ಮಣಿದ್ವೀಪ ವರ್ಣನ - 1 (ದೇವೀ ಭಾಗವತಮ್)

ಶ್ಲೋಕ 1

(ಶ್ರೀದೇವೀಭಾಗವತಂ, ದ್ವಾದಶ ಸ್ಕನ್ಧಂ, ದಶಮೋಽಧ್ಯಾಯಃ, , ಮಣಿದ್ವೀಪ ವರ್ಣನ - 1)

ವ್ಯಾಸ ಉವಾಚ –

ಬ್ರಹ್ಮಲೋಕಾದೂರ್ಧ್ವಭಾಗೇ ಸರ್ವಲೋಕೋಽಸ್ತಿ ಯಃ ಶ್ರುತಃ ।

ಮಣಿದ್ವೀಪಃ ಸ ಏವಾಸ್ತಿ ಯತ್ರ ದೇವೀ ವಿರಾಜತೇ

ಶ್ಲೋಕ 2

ಸರ್ವಸ್ಮಾದಧಿಕೋ ಯಸ್ಮಾತ್ಸರ್ವಲೋಕಸ್ತತಃ ಸ್ಮೃತಃ ।

ಪುರಾ ಪರಾಮ್ಬಯೈವಾಯಂ ಕಲ್ಪಿತೋ ಮನಸೇಚ್ಛಯಾ

॥ 1 ॥

ಶ್ಲೋಕ 3

ಸರ್ವಾದೌ ನಿಜವಾಸಾರ್ಥಂ ಪ್ರಕೃತ್ಯಾ ಮೂಲಭೂತಯಾ ।

ಕೈಲಾಸಾದಧಿಕೋ ಲೋಕೋ ವೈಕುಣ್ಠಾದಪಿ ಚೋತ್ತಮಃ

॥ 2 ॥

ಶ್ಲೋಕ 4

ಗೋಲೋಕಾದಪಿ ಸರ್ವಸ್ಮಾತ್ಸರ್ವಲೋಕೋಽಧಿಕಃ ಸ್ಮೃತಃ ।

ನೈತತ್ಸಮಂ ತ್ರಿಲೋಕ್ಯಾಂ ತು ಸುನ್ದರಂ ವಿದ್ಯತೇ ಕ್ವಚಿತ್

॥ 3 ॥

ಶ್ಲೋಕ 5

ಛತ್ರೀಭೂತಂ ತ್ರಿಜಗತೋ ಭವಸನ್ತಾಪನಾಶಕಮ್ ।

ಛಾಯಾಭೂತಂ ತದೇವಾಸ್ತಿ ಬ್ರಹ್ಮಾಣ್ಡಾನಾಂ ತು ಸತ್ತಮ

॥ 4 ॥

ಶ್ಲೋಕ 6

ಬಹುಯೋಜನವಿಸ್ತೀರ್ಣೋ ಗಮ್ಭೀರಸ್ತಾವದೇವ ಹಿ ।

ಮಣಿದ್ವೀಪಸ್ಯ ಪರಿತೋ ವರ್ತತೇ ತು ಸುಧೋದಧಿಃ

॥ 5 ॥

ಶ್ಲೋಕ 7

ಮರುತ್ಸಙ್ಘಟ್ಟನೋತ್ಕೀರ್ಣತರಙ್ಗ ಶತಸಙ್ಕುಲಃ ।

ರತ್ನಾಚ್ಛವಾಲುಕಾಯುಕ್ತೋ ಝಷಶಙ್ಖಸಮಾಕುಲಃ

॥ 6 ॥

ಶ್ಲೋಕ 8

ವೀಚಿಸಙ್ಘರ್ಷಸಞ್ಜಾತಲಹರೀಕಣಶೀತಲಃ ।

ನಾನಾಧ್ವಜಸಮಾಯುಕ್ತಾ ನಾನಾಪೋತಗತಾಗತೈಃ

॥ 7 ॥

ಶ್ಲೋಕ 9

ವಿರಾಜಮಾನಃ ಪರಿತಸ್ತೀರರತ್ನದ್ರುಮೋ ಮಹಾನ್ ।

ತದುತ್ತರಮಯೋಧಾತುನಿರ್ಮಿತೋ ಗಗನೇ ತತಃ

॥ 8 ॥

ಶ್ಲೋಕ 10

ಸಪ್ತಯೋಜನವಿಸ್ತೀರ್ಣಃ ಪ್ರಾಕಾರೋ ವರ್ತತೇ ಮಹಾನ್ ।

ನಾನಾಶಸ್ತ್ರಪ್ರಹರಣಾ ನಾನಾಯುದ್ಧವಿಶಾರದಾಃ

॥ 9 ॥

ಶ್ಲೋಕ 11

ರಕ್ಷಕಾ ನಿವಸನ್ತ್ಯತ್ರ ಮೋದಮಾನಾಃ ಸಮನ್ತತಃ ।

ಚತುರ್ದ್ವಾರಸಮಾಯುಕ್ತೋ ದ್ವಾರಪಾಲಶತಾನ್ವಿತಃ

॥ 10 ॥

ಶ್ಲೋಕ 12

ನಾನಾಗಣೈಃ ಪರಿವೃತೋ ದೇವೀಭಕ್ತಿಯುತೈರ್ನೃಪ ।

ದರ್ಶನಾರ್ಥಂ ಸಮಾಯಾನ್ತಿ ಯೇ ದೇವಾ ಜಗದೀಶಿತುಃ

॥ 11 ॥

ಶ್ಲೋಕ 13

ತೇಷಾಂ ಗಣಾ ವಸನ್ತ್ಯತ್ರ ವಾಹನಾನಿ ಚ ತತ್ರ ಹಿ ।

ವಿಮಾನಶತಸಙ್ಘರ್ಷಘಣ್ಟಾಸ್ವನಸಮಾಕುಲಃ

॥ 12 ॥

ಶ್ಲೋಕ 14

ಹಯಹೇಷಾಖುರಾಘಾತಬಧಿರೀಕೃತದಿಮ್ಮುಖಃ ।

ಗಣೈಃ ಕಿಲಕಿಲಾರಾವೈರ್ವೇತ್ರಹಸ್ತೈಶ್ಚ ತಾಡಿತಾಃ

॥ 13 ॥

ಶ್ಲೋಕ 15

ಸೇವಕಾ ದೇವಸಙ್ಗಾನಾಂ ಭ್ರಾಜನ್ತೇ ತತ್ರ ಭೂಮಿಪ ।

ತಸ್ಮಿಙ್ಕೋಲಾಹಲೇ ರಾಜನ್ನಶಬ್ದಃ ಕೇನಚಿತ್ಕ್ವಚಿತ್

॥ 14 ॥

ಶ್ಲೋಕ 16

ಕಸ್ಯಚಿಚ್ಛ್ರೂಯತೇಽತ್ಯನ್ತಂ ನಾನಾಧ್ವನಿಸಮಾಕುಲೇ ।

ಪದೇ ಪದೇ ಮಿಷ್ಟವಾರಿಪರಿಪೂರ್ಣಸರಾನ್ಸಿ ಚ

॥ 15 ॥

ಶ್ಲೋಕ 17

ವಾಟಿಕಾ ವಿವಿಧಾ ರಾಜನ್ ರತ್ನದ್ರುಮವಿರಾಜಿತಾಃ ।

ತದುತ್ತರಂ ಮಹಾಸಾರಧಾತುನಿರ್ಮಿತಮಣ್ಡಲಃ

॥ 16 ॥

ಶ್ಲೋಕ 18

ಸಾಲೋಽಪರೋ ಮಹಾನಸ್ತಿ ಗಗನಸ್ಪರ್ಶಿ ಯಚ್ಛಿರಃ ।

ತೇಜಸಾ ಸ್ಯಾಚ್ಛತಗುಣಃ ಪೂರ್ವಸಾಲಾದಯಂ ಪರಃ

॥ 17 ॥

ಶ್ಲೋಕ 19

ಗೋಪುರದ್ವಾರಸಹಿತೋ ಬಹುವೃಕ್ಷಸಮನ್ವಿತಃ ।

ಯಾ ವೃಕ್ಷಜಾತಯಃ ಸನ್ತಿ ಸರ್ವಾಸ್ತಾಸ್ತತ್ರ ಸನ್ತಿ ಚ

॥ 18 ॥

ಶ್ಲೋಕ 20

ನಿರನ್ತರಂ ಪುಷ್ಪಯುತಾಃ ಸದಾ ಫಲಸಮನ್ವಿತಾಃ ।

ನವಪಲ್ಲವಸಂಯುಕ್ತಾಃ ಪರಸೌರಭಸಙ್ಕುಲಾಃ

॥ 19 ॥

ಶ್ಲೋಕ 21

ಪನಸಾ ಬಕುಲಾ ಲೋಧ್ರಾಃ ಕರ್ಣಿಕಾರಾಶ್ಚ ಶಿಂಶಪಾಃ ।

ದೇವದಾರುಕಾಞ್ಚನಾರಾ ಆಮ್ರಾಶ್ಚೈವ ಸುಮೇರವಃ

॥ 20 ॥

ಶ್ಲೋಕ 22

ಲಿಕುಚಾ ಹಿಙ್ಗುಲಾಶ್ಚೈಲಾ ಲವಙ್ಗಾಃ ಕಟ್ಫಲಾಸ್ತಥಾ ।

ಪಾಟಲಾ ಮುಚುಕುನ್ದಾಶ್ಚ ಫಲಿನ್ಯೋ ಜಘನೇಫಲಾಃ

॥ 21 ॥

ಶ್ಲೋಕ 23

ತಾಲಾಸ್ತಮಾಲಾಃ ಸಾಲಾಶ್ಚ ಕಙ್ಕೋಲಾ ನಾಗಭದ್ರಕಾಃ ।

ಪುನ್ನಾಗಾಃ ಪೀಲವಃ ಸಾಲ್ವಕಾ ವೈ ಕರ್ಪೂರಶಾಖಿನಃ

॥ 22 ॥

ಶ್ಲೋಕ 24

ಅಶ್ವಕರ್ಣಾ ಹಸ್ತಿಕರ್ಣಾಸ್ತಾಲಪರ್ಣಾಶ್ಚ ದಾಡಿಮಾಃ ।

ಗಣಿಕಾ ಬನ್ಧುಜೀವಾಶ್ಚ ಜಮ್ಬೀರಾಶ್ಚ ಕುರಣ್ಡಕಾಃ

॥ 23 ॥

ಶ್ಲೋಕ 25

ಚಾಮ್ಪೇಯಾ ಬನ್ಧುಜೀವಾಶ್ಚ ತಥಾ ವೈ ಕನಕದ್ರುಮಾಃ ।

ಕಾಲಾಗುರುದ್ರುಮಾಶ್ಚೈವ ತಥಾ ಚನ್ದನಪಾದಪಾಃ

॥ 24 ॥

ಶ್ಲೋಕ 26

ಖರ್ಜೂರಾ ಯೂಥಿಕಾಸ್ತಾಲಪರ್ಣ್ಯಶ್ಚೈವ ತಥೇಕ್ಷವಃ ।

ಕ್ಷೀರವೃಕ್ಷಾಶ್ಚ ಖದಿರಾಶ್ಚಿಞ್ಚಾಭಲ್ಲಾತಕಾಸ್ತಥಾ

॥ 25 ॥

ಶ್ಲೋಕ 27

ರುಚಕಾಃ ಕುಟಜಾ ವೃಕ್ಷಾ ಬಿಲ್ವವೃಕ್ಷಾಸ್ತಥೈವ ಚ ।

ತುಲಸೀನಾಂ ವನಾನ್ಯೇವಂ ಮಲ್ಲಿಕಾನಾಂ ತಥೈವ ಚ

॥ 26 ॥

ಶ್ಲೋಕ 28

ಇತ್ಯಾದಿತರುಜಾತೀನಾಂ ವನಾನ್ಯುಪವನಾನಿ ಚ ।

ನಾನಾವಾಪೀಶತೈರ್ಯುಕ್ತಾನ್ಯೇವಂ ಸನ್ತಿ ಧರಾಧಿಪ

॥ 27 ॥

ಶ್ಲೋಕ 29

ಕೋಕಿಲಾರಾವಸಂಯುಕ್ತಾ ಗುನ್ಜದ್ಭ್ರಮರಭೂಷಿತಾಃ ।

ನಿರ್ಯಾಸಸ್ರಾವಿಣಃ ಸರ್ವೇ ಸ್ನಿಗ್ಧಚ್ಛಾಯಾಸ್ತರೂತ್ತಮಾಃ

॥ 28 ॥

ಶ್ಲೋಕ 30

ನಾನಾಋತುಭವಾ ವೃಕ್ಷಾ ನಾನಾಪಕ್ಷಿಸಮಾಕುಲಾಃ ।

ನಾನಾರಸಸ್ರಾವಿಣೀಭಿರ್ನದೀಭಿರತಿಶೋಭಿತಾಃ

॥ 29 ॥

ಶ್ಲೋಕ 31

ಪಾರಾವತಶುಕವ್ರಾತಸಾರಿಕಾಪಕ್ಷಮಾರುತೈಃ ।

ಹಂಸಪಕ್ಷಸಮುದ್ಭೂತ ವಾತವ್ರಾತೈಶ್ಚಲದ್ದ್ರುಮಮ್

॥ 30 ॥

ಶ್ಲೋಕ 32

ಸುಗನ್ಧಗ್ರಾಹಿಪವನಪೂರಿತಂ ತದ್ವನೋತ್ತಮಮ್ ।

ಸಹಿತಂ ಹರಿಣೀಯೂಥೈರ್ಧಾವಮಾನೈರಿತಸ್ತತಃ

॥ 31 ॥

ಶ್ಲೋಕ 33

ನೃತ್ಯದ್ಬರ್ಹಿಕದಮ್ಬಸ್ಯ ಕೇಕಾರಾವೈಃ ಸುಖಪ್ರದೈಃ ।

ನಾದಿತಂ ತದ್ವನಂ ದಿವ್ಯಂ ಮಧುಸ್ರಾವಿ ಸಮನ್ತತಃ

॥ 32 ॥

ಶ್ಲೋಕ 34

ಕಾಂಸ್ಯಸಾಲಾದುತ್ತರೇ ತು ತಾಮ್ರಸಾಲಃ ಪ್ರಕೀರ್ತಿತಃ ।

ಚತುರಸ್ರಸಮಾಕಾರ ಉನ್ನತ್ಯಾ ಸಪ್ತಯೋಜನಃ

॥ 33 ॥

ಶ್ಲೋಕ 35

ದ್ವಯೋಸ್ತು ಸಾಲಯೋರ್ಮಧ್ಯೇ ಸಮ್ಪ್ರೋಕ್ತಾ ಕಲ್ಪವಾಟಿಕಾ ।

ಯೇಷಾಂ ತರೂಣಾಂ ಪುಷ್ಪಾಣಿ ಕಾಞ್ಚನಾಭಾನಿ ಭೂಮಿಪ

॥ 34 ॥

ಶ್ಲೋಕ 36

ಪತ್ರಾಣಿ ಕಾಞ್ಚನಾಭಾನಿ ರತ್ನಬೀಜಫಲಾನಿ ಚ ।

ದಶಯೋಜನಗನ್ಧೋ ಹಿ ಪ್ರಸರ್ಪತಿ ಸಮನ್ತತಃ

॥ 35 ॥

ಶ್ಲೋಕ 37

ತದ್ವನಂ ರಕ್ಷಿತಂ ರಾಜನ್ವಸನ್ತೇನರ್ತುನಾನಿಶಮ್ ।

ಪುಷ್ಪಸಿಂಹಾಸನಾಸೀನಃ ಪುಷ್ಪಚ್ಛತ್ರವಿರಾಜಿತಃ

॥ 36 ॥

ಶ್ಲೋಕ 38

ಪುಷ್ಪಭೂಷಾಭೂಷಿತಶ್ಚ ಪುಷ್ಪಾಸವವಿಘೂರ್ಣಿತಃ ।

ಮಧುಶ್ರೀರ್ಮಾಧವಶ್ರೀಶ್ಚ ದ್ವೇ ಭಾರ್ಯೇ ತಸ್ಯ ಸಮ್ಮತೇ

॥ 37 ॥

ಶ್ಲೋಕ 39

ಕ್ರೀಡತಃ ಸ್ಮೇರವದನೇ ಸುಮಸ್ತಬಕಕನ್ದುಕೈಃ ।

ಅತೀವ ರಮ್ಯಂ ವಿಪಿನಂ ಮಧುಸ್ರಾವಿ ಸಮನ್ತತಃ

॥ 38 ॥

ಶ್ಲೋಕ 40

ದಶಯೋಜನಪರ್ಯನ್ತಂ ಕುಸುಮಾಮೋದವಾಯುನಾ ।

ಪೂರಿತಂ ದಿವ್ಯಗನ್ಧರ್ವೈಃ ಸಾಙ್ಗನೈರ್ಗಾನಲೋಲುಪೈಃ

॥ 39 ॥

ಶ್ಲೋಕ 41

ಶೋಭಿತಂ ತದ್ವನಂ ದಿವ್ಯಂ ಮತ್ತಕೋಕಿಲನಾದಿತಮ್ ।

ವಸನ್ತಲಕ್ಷ್ಮೀಸಂಯುಕ್ತಂ ಕಾಮಿಕಾಮಪ್ರವರ್ಧನಮ್

॥ 40 ॥

ಶ್ಲೋಕ 42

ತಾಮ್ರಸಾಲಾದುತ್ತರತ್ರ ಸೀಸಸಾಲಃ ಪ್ರಕೀರ್ತಿತಃ ।

ಸಮುಚ್ಛ್ರಾಯಃ ಸ್ಮೃತೋಽಪ್ಯಸ್ಯ ಸಪ್ತಯೋಜನಸಙ್ಖ್ಯಯಾ

॥ 41 ॥

ಶ್ಲೋಕ 43

ಸನ್ತಾನವಾಟಿಕಾಮಧ್ಯೇ ಸಾಲಯೋಸ್ತು ದ್ವಯೋರ್ನೃಪ ।

ದಶಯೋಜನಗನ್ಧಸ್ತು ಪ್ರಸೂನಾನಾಂ ಸಮನ್ತತಃ

॥ 42 ॥

ಶ್ಲೋಕ 44

ಹಿರಣ್ಯಾಭಾನಿ ಕುಸುಮಾನ್ಯುತ್ಫುಲ್ಲಾನಿ ನಿರನ್ತರಮ್ ।

ಅಮೃತದ್ರವಸಂಯುಕ್ತಫಲಾನಿ ಮಧುರಾಣಿ ಚ

॥ 43 ॥

ಶ್ಲೋಕ 45

ಗ್ರೀಷ್ಮರ್ತುರ್ನಾಯಕಸ್ತಸ್ಯಾ ವಾಟಿಕಾಯಾ ನೃಪೋತ್ತಮ ।

ಶುಕ್ರಶ್ರೀಶ್ಚ ಶುಚಿಶ್ರೀಶ್ಚ ದ್ವೇ ಭಾರ್ಯೇ ತಸ್ಯ ಸಮ್ಮತೇ

॥ 44 ॥

ಶ್ಲೋಕ 46

ಸನ್ತಾಪತ್ರಸ್ತಲೋಕಾಸ್ತು ವೃಕ್ಷಮೂಲೇಷು ಸಂಸ್ಥಿತಾಃ ।

ನಾನಾಸಿದ್ಧೈಃ ಪರಿವೃತೋ ನಾನಾದೇವೈಃ ಸಮನ್ವಿತಃ

॥ 45 ॥

ಶ್ಲೋಕ 47

ವಿಲಾಸಿನೀನಾಂ ಬೃನ್ದೈಸ್ತು ಚನ್ದನದ್ರವಪಙ್ಕಿಲೈಃ ।

ಪುಷ್ಪಮಾಲಾಭೂಷಿತೈಸ್ತು ತಾಲವೃನ್ತಕರಾಮ್ಬುಜೈಃ

॥ 46 ॥

ಶ್ಲೋಕ 48

ಪ್ರಕಾರಃ ಶೋಭಿತೋ ಏಜಚ್ಛೀತಲಾಮ್ಬುನಿಷೇವಿಭಿಃ ।

ಸೀಸಸಾಲಾದುತ್ತರತ್ರಾಪ್ಯಾರಕೂಟಮಯಃ ಶುಭಃ

॥ 47 ॥

ಶ್ಲೋಕ 49

ಪ್ರಾಕಾರೋ ವರ್ತತೇ ರಾಜನ್ಮುನಿಯೋಜನದೈರ್ಘ್ಯವಾನ್ ।

ಹರಿಚನ್ದನವೃಕ್ಷಾಣಾಂ ವಾಟೀ ಮಧ್ಯೇ ತಯೋಃ ಸ್ಮೃತಾ

॥ 48 ॥

ಶ್ಲೋಕ 50

ಸಾಲಯೋರಧಿನಾಥಸ್ತು ವರ್ಷರ್ತುರ್ಮೇಘವಾಹನಃ ।

ವಿದ್ಯುತ್ಪಿಙ್ಗಲನೇತ್ರಶ್ಚ ಜೀಮೂತಕವಚಃ ಸ್ಮೃತಃ

॥ 49 ॥

ಶ್ಲೋಕ 51

ವಜ್ರನಿರ್ಘೋಷಮುಖರಶ್ಚೇನ್ದ್ರಧನ್ವಾ ಸಮನ್ತತಃ ।

ಸಹಸ್ರಶೋ ವಾರಿಧಾರಾ ಮುಞ್ಚನ್ನಾಸ್ತೇ ಗಣಾವೃತಃ

॥ 50 ॥

ಶ್ಲೋಕ 52

ನಭಃ ಶ್ರೀಶ್ಚ ನಭಸ್ಯಶ್ರೀಃ ಸ್ವರಸ್ಯಾ ರಸ್ಯಮಾಲಿನೀ ।

ಅಮ್ಬಾ ದುಲಾ ನಿರತ್ನಿಶ್ಚಾಭ್ರಮನ್ತೀ ಮೇಘಯನ್ತಿಕಾ

॥ 51 ॥

ಶ್ಲೋಕ 53

ವರ್ಷಯನ್ತೀ ಚಿಬುಣಿಕಾ ವಾರಿಧಾರಾ ಚ ಸಮ್ಮತಾಃ ।

ವರ್ಷರ್ತೋರ್ದ್ವಾದಶ ಪ್ರೋಕ್ತಾಃ ಶಕ್ತಯೋ ಮದವಿಹ್ವಲಾಃ

॥ 52 ॥

ಶ್ಲೋಕ 54

ನವಪಲ್ಲವವೃಕ್ಷಾಶ್ಚ ನವೀನಲತಿಕಾನ್ವಿತಾಃ ।

ಹರಿತಾನಿ ತೃಣಾನ್ಯೇವ ವೇಷ್ಟಿತಾ ಯೈರ್ಧರಾಽಖಿಲಾ

॥ 53 ॥

ಶ್ಲೋಕ 55

ನದೀನದಪ್ರವಾಹಾಶ್ಚ ಪ್ರವಹನ್ತಿ ಚ ವೇಗತಃ ।

ಸರಾಂಸಿ ಕಲುಷಾಮ್ಬೂನಿ ರಾಗಿಚಿತ್ತಸಮಾನಿ ಚ

॥ 54 ॥

ಶ್ಲೋಕ 56

ವಸನ್ತಿ ದೇವಾಃ ಸಿದ್ಧಾಶ್ಚ ಯೇ ದೇವೀಕರ್ಮಕಾರಿಣಃ ।

ವಾಪೀಕೂಪತಡಾಗಾಶ್ಚ ಯೇ ದೇವ್ಯರ್ಥಂ ಸಮರ್ಪಿತಾಃ

॥ 55 ॥

ಶ್ಲೋಕ 57

ತೇ ಗಣಾ ನಿವಸನ್ತ್ಯತ್ರ ಸವಿಲಾಸಾಶ್ಚ ಸಾಙ್ಗನಾಃ ।

ಆರಕೂಟಮಯಾದಗ್ರೇ ಸಪ್ತಯೋಜನದೈರ್ಘ್ಯವಾನ್

॥ 56 ॥

ಶ್ಲೋಕ 58

ಪಞ್ಚಲೋಹಾತ್ಮಕಃ ಸಾಲೋ ಮಧ್ಯೇ ಮನ್ದಾರವಾಟಿಕಾ ।

ನಾನಾಪುಷ್ಪಲತಾಕೀರ್ಣಾ ನಾನಾಪಲ್ಲವಶೋಭಿತಾ

॥ 57 ॥

ಶ್ಲೋಕ 59

ಅಧಿಷ್ಠಾತಾಽತ್ರ ಸಮ್ಪ್ರೋಕ್ತಃ ಶರದೃತುರನಾಮಯಃ ।

ಇಷಲಕ್ಷ್ಮೀರೂರ್ಜಲಕ್ಷ್ಮೀರ್ದ್ವೇ ಭಾರ್ಯೇ ತಸ್ಯ ಸಮ್ಮತೇ

॥ 58 ॥

ಶ್ಲೋಕ 60

ನಾನಾಸಿದ್ಧಾ ವಸನ್ತ್ಯತ್ರ ಸಾಙ್ಗನಾಃ ಸಪರಿಚ್ಛದಾಃ ।

ಪಞ್ಚಲೋಹಮಯಾದಗ್ರೇ ಸಪ್ತಯೋಜನದೈರ್ಘ್ಯವಾನ್

॥ 59 ॥

ಶ್ಲೋಕ 61

ದೀಪ್ಯಮಾನೋ ಮಹಾಶೃಙ್ಗೈರ್ವರ್ತತೇ ರೌಪ್ಯಸಾಲಕಃ ।

ಪಾರಿಜಾತಾಟವೀಮಧ್ಯೇ ಪ್ರಸೂನಸ್ತಬಕಾನ್ವಿತಾ

॥ 60 ॥

ಶ್ಲೋಕ 62

ದಶಯೋಜನಗನ್ಧೀನಿ ಕುಸುಮಾನಿ ಸಮನ್ತತಃ ।

ಮೋದಯನ್ತಿ ಗಣಾನ್ಸರ್ವಾನ್ಯೇ ದೇವೀಕರ್ಮಕಾರಿಣಃ

॥ 61 ॥

ಶ್ಲೋಕ 63

ತತ್ರಾಧಿನಾಥಃ ಸಮ್ಪ್ರೋಕ್ತೋ ಹೇಮನ್ತರ್ತುರ್ಮಹೋಜ್ಜ್ವಲಃ ।

ಸಗಣಃ ಸಾಯುಧಃ ಸರ್ವಾನ್ ರಾಗಿಣೋ ರಞ್ಜಯನ್ನಪಃ

॥ 62 ॥

ಶ್ಲೋಕ 64

ಸಹಶ್ರೀಶ್ಚ ಸಹಸ್ಯಶ್ರೀರ್ದ್ವೇ ಭಾರ್ಯೇ ತಸ್ಯ ಸಮ್ಮತೇ ।

ವಸನ್ತಿ ತತ್ರ ಸಿದ್ಧಾಶ್ಚ ಯೇ ದೇವೀವ್ರತಕಾರಿಣಃ

॥ 63 ॥

ಶ್ಲೋಕ 65

ರೌಪ್ಯಸಾಲಮಯಾದಗ್ರೇ ಸಪ್ತಯೋಜನದೈರ್ಘ್ಯವಾನ್ ।

ಸೌವರ್ಣಸಾಲಃ ಸಮ್ಪ್ರೋಕ್ತಸ್ತಪ್ತಹಾಟಕಕಲ್ಪಿತಃ

॥ 64 ॥

ಶ್ಲೋಕ 66

ಮಧ್ಯೇ ಕದಮ್ಬವಾಟೀ ತು ಪುಷ್ಪಪಲ್ಲವಶೋಭಿತಾ ।

ಕದಮ್ಬಮದಿರಾಧಾರಾಃ ಪ್ರವರ್ತನ್ತೇ ಸಹಸ್ರಶಃ

॥ 65 ॥

ಶ್ಲೋಕ 67

ಯಾಭಿರ್ನಿಪೀತಪೀತಾಭಿರ್ನಿಜಾನನ್ದೋಽನುಭೂಯತೇ ।

ತತ್ರಾಧಿನಾಥಃ ಸಮ್ಪ್ರೋಕ್ತಃ ಶೈಶಿರರ್ತುರ್ಮಹೋದಯಃ

॥ 66 ॥

ಶ್ಲೋಕ 68

ತಪಃಶ್ರೀಶ್ಚ ತಪಸ್ಯಶ್ರೀರ್ದ್ವೇ ಭಾರ್ಯೇ ತಸ್ಯ ಸಮ್ಮತೇ ।

ಮೋದಮಾನಃ ಸಹೈತಾಭ್ಯಾಂ ವರ್ತತೇ ಶಿಶಿರಾಕೃತಿಃ

॥ 67 ॥

ಶ್ಲೋಕ 69

ನಾನಾವಿಲಾಸಸಂಯುಕ್ತೋ ನಾನಾಗಣಸಮಾವೃತಃ ।

ನಿವಸನ್ತಿ ಮಹಾಸಿದ್ಧಾ ಯೇ ದೇವೀದಾನಕಾರಿಣಃ

॥ 68 ॥

ಶ್ಲೋಕ 70

ನಾನಾಭೋಗಸಮುತ್ಪನ್ನಮಹಾನನ್ದಸಮನ್ವಿತಾಃ ।

ಸಾಙ್ಗನಾಃ ಪರಿವಾರೈಸ್ತು ಸಙ್ಘಶಃ ಪರಿವಾರಿತಾಃ

॥ 69 ॥

ಶ್ಲೋಕ 71

ಸ್ವರ್ಣಸಾಲಮಯಾದಗ್ರೇ ಮುನಿಯೋಜನದೈರ್ಘ್ಯವಾನ್ ।

ಪುಷ್ಪರಾಗಮಯಃ ಸಾಲಃ ಕುಙ್ಕುಮಾರುಣವಿಗ್ರಹಃ

॥ 70 ॥

ಶ್ಲೋಕ 72

ಪುಷ್ಪರಾಗಮಯೀ ಭೂಮಿರ್ವನಾನ್ಯುಪವನಾನಿ ಚ ।

ರತ್ನವೃಕ್ಷಾಲವಾಲಾಶ್ಚ ಪುಷ್ಪರಾಗಮಯಾಃ ಸ್ಮೃತಾಃ

॥ 71 ॥

ಶ್ಲೋಕ 73

ಪ್ರಾಕಾರೋ ಯಸ್ಯ ರತ್ನಸ್ಯ ತದ್ರತ್ನರಚಿತಾ ದ್ರುಮಾಃ ।

ವನಭೂಃ ಪಕ್ಷಿನಶ್ಚೈವ ರತ್ನವರ್ಣಜಲಾನಿ ಚ

॥ 72 ॥

ಶ್ಲೋಕ 74

ಮಣ್ಡಪಾ ಮಣ್ಡಪಸ್ತಮ್ಭಾಃ ಸರಾನ್ಸಿ ಕಮಲಾನಿ ಚ ।

ಪ್ರಾಕಾರೇ ತತ್ರ ಯದ್ಯತ್ಸ್ಯಾತ್ತತ್ಸರ್ವಂ ತತ್ಸಮಂ ಭವೇತ್

॥ 73 ॥

ಶ್ಲೋಕ 75

ಪರಿಭಾಷೇಯಮುದ್ದಿಷ್ಟಾ ರತ್ನಸಾಲಾದಿಷು ಪ್ರಭೋ ।

ತೇಜಸಾ ಸ್ಯಾಲ್ಲಕ್ಷಗುಣಃ ಪೂರ್ವಸಾಲಾತ್ಪರೋ ನೃಪ

॥ 74 ॥

ಶ್ಲೋಕ 76

ದಿಕ್ಪಾಲಾ ನಿವಸನ್ತ್ಯತ್ರ ಪ್ರತಿಬ್ರಹ್ಮಾನ್ಡವರ್ತಿನಾಮ್ ।

ದಿಕ್ಪಾಲಾನಾಂ ಸಮಷ್ಟ್ಯಾತ್ಮರೂಪಾಃ ಸ್ಫೂರ್ಜದ್ವರಾಯುಧಾಃ

॥ 75 ॥

ಶ್ಲೋಕ 77

ಪೂರ್ವಾಶಾಯಾಂ ಸಮುತ್ತುಙ್ಗಶೃಙ್ಗಾ ಪೂರಮರಾವತೀ ।

ನಾನೋಪವನಸಂಯುಕ್ತಾ ಮಹೇನ್ದ್ರಸ್ತತ್ರ ರಾಜತೇ

॥ 76 ॥

ಶ್ಲೋಕ 78

ಸ್ವರ್ಗಶೋಭಾ ಚ ಯಾ ಸ್ವರ್ಗೇ ಯಾವತೀ ಸ್ಯಾತ್ತತೋಽಧಿಕಾ ।

ಸಮಷ್ಟಿಶತನೇತ್ರಸ್ಯ ಸಹಸ್ರಗುಣತಃ ಸ್ಮೃತಾ

॥ 77 ॥

ಶ್ಲೋಕ 79

ಐರಾವತಸಮಾರೂಢೋ ವಜ್ರಹಸ್ತಃ ಪ್ರತಾಪವಾನ್ ।

ದೇವಸೇನಾಪರಿವೃತೋ ರಾಜತೇಽತ್ರ ಶತಕ್ರತುಃ

॥ 78 ॥

ಶ್ಲೋಕ 80

ದೇವಾಙ್ಗನಾಗಣಯುತಾ ಶಚೀ ತತ್ರ ವಿರಾಜತೇ ।

ವಹ್ನಿಕೋಣೇ ವಹ್ನಿಪುರೀ ವಹ್ನಿಪೂಃ ಸದೃಶೀ ನೃಪ

॥ 79 ॥

ಶ್ಲೋಕ 81

ಸ್ವಾಹಾಸ್ವಧಾಸಮಾಯುಕ್ತೋ ವಹ್ನಿಸ್ತತ್ರ ವಿರಾಜತೇ ।

ನಿಜವಾಹನಭೂಷಾಢ್ಯೋ ನಿಜದೇವಗಣೈರ್ವೃತಃ

॥ 80 ॥

ಶ್ಲೋಕ 82

ಯಾಮ್ಯಾಶಾಯಾಂ ಯಮಪುರೀ ತತ್ರ ದಣ್ಡಧರೋ ಮಹಾನ್ ।

ಸ್ವಭಟೈರ್ವೇಷ್ಟಿತೋ ರಾಜನ್ ಚಿತ್ರಗುಪ್ತಪುರೋಗಮೈಃ

॥ 81 ॥

ಶ್ಲೋಕ 83

ನಿಜಶಕ್ತಿಯುತೋ ಭಾಸ್ವತ್ತನಯೋಽಸ್ತಿ ಯಮೋ ಮಹಾನ್ ।

ನೈರೃತ್ಯಾಂ ದಿಶಿ ರಾಕ್ಷಸ್ಯಾಂ ರಾಕ್ಷಸೈಃ ಪರಿವಾರಿತಃ

॥ 82 ॥

ಶ್ಲೋಕ 84

ಖಡ್ಗಧಾರೀ ಸ್ಫುರನ್ನಾಸ್ತೇ ನಿರೃತಿರ್ನಿಜಶಕ್ತಿಯುಕ್ ।

ವಾರುಣ್ಯಾಂ ವರುಣೋ ರಾಜಾ ಪಾಶಧಾರೀ ಪ್ರತಾಪವಾನ್

॥ 83 ॥

ಶ್ಲೋಕ 85

ಮಹಾಝಶಸಮಾರೂಢೋ ವಾರುಣೀಮಧುವಿಹ್ವಲಃ ।

ನಿಜಶಕ್ತಿಸಮಾಯುಕ್ತೋ ನಿಜಯಾದೋಗಣಾನ್ವಿತಃ

॥ 84 ॥

ಶ್ಲೋಕ 86

ಸಮಾಸ್ತೇ ವಾರುಣೇ ಲೋಕೇ ವರುಣಾನೀರತಾಕುಲಃ ।

ವಾಯುಕೋಣೇ ವಾಯುಲೋಕೋ ವಾಯುಸ್ತತ್ರಾಧಿತಿಷ್ಠತಿ

॥ 85 ॥

ಶ್ಲೋಕ 87

ವಾಯುಸಾಧನಸಂಸಿದ್ಧಯೋಗಿಭಿಃ ಪರಿವಾರಿತಃ ।

ಧ್ವಜಹಸ್ತೋ ವಿಶಾಲಾಕ್ಷೋ ಮೃಗವಾಹನಸಂಸ್ಥಿತಃ

॥ 86 ॥

ಶ್ಲೋಕ 88

ಮರುದ್ಗಣೈಃ ಪರಿವೃತೋ ನಿಜಶಕ್ತಿಸಮನ್ವಿತಃ ।

ಉತ್ತರಸ್ಯಾಂ ದಿಶಿ ಮಹಾನ್ಯಕ್ಷಲೋಕೋಽಸ್ತಿ ಭೂಮಿಪ

॥ 87 ॥

ಶ್ಲೋಕ 89

ಯಕ್ಷಾಧಿರಾಜಸ್ತತ್ರಾಽಽಸ್ತೇ ವೃದ್ಧಿಋದ್ಧ್ಯಾದಿಶಕ್ತಿಭಿಃ ।

ನವಭಿರ್ನಿಧಿಭಿರ್ಯುಕ್ತಸ್ತುನ್ದಿಲೋ ಧನನಾಯಕಃ

॥ 88 ॥

ಶ್ಲೋಕ 90

ಮಣಿಭದ್ರಃ ಪೂರ್ಣಭದ್ರೋ ಮಣಿಮಾನ್ಮಣಿಕನ್ಧರಃ ।

ಮಣಿಭೂಷೋ ಮಣಿಸ್ರಗ್ವೀ ಮಣಿಕಾರ್ಮುಕಧಾರಕಃ

॥ 89 ॥

ಶ್ಲೋಕ 91

ಇತ್ಯಾದಿಯಕ್ಷಸೇನಾನೀಸಹಿತೋ ನಿಜಶಕ್ತಿಯುಕ್ ।

ಈಶಾನಕೋಣೇ ಸಮ್ಪ್ರೋಕ್ತೋ ರುದ್ರಲೋಕೋ ಮಹತ್ತರಃ

॥ 90 ॥

ಶ್ಲೋಕ 92

ಅನರ್ಘ್ಯರತ್ನಖಚಿತೋ ಯತ್ರ ರುದ್ರೋಽಧಿದೈವತಮ್ ।

ಮನ್ಯುಮಾನ್ದೀಪ್ತನಯನೋ ಬದ್ಧಪೃಷ್ಠಮಹೇಷುಧಿಃ

॥ 91 ॥

ಶ್ಲೋಕ 93

ಸ್ಫೂರ್ಜದ್ಧನುರ್ವಾಮಹಸ್ತೋಽಧಿಜ್ಯಧನ್ವಭಿರಾವೃತಃ ।

ಸ್ವಸಮಾನೈರಸಙ್ಖ್ಯಾತರುದ್ರೈಃ ಶೂಲವರಾಯುಧೈಃ

॥ 92 ॥

ಶ್ಲೋಕ 94

ವಿಕೃತಾಸ್ಯೈಃ ಕರಾಲಾಸ್ಯೈರ್ವಮದ್ವಹ್ನಿಭಿರಾಸ್ಯತಃ ।

ದಶಹಸ್ತೈಃ ಶತಕರೈಃ ಸಹಸ್ರಭುಜಸಂಯುತೈಃ

॥ 93 ॥

ಶ್ಲೋಕ 95

ದಶಪಾದೈರ್ದಶಗ್ರೀವೈಸ್ತ್ರಿನೇತ್ರೈರುಗ್ರಮೂರ್ತಿಭಿಃ ।

ಅನ್ತರಿಕ್ಷಚರಾ ಯೇ ಚ ಯೇ ಚ ಭೂಮಿಚರಾಃ ಸ್ಮೃತಾಃ

॥ 94 ॥

ಶ್ಲೋಕ 96

ರುದ್ರಾಧ್ಯಾಯೇ ಸ್ಮೃತಾ ರುದ್ರಾಸ್ತೈಃ ಸರ್ವೈಶ್ಚ ಸಮಾವೃತಃ ।

ರುದ್ರಾಣೀಕೋಟಿಸಹಿತೋ ಭದ್ರಕಾಲ್ಯಾದಿಮಾತೃಭಿಃ

॥ 95 ॥

ಶ್ಲೋಕ 97

ನಾನಾಶಕ್ತಿಸಮಾವಿಷ್ಟಡಾಮರ್ಯಾದಿಗಣಾವೃತಃ ।

ವೀರಭದ್ರಾದಿಸಹಿತೋ ರುದ್ರೋ ರಾಜನ್ವಿರಾಜತೇ

॥ 96 ॥

ಶ್ಲೋಕ 98

ಮುಣ್ಡಮಾಲಾಧರೋ ನಾಗವಲಯೋ ನಾಗಕನ್ಧರಃ ।

ವ್ಯಾಘ್ರಚರ್ಮಪರೀಧಾನೋ ಗಜಚರ್ಮೋತ್ತರೀಯಕಃ

॥ 97 ॥

ಶ್ಲೋಕ 99

ಚಿತಾಭಸ್ಮಾಙ್ಗಲಿಪ್ತಾಙ್ಗಃ ಪ್ರಮಥಾದಿಗಣಾವೃತಃ ।

ನಿನದಡ್ಡಮರುಧ್ವಾನೈರ್ಬಧಿರೀಕೃತದಿಮ್ಮುಖಃ

॥ 98 ॥

ಶ್ಲೋಕ 100

ಅಟ್ಟಹಾಸಾಸ್ಫೋಟಶಬ್ದೈಃ ಸನ್ತ್ರಾಸಿತನಭಸ್ತಲಃ ।

ಭೂತಸಙ್ಘಸಮಾವಿಷ್ಟೋ ಭೂತಾವಾಸೋ ಮಹೇಶ್ವರಃ

॥ 99 ॥

ಶ್ಲೋಕ 101

ಈಶಾನದಿಕ್ಪತಿಃ ಸೋಽಯಂ ನಾಮ್ನಾ ಚೇಶಾನ ಏವ ಚ

॥ 100 ॥

ಶ್ಲೋಕ 102

ಇತಿ ಶ್ರೀದೇವೀಭಾಗವತೇ ಮಹಾಪುರಾಣೇ ದ್ವಾದಶಸ್ಕನ್ಧೇ ಮಣಿದ್ವೀಪವರ್ಣನಂ ನಾಮ ದಶಮೋಽಧ್ಯಾಯಃ ॥