ಭಜ ಗೋವಿನ್ದಮ್ (ಮೋಹ ಮುದ್ಗರಮ್)

ಭಜ ಗೋವಿನ್ದಮ್ (ಮೋಹ ಮುದ್ಗರಮ್)

ಶ್ಲೋಕ 1

ಭಜ ಗೋವಿನ್ದಂ ಭಜ ಗೋವಿನ್ದಂ

ಗೋವಿನ್ದಂ ಭಜ ಮೂಢಮತೇ ।

ಸಮ್ಪ್ರಾಪ್ತೇ ಸನ್ನಿಹಿತೇ ಕಾಲೇ

ನಹಿ ನಹಿ ರಕ್ಷತಿ ಡುಕೃಙ್ಕರಣೇ

ಶ್ಲೋಕ 2

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಮೂಢ ಜಹೀಹಿ ಧನಾಗಮತೃಷ್ಣಾಂ

ಕುರು ಸದ್ಬುದ್ಧಿಂ ಮನಸಿ ವಿತೃಷ್ಣಾಮ್ ।

ಯಲ್ಲಭಸೇ ನಿಜಕರ್ಮೋಪಾತ್ತಂ

ವಿತ್ತಂ ತೇನ ವಿನೋದಯ ಚಿತ್ತಮ್

॥ 1 ॥

ಶ್ಲೋಕ 3

ಭಜ ಗೋವಿನ್ದಂ ಭಜ ಗೋವಿನ್ದಂ ...

ನಾರೀಸ್ತನಭರ-ನಾಭೀದೇಶಂ

ದೃಷ್ಟ್ವಾ ಮಾ ಗಾ ಮೋಹಾವೇಶಮ್ ।

ಏತನ್ಮಾಂಸವಸಾದಿವಿಕಾರಂ

ಮನಸಿ ವಿಚಿನ್ತಯ ವಾರಂ ವಾರಮ್

॥ 2 ॥

ಶ್ಲೋಕ 4

ಭಜ ಗೋವಿನ್ದಂ ಭಜ ಗೋವಿನ್ದಂ ...

ನಲಿನೀದಲ-ಗತಜಲಮತಿತರಲಂ

ತದ್ವಜ್ಜೀವಿತಮತಿಶಯ-ಚಪಲಮ್ ।

ವಿದ್ಧಿ ವ್ಯಾಧ್ಯಭಿಮಾನಗ್ರಸ್ತಂ

ಲೋಕಂ ಶೋಕಹತಂ ಚ ಸಮಸ್ತಮ್

॥ 3 ॥

ಶ್ಲೋಕ 5

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಯಾವದ್ವಿತ್ತೋಪಾರ್ಜನಸಕ್ತಃ

ತಾವನ್ನಿಜಪರಿವಾರೋ ರಕ್ತಃ ।

ಪಶ್ಚಾಜ್ಜೀವತಿ ಜರ್ಜರದೇಹೇ

ವಾರ್ತಾಂ ಕೋಽಪಿ ನ ಪೃಚ್ಛತಿ ಗೇಹೇ

॥ 4 ॥

ಶ್ಲೋಕ 6

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಯಾವತ್ಪವನೋ ನಿವಸತಿ ದೇಹೇ

ತಾವತ್ಪೃಚ್ಛತಿ ಕುಶಲಂ ಗೇಹೇ ।

ಗತವತಿ ವಾಯೌ ದೇಹಾಪಾಯೇ

ಭಾರ್ಯಾ ಬಿಭ್ಯತಿ ತಸ್ಮಿನ್ಕಾಯೇ

॥ 5 ॥

ಶ್ಲೋಕ 7

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಬಾಲಸ್ತಾವತ್ಕ್ರೀಡಾಸಕ್ತಃ

ತರುಣಸ್ತಾವತ್ತರುಣೀಸಕ್ತಃ ।

ವೃದ್ಧಸ್ತಾವಚ್ಚಿನ್ತಾಸಕ್ತಃ

ಪರಮೇ ಬ್ರಹ್ಮಣಿ ಕೋಽಪಿ ನ ಸಕ್ತಃ

॥ 6 ॥

ಶ್ಲೋಕ 8

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಕಾ ತೇ ಕಾನ್ತಾ ಕಸ್ತೇ ಪುತ್ರಃ

ಸಂಸಾರೋಽಯಮತೀವ ವಿಚಿತ್ರಃ ।

ಕಸ್ಯ ತ್ವಂ ಕಃ ಕುತ ಆಯಾತಃ

ತತ್ತ್ವಂ ಚಿನ್ತಯ ತದಿಹ ಭ್ರಾತಃ

॥ 7 ॥

ಶ್ಲೋಕ 9

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಸತ್ಸಙ್ಗತ್ವೇ ನಿಸ್ಸಙ್ಗತ್ವಂ

ನಿಸ್ಸಙ್ಗತ್ವೇ ನಿರ್ಮೋಹತ್ವಮ್ ।

ನಿರ್ಮೋಹತ್ವೇ ನಿಶ್ಚಲತತ್ತ್ವಂ

ನಿಶ್ಚಲತತ್ತ್ವೇ ಜೀವನ್ಮುಕ್ತಿಃ

॥ 8 ॥

ಶ್ಲೋಕ 10

ಭಜ ಗೋವಿನ್ದಂ ಭಜ ಗೋವಿನ್ದಂ ...

ವಯಸಿ ಗತೇ ಕಃ ಕಾಮವಿಕಾರಃ

ಶುಷ್ಕೇ ನೀರೇ ಕಃ ಕಾಸಾರಃ ।

ಕ್ಷೀಣೇ ವಿತ್ತೇ ಕಃ ಪರಿವಾರಃ

ಜ್ಞಾತೇ ತತ್ತ್ವೇ ಕಃ ಸಂಸಾರಃ

॥ 9 ॥

ಶ್ಲೋಕ 11

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಮಾ ಕುರು ಧನ-ಜನ-ಯೌವನ-ಗರ್ವಂ

ಹರತಿ ನಿಮೇಷಾತ್ಕಾಲಃ ಸರ್ವಮ್ ।

ಮಾಯಾಮಯಮಿದಮಖಿಲಂ ಹಿತ್ವಾ

ಬ್ರಹ್ಮಪದಂ ತ್ವಂ ಪ್ರವಿಶ ವಿದಿತ್ವಾ

॥ 10 ॥

ಶ್ಲೋಕ 12

ಭಜ ಗೋವಿನ್ದಂ ಭಜ ಗೋವಿನ್ದಂ ...

ದಿನಯಾಮಿನ್ಯೌ ಸಾಯಂ ಪ್ರಾತಃ

ಶಿಶಿರವಸನ್ತೌ ಪುನರಾಯಾತಃ ।

ಕಾಲಃ ಕ್ರೀಡತಿ ಗಚ್ಛತ್ಯಾಯುಃ

ತದಪಿ ನ ಮುಞ್ಚತ್ಯಾಶಾವಾಯುಃ

॥ 11 ॥

ಶ್ಲೋಕ 13

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಕಾ ತೇ ಕಾನ್ತಾ ಧನಗತಚಿನ್ತಾ

ವಾತುಲ ಕಿಂ ತವ ನಾಸ್ತಿ ನಿಯನ್ತಾ ।

ತ್ರಿಜಗತಿ ಸಜ್ಜನಸಙ್ಗತಿರೇಕಾ

ಭವತಿ ಭವಾರ್ಣವತರಣೇ ನೌಕಾ

॥ 12 ॥

ಶ್ಲೋಕ 14

ಭಜ ಗೋವಿನ್ದಂ ಭಜ ಗೋವಿನ್ದಂ ...

ದ್ವಾದಶ-ಮಞ್ಜರಿಕಾಭಿರಶೇಷಃ

ಕಥಿತೋ ವೈಯಾಕರಣಸ್ಯೈಷಃ ।

ಉಪದೇಶೋಽಭೂದ್ವಿದ್ಯಾ-ನಿಪುಣೈಃ

ಶ್ರೀಮಚ್ಛಙ್ಕರ-ಭಗವಚ್ಛರಣೈಃ

॥ 13 ॥

ಶ್ಲೋಕ 15

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಜಟಿಲೋ ಮುಣ್ಡೀ ಲುಞ್ಛಿತಕೇಶಃ

ಕಾಷಾಯಾಮ್ಬರ-ಬಹುಕೃತವೇಷಃ ।

ಪಶ್ಯನ್ನಪಿ ಚ ನ ಪಶ್ಯತಿ ಮೂಢಃ

ಉದರನಿಮಿತ್ತಂ ಬಹುಕೃತವೇಷಃ

॥ 14 ॥

ಶ್ಲೋಕ 16

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಅಙ್ಗಂ ಗಲಿತಂ ಪಲಿತಂ ಮುಣ್ಡಂ

ದಶನವಿಹೀನಂ ಜಾತಂ ತುಣ್ಡಮ್ ।

ವೃದ್ಧೋ ಯಾತಿ ಗೃಹೀತ್ವಾ ದಣ್ಡಂ

ತದಪಿ ನ ಮುಞ್ಚತ್ಯಾಶಾಪಿಣ್ಡಮ್

॥ 15 ॥

ಶ್ಲೋಕ 17

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಅಗ್ರೇ ವಹ್ನಿಃ ಪೃಷ್ಠೇ ಭಾನುಃ

ರಾತ್ರೌ ಚುಬುಕ-ಸಮರ್ಪಿತ-ಜಾನುಃ ।

ಕರತಲ-ಭಿಕ್ಷಸ್ತರುತಲವಾಸಃ

ತದಪಿ ನ ಮುಞ್ಚತ್ಯಾಶಾಪಾಶಃ

॥ 16 ॥

ಶ್ಲೋಕ 18

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಕುರುತೇ ಗಙ್ಗಾಸಾಗರಗಮನಂ

ವ್ರತ-ಪರಿಪಾಲನಮಥವಾ ದಾನಮ್ ।

ಜ್ಞಾನವಿಹೀನಃ ಸರ್ವಮತೇನ

ಭಜತಿ ನ ಮುಕ್ತಿಂ ಜನ್ಮಶತೇನ

॥ 17 ॥

ಶ್ಲೋಕ 19

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಸುರಮನ್ದಿರ-ತರು-ಮೂಲ-ನಿವಾಸಃ

ಶಯ್ಯಾ ಭೂತಲಮಜಿನಂ ವಾಸಃ ।

ಸರ್ವ-ಪರಿಗ್ರಹ-ಭೋಗತ್ಯಾಗಃ

ಕಸ್ಯ ಸುಖಂ ನ ಕರೋತಿ ವಿರಾಗಃ

॥ 18 ॥

ಶ್ಲೋಕ 20

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಯೋಗರತೋ ವಾ ಭೋಗರತೋ ವಾ

ಸಙ್ಗರತೋ ವಾ ಸಙ್ಗವಿಹೀನಃ ।

ಯಸ್ಯ ಬ್ರಹ್ಮಣಿ ರಮತೇ ಚಿತ್ತಂ

ನನ್ದತಿ ನನ್ದತಿ ನನ್ದತ್ಯೇವ

॥ 19 ॥

ಶ್ಲೋಕ 21

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಭಗವದ್ಗೀತಾ ಕಿಞ್ಚಿದಧೀತಾ

ಗಙ್ಗಾಜಲ-ಲವಕಣಿಕಾ ಪೀತಾ ।

ಸಕೃದಪಿ ಯೇನ ಮುರಾರಿಸಮರ್ಚಾ

ಕ್ರಿಯತೇ ತಸ್ಯ ಯಮೇನ ನ ಚರ್ಚಾ

॥ 20 ॥

ಶ್ಲೋಕ 22

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಪುನರಪಿ ಜನನಂ ಪುನರಪಿ ಮರಣಂ

ಪುನರಪಿ ಜನನೀಜಠರೇ ಶಯನಮ್ ।

ಇಹ ಸಂಸಾರೇ ಬಹುದುಸ್ತಾರೇ

ಕೃಪಯಾಽಪಾರೇ ಪಾಹಿ ಮುರಾರೇ

॥ 21 ॥

ಶ್ಲೋಕ 23

ಭಜ ಗೋವಿನ್ದಂ ಭಜ ಗೋವಿನ್ದಂ ...

ರಥ್ಯಾಚರ್ಪಟ-ವಿರಚಿತ-ಕನ್ಥಃ

ಪುಣ್ಯಾಪುಣ್ಯ-ವಿವರ್ಜಿತ-ಪನ್ಥಃ ।

ಯೋಗೀ ಯೋಗನಿಯೋಜಿತ-ಚಿತ್ತಃ

ರಮತೇ ಬಾಲೋನ್ಮತ್ತವದೇವ

॥ 22 ॥

ಶ್ಲೋಕ 24

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಕಸ್ತ್ವಂ ಕೋಽಹಂ ಕುತ ಆಯಾತಃ

ಕಾ ಮೇ ಜನನೀ ಕೋ ಮೇ ತಾತಃ ।

ಇತಿ ಪರಿಭಾವಯ ಸರ್ವಮಸಾರಂ

ವಿಶ್ವಂ ತ್ಯಕ್ತ್ವಾ ಸ್ವಪ್ನವಿಚಾರಮ್

॥ 23 ॥

ಶ್ಲೋಕ 25

ಭಜ ಗೋವಿನ್ದಂ ಭಜ ಗೋವಿನ್ದಂ ...

ತ್ವಯಿ ಮಯಿ ಚಾನ್ಯತ್ರೈಕೋ ವಿಷ್ಣುಃ

ವ್ಯರ್ಥಂ ಕುಪ್ಯಸಿ ಮಯ್ಯಸಹಿಷ್ಣುಃ ।

ಭವ ಸಮಚಿತ್ತಃ ಸರ್ವತ್ರ ತ್ವಂ

ವಾಞ್ಛಸ್ಯಚಿರಾದ್ಯದಿ ವಿಷ್ಣುತ್ವಮ್

॥ 24 ॥

ಶ್ಲೋಕ 26

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಶತ್ರೌ ಮಿತ್ರೇ ಪುತ್ರೇ ಬನ್ಧೌ

ಮಾ ಕುರು ಯತ್ನಂ ವಿಗ್ರಹಸನ್ಧೌ ।

ಸರ್ವಸ್ಮಿನ್ನಪಿ ಪಶ್ಯಾತ್ಮಾನಂ

ಸರ್ವತ್ರೋತ್ಸೃಜ ಭೇದಾಜ್ಞಾನಮ್

॥ 25 ॥

ಶ್ಲೋಕ 27

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಕಾಮಂ ಕ್ರೋಧಂ ಲೋಭಂ ಮೋಹಂ

ತ್ಯಕ್ತ್ವಾಽಽತ್ಮಾನಂ ಪಶ್ಯತಿ ಸೋಽಹಮ್ ।

ಆತ್ಮಜ್ಞಾನವಿಹೀನಾ ಮೂಢಾಃ

ತೇ ಪಚ್ಯನ್ತೇ ನರಕನಿಗೂಢಾಃ

॥ 26 ॥

ಶ್ಲೋಕ 28

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಗೇಯಂ ಗೀತಾ-ನಾಮಸಹಸ್ರಂ

ಧ್ಯೇಯಂ ಶ್ರೀಪತಿ-ರೂಪಮಜಸ್ರಮ್ ।

ನೇಯಂ ಸಜ್ಜನ-ಸಙ್ಗೇ ಚಿತ್ತಂ

ದೇಯಂ ದೀನಜನಾಯ ಚ ವಿತ್ತಮ್

॥ 27 ॥

ಶ್ಲೋಕ 29

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಸುಖತಃ ಕ್ರಿಯತೇ ಕಾಮಾಭೋಗಃ

ಪಶ್ಚಾದನ್ತ ಶರೀರೇ ರೋಗಃ ।

ಯದ್ಯಪಿ ಲೋಕೇ ಮರಣಂ ಶರಣಂ

ತದಪಿ ನ ಮುಞ್ಚತಿ ಪಾಪಾಚರಣಮ್

॥ 28 ॥

ಶ್ಲೋಕ 30

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಅರ್ಥಮನರ್ಥಂ ಭಾವಯ ನಿತ್ಯಂ

ನಾಸ್ತಿತತಃ ಸುಖಲೇಶಃ ಸತ್ಯಮ್ ।

ಪುತ್ರಾದಪಿ ಧನಭಾಜಾಂ ಭೀತಿಃ

ಸರ್ವತ್ರೈಷಾ ವಿಹಿತಾ ರೀತಿಃ

॥ 29 ॥

ಶ್ಲೋಕ 31

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಪ್ರಾಣಾಯಾಮಂ ಪ್ರತ್ಯಾಹಾರಂ

ನಿತ್ಯಾನಿತ್ಯ ವಿವೇಕವಿಚಾರಮ್ ।

ಜಾಪ್ಯಸಮೇತಸಮಾಧಿವಿಧಾನಂ

ಕುರ್ವವಧಾನಂ ಮಹದವಧಾನಮ್

॥ 30 ॥

ಶ್ಲೋಕ 32

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಗುರುಚರಣಾಮ್ಬುಜ-ನಿರ್ಭರಭಕ್ತಃ

ಸಂಸಾರಾದಚಿರಾದ್ಭವ ಮುಕ್ತಃ ।

ಸೇನ್ದ್ರಿಯಮಾನಸ-ನಿಯಮಾದೇವಂ

ದ್ರಕ್ಷ್ಯಸಿ ನಿಜಹೃದಯಸ್ಥಂ ದೇವಮ್

॥ 31 ॥

ಶ್ಲೋಕ 33

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಮೂಢಃ ಕಶ್ಚನ ವೈಯಾಕರಣೋ

ಡುಃಕೃಙ್ಕರಣಾಧ್ಯಯನಧುರೀಣಃ ।

ಶ್ರೀಮಚ್ಛಙ್ಕರ-ಭಗವಚ್ಛಿಷ್ಯೈಃ

ಬೋಧಿತ ಆಸೀಚ್ಛೋಧಿತ-ಕರಣಃ

॥ 32 ॥

ಶ್ಲೋಕ 34

ಭಜ ಗೋವಿನ್ದಂ ಭಜ ಗೋವಿನ್ದಂ ...

ಭಜ ಗೋವಿನ್ದಂ ಭಜ ಗೋವಿನ್ದಂ

ಗೋವಿನ್ದಂ ಭಜ ಮೂಢಮತೇ ।

ನಾಮಸ್ಮರಣಾದನ್ಯಮುಪಾಯಂ

ನಹಿ ಪಶ್ಯಾಮೋ ಭವತರಣೇ

॥ 33 ॥

ಶ್ಲೋಕ 35

ಭಜ ಗೋವಿನ್ದಂ ಭಜ ಗೋವಿನ್ದಂ ...