ದೇವೀ ಮಾಹಾತ್ಮ್ಯಂ ದುರ್ಗಾ ಸಪ್ತಶತಿ ಅಷ್ಟಮೋಽಧ್ಯಾಯಃ

ದೇವೀ ಮಾಹಾತ್ಮ್ಯಂ ದುರ್ಗಾ ಸಪ್ತಶತಿ ಅಷ್ಟಮೋಽಧ್ಯಾಯಃ

ಶ್ಲೋಕ 1

ರಕ್ತಬೀಜವಧೋ ನಾಮ ಅಷ್ಟಮೋಧ್ಯಾಯ ॥

ಧ್ಯಾನಂ

ಅರುಣಾಂ ಕರುಣಾ ತರಙ್ಗಿತಾಕ್ಷೀಂ ಧೃತಪಾಶಾಙ್ಕುಶ ಪುಷ್ಪಬಾಣಚಾಪಾಮ್ ।

ಅಣಿಮಾಧಿಭಿರಾವೃತಾಂ ಮಯೂಖೈ ರಹಮಿತ್ಯೇವ ವಿಭಾವಯೇ ಭವಾನೀಮ್ ॥

ಋಷಿರುವಾಚ

ಶ್ಲೋಕ 2

ಚಣ್ಡೇ ಚ ನಿಹತೇ ದೈತ್ಯೇ ಮುಣ್ಡೇ ಚ ವಿನಿಪಾತಿತೇ ।

ಬಹುಲೇಷು ಚ ಸೈನ್ಯೇಷು ಕ್ಷಯಿತೇಷ್ವಸುರೇಶ್ವರಃ

॥1॥

ಶ್ಲೋಕ 3

ತತಃ ಕೋಪಪರಾಧೀನಚೇತಾಃ ಶುಮ್ಭಃ ಪ್ರತಾಪವಾನ್ ।

ಉದ್ಯೋಗಂ ಸರ್ವ ಸೈನ್ಯಾನಾಂ ದೈತ್ಯಾನಾಮಾದಿದೇಶ ಹ

॥ 2 ॥

ಶ್ಲೋಕ 4

ಅದ್ಯ ಸರ್ವ ಬಲೈರ್ದೈತ್ಯಾಃ ಷಡಶೀತಿರುದಾಯುಧಾಃ ।

ಕಮ್ಬೂನಾಂ ಚತುರಶೀತಿರ್ನಿರ್ಯಾನ್ತು ಸ್ವಬಲೈರ್ವೃತಾಃ

॥3॥

ಶ್ಲೋಕ 5

ಕೋಟಿವೀರ್ಯಾಣಿ ಪಞ್ಚಾಶದಸುರಾಣಾಂ ಕುಲಾನಿ ವೈ ।

ಶತಂ ಕುಲಾನಿ ಧೌಮ್ರಾಣಾಂ ನಿರ್ಗಚ್ಛನ್ತು ಮಮಾಜ್ಞಯಾ

॥4॥

ಶ್ಲೋಕ 6

ಕಾಲಕಾ ದೌರ್ಹೃದಾ ಮೌರ್ವಾಃ ಕಾಲಿಕೇಯಾಸ್ತಥಾಸುರಾಃ ।

ಯುದ್ಧಾಯ ಸಜ್ಜಾ ನಿರ್ಯಾನ್ತು ಆಜ್ಞಯಾ ತ್ವರಿತಾ ಮಮ

॥5॥

ಶ್ಲೋಕ 7

ಇತ್ಯಾಜ್ಞಾಪ್ಯಾಸುರಾಪತಿಃ ಶುಮ್ಭೋ ಭೈರವಶಾಸನಃ ।

ನಿರ್ಜಗಾಮ ಮಹಾಸೈನ್ಯಸಹಸ್ತ್ರೈರ್ಭಹುಭಿರ್ವೃತಃ

॥6॥

ಶ್ಲೋಕ 8

ಆಯಾನ್ತಂ ಚಣ್ಡಿಕಾ ದೃಷ್ಟ್ವಾ ತತ್ಸೈನ್ಯಮತಿಭೀಷಣಮ್ ।

ಜ್ಯಾಸ್ವನೈಃ ಪೂರಯಾಮಾಸ ಧರಣೀಗಗನಾನ್ತರಮ್

॥7॥

ಶ್ಲೋಕ 9

ತತಃಸಿಂಹೊ ಮಹಾನಾದಮತೀವ ಕೃತವಾನ್ನೃಪ ।

ಘಣ್ಟಾಸ್ವನೇನ ತಾನ್ನಾದಾನಮ್ಬಿಕಾ ಚೋಪಬೃಂಹಯತ್

॥8॥

ಶ್ಲೋಕ 10

ಧನುರ್ಜ್ಯಾಸಿಂಹಘಣ್ಟಾನಾಂ ನಾದಾಪೂರಿತದಿಙ್ಮುಖಾ ।

ನಿನಾದೈರ್ಭೀಷಣೈಃ ಕಾಲೀ ಜಿಗ್ಯೇ ವಿಸ್ತಾರಿತಾನನಾ

॥9॥

ಶ್ಲೋಕ 11

ತಂ ನಿನಾದಮುಪಶ್ರುತ್ಯ ದೈತ್ಯ ಸೈನ್ಯೈಶ್ಚತುರ್ದಿಶಮ್ ।

ದೇವೀ ಸಿಂಹಸ್ತಥಾ ಕಾಲೀ ಸರೋಷೈಃ ಪರಿವಾರಿತಾಃ

॥10॥

ಶ್ಲೋಕ 12

ಏತಸ್ಮಿನ್ನನ್ತರೇ ಭೂಪ ವಿನಾಶಾಯ ಸುರದ್ವಿಷಾಮ್ ।

ಭವಾಯಾಮರಸಿಂಹನಾಮತಿವೀರ್ಯಬಲಾನ್ವಿತಾಃ

॥11॥

ಶ್ಲೋಕ 13

ಬ್ರಹ್ಮೇಶಗುಹವಿಷ್ಣೂನಾಂ ತಥೇನ್ದ್ರಸ್ಯ ಚ ಶಕ್ತಯಃ ।

ಶರೀರೇಭ್ಯೋವಿನಿಷ್ಕ್ರಮ್ಯ ತದ್ರೂಪೈಶ್ಚಣ್ಡಿಕಾಂ ಯಯುಃ

॥12॥

ಶ್ಲೋಕ 14

ಯಸ್ಯ ದೇವಸ್ಯ ಯದ್ರೂಪಂ ಯಥಾ ಭೂಷಣವಾಹನಮ್ ।

ತದ್ವದೇವ ಹಿ ತಚ್ಚಕ್ತಿರಸುರಾನ್ಯೋದ್ಧುಮಾಯಮೌ

॥13॥

ಶ್ಲೋಕ 15

ಹಂಸಯುಕ್ತವಿಮಾನಾಗ್ರೇ ಸಾಕ್ಷಸೂತ್ರಕ ಮಣ್ಡಲುಃ ।

ಆಯಾತಾ ಬ್ರಹ್ಮಣಃ ಶಕ್ತಿಬ್ರಹ್ಮಾಣೀ ತ್ಯಭಿಧೀಯತೇ

॥14॥

ಶ್ಲೋಕ 16

ಮಹೇಶ್ವರೀ ವೃಷಾರೂಢಾ ತ್ರಿಶೂಲವರಧಾರಿಣೀ ।

ಮಹಾಹಿವಲಯಾ ಪ್ರಾಪ್ತಾಚನ್ದ್ರರೇಖಾವಿಭೂಷಣಾ

॥15॥

ಶ್ಲೋಕ 17

ಕೌಮಾರೀ ಶಕ್ತಿಹಸ್ತಾ ಚ ಮಯೂರವರವಾಹನಾ ।

ಯೋದ್ಧುಮಭ್ಯಾಯಯೌ ದೈತ್ಯಾನಮ್ಬಿಕಾ ಗುಹರೂಪಿಣೀ

॥16॥

ಶ್ಲೋಕ 18

ತಥೈವ ವೈಷ್ಣವೀ ಶಕ್ತಿರ್ಗರುಡೋಪರಿ ಸಂಸ್ಥಿತಾ ।

ಶಙ್ಖಚಕ್ರಗಧಾಶಾಙ್ಖರ್ ಖಡ್ಗಹಸ್ತಾಭ್ಯುಪಾಯಯೌ

॥17॥

ಶ್ಲೋಕ 19

ಯಜ್ಞವಾರಾಹಮತುಲಂ ರೂಪಂ ಯಾ ಭಿಭ್ರತೋ ಹರೇಃ ।

ಶಕ್ತಿಃ ಸಾಪ್ಯಾಯಯೌ ತತ್ರ ವಾರಾಹೀಂ ಬಿಭ್ರತೀ ತನುಮ್

॥18॥

ಶ್ಲೋಕ 20

ನಾರಸಿಂಹೀ ನೃಸಿಂಹಸ್ಯ ಬಿಭ್ರತೀ ಸದೃಶಂ ವಪುಃ ।

ಪ್ರಾಪ್ತಾ ತತ್ರ ಸಟಾಕ್ಷೇಪಕ್ಷಿಪ್ತನಕ್ಷತ್ರ ಸಂಹತಿಃ

॥19॥

ಶ್ಲೋಕ 21

ವಜ್ರ ಹಸ್ತಾ ತಥೈವೈನ್ದ್ರೀ ಗಜರಾಜೋ ಪರಿಸ್ಥಿತಾ ।

ಪ್ರಾಪ್ತಾ ಸಹಸ್ರ ನಯನಾ ಯಥಾ ಶಕ್ರಸ್ತಥೈವ ಸಾ

॥20॥

ಶ್ಲೋಕ 22

ತತಃ ಪರಿವೃತ್ತಸ್ತಾಭಿರೀಶಾನೋ ದೇವ ಶಕ್ತಿಭಿಃ ।

ಹನ್ಯನ್ತಾಮಸುರಾಃ ಶೀಘ್ರಂ ಮಮ ಪ್ರೀತ್ಯಾಹ ಚಣ್ಡಿಕಾಂ

॥21॥

ಶ್ಲೋಕ 23

ತತೋ ದೇವೀ ಶರೀರಾತ್ತು ವಿನಿಷ್ಕ್ರಾನ್ತಾತಿಭೀಷಣಾ ।

ಚಣ್ಡಿಕಾ ಶಕ್ತಿರತ್ಯುಗ್ರಾ ಶಿವಾಶತನಿನಾದಿನೀ

॥22॥

ಶ್ಲೋಕ 24

ಸಾ ಚಾಹ ಧೂಮ್ರಜಟಿಲಂ ಈಶಾನಮಪರಾಜಿತಾ ।

ದೂತತ್ವಂ ಗಚ್ಛ ಭಗವನ್ ಪಾರ್ಶ್ವಂ ಶುಮ್ಭನಿಶುಮ್ಭಯೋಃ

॥23॥

ಶ್ಲೋಕ 25

ಬ್ರೂಹಿ ಶುಮ್ಭಂ ನಿಶುಮ್ಭಂ ಚ ದಾನವಾವತಿಗರ್ವಿತೌ ।

ಯೇ ಚಾನ್ಯೇ ದಾನವಾಸ್ತತ್ರ ಯುದ್ಧಾಯ ಸಮುಪಸ್ಥಿತಾಃ

॥24॥

ಶ್ಲೋಕ 26

ತ್ರೈಲೋಕ್ಯಮಿನ್ದ್ರೋ ಲಭತಾಂ ದೇವಾಃ ಸನ್ತು ಹವಿರ್ಭುಜಃ ।

ಯೂಯಂ ಪ್ರಯಾತ ಪಾತಾಲಂ ಯದಿ ಜೀವಿತುಮಿಚ್ಛಥ

॥25॥

ಶ್ಲೋಕ 27

ಬಲಾವಲೇಪಾದಥ ಚೇದ್ಭವನ್ತೋ ಯುದ್ಧಕಾಙ್ಕ್ಷಿಣಃ ।

ತದಾ ಗಚ್ಛತ ತೃಪ್ಯನ್ತು ಮಚ್ಛಿವಾಃ ಪಿಶಿತೇನ ವಃ

॥26॥

ಶ್ಲೋಕ 28

ಯತೋ ನಿಯುಕ್ತೋ ದೌತ್ಯೇನ ತಯಾ ದೇವ್ಯಾ ಶಿವಃ ಸ್ವಯಮ್ ।

ಶಿವದೂತೀತಿ ಲೋಕೇಽಸ್ಮಿಂಸ್ತತಃ ಸಾ ಖ್ಯಾತಿ ಮಾಗತಾ

॥27॥

ಶ್ಲೋಕ 29

ತೇಽಪಿ ಶ್ರುತ್ವಾ ವಚೋ ದೇವ್ಯಾಃ ಶರ್ವಾಖ್ಯಾತಂ ಮಹಾಸುರಾಃ ।

ಅಮರ್ಷಾಪೂರಿತಾ ಜಗ್ಮುರ್ಯತ್ರ ಕಾತ್ಯಾಯನೀ ಸ್ಥಿತಾ

॥28॥

ಶ್ಲೋಕ 30

ತತಃ ಪ್ರಥಮಮೇವಾಗ್ರೇ ಶರಶಕ್ತ್ಯೃಷ್ಟಿವೃಷ್ಟಿಭಿಃ ।

ವವರ್ಷುರುದ್ಧತಾಮರ್ಷಾಃ ಸ್ತಾಂ ದೇವೀಮಮರಾರಯಃ

॥29॥

ಶ್ಲೋಕ 31

ಸಾ ಚ ತಾನ್ ಪ್ರಹಿತಾನ್ ಬಾಣಾನ್ ಞ್ಛೂಲಶಕ್ತಿಪರಶ್ವಧಾನ್ ।

ಚಿಚ್ಛೇದ ಲೀಲಯಾಧ್ಮಾತಧನುರ್ಮುಕ್ತೈರ್ಮಹೇಷುಭಿಃ

॥30॥

ಶ್ಲೋಕ 32

ತಸ್ಯಾಗ್ರತಸ್ತಥಾ ಕಾಲೀ ಶೂಲಪಾತವಿದಾರಿತಾನ್ ।

ಖಟ್ವಾಙ್ಗಪೋಥಿತಾಂಶ್ಚಾರೀನ್ಕುರ್ವನ್ತೀ ವ್ಯಚರತ್ತದಾ

॥31॥

ಶ್ಲೋಕ 33

ಕಮಣ್ಡಲುಜಲಾಕ್ಷೇಪಹತವೀರ್ಯಾನ್ ಹತೌಜಸಃ ।

ಬ್ರಹ್ಮಾಣೀ ಚಾಕರೋಚ್ಛತ್ರೂನ್ಯೇನ ಯೇನ ಸ್ಮ ಧಾವತಿ

॥32॥

ಶ್ಲೋಕ 34

ಮಾಹೇಶ್ವರೀ ತ್ರಿಶೂಲೇನ ತಥಾ ಚಕ್ರೇಣ ವೈಷ್ಣವೀ ।

ದೈತ್ಯಾಙ್ಜಘಾನ ಕೌಮಾರೀ ತಥಾ ಶತ್ಯಾತಿ ಕೋಪನಾ

॥33॥

ಶ್ಲೋಕ 35

ಐನ್ದ್ರೀ ಕುಲಿಶಪಾತೇನ ಶತಶೋ ದೈತ್ಯದಾನವಾಃ ।

ಪೇತುರ್ವಿದಾರಿತಾಃ ಪೃಥ್ವ್ಯಾಂ ರುಧಿರೌಘಪ್ರವರ್ಷಿಣಃ

॥34॥

ಶ್ಲೋಕ 36

ತುಣ್ಡಪ್ರಹಾರವಿಧ್ವಸ್ತಾ ದಂಷ್ಟ್ರಾ ಗ್ರಕ್ಷತ ವಕ್ಷಸಃ ।

ವಾರಾಹಮೂರ್ತ್ಯಾ ನ್ಯಪತಂಶ್ಚಕ್ರೇಣ ಚ ವಿದಾರಿತಾಃ

॥35॥

ಶ್ಲೋಕ 37

ನಖೈರ್ವಿದಾರಿತಾಂಶ್ಚಾನ್ಯಾನ್ ಭಕ್ಷಯನ್ತೀ ಮಹಾಸುರಾನ್ ।

ನಾರಸಿಂಹೀ ಚಚಾರಾಜೌ ನಾದಾ ಪೂರ್ಣದಿಗಮ್ಬರಾ

॥36॥

ಶ್ಲೋಕ 38

ಚಣ್ಡಾಟ್ಟಹಾಸೈರಸುರಾಃ ಶಿವದೂತ್ಯಭಿದೂಷಿತಾಃ ।

ಪೇತುಃ ಪೃಥಿವ್ಯಾಂ ಪತಿತಾಂಸ್ತಾಂಶ್ಚಖಾದಾಥ ಸಾ ತದಾ

॥37॥

ಶ್ಲೋಕ 39

ಇತಿ ಮಾತೃ ಗಣಂ ಕ್ರುದ್ಧಂ ಮರ್ದ ಯನ್ತಂ ಮಹಾಸುರಾನ್ ।

ದೃಷ್ಟ್ವಾಭ್ಯುಪಾಯೈರ್ವಿವಿಧೈರ್ನೇಶುರ್ದೇವಾರಿಸೈನಿಕಾಃ

॥38॥

ಶ್ಲೋಕ 40

ಪಲಾಯನಪರಾನ್ದೃಷ್ಟ್ವಾ ದೈತ್ಯಾನ್ಮಾತೃಗಣಾರ್ದಿತಾನ್ ।

ಯೋದ್ಧುಮಭ್ಯಾಯಯೌ ಕ್ರುದ್ಧೋ ರಕ್ತಬೀಜೋ ಮಹಾಸುರಃ

॥39॥

ಶ್ಲೋಕ 41

ರಕ್ತಬಿನ್ದುರ್ಯದಾ ಭೂಮೌ ಪತತ್ಯಸ್ಯ ಶರೀರತಃ ।

ಸಮುತ್ಪತತಿ ಮೇದಿನ್ಯಾಂ ತತ್ಪ್ರಮಾಣೋ ಮಹಾಸುರಃ

॥40॥

ಶ್ಲೋಕ 42

ಯುಯುಧೇ ಸ ಗದಾಪಾಣಿರಿನ್ದ್ರಶಕ್ತ್ಯಾ ಮಹಾಸುರಃ ।

ತತಶ್ಚೈನ್ದ್ರೀ ಸ್ವವಜ್ರೇಣ ರಕ್ತಬೀಜಮತಾಡಯತ್

॥41॥

ಶ್ಲೋಕ 43

ಕುಲಿಶೇನಾಹತಸ್ಯಾಶು ಬಹು ಸುಸ್ರಾವ ಶೋಣಿತಮ್ ।

ಸಮುತ್ತಸ್ಥುಸ್ತತೋ ಯೋಧಾಸ್ತದ್ರಪಾಸ್ತತ್ಪರಾಕ್ರಮಾಃ

॥42॥

ಶ್ಲೋಕ 44

ಯಾವನ್ತಃ ಪತಿತಾಸ್ತಸ್ಯ ಶರೀರಾದ್ರಕ್ತಬಿನ್ದವಃ ।

ತಾವನ್ತಃ ಪುರುಷಾ ಜಾತಾಃ ಸ್ತದ್ವೀರ್ಯಬಲವಿಕ್ರಮಾಃ

॥43॥

ಶ್ಲೋಕ 45

ತೇ ಚಾಪಿ ಯುಯುಧುಸ್ತತ್ರ ಪುರುಷಾ ರಕ್ತ ಸಮ್ಭವಾಃ ।

ಸಮಂ ಮಾತೃಭಿರತ್ಯುಗ್ರಶಸ್ತ್ರಪಾತಾತಿಭೀಷಣಂ

॥44॥

ಶ್ಲೋಕ 46

ಪುನಶ್ಚ ವಜ್ರ ಪಾತೇನ ಕ್ಷತ ಮಶ್ಯ ಶಿರೋ ಯದಾ ।

ವವಾಹ ರಕ್ತಂ ಪುರುಷಾಸ್ತತೋ ಜಾತಾಃ ಸಹಸ್ರಶಃ

॥45॥

ಶ್ಲೋಕ 47

ವೈಷ್ಣವೀ ಸಮರೇ ಚೈನಂ ಚಕ್ರೇಣಾಭಿಜಘಾನ ಹ ।

ಗದಯಾ ತಾಡಯಾಮಾಸ ಐನ್ದ್ರೀ ತಮಸುರೇಶ್ವರಮ್

॥46॥

ಶ್ಲೋಕ 48

ವೈಷ್ಣವೀ ಚಕ್ರಭಿನ್ನಸ್ಯ ರುಧಿರಸ್ರಾವ ಸಮ್ಭವೈಃ ।

ಸಹಸ್ರಶೋ ಜಗದ್ವ್ಯಾಪ್ತಂ ತತ್ಪ್ರಮಾಣೈರ್ಮಹಾಸುರೈಃ

॥47॥

ಶ್ಲೋಕ 49

ಶಕ್ತ್ಯಾ ಜಘಾನ ಕೌಮಾರೀ ವಾರಾಹೀ ಚ ತಥಾಸಿನಾ ।

ಮಾಹೇಶ್ವರೀ ತ್ರಿಶೂಲೇನ ರಕ್ತಬೀಜಂ ಮಹಾಸುರಮ್

॥48॥

ಶ್ಲೋಕ 50

ಸ ಚಾಪಿ ಗದಯಾ ದೈತ್ಯಃ ಸರ್ವಾ ಏವಾಹನತ್ ಪೃಥಕ್ ।

ಮಾತೄಃ ಕೋಪಸಮಾವಿಷ್ಟೋ ರಕ್ತಬೀಜೋ ಮಹಾಸುರಃ

॥49॥

ಶ್ಲೋಕ 51

ತಸ್ಯಾಹತಸ್ಯ ಬಹುಧಾ ಶಕ್ತಿಶೂಲಾದಿ ಭಿರ್ಭುವಿಃ ।

ಪಪಾತ ಯೋ ವೈ ರಕ್ತೌಘಸ್ತೇನಾಸಞ್ಚತಶೋಽಸುರಾಃ

॥50॥

ಶ್ಲೋಕ 52

ತೈಶ್ಚಾಸುರಾಸೃಕ್ಸಮ್ಭೂತೈರಸುರೈಃ ಸಕಲಂ ಜಗತ್ ।

ವ್ಯಾಪ್ತಮಾಸೀತ್ತತೋ ದೇವಾ ಭಯಮಾಜಗ್ಮುರುತ್ತಮಮ್

॥51॥

ಶ್ಲೋಕ 53

ತಾನ್ ವಿಷಣ್ಣಾ ನ್ ಸುರಾನ್ ದೃಷ್ಟ್ವಾ ಚಣ್ಡಿಕಾ ಪ್ರಾಹಸತ್ವರಮ್ ।

ಉವಾಚ ಕಾಲೀಂ ಚಾಮುಣ್ಡೇ ವಿಸ್ತೀರ್ಣಂ ವದನಂ ಕುರು

॥52॥

ಶ್ಲೋಕ 54

ಮಚ್ಛಸ್ತ್ರಪಾತಸಮ್ಭೂತಾನ್ ರಕ್ತಬಿನ್ದೂನ್ ಮಹಾಸುರಾನ್ ।

ರಕ್ತಬಿನ್ದೋಃ ಪ್ರತೀಚ್ಛ ತ್ವಂ ವಕ್ತ್ರೇಣಾನೇನ ವೇಗಿನಾ

॥53॥

ಶ್ಲೋಕ 55

ಭಕ್ಷಯನ್ತೀ ಚರ ರಣೋ ತದುತ್ಪನ್ನಾನ್ಮಹಾಸುರಾನ್ ।

ಏವಮೇಷ ಕ್ಷಯಂ ದೈತ್ಯಃ ಕ್ಷೇಣ ರಕ್ತೋ ಗಮಿಷ್ಯತಿ

॥54॥

ಶ್ಲೋಕ 56

ಭಕ್ಷ್ಯ ಮಾಣಾ ಸ್ತ್ವಯಾ ಚೋಗ್ರಾ ನ ಚೋತ್ಪತ್ಸ್ಯನ್ತಿ ಚಾಪರೇ ।

ಇತ್ಯುಕ್ತ್ವಾ ತಾಂ ತತೋ ದೇವೀ ಶೂಲೇನಾಭಿಜಘಾನ ತಮ್

॥55॥

ಶ್ಲೋಕ 57

ಮುಖೇನ ಕಾಲೀ ಜಗೃಹೇ ರಕ್ತಬೀಜಸ್ಯ ಶೋಣಿತಮ್ ।

ತತೋಽಸಾವಾಜಘಾನಾಥ ಗದಯಾ ತತ್ರ ಚಣ್ಡಿಕಾಂ

॥56॥

ಶ್ಲೋಕ 58

ನ ಚಾಸ್ಯಾ ವೇದನಾಂ ಚಕ್ರೇ ಗದಾಪಾತೋಽಲ್ಪಿಕಾಮಪಿ ।

ತಸ್ಯಾಹತಸ್ಯ ದೇಹಾತ್ತು ಬಹು ಸುಸ್ರಾವ ಶೋಣಿತಮ್

॥57॥

ಶ್ಲೋಕ 59

ಯತಸ್ತತಸ್ತದ್ವಕ್ತ್ರೇಣ ಚಾಮುಣ್ಡಾ ಸಮ್ಪ್ರತೀಚ್ಛತಿ ।

ಮುಖೇ ಸಮುದ್ಗತಾ ಯೇಽಸ್ಯಾ ರಕ್ತಪಾತಾನ್ಮಹಾಸುರಾಃ

॥58॥

ಶ್ಲೋಕ 60

ತಾಂಶ್ಚಖಾದಾಥ ಚಾಮುಣ್ಡಾ ಪಪೌ ತಸ್ಯ ಚ ಶೋಣಿತಮ್

॥59॥

ಶ್ಲೋಕ 61

ದೇವೀ ಶೂಲೇನ ವಜ್ರೇಣ ಬಾಣೈರಸಿಭಿರ್ ಋಷ್ಟಿಭಿಃ ।

ಜಘಾನ ರಕ್ತಬೀಜಂ ತಂ ಚಾಮುಣ್ಡಾ ಪೀತ ಶೋಣಿತಮ್

॥60॥

ಶ್ಲೋಕ 62

ಸ ಪಪಾತ ಮಹೀಪೃಷ್ಠೇ ಶಸ್ತ್ರಸಙ್ಘಸಮಾಹತಃ ।

ನೀರಕ್ತಶ್ಚ ಮಹೀಪಾಲ ರಕ್ತಬೀಜೋ ಮಹಾಸುರಃ

॥61॥

ಶ್ಲೋಕ 63

ತತಸ್ತೇ ಹರ್ಷ ಮತುಲಂ ಅವಾಪುಸ್ತ್ರಿದಶಾ ನೃಪ ।

ತೇಷಾಂ ಮಾತೃಗಣೋ ಜಾತೋ ನನರ್ತಾಸೃಂಙ್ಗಮದೋದ್ಧತಃ

॥62॥

ಶ್ಲೋಕ 64

॥ ಸ್ವಸ್ತಿ ಶ್ರೀ ಮಾರ್ಕಣ್ಡೇಯ ಪುರಾಣೇ ಸಾವರ್ನಿಕೇ ಮನ್ವನ್ತರೇ ದೇವಿ ಮಹತ್ಮ್ಯೇ ರಕ್ತಬೀಜವಧೋನಾಮ ಅಷ್ಟಮೋಧ್ಯಾಯ ಸಮಾಪ್ತಮ್ ॥

ಆಹುತಿ

ಓಂ ಜಯನ್ತೀ ಸಾಙ್ಗಾಯೈ ಸಶಕ್ತಿಕಾಯೈ ಸಪರಿವಾರಾಯೈ ಸವಾಹನಾಯೈ ರಕ್ತಾಕ್ಷ್ಯೈ ಅಷ್ಟಮಾತೃ ಸಹಿತಾಯೈ ಮಹಾಹುತಿಂ ಸಮರ್ಪಯಾಮಿ ನಮಃ ಸ್ವಾಹಾ ॥