કાલભૈરવાષ્ટકમ્

કાલભૈરવાષ્ટકમ્

શ્લોક 1

દેવરાજ-સેવ્યમાન-પાવનાઙ્ઘ્રિ-પઙ્કજં
વ્યાલયજ્ઞ-સૂત્રમિન્દુ-શેખરં કૃપાકરમ્ ।
નારદાદિ-યોગિબૃન્દ-વન્દિતં દિગમ્બરં
કાશિકાપુરાધિનાથ કાલભૈરવં ભજે ॥ ૧ ॥

ભાનુકોટિ-ભાસ્વરં ભવાબ્ધિ-તારકં પરં
નીલકણ્ઠમીપ્સિતાર્થદાયકં ત્રિલોચનમ્ ।
કાલકાલમમ્બુજાક્ષમક્ષશૂલમક્ષરં
કાશિકાપુરાધિનાથ કાલભૈરવં ભજે ॥ ૨ ॥

શૂલટઙ્કપાશદણ્ડપાણિમાદિકારણં
શ્યામકાયમાદિદેવમક્ષરં નિરામયમ્ ।
ભીમવિક્રમં પ્રભું વિચિત્રતાણ્ડવપ્રિયં
કાશિકાપુરાધિનાથ કાલભૈરવં ભજે ॥ ૩ ॥

ભુક્તિમુક્તિદાયકં પ્રશસ્તચારુવિગ્રહં
ભક્તવત્સલં સ્થિતં સમસ્તલોકવિગ્રહમ્ ।
વિનિક્વણન્મનોજ્ઞહેમકિઙ્કિણીલસત્કટિં
કાશિકાપુરાધિનાથ કાલભૈરવં ભજે ॥ ૪ ॥

ધર્મસેતુપાલકં ત્વધર્મમાર્ગનાશકં
કર્મપાશમોચકં સુશર્મદાયકં વિભુમ્ ।
સ્વર્ણવર્ણકેશપાશભૂષિતં ત્રિલોચનં
કાશિકાપુરાધિનાથ કાલભૈરવં ભજે ॥ ૫ ॥

રત્નપાદુકાપ્રભાભિરામપાદયુગ્મકં
નિત્યમદ્વિતીયમિષ્ટદૈવતં નિરઞ્જનમ્ ।
મૃત્યુદર્પનાશનં કરાલદંષ્ટ્રમોક્ષણં
કાશિકાપુરાધિનાથ કાલભૈરવં ભજે ॥ ૬ ॥

અટ્ટહાસભિન્નપદ્મજાણ્ડકોશસન્તતિં
દૃષ્ટિપાતનષ્ટપાપજાલમુગ્રશાસનમ્ ।
અષ્ટસિદ્ધિદાયકં કપાલમાલિકાધરં
કાશિકાપુરાધિનાથ કાલભૈરવં ભજે ॥ ૭ ॥

ભૂતસઙ્ઘનાયકં વિશાલકીર્તિદાયકં
કાશિવાસલોકપુણ્યપાપશોધકં વિભુમ્ ।
નીતિમાર્ગકોવિદં પુરાતનં જગત્પતિં
કાશિકાપુરાધિનાથ કાલભૈરવં ભજે ॥ ૮ ॥

કાલભૈરવાષ્ટકં પઠન્તિ યે મનોહરં
જ્ઞાનમુક્તિસાધનં વિચિત્રપુણ્યવર્ધનમ્ ।
શોકમોહદૈન્યલોભકોપતાપનાશનં
તે પ્રયાન્તિ કાલભૈરવાઙ્ઘ્રિસન્નિધિં ધ્રુવમ્ ॥ ૯ ॥