മന്ത്ര മാതൃകാ പുഷ്പ മാലാ സ്തവ

മന്ത്ര മാതൃകാ പുഷ്പ മാലാ സ്തവ

ശ്ലോക 1

കല്ലോലോല്ലസിതാമൃതാബ്ധിലഹരീമധ്യേ വിരാജന്മണി-

-ദ്വീപേ കല്പകവാടികാപരിവൃതേ കാദമ്ബവാട്യുജ്ജ്വലേ ।

രത്നസ്തമ്ഭസഹസ്രനിര്മിതസഭാമധ്യേ വിമാനോത്തമേ

ചിന്താരത്നവിനിര്മിതം ജനനി തേ സിംഹാസനം ഭാവയേ

ശ്ലോക 2

ഏണാങ്കാനലഭാനുമണ്ഡലലസച്ഛ്രീചക്രമധ്യേ സ്ഥിതാം

ബാലാര്കദ്യുതിഭാസുരാം കരതലൈഃ പാശാങ്കുശൌ ബിഭ്രതീമ് ।

ചാപം ബാണമപി പ്രസന്നവദനാം കൌസുമ്ഭവസ്ത്രാന്വിതാം

താം ത്വാം ചന്ദ്രകലാവതംസമകുടാം ചാരുസ്മിതാം ഭാവയേ

॥ 1 ॥

ശ്ലോക 3

ഈശാനാദിപദം ശിവൈകഫലദം രത്നാസനം തേ ശുഭം

പാദ്യം കുങ്കുമചന്ദനാദിഭരിതൈരര്ഘ്യം സരത്നാക്ഷതൈഃ ।

ശുദ്ധൈരാചമനീയകം തവ ജലൈര്ഭക്ത്യാ മയാ കല്പിതം

കാരുണ്യാമൃതവാരിധേ തദഖിലം സന്തുഷ്ടയേ കല്പതാമ്

॥ 2 ॥

ശ്ലോക 4

ലക്ഷ്യേ യോഗിജനസ്യ രക്ഷിതജഗജ്ജാലേ വിശാലേക്ഷണേ

പ്രാലേയാമ്ബുപടീരകുങ്കുമലസത്കര്പൂരമിശ്രോദകൈഃ ।

ഗോക്ഷീരൈരപി നാരികേലസലിലൈഃ ശുദ്ധോദകൈര്മന്ത്രിതൈഃ

സ്നാനം ദേവി ധിയാ മയൈതദഖിലം സന്തുഷ്ടയേ കല്പതാമ്

॥ 3 ॥

ശ്ലോക 5

ഹ്രീം‍കാരാങ്കിതമന്ത്രലക്ഷിതതനോ ഹേമാചലാത്സഞ്ചിതൈഃ

രത്നൈരുജ്ജ്വലമുത്തരീയസഹിതം കൌസുമ്ഭവര്ണാംശുകമ് ।

മുക്താസന്തതിയജ്ഞസൂത്രമമലം സൌവര്ണതന്തൂദ്ഭവം

ദത്തം ദേവി ധിയാ മയൈതദഖിലം സന്തുഷ്ടയേ കല്പതാമ്

॥ 4 ॥

ശ്ലോക 6

ഹംസൈരപ്യതിലോഭനീയഗമനേ ഹാരാവലീമുജ്ജ്വലാം

ഹിന്ദോലദ്യുതിഹീരപൂരിതതരേ ഹേമാങ്ഗദേ കങ്കണേ ।

മഞ്ജീരൌ മണികുണ്ഡലേ മകുടമപ്യര്ധേന്ദുചൂഡാമണിം

നാസാമൌക്തികമങ്ഗുലീയകടകൌ കാഞ്ചീമപി സ്വീകുരു

॥ 5 ॥

ശ്ലോക 7

സര്വാങ്ഗേ ഘനസാരകുങ്കുമഘനശ്രീഗന്ധപങ്കാങ്കിതം

കസ്തൂരീതിലകം ച ഫാലഫലകേ ഗോരോചനാപത്രകമ് ।

ഗണ്ഡാദര്ശനമണ്ഡലേ നയനയോര്ദിവ്യാഞ്ജനം തേഽഞ്ചിതം

കണ്ഠാബ്ജേ മൃഗനാഭിപങ്കമമലം ത്വത്പ്രീതയേ കല്പതാമ്

॥ 6 ॥

ശ്ലോക 8

കഹ്ലാരോത്പലമല്ലികാമരുവകൈഃ സൌവര്ണപങ്കേരുഹൈ-

-ര്ജാതീചമ്പകമാലതീവകുലകൈര്മന്ദാരകുന്ദാദിഭിഃ ।

കേതക്യാ കരവീരകൈര്ബഹുവിധൈഃ ക്ലുപ്താഃ സ്രജോ മാലികാഃ

സങ്കല്പേന സമര്പയാമി വരദേ സന്തുഷ്ടയേ ഗൃഹ്യതാമ്

॥ 7 ॥

ശ്ലോക 9

ഹന്താരം മദനസ്യ നന്ദയസി യൈരങ്ഗൈരനങ്ഗോജ്ജ്വലൈ-

-ര്യൈര്ഭൃങ്ഗാവലിനീലകുന്തലഭരൈര്ബധ്നാസി തസ്യാശയമ് ।

താനീമാനി തവാമ്ബ കോമലതരാണ്യാമോദലീലാഗൃഹാ-

-ണ്യാമോദായ ദശാങ്ഗഗുഗ്ഗുലുഘൃതൈര്ധൂപൈരഹം ധൂപയേ

॥ 8 ॥

ശ്ലോക 10

ലക്ഷ്മീമുജ്ജ്വലയാമി രത്നനിവഹോദ്ഭാസ്വത്തരേ മന്ദിരേ

മാലാരൂപവിലമ്ബിതൈര്മണിമയസ്തമ്ഭേഷു സമ്ഭാവിതൈഃ ।

ചിത്രൈര്ഹാടകപുത്രികാകരധൃതൈര്ഗവ്യൈര്ഘൃതൈര്വര്ധിതൈ-

-ര്ദിവ്യൈര്ദീപഗണൈര്ധിയാ ഗിരിസുതേ സന്തുഷ്ടയേ കല്പതാമ്

॥ 9 ॥

ശ്ലോക 11

ഹ്രീം‍കാരേശ്വരി തപ്തഹാടകകൃതൈഃ സ്ഥാലീസഹസ്രൈര്ഭൃതം

ദിവ്യാന്നം ഘൃതസൂപശാകഭരിതം ചിത്രാന്നഭേദം തഥാ ।

ദുഗ്ധാന്നം മധുശര്കരാദധിയുതം മാണിക്യപാത്രേ സ്ഥിതം

മാഷാപൂപസഹസ്രമമ്ബ സഫലം നൈവേദ്യമാവേദയേ

॥ 10 ॥

ശ്ലോക 12

സച്ഛായൈര്വരകേതകീദലരുചാ താമ്ബൂലവല്ലീദലൈഃ

പൂഗൈര്ഭൂരിഗുണൈഃ സുഗന്ധിമധുരൈഃ കര്പൂരഖണ്ഡോജ്ജ്വലൈഃ ।

മുക്താചൂര്ണവിരാജിതൈര്ബഹുവിധൈര്വക്ത്രാമ്ബുജാമോദനൈഃ

പൂര്ണാ രത്നകലാചികാ തവ മുദേ ന്യസ്താ പുരസ്താദുമേ

॥ 11 ॥

ശ്ലോക 13

കന്യാഭിഃ കമനീയകാന്തിഭിരലങ്കാരാമലാരാര്തികാ

പാത്രേ മൌക്തികചിത്രപങ്ക്തിവിലസത്കര്പൂരദീപാലിഭിഃ ।

തത്തത്താലമൃദങ്ഗഗീതസഹിതം നൃത്യത്പദാമ്ഭോരുഹം

മന്ത്രാരാധനപൂര്വകം സുവിഹിതം നീരാജനം ഗൃഹ്യതാമ്

॥ 12 ॥

ശ്ലോക 14

ലക്ഷ്മീര്മൌക്തികലക്ഷകല്പിതസിതച്ഛത്ത്രം തു ധത്തേ രസാ-

-ദിന്ദ്രാണീ ച രതിശ്ച ചാമരവരേ ധത്തേ സ്വയം ഭാരതീ ।

വീണാമേണവിലോചനാഃ സുമനസാം നൃത്യന്തി തദ്രാഗവ-

-ദ്ഭാവൈരാങ്ഗികസാത്ത്വികൈഃ സ്ഫുടരസം മാതസ്തദാകര്ണ്യതാമ്

॥ 13 ॥

ശ്ലോക 15

ഹ്രീം‍കാരത്രയസമ്പുടേന മനുനോപാസ്യേ ത്രയീമൌലിഭി-

-ര്വാക്യൈര്ലക്ഷ്യതനോ തവ സ്തുതിവിധൌ കോ വാ ക്ഷമേതാമ്ബികേ ।

സല്ലാപാഃ സ്തുതയഃ പ്രദക്ഷിണശതം സഞ്ചാര ഏവാസ്തു തേ

സംവേശോ നമസഃ സഹസ്രമഖിലം ത്വത്പ്രീതയേ കല്പതാമ്

॥ 14 ॥

ശ്ലോക 16

ശ്രീമന്ത്രാക്ഷരമാലയാ ഗിരിസുതാം യഃ പൂജയേച്ചേതസാ

സന്ധ്യാസു പ്രതിവാസരം സുനിയതസ്തസ്യാമലം സ്യാന്മനഃ ।

ചിത്താമ്ഭോരുഹമണ്ടപേ ഗിരിസുതാ നൃത്തം വിധത്തേ രസാ-

-ദ്വാണീ വക്ത്രസരോരുഹേ ജലധിജാ ഗേഹേ ജഗന്മങ്ഗലാ

॥ 15 ॥

ശ്ലോക 17

ഇതി ഗിരിവരപുത്രീപാദരാജീവഭൂഷാ

ഭുവനമമലയന്തീ സൂക്തിസൌരഭ്യസാരൈഃ ।

ശിവപദമകരന്ദസ്യന്ദിനീയം നിബദ്ധാ

മദയതു കവിഭൃങ്ഗാന്മാതൃകാപുഷ്പമാലാ

॥ 16 ॥

ശ്ലോക 18

ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിന്ദഭഗവത്പൂജ്യപാദശിഷ്യസ്യ ശ്രീമച്ഛങ്കരഭഗവതഃ കൃതൌ മന്ത്രമാതൃകാപുഷ്പമാലാ സ്തവഃ ।