ഭജ ഗോവിന്ദമ് (മോഹ മുദ്ഗരമ്)

ഭജ ഗോവിന്ദമ് (മോഹ മുദ്ഗരമ്)

ശ്ലോക 1

ഭജ ഗോവിന്ദം ഭജ ഗോവിന്ദം

ഗോവിന്ദം ഭജ മൂഢമതേ ।

സമ്പ്രാപ്തേ സന്നിഹിതേ കാലേ

നഹി നഹി രക്ഷതി ഡുകൃങ്കരണേ

ശ്ലോക 2

ഭജ ഗോവിന്ദം ഭജ ഗോവിന്ദം ...

മൂഢ ജഹീഹി ധനാഗമതൃഷ്ണാം

കുരു സദ്ബുദ്ധിം മനസി വിതൃഷ്ണാമ് ।

യല്ലഭസേ നിജകര്മോപാത്തം

വിത്തം തേന വിനോദയ ചിത്തമ്

॥ 1 ॥

ശ്ലോക 3

ഭജ ഗോവിന്ദം ഭജ ഗോവിന്ദം ...

നാരീസ്തനഭര-നാഭീദേശം

ദൃഷ്ട്വാ മാ ഗാ മോഹാവേശമ് ।

ഏതന്മാംസവസാദിവികാരം

മനസി വിചിന്തയ വാരം വാരമ്

॥ 2 ॥

ശ്ലോക 4

ഭജ ഗോവിന്ദം ഭജ ഗോവിന്ദം ...

നലിനീദല-ഗതജലമതിതരലം

തദ്വജ്ജീവിതമതിശയ-ചപലമ് ।

വിദ്ധി വ്യാധ്യഭിമാനഗ്രസ്തം

ലോകം ശോകഹതം ച സമസ്തമ്

॥ 3 ॥

ശ്ലോക 5

ഭജ ഗോവിന്ദം ഭജ ഗോവിന്ദം ...

യാവദ്വിത്തോപാര്ജനസക്തഃ

താവന്നിജപരിവാരോ രക്തഃ ।

പശ്ചാജ്ജീവതി ജര്ജരദേഹേ

വാര്താം കോഽപി ന പൃച്ഛതി ഗേഹേ

॥ 4 ॥

ശ്ലോക 6

ഭജ ഗോവിന്ദം ഭജ ഗോവിന്ദം ...

യാവത്പവനോ നിവസതി ദേഹേ

താവത്പൃച്ഛതി കുശലം ഗേഹേ ।

ഗതവതി വായൌ ദേഹാപായേ

ഭാര്യാ ബിഭ്യതി തസ്മിന്കായേ

॥ 5 ॥

ശ്ലോക 7

ഭജ ഗോവിന്ദം ഭജ ഗോവിന്ദം ...

ബാലസ്താവത്ക്രീഡാസക്തഃ

തരുണസ്താവത്തരുണീസക്തഃ ।

വൃദ്ധസ്താവച്ചിന്താസക്തഃ

പരമേ ബ്രഹ്മണി കോഽപി ന സക്തഃ

॥ 6 ॥

ശ്ലോക 8

ഭജ ഗോവിന്ദം ഭജ ഗോവിന്ദം ...

കാ തേ കാന്താ കസ്തേ പുത്രഃ

സംസാരോഽയമതീവ വിചിത്രഃ ।

കസ്യ ത്വം കഃ കുത ആയാതഃ

തത്ത്വം ചിന്തയ തദിഹ ഭ്രാതഃ

॥ 7 ॥

ശ്ലോക 9

ഭജ ഗോവിന്ദം ഭജ ഗോവിന്ദം ...

സത്സങ്ഗത്വേ നിസ്സങ്ഗത്വം

നിസ്സങ്ഗത്വേ നിര്മോഹത്വമ് ।

നിര്മോഹത്വേ നിശ്ചലതത്ത്വം

നിശ്ചലതത്ത്വേ ജീവന്മുക്തിഃ

॥ 8 ॥

ശ്ലോക 10

ഭജ ഗോവിന്ദം ഭജ ഗോവിന്ദം ...

വയസി ഗതേ കഃ കാമവികാരഃ

ശുഷ്കേ നീരേ കഃ കാസാരഃ ।

ക്ഷീണേ വിത്തേ കഃ പരിവാരഃ

ജ്ഞാതേ തത്ത്വേ കഃ സംസാരഃ

॥ 9 ॥

ശ്ലോക 11

ഭജ ഗോവിന്ദം ഭജ ഗോവിന്ദം ...

മാ കുരു ധന-ജന-യൌവന-ഗര്വം

ഹരതി നിമേഷാത്കാലഃ സര്വമ് ।

മായാമയമിദമഖിലം ഹിത്വാ

ബ്രഹ്മപദം ത്വം പ്രവിശ വിദിത്വാ

॥ 10 ॥

ശ്ലോക 12

ഭജ ഗോവിന്ദം ഭജ ഗോവിന്ദം ...

ദിനയാമിന്യൌ സായം പ്രാതഃ

ശിശിരവസന്തൌ പുനരായാതഃ ।

കാലഃ ക്രീഡതി ഗച്ഛത്യായുഃ

തദപി ന മുഞ്ചത്യാശാവായുഃ

॥ 11 ॥

ശ്ലോക 13

ഭജ ഗോവിന്ദം ഭജ ഗോവിന്ദം ...

കാ തേ കാന്താ ധനഗതചിന്താ

വാതുല കിം തവ നാസ്തി നിയന്താ ।

ത്രിജഗതി സജ്ജനസങ്ഗതിരേകാ

ഭവതി ഭവാര്ണവതരണേ നൌകാ

॥ 12 ॥

ശ്ലോക 14

ഭജ ഗോവിന്ദം ഭജ ഗോവിന്ദം ...

ദ്വാദശ-മഞ്ജരികാഭിരശേഷഃ

കഥിതോ വൈയാകരണസ്യൈഷഃ ।

ഉപദേശോഽഭൂദ്വിദ്യാ-നിപുണൈഃ

ശ്രീമച്ഛങ്കര-ഭഗവച്ഛരണൈഃ

॥ 13 ॥

ശ്ലോക 15

ഭജ ഗോവിന്ദം ഭജ ഗോവിന്ദം ...

ജടിലോ മുണ്ഡീ ലുഞ്ഛിതകേശഃ

കാഷായാമ്ബര-ബഹുകൃതവേഷഃ ।

പശ്യന്നപി ച ന പശ്യതി മൂഢഃ

ഉദരനിമിത്തം ബഹുകൃതവേഷഃ

॥ 14 ॥

ശ്ലോക 16

ഭജ ഗോവിന്ദം ഭജ ഗോവിന്ദം ...

അങ്ഗം ഗലിതം പലിതം മുണ്ഡം

ദശനവിഹീനം ജാതം തുണ്ഡമ് ।

വൃദ്ധോ യാതി ഗൃഹീത്വാ ദണ്ഡം

തദപി ന മുഞ്ചത്യാശാപിണ്ഡമ്

॥ 15 ॥

ശ്ലോക 17

ഭജ ഗോവിന്ദം ഭജ ഗോവിന്ദം ...

അഗ്രേ വഹ്നിഃ പൃഷ്ഠേ ഭാനുഃ

രാത്രൌ ചുബുക-സമര്പിത-ജാനുഃ ।

കരതല-ഭിക്ഷസ്തരുതലവാസഃ

തദപി ന മുഞ്ചത്യാശാപാശഃ

॥ 16 ॥

ശ്ലോക 18

ഭജ ഗോവിന്ദം ഭജ ഗോവിന്ദം ...

കുരുതേ ഗങ്ഗാസാഗരഗമനം

വ്രത-പരിപാലനമഥവാ ദാനമ് ।

ജ്ഞാനവിഹീനഃ സര്വമതേന

ഭജതി ന മുക്തിം ജന്മശതേന

॥ 17 ॥

ശ്ലോക 19

ഭജ ഗോവിന്ദം ഭജ ഗോവിന്ദം ...

സുരമന്ദിര-തരു-മൂല-നിവാസഃ

ശയ്യാ ഭൂതലമജിനം വാസഃ ।

സര്വ-പരിഗ്രഹ-ഭോഗത്യാഗഃ

കസ്യ സുഖം ന കരോതി വിരാഗഃ

॥ 18 ॥

ശ്ലോക 20

ഭജ ഗോവിന്ദം ഭജ ഗോവിന്ദം ...

യോഗരതോ വാ ഭോഗരതോ വാ

സങ്ഗരതോ വാ സങ്ഗവിഹീനഃ ।

യസ്യ ബ്രഹ്മണി രമതേ ചിത്തം

നന്ദതി നന്ദതി നന്ദത്യേവ

॥ 19 ॥

ശ്ലോക 21

ഭജ ഗോവിന്ദം ഭജ ഗോവിന്ദം ...

ഭഗവദ്ഗീതാ കിഞ്ചിദധീതാ

ഗങ്ഗാജല-ലവകണികാ പീതാ ।

സകൃദപി യേന മുരാരിസമര്ചാ

ക്രിയതേ തസ്യ യമേന ന ചര്ചാ

॥ 20 ॥

ശ്ലോക 22

ഭജ ഗോവിന്ദം ഭജ ഗോവിന്ദം ...

പുനരപി ജനനം പുനരപി മരണം

പുനരപി ജനനീജഠരേ ശയനമ് ।

ഇഹ സംസാരേ ബഹുദുസ്താരേ

കൃപയാഽപാരേ പാഹി മുരാരേ

॥ 21 ॥

ശ്ലോക 23

ഭജ ഗോവിന്ദം ഭജ ഗോവിന്ദം ...

രഥ്യാചര്പട-വിരചിത-കന്ഥഃ

പുണ്യാപുണ്യ-വിവര്ജിത-പന്ഥഃ ।

യോഗീ യോഗനിയോജിത-ചിത്തഃ

രമതേ ബാലോന്മത്തവദേവ

॥ 22 ॥

ശ്ലോക 24

ഭജ ഗോവിന്ദം ഭജ ഗോവിന്ദം ...

കസ്ത്വം കോഽഹം കുത ആയാതഃ

കാ മേ ജനനീ കോ മേ താതഃ ।

ഇതി പരിഭാവയ സര്വമസാരം

വിശ്വം ത്യക്ത്വാ സ്വപ്നവിചാരമ്

॥ 23 ॥

ശ്ലോക 25

ഭജ ഗോവിന്ദം ഭജ ഗോവിന്ദം ...

ത്വയി മയി ചാന്യത്രൈകോ വിഷ്ണുഃ

വ്യര്ഥം കുപ്യസി മയ്യസഹിഷ്ണുഃ ।

ഭവ സമചിത്തഃ സര്വത്ര ത്വം

വാഞ്ഛസ്യചിരാദ്യദി വിഷ്ണുത്വമ്

॥ 24 ॥

ശ്ലോക 26

ഭജ ഗോവിന്ദം ഭജ ഗോവിന്ദം ...

ശത്രൌ മിത്രേ പുത്രേ ബന്ധൌ

മാ കുരു യത്നം വിഗ്രഹസന്ധൌ ।

സര്വസ്മിന്നപി പശ്യാത്മാനം

സര്വത്രോത്സൃജ ഭേദാജ്ഞാനമ്

॥ 25 ॥

ശ്ലോക 27

ഭജ ഗോവിന്ദം ഭജ ഗോവിന്ദം ...

കാമം ക്രോധം ലോഭം മോഹം

ത്യക്ത്വാഽഽത്മാനം പശ്യതി സോഽഹമ് ।

ആത്മജ്ഞാനവിഹീനാ മൂഢാഃ

തേ പച്യന്തേ നരകനിഗൂഢാഃ

॥ 26 ॥

ശ്ലോക 28

ഭജ ഗോവിന്ദം ഭജ ഗോവിന്ദം ...

ഗേയം ഗീതാ-നാമസഹസ്രം

ധ്യേയം ശ്രീപതി-രൂപമജസ്രമ് ।

നേയം സജ്ജന-സങ്ഗേ ചിത്തം

ദേയം ദീനജനായ ച വിത്തമ്

॥ 27 ॥

ശ്ലോക 29

ഭജ ഗോവിന്ദം ഭജ ഗോവിന്ദം ...

സുഖതഃ ക്രിയതേ കാമാഭോഗഃ

പശ്ചാദന്ത ശരീരേ രോഗഃ ।

യദ്യപി ലോകേ മരണം ശരണം

തദപി ന മുഞ്ചതി പാപാചരണമ്

॥ 28 ॥

ശ്ലോക 30

ഭജ ഗോവിന്ദം ഭജ ഗോവിന്ദം ...

അര്ഥമനര്ഥം ഭാവയ നിത്യം

നാസ്തിതതഃ സുഖലേശഃ സത്യമ് ।

പുത്രാദപി ധനഭാജാം ഭീതിഃ

സര്വത്രൈഷാ വിഹിതാ രീതിഃ

॥ 29 ॥

ശ്ലോക 31

ഭജ ഗോവിന്ദം ഭജ ഗോവിന്ദം ...

പ്രാണായാമം പ്രത്യാഹാരം

നിത്യാനിത്യ വിവേകവിചാരമ് ।

ജാപ്യസമേതസമാധിവിധാനം

കുര്വവധാനം മഹദവധാനമ്

॥ 30 ॥

ശ്ലോക 32

ഭജ ഗോവിന്ദം ഭജ ഗോവിന്ദം ...

ഗുരുചരണാമ്ബുജ-നിര്ഭരഭക്തഃ

സംസാരാദചിരാദ്ഭവ മുക്തഃ ।

സേന്ദ്രിയമാനസ-നിയമാദേവം

ദ്രക്ഷ്യസി നിജഹൃദയസ്ഥം ദേവമ്

॥ 31 ॥

ശ്ലോക 33

ഭജ ഗോവിന്ദം ഭജ ഗോവിന്ദം ...

മൂഢഃ കശ്ചന വൈയാകരണോ

ഡുഃകൃങ്കരണാധ്യയനധുരീണഃ ।

ശ്രീമച്ഛങ്കര-ഭഗവച്ഛിഷ്യൈഃ

ബോധിത ആസീച്ഛോധിത-കരണഃ

॥ 32 ॥

ശ്ലോക 34

ഭജ ഗോവിന്ദം ഭജ ഗോവിന്ദം ...

ഭജ ഗോവിന്ദം ഭജ ഗോവിന്ദം

ഗോവിന്ദം ഭജ മൂഢമതേ ।

നാമസ്മരണാദന്യമുപായം

നഹി പശ്യാമോ ഭവതരണേ

॥ 33 ॥

ശ്ലോക 35

ഭജ ഗോവിന്ദം ഭജ ഗോവിന്ദം ...