Subrahmanya Bhujanga Stotram

සුබ්රහ්මණ්ය භුජඞ්ග ස්තෝත්රම්

ශ්ලොක 1

සදා බාලරූපා(අ)පි විඝ්නාද්රිහන්ත්රී

මහාදන්තිවක්ත්රා(අ)පි පඤ්චාස්යමාන්යා .

විධීන්ද්රාදිමෘග්යා ගණේශාභිධා මේ

විධත්තාං ශ්රියං කා(අ)පි කල්යාණමූර්තිඃ .. 1 ..

න ජානාමි ශබ්දං න ජානාමි චාර්ථං

න ජානාමි පද්යං න ජානාමි ගද්යම් .

චිදේකා ෂඩාස්යා හෘදි ද්යෝතතේ මේ

මුඛාන්නිඃසරන්තේ ගිරශ්චාපි චිත්රම් .. 2 ..

මයූරාධිරූඪං මහාවාක්යගූඪං

මනෝහාරිදේහං මහච්චිත්තගේහම් .

මහීදේවදේවං මහාවේදභාවං

මහාදේවබාලං භජේ ලෝකපාලම් .. 3 ..

යදා සන්නිධානං ගතා මානවා මේ

භවාම්භෝධිපාරං ගතාස්තේ තදෛව .

ඉති ව්යඤ්ජයන්සින්ධුතීරේ ය ආස්තේ

තමීඩේ පවිත්රං පරාශක්තිපුත්රම් .. 4 ..

යථාබ්ධේස්තරඞ්ගා ලයං යාන්ති තුඞ්ගා-

ස්තථෛවාපදඃ සන්නිධෞ සේවතාං මේ .

ඉතීවෝර්මිපඞ්ක්තීර්නෘණාං දර්ශයන්තං

සදා භාවයේ හෘත්සරෝජේ ගුහං තම් .. 5 ..

ගිරෞ මන්නිවාසේ නරා යේ(අ)ධිරූඪා-

ස්තදා පර්වතේ රාජතේ තේ(අ)ධිරූඪාඃ .

ඉතීව බ්රුවන්ගන්ධශෛලාධිරූඪඃ

ස දේවෝ මුදේ මේ සදා ෂණ්මුඛෝ(අ)ස්තු .. 6 ..

මහාම්භෝධිතීරේ මහාපාපචෝරේ

මුනීන්ද්රානුකූලේ සුගන්ධාඛ්යශෛලේ .

ගුහායාං වසන්තං ස්වභාසා ලසන්තං

ජනාර්තිං හරන්තං ශ්රයාමෝ ගුහං තම් .. 7 ..

ලසත්ස්වර්ණගේහේ නෘණාං කාමදෝහේ

සුමස්තෝමසඤ්ඡන්නමාණික්යමඤ්චේ .

සමුද්යත්සහස්රාර්කතුල්යප්රකාශං

සදා භාවයේ කාර්තිකේයං සුරේශම් .. 8 ..

රණද්ධංසකේ මඤ්ජුලේ(අ)ත්යන්තශෝණේ

මනෝහාරිලාවණ්යපීයූෂපූර්ණේ .

මනඃෂට්පදෝ මේ භවක්ලේශතප්තඃ

සදා මෝදතාං ස්කන්ද තේ පාදපද්මේ .. 9 ..

සුවර්ණාභදිව්යාම්බරෛර්භාසමානාං

ක්වණත්කිඞ්කිණීමේඛලාශෝභමානාම් .

ලසද්ධේමපට්ටේන විද්යෝතමානාං

කටිං භාවයේ ස්කන්ද තේ දීප්යමානාම් .. 10 ..

පුලින්දේශකන්යාඝනාභෝගතුඞ්ග-

ස්තනාලිඞ්ගනාසක්තකාශ්මීරරාගම් .

නමස්යාම්යහං තාරකාරේ තවෝරඃ

ස්වභක්තාවනේ සර්වදා සානුරාගම් .. 11 ..

විධෞ ක්ලෘප්තදණ්ඩාන්ස්වලීලාධෘතාණ්ඩා-

න්නිරස්තේභශුණ්ඩාන්ද්විෂත්කාලදණ්ඩාන් .

හතේන්ද්රාරිෂණ්ඩාන්ජගත්රාණශෞණ්ඩා-

න්සදා තේ ප්රචණ්ඩාන්ශ්රයේ බාහුදණ්ඩාන් .. 12 ..

සදා ශාරදාඃ ෂණ්මෘගාඞ්කා යදි ස්යුඃ

සමුද්යන්ත ඒව ස්ථිතාශ්චේත්සමන්තාත් .

සදා පූර්ණබිම්බාඃ කලඞ්කෛශ්ච හීනා-

ස්තදා ත්වන්මුඛානාං බ්රුවේ ස්කන්ද සාම්යම් .. 13 ..

ස්ඵුරන්මන්දහාසෛඃ සහංසානි චඤ්ච-

ත්කටාක්ෂාවලීභෘඞ්ගසඞ්ඝෝජ්ජ්වලානි .

සුධාස්යන්දිබිම්බාධරාණීශසූනෝ

තවාලෝකයේ ෂණ්මුඛාම්භෝරුහාණි .. 14 ..

විශාලේෂු කර්ණාන්තදීර්ඝේෂ්වජස්රං

දයාස්යන්දිෂු ද්වාදශස්වීක්ෂණේෂු .

මයීෂත්කටාක්ෂඃ සකෘත්පාතිතශ්චේ-

ද්භවේත්තේ දයාශීල කා නාම හානිඃ .. 15 ..

සුතාඞ්ගෝද්භවෝ මේ(අ)සි ජීවේති ෂඩ්ධා

ජපන්මන්ත්රමීශෝ මුදා ජිඝ්රතේ යාන් .

ජගද්භාරභෘද්භ්යෝ ජගන්නාථ තේභ්යඃ

කිරීටෝජ්ජ්වලේභ්යෝ නමෝ මස්තකේභ්යඃ .. 16 ..

ස්ඵුරද්රත්නකේයූරහාරාභිරාම-

ශ්චලත්කුණ්ඩලශ්රීලසද්ගණ්ඩභාගඃ .

කටෞ පීතවාසාඃ කරේ චාරුශක්තිඃ

පුරස්තාන්මමාස්තාං පුරාරේස්තනූජඃ .. 17 ..

ඉහායාහි වත්සේති හස්තාන්ප්රසාර්යා-

හ්වයත්යාදරාච්ඡඞ්කරේ මාතුරඞ්කාත් .

සමුත්පත්ය තාතං ශ්රයන්තං කුමාරං

හරාශ්ලිෂ්ටගාත්රං භජේ බාලමූර්තිම් .. 18 ..

කුමාරේශසූනෝ ගුහ ස්කන්ද සේනා-

පතේ ශක්තිපාණේ මයූරාධිරූඪ .

පුලින්දාත්මජාකාන්ත භක්තාර්තිහාරින්

ප්රභෝ තාරකාරේ සදා රක්ෂ මාං ත්වම් .. 19 ..

ප්රශාන්තේන්ද්රියේ නෂ්ටසඤ්ජ්ඤේ විචේෂ්ටේ

කඵෝද්ගාරිවක්ත්රේ භයෝත්කම්පිගාත්රේ .

ප්රයාණෝන්මුඛේ මය්යනාථේ තදානීං

ද්රුතං මේ දයාලෝ භවාග්රේ ගුහ ත්වම් .. 20 ..

කෘතාන්තස්ය දූතේෂු චණ්ඩේෂු කෝපා-

ද්දහච්ඡින්ද්ධි භින්ද්ධීති මාං තර්ජයත්සු .

මයූරං සමාරුහ්ය මා භෛරිති ත්වං

පුරඃ ශක්තිපාණිර්මමායාහි ශීඝ්රම් .. 21 ..

ප්රණම්යාසකෘත්පාදයෝස්තේ පතිත්වා

ප්රසාද්ය ප්රභෝ ප්රාර්ථයේ(අ)නේකවාරම් .

න වක්තුං ක්ෂමෝ(අ)හං තදානීං කෘපාබ්ධේ

න කාර්යාන්තකාලේ මනාගප්යුපේක්ෂා .. 22 ..

සහස්රාණ්ඩභෝක්තා ත්වයා ශූරනාමා

හතස්තාරකඃ සිංහවක්ත්රශ්ච දෛත්යඃ .

මමාන්තර්හෘදිස්ථං මනඃක්ලේශමේකං

න හංසි ප්රභෝ කිං කරෝමි ක්ව යාමි .. 23 ..

අහං සර්වදා දුඃඛභාරාවසන්නෝ

භවාන්දීනබන්ධුස්ත්වදන්යං න යාචේ .

භවද්භක්තිරෝධං සදා ක්ලෘප්තබාධං

මමාධිං ද්රුතං නාශයෝමාසුත ත්වම් .. 24 ..

අපස්මාරකුෂ්ටක්ෂයාර්ශඃ ප්රමේහ-

ජ්වරෝන්මාදගුල්මාදිරෝගා මහාන්තඃ .

පිශාචාශ්ච සර්වේ භවත්පත්රභූතිං

විලෝක්ය ක්ෂණාත්තාරකාරේ ද්රවන්තේ .. 25 ..

දෘශි ස්කන්දමූර්තිඃ ශ්රුතෞ ස්කන්දකීර්ති-

ර්මුඛේ මේ පවිත්රං සදා තච්චරිත්රම් .

කරේ තස්ය කෘත්යං වපුස්තස්ය භෘත්යං

ගුහේ සන්තු ලීනා මමාශේෂභාවාඃ .. 26 ..

මුනීනාමුතාහෝ නෘණාං භක්තිභාජා-

මභීෂ්ටප්රදාඃ සන්ති සර්වත්ර දේවාඃ .

නෘණාමන්ත්යජානාමපි ස්වාර්ථදානේ

ගුහාද්දේවමන්යං න ජානේ න ජානේ .. 27 ..

කලත්රං සුතා බන්ධුවර්ගඃ පශුර්වා

නරෝ වාථ නාරී ගෘහේ යේ මදීයාඃ .

යජන්තෝ නමන්තඃ ස්තුවන්තෝ භවන්තං

ස්මරන්තශ්ච තේ සන්තු සර්වේ කුමාර .. 28 ..

මෘගාඃ පක්ෂිණෝ දංශකා යේ ච දුෂ්ටා-

ස්තථා ව්යාධයෝ බාධකා යේ මදඞ්ගේ .

භවච්ඡක්තිතීක්ෂ්ණාග්රභින්නාඃ සුදූරේ

විනශ්යන්තු තේ චූර්ණිතක්රෞඤ්චශෛල .. 29 ..

ජනිත්රී පිතා ච ස්වපුත්රාපරාධං

සහේතේ න කිං දේවසේනාධිනාථ .

අහං චාතිබාලෝ භවාන් ලෝකතාතඃ

ක්ෂමස්වාපරාධං සමස්තං මහේශ .. 30 ..

නමඃ කේකිනේ ශක්තයේ චාපි තුභ්යං

නමශ්ඡාග තුභ්යං නමඃ කුක්කුටාය .

නමඃ සින්ධවේ සින්ධුදේශාය තුභ්යං

පුනඃ ස්කන්දමූර්තේ නමස්තේ නමෝ(අ)ස්තු .. 31 ..

ජයානන්දභූමං ජයාපාරධාමං

ජයාමෝඝකීර්තේ ජයානන්දමූර්තේ .

ජයානන්දසින්ධෝ ජයාශේෂබන්ධෝ

ජය ත්වං සදා මුක්තිදානේශසූනෝ .. 32 ..

භුජඞ්ගාඛ්යවෘත්තේන ක්ලෘප්තං ස්තවං යඃ

පඨේද්භක්තියුක්තෝ ගුහං සම්ප්රණම්ය .

ස පුත්රාන්කලත්රං ධනං දීර්ඝමායු-

ර්ලභේත්ස්කන්දසායුජ්යමන්තේ නරඃ සඃ .. 33 ..