గోవిన్ద దామోదర స్తోత్రమ్ (లఘు)

గోవిన్ద దామోదర స్తోత్రమ్ (లఘు)

శ్లోక 1

కరారవిన్దేన పదారవిన్దం

ముఖారవిన్దే వినివేశయన్తమ్ ।

వటస్య పత్రస్య పుటే శయానం

బాలం ముకున్దం మనసా స్మరామి ॥

శ్రీకృష్ణ గోవిన్ద హరే మురారే

హే నాథ నారాయణ వాసుదేవ ।

జిహ్వే పిబస్వామృతమేతదేవ

గోవిన్ద దామోదర మాధవేతి ॥ 1

విక్రేతుకామాఖిలగోపకన్యా

మురారిపాదార్పితచిత్తవృత్తిః ।

దధ్యాదికం మోహవశాదవోచత్

గోవిన్ద దామోదర మాధవేతి ॥ 2

గృహే గృహే గోపవధూకదమ్బాః

సర్వే మిలిత్వా సమవాప్య యోగమ్ ।

పుణ్యాని నామాని పఠన్తి నిత్యం

గోవిన్ద దామోదర మాధవేతి ॥ 3

సుఖం శయానా నిలయే నిజేఽపి

నామాని విష్ణోః ప్రవదన్తి మర్త్యాః ।

తే నిశ్చితం తన్మయతాం వ్రజన్తి

గోవిన్ద దామోదర మాధవేతి ॥ 4

జిహ్వే సదైవం భజ సున్దరాణి

నామాని కృష్ణస్య మనోహరాణి ।

సమస్త భక్తార్తివినాశనాని

గోవిన్ద దామోదర మాధవేతి ॥ 5

సుఖావసానే ఇదమేవ సారం

దుఃఖావసానే ఇదమేవ జ్ఞేయమ్ ।

దేహావసానే ఇదమేవ జాప్యం

గోవిన్ద దామోదర మాధవేతి ॥ 6

జిహ్వే రసజ్ఞే మధురప్రియే త్వం

సత్యం హితం త్వాం పరమం వదామి ।

అవర్ణయేథా మధురాక్షరాణి

గోవిన్ద దామోదర మాధవేతి ॥ 7

త్వామేవ యాచే మమ దేహి జిహ్వే

సమాగతే దణ్డధరే కృతాన్తే ।

వక్తవ్యమేవం మధురం సుభక్త్యా

గోవిన్ద దామోదర మాధవేతి ॥ 8

శ్రీకృష్ణ రాధావర గోకులేశ

గోపాల గోవర్ధననాథ విష్ణో ।

జిహ్వే పిబస్వామృతమేతదేవ

గోవిన్ద దామోదర మాధవేతి ॥ 9