મન્ત્ર માતૃકા પુષ્પ માલા સ્તવ

મન્ત્ર માતૃકા પુષ્પ માલા સ્તવ

કલ્લોલોલ્લસિતામૃતાબ્ધિલહરીમધ્યે વિરાજન્મણિ-

-દ્વીપે કલ્પકવાટિકાપરિવૃતે કાદમ્બવાટ્યુજ્જ્વલે ।

રત્નસ્તમ્ભસહસ્રનિર્મિતસભામધ્યે વિમાનોત્તમે

ચિન્તારત્નવિનિર્મિતં જનનિ તે સિંહાસનં ભાવયે ॥ 1 ॥

એણાઙ્કાનલભાનુમણ્ડલલસચ્છ્રીચક્રમધ્યે સ્થિતાં

બાલાર્કદ્યુતિભાસુરાં કરતલૈઃ પાશાઙ્કુશૌ બિભ્રતીમ્ ।

ચાપં બાણમપિ પ્રસન્નવદનાં કૌસુમ્ભવસ્ત્રાન્વિતાં

તાં ત્વાં ચન્દ્રકલાવતંસમકુટાં ચારુસ્મિતાં ભાવયે ॥ 2 ॥

ઈશાનાદિપદં શિવૈકફલદં રત્નાસનં તે શુભં

પાદ્યં કુઙ્કુમચન્દનાદિભરિતૈરર્ઘ્યં સરત્નાક્ષતૈઃ ।

શુદ્ધૈરાચમનીયકં તવ જલૈર્ભક્ત્યા મયા કલ્પિતં

કારુણ્યામૃતવારિધે તદખિલં સન્તુષ્ટયે કલ્પતામ્ ॥ 3 ॥

લક્ષ્યે યોગિજનસ્ય રક્ષિતજગજ્જાલે વિશાલેક્ષણે

પ્રાલેયામ્બુપટીરકુઙ્કુમલસત્કર્પૂરમિશ્રોદકૈઃ ।

ગોક્ષીરૈરપિ નારિકેલસલિલૈઃ શુદ્ધોદકૈર્મન્ત્રિતૈઃ

સ્નાનં દેવિ ધિયા મયૈતદખિલં સન્તુષ્ટયે કલ્પતામ્ ॥ 4 ॥

હ્રીં‍કારાઙ્કિતમન્ત્રલક્ષિતતનો હેમાચલાત્સઞ્ચિતૈઃ

રત્નૈરુજ્જ્વલમુત્તરીયસહિતં કૌસુમ્ભવર્ણાંશુકમ્ ।

મુક્તાસન્તતિયજ્ઞસૂત્રમમલં સૌવર્ણતન્તૂદ્ભવં

દત્તં દેવિ ધિયા મયૈતદખિલં સન્તુષ્ટયે કલ્પતામ્ ॥ 5 ॥

હંસૈરપ્યતિલોભનીયગમને હારાવલીમુજ્જ્વલાં

હિન્દોલદ્યુતિહીરપૂરિતતરે હેમાઙ્ગદે કઙ્કણે ।

મઞ્જીરૌ મણિકુણ્ડલે મકુટમપ્યર્ધેન્દુચૂડામણિં

નાસામૌક્તિકમઙ્ગુલીયકટકૌ કાઞ્ચીમપિ સ્વીકુરુ ॥ 6 ॥

સર્વાઙ્ગે ઘનસારકુઙ્કુમઘનશ્રીગન્ધપઙ્કાઙ્કિતં

કસ્તૂરીતિલકં ચ ફાલફલકે ગોરોચનાપત્રકમ્ ।

ગણ્ડાદર્શનમણ્ડલે નયનયોર્દિવ્યાઞ્જનં તેઽઞ્ચિતં

કણ્ઠાબ્જે મૃગનાભિપઙ્કમમલં ત્વત્પ્રીતયે કલ્પતામ્ ॥ 7 ॥

કહ્લારોત્પલમલ્લિકામરુવકૈઃ સૌવર્ણપઙ્કેરુહૈ-

-ર્જાતીચમ્પકમાલતીવકુલકૈર્મન્દારકુન્દાદિભિઃ ।

કેતક્યા કરવીરકૈર્બહુવિધૈઃ ક્લુપ્તાઃ સ્રજો માલિકાઃ

સઙ્કલ્પેન સમર્પયામિ વરદે સન્તુષ્ટયે ગૃહ્યતામ્ ॥ 8 ॥

હન્તારં મદનસ્ય નન્દયસિ યૈરઙ્ગૈરનઙ્ગોજ્જ્વલૈ-

-ર્યૈર્ભૃઙ્ગાવલિનીલકુન્તલભરૈર્બધ્નાસિ તસ્યાશયમ્ ।

તાનીમાનિ તવામ્બ કોમલતરાણ્યામોદલીલાગૃહા-

-ણ્યામોદાય દશાઙ્ગગુગ્ગુલુઘૃતૈર્ધૂપૈરહં ધૂપયે ॥ 9 ॥

લક્ષ્મીમુજ્જ્વલયામિ રત્નનિવહોદ્ભાસ્વત્તરે મન્દિરે

માલારૂપવિલમ્બિતૈર્મણિમયસ્તમ્ભેષુ સમ્ભાવિતૈઃ ।

ચિત્રૈર્હાટકપુત્રિકાકરધૃતૈર્ગવ્યૈર્ઘૃતૈર્વર્ધિતૈ-

-ર્દિવ્યૈર્દીપગણૈર્ધિયા ગિરિસુતે સન્તુષ્ટયે કલ્પતામ્ ॥ 10 ॥

હ્રીં‍કારેશ્વરિ તપ્તહાટકકૃતૈઃ સ્થાલીસહસ્રૈર્ભૃતં

દિવ્યાન્નં ઘૃતસૂપશાકભરિતં ચિત્રાન્નભેદં તથા ।

દુગ્ધાન્નં મધુશર્કરાદધિયુતં માણિક્યપાત્રે સ્થિતં

માષાપૂપસહસ્રમમ્બ સફલં નૈવેદ્યમાવેદયે ॥ 11 ॥

સચ્છાયૈર્વરકેતકીદલરુચા તામ્બૂલવલ્લીદલૈઃ

પૂગૈર્ભૂરિગુણૈઃ સુગન્ધિમધુરૈઃ કર્પૂરખણ્ડોજ્જ્વલૈઃ ।

મુક્તાચૂર્ણવિરાજિતૈર્બહુવિધૈર્વક્ત્રામ્બુજામોદનૈઃ

પૂર્ણા રત્નકલાચિકા તવ મુદે ન્યસ્તા પુરસ્તાદુમે ॥ 12 ॥

કન્યાભિઃ કમનીયકાન્તિભિરલઙ્કારામલારાર્તિકા

પાત્રે મૌક્તિકચિત્રપઙ્ક્તિવિલસત્કર્પૂરદીપાલિભિઃ ।

તત્તત્તાલમૃદઙ્ગગીતસહિતં નૃત્યત્પદામ્ભોરુહં

મન્ત્રારાધનપૂર્વકં સુવિહિતં નીરાજનં ગૃહ્યતામ્ ॥ 13 ॥

લક્ષ્મીર્મૌક્તિકલક્ષકલ્પિતસિતચ્છત્ત્રં તુ ધત્તે રસા-

-દિન્દ્રાણી ચ રતિશ્ચ ચામરવરે ધત્તે સ્વયં ભારતી ।

વીણામેણવિલોચનાઃ સુમનસાં નૃત્યન્તિ તદ્રાગવ-

-દ્ભાવૈરાઙ્ગિકસાત્ત્વિકૈઃ સ્ફુટરસં માતસ્તદાકર્ણ્યતામ્ ॥ 14 ॥

હ્રીં‍કારત્રયસમ્પુટેન મનુનોપાસ્યે ત્રયીમૌલિભિ-

-ર્વાક્યૈર્લક્ષ્યતનો તવ સ્તુતિવિધૌ કો વા ક્ષમેતામ્બિકે ।

સલ્લાપાઃ સ્તુતયઃ પ્રદક્ષિણશતં સઞ્ચાર એવાસ્તુ તે

સંવેશો નમસઃ સહસ્રમખિલં ત્વત્પ્રીતયે કલ્પતામ્ ॥ 15 ॥

શ્રીમન્ત્રાક્ષરમાલયા ગિરિસુતાં યઃ પૂજયેચ્ચેતસા

સન્ધ્યાસુ પ્રતિવાસરં સુનિયતસ્તસ્યામલં સ્યાન્મનઃ ।

ચિત્તામ્ભોરુહમણ્ટપે ગિરિસુતા નૃત્તં વિધત્તે રસા-

-દ્વાણી વક્ત્રસરોરુહે જલધિજા ગેહે જગન્મઙ્ગલા ॥ 16 ॥

ઇતિ ગિરિવરપુત્રીપાદરાજીવભૂષા

ભુવનમમલયન્તી સૂક્તિસૌરભ્યસારૈઃ ।

શિવપદમકરન્દસ્યન્દિનીયં નિબદ્ધા

મદયતુ કવિભૃઙ્ગાન્માતૃકાપુષ્પમાલા ॥ 17 ॥

ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિન્દભગવત્પૂજ્યપાદશિષ્યસ્ય શ્રીમચ્છઙ્કરભગવતઃ કૃતૌ મન્ત્રમાતૃકાપુષ્પમાલા સ્તવઃ ।