గోవిన్దాష్టకమ్

గోవిన్దాష్టకమ్

శ్లోక 1

సత్యం జ్ఞానమనన్తం నిత్యమనాకాశం పరమాకాశమ్ ।

గోష్ఠప్రాఙ్గణరిఙ్ఖణలోలమనాయాసం పరమాయాసమ్ ।

మాయాకల్పితనానాకారమనాకారం భువనాకారమ్ ।

క్ష్మామానాథమనాథం ప్రణమత గోవిన్దం పరమానన్దమ్

శ్లోక 2

మృత్స్నామత్సీహేతి యశోదాతాడనశైశవ సన్త్రాసమ్ ।

వ్యాదితవక్త్రాలోకితలోకాలోకచతుర్దశలోకాలిమ్ ।

లోకత్రయపురమూలస్తమ్భం లోకాలోకమనాలోకమ్ ।

లోకేశం పరమేశం ప్రణమత గోవిన్దం పరమానన్దమ్

॥ 1 ॥

శ్లోక 3

త్రైవిష్టపరిపువీరఘ్నం క్షితిభారఘ్నం భవరోగఘ్నమ్ ।

కైవల్యం నవనీతాహారమనాహారం భువనాహారమ్ ।

వైమల్యస్ఫుటచేతోవృత్తివిశేషాభాసమనాభాసమ్ ।

శైవం కేవలశాన్తం ప్రణమత గోవిన్దం పరమానన్దమ్

॥ 2 ॥

శ్లోక 4

గోపాలం ప్రభులీలావిగ్రహగోపాలం కులగోపాలమ్ ।

గోపీఖేలనగోవర్ధనధృతిలీలాలాలితగోపాలమ్ ।

గోభిర్నిగదిత గోవిన్దస్ఫుటనామానం బహునామానమ్ ।

గోపీగోచరదూరం ప్రణమత గోవిన్దం పరమానన్దమ్

॥ 3 ॥

శ్లోక 5

గోపీమణ్డలగోష్ఠీభేదం భేదావస్థమభేదాభమ్ ।

శశ్వద్గోఖురనిర్ధూతోద్గత ధూలీధూసరసౌభాగ్యమ్ ।

శ్రద్ధాభక్తిగృహీతానన్దమచిన్త్యం చిన్తితసద్భావమ్ ।

చిన్తామణిమహిమానం ప్రణమత గోవిన్దం పరమానన్దమ్

॥ 4 ॥

శ్లోక 6

స్నానవ్యాకులయోషిద్వస్త్రముపాదాయాగముపారూఢమ్ ।

వ్యాదిత్సన్తీరథ దిగ్వస్త్రా దాతుముపాకర్షన్తం తాః

నిర్ధూతద్వయశోకవిమోహం బుద్ధం బుద్ధేరన్తస్థమ్ ।

సత్తామాత్రశరీరం ప్రణమత గోవిన్దం పరమానన్దమ్

॥ 5 ॥

శ్లోక 7

కాన్తం కారణకారణమాదిమనాదిం కాలధనాభాసమ్ ।

కాలిన్దీగతకాలియశిరసి సునృత్యన్తం ముహురత్యన్తమ్ ।

కాలం కాలకలాతీతం కలితాశేషం కలిదోషఘ్నమ్ ।

కాలత్రయగతిహేతుం ప్రణమత గోవిన్దం పరమానన్దమ్

॥ 6 ॥

శ్లోక 8

బృన్దావనభువి బృన్దారకగణబృన్దారాధితవన్దేహమ్ ।

కున్దాభామలమన్దస్మేరసుధానన్దం సుహృదానన్దమ్ ।

వన్ద్యాశేష మహాముని మానస వన్ద్యానన్దపదద్వన్ద్వమ్ ।

వన్ద్యాశేషగుణాబ్ధిం ప్రణమత గోవిన్దం పరమానన్దమ్

॥ 7 ॥

శ్లోక 9

గోవిన్దాష్టకమేతదధీతే గోవిన్దార్పితచేతా యః ।

గోవిన్దాచ్యుత మాధవ విష్ణో గోకులనాయక కృష్ణేతి ।

గోవిన్దాఙ్ఘ్రి సరోజధ్యానసుధాజలధౌతసమస్తాఘః ।

గోవిన్దం పరమానన్దామృతమన్తస్థం స తమభ్యేతి ॥

ఇతి శ్రీ శఙ్కరాచార్య విరచిత శ్రీగోవిన్దాష్టకం సమాప్తం