Chandra Ashtottara Sata Nama Stotram

candra aSTottara zata nAma stotram

zloka 1

zrImAn zazadharazcandro tArAdhIzo nizAkaraH |

sudhAnidhiH sadArAdhyaH satpatiH sAdhupUjitaH || 1 ||

jitendriyo jagadyoniH jyotizcakrapravartakaH |

vikartanAnujo vIro vizvezo viduSAM patiH || 2 ||

doSAkaro duSTadUraH puSTimAn ziSTapAlakaH |

aSTamUrtipriyo'nantakaSTadArukuThArakaH || 3 ||

svaprakAzaH prakAzAtmA dyucaro devabhojanaH |

kalAdharaH kAlahetuH kAmakRtkAmadAyakaH || 4 ||

mRtyusaMhArako'martyo nityAnuSThAnadAyakaH |

kSapAkaraH kSINapApaH kSayavRddhisamanvitaH || 5 ||

jaivAtRkaH zucI zubhro jayI jayaphalapradaH |

sudhAmayaH surasvAmI bhaktanAmiSTadAyakaH || 6 ||

bhuktido muktido bhadro bhaktadAridryabhaJjakaH |

sAmagAnapriyaH sarvarakSakaH sAgarodbhavaH || 7 ||

bhayAntakRdbhaktigamyo bhavabandhavimocakaH |

jagatprakAzakiraNo jagadAnandakAraNaH || 8 ||

nissapatno nirAhAro nirvikAro nirAmayaH |

bhUcchAyA''cchAdito bhavyo bhuvanapratipAlakaH || 9 ||

sakalArtiharaH saumyajanakaH sAdhuvanditaH |

sarvAgamajJaH sarvajJo sanakAdimunistutaH || 10 ||

sitacchatradhvajopetaH sitAGgo sitabhUSaNaH |

zvetamAlyAmbaradharaH zvetagandhAnulepanaH || 11 ||

dazAzvarathasaMrUDho daNDapANiH dhanurdharaH |

kundapuSpojjvalAkAro nayanAbjasamudbhavaH || 12 ||

Atreyagotrajo'tyantavinayaH priyadAyakaH |

karuNArasasampUrNaH karkaTaprabhuravyayaH || 13 ||

caturazrAsanArUDhazcaturo divyavAhanaH |

vivasvanmaNDalAgneyavAso vasusamRddhidaH || 14 ||

mahezvarapriyo dAntaH merugotrapradakSiNaH |

grahamaNDalamadhyastho grasitArko grahAdhipaH || 15 ||

dvijarAjo dyutilako dvibhujo dvijapUjitaH |

audumbaranagAvAsa udAro rohiNIpatiH || 16 ||

nityodayo munistutyo nityAnandaphalapradaH |

sakalAhlAdanakaraH palAzasamidhapriyaH || 17 ||

evaM nakSatranAthasya nAmnAmaSTottaraM zatam ||

iti zrI candra aSTottarazatanAma stotram |