ಮಹಾ ಗಣಪತಿ ಮೂಲ ಮನ್ತ್ರಾಃ (ಪಾದ ಮಾಲಾ ಸ್ತೋತ್ರಮ್)

ಮಹಾ ಗಣಪತಿ ಮೂಲ ಮನ್ತ್ರಾಃ (ಪಾದ ಮಾಲಾ ಸ್ತೋತ್ರಮ್)

ಶ್ಲೋಕ 1

॥ ಮೂಲಮನ್ತ್ರಮ್ ॥

॥ ಓಂ ಹ್ರೀಂ ಶ್ರೀಂ ಕ್ಲೀಂ ಗ್ಲೌಂ ಗಂ ಗಣಪತಯೇ ವರವರದ

ಸರ್ವಜನಂ ಮೇ ವಶಮಾನಯ ಸ್ವಾಹಾ ॥

॥ ಅಥ ಸ್ತೋತ್ರಮ್॥

ಓಂ ಇತ್ಯೇತದಜಸ್ಯ ಕಣ್ಠವಿವರಂ ಭಿತ್ವಾ ಬಹಿರ್ನಿರ್ಗತಂ

ಹ್ಯೋಮಿತ್ಯೇವ ಸಮಸ್ತಕರ್ಮ ಋಷಿಭಿಃ ಪ್ರಾರಭ್ಯತೇ ಮಾನುಷೈಃ ।

ಓಮಿತ್ಯೇವ ಸದಾ ಜಪನ್ತಿ ಯತಯಃ ಸ್ವಾತಮೈಕನಿಷ್ಠಾಃ ಪರಂ

ಹ್ಯೋಙ್ಕಾರಾಕೃತಿವಕ್ತ್ರಮಿನ್ದುನಿಟಿಲಂ ವಿಘ್ನೇಶ್ವರಂ ಭವಾಯೇ

ಶ್ಲೋಕ 2

ಶ್ರೀಮ್ಬೀಜಂ ಶ್ರಮದುಃಖಜನ್ಮಮರಣವ್ಯಾಧ್ಯಾಧಿಭೀನಾಶಕಂ

ಮೃತ್ಯುಕ್ರೋಧನಶಾನ್ತಿಬಿನ್ದುವಿಲಸದ್ವರ್ಣಾಕೃತಿಶ್ರೀಪ್ರದಮ್ ।

ಸ್ವಾನ್ತಃಸ್ವಾತ್ಮಶರಸ್ಯ ಲಕ್ಷ್ಯಮಜರಸ್ವಾತ್ಮಾವಬೋಧಪ್ರದಂ

ಶ್ರೀಶ್ರೀನಾಯಕಸೇವಿತೇ ಭವದನಪ್ರೇಮಾಸ್ಪದಂ ಭಾವಯೇ

॥ 1॥

ಶ್ಲೋಕ 3

ಹ್ರೀಮ್ಬೀಜಂ ಹೃದಯತ್ರಿಕೋಣವಿಲಸನ್ಮಧ್ಯಾಸನಸ್ಥಂ ಸದಾ

ಚಾಕಾಶಾನಲವಾಮಲೋಚನನಿಶಾನಾಥಾರ್ಧವರ್ಣಾತ್ಮಕಮ್ ।

ಮಾಯಾಕಾರ್ಯಜಗತ್ಪ್ರಕಾಶಕಮುಮಾರೂಪಂ ಸ್ವಶಕ್ತಿಪ್ರದಂ

ಮಾಯಾತೀತಪದಪ್ರದಂ ಹೃದಿ ಭಜೇ ಲೋಕೇಶ್ವರಾರಾಧಿತಮ್

॥ 2॥

ಶ್ಲೋಕ 4

ಕ್ಲೀಮ್ಬೀಜಂ ಕಲಿಧಾತುವತ್ಕಲಯತಾಂ ಸರ್ವೇಷ್ಟದಂ ದೇಹಿನಾಂ

ಧಾತೃಕ್ಷ್ಮಾಯುತಶಾನ್ತಿಬಿನ್ದುವಿಲಸದ್ವರ್ಣಾತ್ಮಕಂ ಕಾಮದಮ್ ।

ಶ್ರೀಕೃಷ್ಣಪ್ರಿಯಮಿನ್ದಿರಾಸುತಮನಃಪ್ರೀತ್ಯೇಕಹೇತುಂ ಪರಂ

ಹೃತ್ಪದ್ಮೇ ಕಲಯೇ ಸದಾ ಕಲಿಹರಂ ಕಾಲಾರಿಪುತ್ರಪ್ರಿಯಮ್

॥ 3॥

ಶ್ಲೋಕ 5

ಗ್ಲೌಮ್ಬೀಜಂ ಗುಣರೂಪನಿರ್ಗುಣಪರಬ್ರಹ್ಮಾದಿಶಕ್ತೇರ್ಮಹಾ-

ಹಙ್ಕಾರಾಕೃತಿದಣ್ಡಿನೀಪ್ರಿಯಮಜಶ್ರೀನಾಥರುದ್ರೇಷ್ಟದಮ್ ।

ಸರ್ವಾಕರ್ಷಿಣಿದೇವರಾಜಭುವನಾರ್ಣೇನ್ದ್ವಾತ್ಮಕಂ ಶ್ರೀಕರಂ

ಚಿತ್ತೇ ವಿಘ್ನನಿವಾರಣಾಯ ಗಿರಿಜಜಾತಪ್ರಿಯಂ ಭಾವಯೇ

॥ 4॥

ಶ್ಲೋಕ 6

ಗಙ್ಗಾಸುತಂ ಗನ್ಧಮುಖೋಪಚಾರಪ್ರಿಯಂ ಖಗಾರೋಹಣಭಾಗಿನೇಯಮ್ ।

ಗಙ್ಗಾಸುತಾದ್ಯಂ ವರಗನ್ಧತತ್ತ್ವಮೂಲಾಮ್ಬುಜಸ್ಥಂ ಹೃದಿ ಭಾವಯೇಽಹಮ್

॥ 5॥

ಶ್ಲೋಕ 7

ಗಣಪತಯೇ ವರಗುಣನಿಧಯೇ ಸುರಗಣಪತಯೇ ನತಜನತತಯೇ ।

ಮಣಿಗಣಭೂಷಿತಚರಣಯುಗಾಶ್ರಿತಮಲಹರಣೇ ಚಣ ತೇ ನಮಃ

॥ 6॥

ಶ್ಲೋಕ 8

ವರಾಭಯೇ ಮೋದಕಮೇಕದನ್ತಂ ಕರಾಮ್ಬುಜಾತೈಃ ಸತತಂ ಧರನ್ತಮ್ ।

ವರಾಙ್ಗಚನ್ದ್ರಂ ಪರಭಕ್ತಿಸಾನ್ದ್ರೈರ್ಜನೈರ್ಭಜನ್ತಂ ಕಲಯೇ ಸದಾಽನ್ತಃ

॥ 7॥

ಶ್ಲೋಕ 9

ವರದ ನತಜನಾನಾಂ ಸನ್ತತಂ ವಕ್ರತುಣ್ಡ

ಸ್ವರಮಯನಿಜಗಾತ್ರ ಸ್ವಾತ್ಮಬೋಧೈಕಹೇತೋ ।

ಕರಲಸದಮೃತಾಮ್ಭೋಪೂರ್ಣಪತ್ರಾದ್ಯ ಮಹ್ಯಂ

ಗರಗಲಸುತ ಶೀಘ್ರಂ ದೇಹಿ ಮದ್ಬೋಧಮೀಡ್ಯಮ್

॥ 8॥

ಶ್ಲೋಕ 10

ಸರ್ವಜನಂ ಪರಿಪಾಲಯ ಶರ್ವಜ

ಪರ್ವಸುಧಾಕರಗರ್ವಹರ ।

ಪರ್ವತನಾಥಸುತಾಸುತ ಪಾಲಯ

ಖರ್ವಂ ಮಾ ಕುರು ದೀನಮಿಮಮ್

॥ 9॥

ಶ್ಲೋಕ 11

ಮೇದೋಽಸ್ಥಿಮಾಂಸರುಧಿರಾನ್ತ್ರಮಯೇ ಶರೀರೇ

ಮೇದಿನ್ಯಬಗ್ನಿಮರುದಮ್ಬರಲಾಸ್ಯಮಾನೇ ।

ಮೇ ದಾರುಣಂ ಮದಮುಖಾಘಮುಮಾಜ ಹೃತ್ವಾ

ಮೇಧಾಹ್ವಯಾಸನವರೇ ವಸ ದನ್ತಿವಕ್ತ್ರ

॥ 10 ॥

ಶ್ಲೋಕ 12

ವಶಂ ಕುರು ತ್ವಂ ಶಿವಜಾತ ಮಾಂ ತೇ ವಶೀಕೃತಾಶೇಷಸಮಸ್ತಲೋಕ ।

ವಸಾರ್ಣಸಂಶೋಭಿತಮೂಲಪದ್ಮಲಸಚ್ಛ್ರಿಯಾಽಲಿಙ್ತವಾರಣಾಸ್ಯ

॥ 11॥

ಶ್ಲೋಕ 13

ಆನಯಾಶುಪದವಾರಿಜಾನ್ತಿಕಂ ಮಾಂ ನಯಾದಿಗುಣವರ್ಜಿತಂ ತವ ।

ಹಾನಿಹೀನಪದಜಾಮೃತಸ್ಯ ತೇ ಪಾನಯೋಗ್ಯಮಿಭವಕ್ತ್ರ ಮಾಂ ಕುರು

॥ 12॥

ಶ್ಲೋಕ 14

ಸ್ವಾಹಾಸ್ವರೂಪೇಣ ವಿರಾಜಸೇ ತ್ವಂ ಸುಧಾಶನಾನಾಂ ಪ್ರಿಯಕರ್ಮಣೀಡ್ಯಮ್ ।

ಸ್ವಧಾಸ್ವರೂಪೇಣ ತು ಪಿತ್ರ್ಯಕರ್ಮಣ್ಯುಮಾಸುತೇಜ್ಯಾಮಯವಿಶ್ವಮೂರ್ತೇ

॥ 13॥

ಶ್ಲೋಕ 15

ಅಷ್ಟಾವಿಂಶತಿವರ್ಣಪತ್ರಲಸಿತಂ ಹಾರಂ ಗಣೇಶಪ್ರಿಯಂ

ಕಷ್ಟಾಽನಿಷ್ಟಹರಂ ಚತುರ್ದಶಪದೈಃ ಪುಷ್ಪೈರ್ಮನೋಹಾರಕಮ್ ।

ತುಷ್ಟ್ಯಾದಿಪ್ರದಸದ್ಗುರುತ್ತಮಪದಾಮ್ಭೋಜೇ ಚಿದಾನನ್ದದಂ

ಶಿಷ್ಟೇಷ್ಟೋಽಹಮನನ್ತಸೂತ್ರಹೃದಯಾಽಽಬದ್ಧಂ ಸುಭಕ್ತ್ಯಾಽರ್ಪಯೇ

॥ 14॥

ಶ್ಲೋಕ 16

॥ ಇತಿ ಶ್ರೀಅನನ್ತಾನನ್ದಕೃತಂ ಶ್ರೀಗುರುಚಿದಾನನ್ದನಾಥಸಮರ್ಪಿತಂ

ಶ್ರೀಮಹಾಗಣಪತಿಮೂಲಮನ್ತ್ರಮಾಲಾಸ್ತೋತ್ರಮ್ ॥