കാലഭൈരവാഷ്ടകമ്

കാലഭൈരവാഷ്ടകമ്

ശ്ലോക 1

ദേവരാജ-സേവ്യമാന-പാവനാങ്ഘ്രി-പങ്കജം
വ്യാലയജ്ഞ-സൂത്രമിന്ദു-ശേഖരം കൃപാകരമ് ।
നാരദാദി-യോഗിബൃന്ദ-വന്ദിതം ദിഗമ്ബരം
കാശികാപുരാധിനാഥ കാലഭൈരവം ഭജേ ॥ ൧ ॥

ഭാനുകോടി-ഭാസ്വരം ഭവാബ്ധി-താരകം പരം
നീലകണ്ഠമീപ്സിതാര്ഥദായകം ത്രിലോചനമ് ।
കാലകാലമമ്ബുജാക്ഷമക്ഷശൂലമക്ഷരം
കാശികാപുരാധിനാഥ കാലഭൈരവം ഭജേ ॥ ൨ ॥

ശൂലടങ്കപാശദണ്ഡപാണിമാദികാരണം
ശ്യാമകായമാദിദേവമക്ഷരം നിരാമയമ് ।
ഭീമവിക്രമം പ്രഭും വിചിത്രതാണ്ഡവപ്രിയം
കാശികാപുരാധിനാഥ കാലഭൈരവം ഭജേ ॥ ൩ ॥

ഭുക്തിമുക്തിദായകം പ്രശസ്തചാരുവിഗ്രഹം
ഭക്തവത്സലം സ്ഥിതം സമസ്തലോകവിഗ്രഹമ് ।
വിനിക്വണന്മനോജ്ഞഹേമകിങ്കിണീലസത്കടിം
കാശികാപുരാധിനാഥ കാലഭൈരവം ഭജേ ॥ ൪ ॥

ധര്മസേതുപാലകം ത്വധര്മമാര്ഗനാശകം
കര്മപാശമോചകം സുശര്മദായകം വിഭുമ് ।
സ്വര്ണവര്ണകേശപാശഭൂഷിതം ത്രിലോചനം
കാശികാപുരാധിനാഥ കാലഭൈരവം ഭജേ ॥ ൫ ॥

രത്നപാദുകാപ്രഭാഭിരാമപാദയുഗ്മകം
നിത്യമദ്വിതീയമിഷ്ടദൈവതം നിരഞ്ജനമ് ।
മൃത്യുദര്പനാശനം കരാലദംഷ്ട്രമോക്ഷണം
കാശികാപുരാധിനാഥ കാലഭൈരവം ഭജേ ॥ ൬ ॥

അട്ടഹാസഭിന്നപദ്മജാണ്ഡകോശസന്തതിം
ദൃഷ്ടിപാതനഷ്ടപാപജാലമുഗ്രശാസനമ് ।
അഷ്ടസിദ്ധിദായകം കപാലമാലികാധരം
കാശികാപുരാധിനാഥ കാലഭൈരവം ഭജേ ॥ ൭ ॥

ഭൂതസങ്ഘനായകം വിശാലകീര്തിദായകം
കാശിവാസലോകപുണ്യപാപശോധകം വിഭുമ് ।
നീതിമാര്ഗകോവിദം പുരാതനം ജഗത്പതിം
കാശികാപുരാധിനാഥ കാലഭൈരവം ഭജേ ॥ ൮ ॥

കാലഭൈരവാഷ്ടകം പഠന്തി യേ മനോഹരം
ജ്ഞാനമുക്തിസാധനം വിചിത്രപുണ്യവര്ധനമ് ।
ശോകമോഹദൈന്യലോഭകോപതാപനാശനം
തേ പ്രയാന്തി കാലഭൈരവാങ്ഘ്രിസന്നിധിം ധ്രുവമ് ॥ ൯ ॥