દેવ્યપરાધ ક્ષમાપણ સ્તોત્રમ્

દેવ્યપરાધ ક્ષમાપણ સ્તોત્રમ્

શ્લોક 1

ન મન્ત્રં નો યન્ત્રં તદપિ ચ ન જાને સ્તુતિમહો

ન ચાહ્વાનં ધ્યાનં તદપિ ચ ન જાને સ્તુતિકથાઃ ।

ન જાને મુદ્રાસ્તે તદપિ ચ ન જાને વિલપનં

પરં જાને માતસ્ત્વદનુસરણં ક્લેશહરણમ્

શ્લોક 2

વિધેરજ્ઞાનેન દ્રવિણવિરહેણાલસતયા

વિધેયાશક્યત્વાત્તવ ચરણયોર્યા ચ્યુતિરભૂત્ ।

તદેતત્ ક્ષન્તવ્યં જનનિ સકલોદ્ધારિણિ શિવે

કુપુત્રો જાયેત ક્વચિદપિ કુમાતા ન ભવતિ

॥ 1 ॥

શ્લોક 3

પૃથિવ્યાં પુત્રાસ્તે જનનિ બહવઃ સન્તિ સરલાઃ

પરં તેષાં મધ્યે વિરલતરલોઽહં તવ સુતઃ ।

મદીયોઽયં ત્યાગઃ સમુચિતમિદં નો તવ શિવે

કુપુત્રો જાયેત ક્વચિદપિ કુમાતા ન ભવતિ

॥ 2 ॥

શ્લોક 4

જગન્માતર્માતસ્તવ ચરણસેવા ન રચિતા

ન વા દત્તં દેવિ દ્રવિણમપિ ભૂયસ્તવ મયા ।

તથાપિ ત્વં સ્નેહં મયિ નિરુપમં યત્પ્રકુરુષે

કુપુત્રો જાયેત ક્વચિદપિ કુમાતા ન ભવતિ

॥ 3 ॥

શ્લોક 5

પરિત્યક્તા દેવાન્વિવિધવિધિસેવાકુલતયા

મયા પઞ્ચાશીતેરધિકમપનીતે તુ વયસિ ।

ઇદાનીં ચેન્માતસ્તવ યદિ કૃપા નાપિ ભવિતા

નિરાલમ્બો લમ્બોદરજનનિ કં યામિ શરણમ્

॥ 4 ॥

શ્લોક 6

શ્વપાકો જલ્પાકો ભવતિ મધુપાકોપમગિરા

નિરાતઙ્કો રઙ્કો વિહરતિ ચિરં કોટિકનકૈઃ ।

તવાપર્ણે કર્ણે વિશતિ મનુવર્ણે ફલમિદં

જનઃ કો જાનીતે જનનિ જપનીયં જપવિધૌ

॥ 5 ॥

શ્લોક 7

ચિતાભસ્માલેપો ગરલમશનં દિક્પટધરો

જટાધારી કણ્ઠે ભુજગપતિહારી પશુપતિઃ ।

કપાલી ભૂતેશો ભજતિ જગદીશૈકપદવીં

ભવાની ત્વત્પાણિગ્રહણપરિપાટી ફલમિદમ્

॥ 6 ॥

શ્લોક 8

ન મોક્ષસ્યાકાઙ્ક્ષા ન ચ વિભવવાઞ્છાપિ ચ ન મે

ન વિજ્ઞાનાપેક્ષા શશિમુખિ સુખેચ્છાપિ ન પુનઃ ।

અતસ્ત્વાં સંયાચે જનનિ જનનં યાતુ મમ વૈ

મૃડાની રુદ્રાણી શિવ શિવ ભવાનીતિ જપતઃ

॥ 7 ॥

શ્લોક 9

નારાધિતાસિ વિધિના વિવિધોપચારૈઃ

કિં રૂક્ષચિન્તનપરૈર્ન કૃતં વચોભિઃ ।

શ્યામે ત્વમેવ યદિ કિઞ્ચન મય્યનાથે

ધત્સે કૃપામુચિતમમ્બ પરં તવૈવ

॥ 8 ॥

શ્લોક 10

આપત્સુ મગ્નઃ સ્મરણં ત્વદીયં

કરોમિ દુર્ગે કરુણાર્ણવે શિવે ।

નૈતચ્છઠત્વં મમ ભાવયેથાઃ

ક્ષુધાતૃષાર્તાઃ જનનીં સ્મરન્તિ

॥ 9 ॥

શ્લોક 11

જગદમ્બ વિચિત્રમત્ર કિં

પરિપૂર્ણા કરુણાસ્તિ ચેન્મયિ ।

અપરાધપરમ્પરાવૃતં

ન હિ માતા સમુપેક્ષતે સુતમ્

॥ 10 ॥

શ્લોક 12

મત્સમઃ પાતકી નાસ્તિ પાપઘ્ની ત્વત્સમા ન હિ ।

એવં જ્ઞાત્વા મહાદેવી યથા યોગ્યં તથા કુરુ

॥ 11 ॥

શ્લોક 13

ઇતિ શ્રીમચ્છઙ્કરાચાર્ય વિરચિતં દેવ્યપરાધક્ષમાપણ સ્તોત્રમ્ ।