మన్త్ర మాతృకా పుష్ప మాలా స్తవ

మన్త్ర మాతృకా పుష్ప మాలా స్తవ

శ్లోక 1

కల్లోలోల్లసితామృతాబ్ధిలహరీమధ్యే విరాజన్మణి-

-ద్వీపే కల్పకవాటికాపరివృతే కాదమ్బవాట్యుజ్జ్వలే ।

రత్నస్తమ్భసహస్రనిర్మితసభామధ్యే విమానోత్తమే

చిన్తారత్నవినిర్మితం జనని తే సింహాసనం భావయే

శ్లోక 2

ఏణాఙ్కానలభానుమణ్డలలసచ్ఛ్రీచక్రమధ్యే స్థితాం

బాలార్కద్యుతిభాసురాం కరతలైః పాశాఙ్కుశౌ బిభ్రతీమ్ ।

చాపం బాణమపి ప్రసన్నవదనాం కౌసుమ్భవస్త్రాన్వితాం

తాం త్వాం చన్ద్రకలావతంసమకుటాం చారుస్మితాం భావయే

॥ 1 ॥

శ్లోక 3

ఈశానాదిపదం శివైకఫలదం రత్నాసనం తే శుభం

పాద్యం కుఙ్కుమచన్దనాదిభరితైరర్ఘ్యం సరత్నాక్షతైః ।

శుద్ధైరాచమనీయకం తవ జలైర్భక్త్యా మయా కల్పితం

కారుణ్యామృతవారిధే తదఖిలం సన్తుష్టయే కల్పతామ్

॥ 2 ॥

శ్లోక 4

లక్ష్యే యోగిజనస్య రక్షితజగజ్జాలే విశాలేక్షణే

ప్రాలేయామ్బుపటీరకుఙ్కుమలసత్కర్పూరమిశ్రోదకైః ।

గోక్షీరైరపి నారికేలసలిలైః శుద్ధోదకైర్మన్త్రితైః

స్నానం దేవి ధియా మయైతదఖిలం సన్తుష్టయే కల్పతామ్

॥ 3 ॥

శ్లోక 5

హ్రీం‍కారాఙ్కితమన్త్రలక్షితతనో హేమాచలాత్సఞ్చితైః

రత్నైరుజ్జ్వలముత్తరీయసహితం కౌసుమ్భవర్ణాంశుకమ్ ।

ముక్తాసన్తతియజ్ఞసూత్రమమలం సౌవర్ణతన్తూద్భవం

దత్తం దేవి ధియా మయైతదఖిలం సన్తుష్టయే కల్పతామ్

॥ 4 ॥

శ్లోక 6

హంసైరప్యతిలోభనీయగమనే హారావలీముజ్జ్వలాం

హిన్దోలద్యుతిహీరపూరితతరే హేమాఙ్గదే కఙ్కణే ।

మఞ్జీరౌ మణికుణ్డలే మకుటమప్యర్ధేన్దుచూడామణిం

నాసామౌక్తికమఙ్గులీయకటకౌ కాఞ్చీమపి స్వీకురు

॥ 5 ॥

శ్లోక 7

సర్వాఙ్గే ఘనసారకుఙ్కుమఘనశ్రీగన్ధపఙ్కాఙ్కితం

కస్తూరీతిలకం చ ఫాలఫలకే గోరోచనాపత్రకమ్ ।

గణ్డాదర్శనమణ్డలే నయనయోర్దివ్యాఞ్జనం తేఽఞ్చితం

కణ్ఠాబ్జే మృగనాభిపఙ్కమమలం త్వత్ప్రీతయే కల్పతామ్

॥ 6 ॥

శ్లోక 8

కహ్లారోత్పలమల్లికామరువకైః సౌవర్ణపఙ్కేరుహై-

-ర్జాతీచమ్పకమాలతీవకులకైర్మన్దారకున్దాదిభిః ।

కేతక్యా కరవీరకైర్బహువిధైః క్లుప్తాః స్రజో మాలికాః

సఙ్కల్పేన సమర్పయామి వరదే సన్తుష్టయే గృహ్యతామ్

॥ 7 ॥

శ్లోక 9

హన్తారం మదనస్య నన్దయసి యైరఙ్గైరనఙ్గోజ్జ్వలై-

-ర్యైర్భృఙ్గావలినీలకున్తలభరైర్బధ్నాసి తస్యాశయమ్ ।

తానీమాని తవామ్బ కోమలతరాణ్యామోదలీలాగృహా-

-ణ్యామోదాయ దశాఙ్గగుగ్గులుఘృతైర్ధూపైరహం ధూపయే

॥ 8 ॥

శ్లోక 10

లక్ష్మీముజ్జ్వలయామి రత్ననివహోద్భాస్వత్తరే మన్దిరే

మాలారూపవిలమ్బితైర్మణిమయస్తమ్భేషు సమ్భావితైః ।

చిత్రైర్హాటకపుత్రికాకరధృతైర్గవ్యైర్ఘృతైర్వర్ధితై-

-ర్దివ్యైర్దీపగణైర్ధియా గిరిసుతే సన్తుష్టయే కల్పతామ్

॥ 9 ॥

శ్లోక 11

హ్రీం‍కారేశ్వరి తప్తహాటకకృతైః స్థాలీసహస్రైర్భృతం

దివ్యాన్నం ఘృతసూపశాకభరితం చిత్రాన్నభేదం తథా ।

దుగ్ధాన్నం మధుశర్కరాదధియుతం మాణిక్యపాత్రే స్థితం

మాషాపూపసహస్రమమ్బ సఫలం నైవేద్యమావేదయే

॥ 10 ॥

శ్లోక 12

సచ్ఛాయైర్వరకేతకీదలరుచా తామ్బూలవల్లీదలైః

పూగైర్భూరిగుణైః సుగన్ధిమధురైః కర్పూరఖణ్డోజ్జ్వలైః ।

ముక్తాచూర్ణవిరాజితైర్బహువిధైర్వక్త్రామ్బుజామోదనైః

పూర్ణా రత్నకలాచికా తవ ముదే న్యస్తా పురస్తాదుమే

॥ 11 ॥

శ్లోక 13

కన్యాభిః కమనీయకాన్తిభిరలఙ్కారామలారార్తికా

పాత్రే మౌక్తికచిత్రపఙ్క్తివిలసత్కర్పూరదీపాలిభిః ।

తత్తత్తాలమృదఙ్గగీతసహితం నృత్యత్పదామ్భోరుహం

మన్త్రారాధనపూర్వకం సువిహితం నీరాజనం గృహ్యతామ్

॥ 12 ॥

శ్లోక 14

లక్ష్మీర్మౌక్తికలక్షకల్పితసితచ్ఛత్త్రం తు ధత్తే రసా-

-దిన్ద్రాణీ చ రతిశ్చ చామరవరే ధత్తే స్వయం భారతీ ।

వీణామేణవిలోచనాః సుమనసాం నృత్యన్తి తద్రాగవ-

-ద్భావైరాఙ్గికసాత్త్వికైః స్ఫుటరసం మాతస్తదాకర్ణ్యతామ్

॥ 13 ॥

శ్లోక 15

హ్రీం‍కారత్రయసమ్పుటేన మనునోపాస్యే త్రయీమౌలిభి-

-ర్వాక్యైర్లక్ష్యతనో తవ స్తుతివిధౌ కో వా క్షమేతామ్బికే ।

సల్లాపాః స్తుతయః ప్రదక్షిణశతం సఞ్చార ఏవాస్తు తే

సంవేశో నమసః సహస్రమఖిలం త్వత్ప్రీతయే కల్పతామ్

॥ 14 ॥

శ్లోక 16

శ్రీమన్త్రాక్షరమాలయా గిరిసుతాం యః పూజయేచ్చేతసా

సన్ధ్యాసు ప్రతివాసరం సునియతస్తస్యామలం స్యాన్మనః ।

చిత్తామ్భోరుహమణ్టపే గిరిసుతా నృత్తం విధత్తే రసా-

-ద్వాణీ వక్త్రసరోరుహే జలధిజా గేహే జగన్మఙ్గలా

॥ 15 ॥

శ్లోక 17

ఇతి గిరివరపుత్రీపాదరాజీవభూషా

భువనమమలయన్తీ సూక్తిసౌరభ్యసారైః ।

శివపదమకరన్దస్యన్దినీయం నిబద్ధా

మదయతు కవిభృఙ్గాన్మాతృకాపుష్పమాలా

॥ 16 ॥

శ్లోక 18

ఇతి శ్రీమత్పరమహంసపరివ్రాజకాచార్యస్య శ్రీగోవిన్దభగవత్పూజ్యపాదశిష్యస్య శ్రీమచ్ఛఙ్కరభగవతః కృతౌ మన్త్రమాతృకాపుష్పమాలా స్తవః ।