ಗೋವಿನ್ದಾಷ್ಟಕಮ್

ಗೋವಿನ್ದಾಷ್ಟಕಮ್

ಶ್ಲೋಕ 1

ಸತ್ಯಂ ಜ್ಞಾನಮನನ್ತಂ ನಿತ್ಯಮನಾಕಾಶಂ ಪರಮಾಕಾಶಮ್ ।

ಗೋಷ್ಠಪ್ರಾಙ್ಗಣರಿಙ್ಖಣಲೋಲಮನಾಯಾಸಂ ಪರಮಾಯಾಸಮ್ ।

ಮಾಯಾಕಲ್ಪಿತನಾನಾಕಾರಮನಾಕಾರಂ ಭುವನಾಕಾರಮ್ ।

ಕ್ಷ್ಮಾಮಾನಾಥಮನಾಥಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್

ಶ್ಲೋಕ 2

ಮೃತ್ಸ್ನಾಮತ್ಸೀಹೇತಿ ಯಶೋದಾತಾಡನಶೈಶವ ಸನ್ತ್ರಾಸಮ್ ।

ವ್ಯಾದಿತವಕ್ತ್ರಾಲೋಕಿತಲೋಕಾಲೋಕಚತುರ್ದಶಲೋಕಾಲಿಮ್ ।

ಲೋಕತ್ರಯಪುರಮೂಲಸ್ತಮ್ಭಂ ಲೋಕಾಲೋಕಮನಾಲೋಕಮ್ ।

ಲೋಕೇಶಂ ಪರಮೇಶಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್

॥ 1 ॥

ಶ್ಲೋಕ 3

ತ್ರೈವಿಷ್ಟಪರಿಪುವೀರಘ್ನಂ ಕ್ಷಿತಿಭಾರಘ್ನಂ ಭವರೋಗಘ್ನಮ್ ।

ಕೈವಲ್ಯಂ ನವನೀತಾಹಾರಮನಾಹಾರಂ ಭುವನಾಹಾರಮ್ ।

ವೈಮಲ್ಯಸ್ಫುಟಚೇತೋವೃತ್ತಿವಿಶೇಷಾಭಾಸಮನಾಭಾಸಮ್ ।

ಶೈವಂ ಕೇವಲಶಾನ್ತಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್

॥ 2 ॥

ಶ್ಲೋಕ 4

ಗೋಪಾಲಂ ಪ್ರಭುಲೀಲಾವಿಗ್ರಹಗೋಪಾಲಂ ಕುಲಗೋಪಾಲಮ್ ।

ಗೋಪೀಖೇಲನಗೋವರ್ಧನಧೃತಿಲೀಲಾಲಾಲಿತಗೋಪಾಲಮ್ ।

ಗೋಭಿರ್ನಿಗದಿತ ಗೋವಿನ್ದಸ್ಫುಟನಾಮಾನಂ ಬಹುನಾಮಾನಮ್ ।

ಗೋಪೀಗೋಚರದೂರಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್

॥ 3 ॥

ಶ್ಲೋಕ 5

ಗೋಪೀಮಣ್ಡಲಗೋಷ್ಠೀಭೇದಂ ಭೇದಾವಸ್ಥಮಭೇದಾಭಮ್ ।

ಶಶ್ವದ್ಗೋಖುರನಿರ್ಧೂತೋದ್ಗತ ಧೂಲೀಧೂಸರಸೌಭಾಗ್ಯಮ್ ।

ಶ್ರದ್ಧಾಭಕ್ತಿಗೃಹೀತಾನನ್ದಮಚಿನ್ತ್ಯಂ ಚಿನ್ತಿತಸದ್ಭಾವಮ್ ।

ಚಿನ್ತಾಮಣಿಮಹಿಮಾನಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್

॥ 4 ॥

ಶ್ಲೋಕ 6

ಸ್ನಾನವ್ಯಾಕುಲಯೋಷಿದ್ವಸ್ತ್ರಮುಪಾದಾಯಾಗಮುಪಾರೂಢಮ್ ।

ವ್ಯಾದಿತ್ಸನ್ತೀರಥ ದಿಗ್ವಸ್ತ್ರಾ ದಾತುಮುಪಾಕರ್ಷನ್ತಂ ತಾಃ

ನಿರ್ಧೂತದ್ವಯಶೋಕವಿಮೋಹಂ ಬುದ್ಧಂ ಬುದ್ಧೇರನ್ತಸ್ಥಮ್ ।

ಸತ್ತಾಮಾತ್ರಶರೀರಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್

॥ 5 ॥

ಶ್ಲೋಕ 7

ಕಾನ್ತಂ ಕಾರಣಕಾರಣಮಾದಿಮನಾದಿಂ ಕಾಲಧನಾಭಾಸಮ್ ।

ಕಾಲಿನ್ದೀಗತಕಾಲಿಯಶಿರಸಿ ಸುನೃತ್ಯನ್ತಂ ಮುಹುರತ್ಯನ್ತಮ್ ।

ಕಾಲಂ ಕಾಲಕಲಾತೀತಂ ಕಲಿತಾಶೇಷಂ ಕಲಿದೋಷಘ್ನಮ್ ।

ಕಾಲತ್ರಯಗತಿಹೇತುಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್

॥ 6 ॥

ಶ್ಲೋಕ 8

ಬೃನ್ದಾವನಭುವಿ ಬೃನ್ದಾರಕಗಣಬೃನ್ದಾರಾಧಿತವನ್ದೇಹಮ್ ।

ಕುನ್ದಾಭಾಮಲಮನ್ದಸ್ಮೇರಸುಧಾನನ್ದಂ ಸುಹೃದಾನನ್ದಮ್ ।

ವನ್ದ್ಯಾಶೇಷ ಮಹಾಮುನಿ ಮಾನಸ ವನ್ದ್ಯಾನನ್ದಪದದ್ವನ್ದ್ವಮ್ ।

ವನ್ದ್ಯಾಶೇಷಗುಣಾಬ್ಧಿಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್

॥ 7 ॥

ಶ್ಲೋಕ 9

ಗೋವಿನ್ದಾಷ್ಟಕಮೇತದಧೀತೇ ಗೋವಿನ್ದಾರ್ಪಿತಚೇತಾ ಯಃ ।

ಗೋವಿನ್ದಾಚ್ಯುತ ಮಾಧವ ವಿಷ್ಣೋ ಗೋಕುಲನಾಯಕ ಕೃಷ್ಣೇತಿ ।

ಗೋವಿನ್ದಾಙ್ಘ್ರಿ ಸರೋಜಧ್ಯಾನಸುಧಾಜಲಧೌತಸಮಸ್ತಾಘಃ ।

ಗೋವಿನ್ದಂ ಪರಮಾನನ್ದಾಮೃತಮನ್ತಸ್ಥಂ ಸ ತಮಭ್ಯೇತಿ ॥

ಇತಿ ಶ್ರೀ ಶಙ್ಕರಾಚಾರ್ಯ ವಿರಚಿತ ಶ್ರೀಗೋವಿನ್ದಾಷ್ಟಕಂ ಸಮಾಪ್ತಂ