিং স নিযতং লব্ধ্বা কটাক্ষচ্ছবিম্ ।

কামাক্ষ্যা মৃদুলস্মিতাংশুলহরীজ্যোত্স্নাবযস্যান্বিতাম্

আরোহত্যপবর্গসৌধবলভীমানন্দবীচীমযীম্

॥100॥

শ্লোক 102

॥ ইতি মন্দস্মিতশতকং সম্পূর্ণম্ ॥

॥ ইতি শ্রী মূকপঞ্চশতী সম্পূর্ণা ॥

॥ঔং তত্ সত্ ॥