ഗോവിന്ദ ദാമോദര സ്തോത്രമ് (ലഘു)

ഗോവിന്ദ ദാമോദര സ്തോത്രമ് (ലഘു)

ശ്ലോക 1

കരാരവിന്ദേന പദാരവിന്ദം

മുഖാരവിന്ദേ വിനിവേശയന്തമ് ।

വടസ്യ പത്രസ്യ പുടേ ശയാനം

ബാലം മുകുന്ദം മനസാ സ്മരാമി ॥

ശ്രീകൃഷ്ണ ഗോവിന്ദ ഹരേ മുരാരേ

ഹേ നാഥ നാരായണ വാസുദേവ ।

ജിഹ്വേ പിബസ്വാമൃതമേതദേവ

ഗോവിന്ദ ദാമോദര മാധവേതി ॥ 1

വിക്രേതുകാമാഖിലഗോപകന്യാ

മുരാരിപാദാര്പിതചിത്തവൃത്തിഃ ।

ദധ്യാദികം മോഹവശാദവോചത്

ഗോവിന്ദ ദാമോദര മാധവേതി ॥ 2

ഗൃഹേ ഗൃഹേ ഗോപവധൂകദമ്ബാഃ

സര്വേ മിലിത്വാ സമവാപ്യ യോഗമ് ।

പുണ്യാനി നാമാനി പഠന്തി നിത്യം

ഗോവിന്ദ ദാമോദര മാധവേതി ॥ 3

സുഖം ശയാനാ നിലയേ നിജേഽപി

നാമാനി വിഷ്ണോഃ പ്രവദന്തി മര്ത്യാഃ ।

തേ നിശ്ചിതം തന്മയതാം വ്രജന്തി

ഗോവിന്ദ ദാമോദര മാധവേതി ॥ 4

ജിഹ്വേ സദൈവം ഭജ സുന്ദരാണി

നാമാനി കൃഷ്ണസ്യ മനോഹരാണി ।

സമസ്ത ഭക്താര്തിവിനാശനാനി

ഗോവിന്ദ ദാമോദര മാധവേതി ॥ 5

സുഖാവസാനേ ഇദമേവ സാരം

ദുഃഖാവസാനേ ഇദമേവ ജ്ഞേയമ് ।

ദേഹാവസാനേ ഇദമേവ ജാപ്യം

ഗോവിന്ദ ദാമോദര മാധവേതി ॥ 6

ജിഹ്വേ രസജ്ഞേ മധുരപ്രിയേ ത്വം

സത്യം ഹിതം ത്വാം പരമം വദാമി ।

അവര്ണയേഥാ മധുരാക്ഷരാണി

ഗോവിന്ദ ദാമോദര മാധവേതി ॥ 7

ത്വാമേവ യാചേ മമ ദേഹി ജിഹ്വേ

സമാഗതേ ദണ്ഡധരേ കൃതാന്തേ ।

വക്തവ്യമേവം മധുരം സുഭക്ത്യാ

ഗോവിന്ദ ദാമോദര മാധവേതി ॥ 8

ശ്രീകൃഷ്ണ രാധാവര ഗോകുലേശ

ഗോപാല ഗോവര്ധനനാഥ വിഷ്ണോ ।

ജിഹ്വേ പിബസ്വാമൃതമേതദേവ

ഗോവിന്ദ ദാമോദര മാധവേതി ॥ 9