సుబ్రహ్మణ్య భుజఙ్గ స్తోత్రమ్

సుబ్రహ్మణ్య భుజఙ్గ స్తోత్రమ్

శ్లోక 1

సదా బాలరూపాఽపి విఘ్నాద్రిహన్త్రీ

మహాదన్తివక్త్రాఽపి పఞ్చాస్యమాన్యా ।

విధీన్ద్రాదిమృగ్యా గణేశాభిధా మే

విధత్తాం శ్రియం కాఽపి కల్యాణమూర్తిః

శ్లోక 2

న జానామి శబ్దం న జానామి చార్థం

న జానామి పద్యం న జానామి గద్యమ్ ।

చిదేకా షడాస్యా హృది ద్యోతతే మే

ముఖాన్నిఃసరన్తే గిరశ్చాపి చిత్రమ్

॥ 1 ॥

శ్లోక 3

మయూరాధిరూఢం మహావాక్యగూఢం

మనోహారిదేహం మహచ్చిత్తగేహమ్ ।

మహీదేవదేవం మహావేదభావం

మహాదేవబాలం భజే లోకపాలమ్

॥ 2 ॥

శ్లోక 4

యదా సన్నిధానం గతా మానవా మే

భవామ్భోధిపారం గతాస్తే తదైవ ।

ఇతి వ్యఞ్జయన్సిన్ధుతీరే య ఆస్తే

తమీడే పవిత్రం పరాశక్తిపుత్రమ్

॥ 3 ॥

శ్లోక 5

యథాబ్ధేస్తరఙ్గా లయం యాన్తి తుఙ్గా-

స్తథైవాపదః సన్నిధౌ సేవతాం మే ।

ఇతీవోర్మిపఙ్క్తీర్నృణాం దర్శయన్తం

సదా భావయే హృత్సరోజే గుహం తమ్

॥ 4 ॥

శ్లోక 6

గిరౌ మన్నివాసే నరా యేఽధిరూఢా-

స్తదా పర్వతే రాజతే తేఽధిరూఢాః ।

ఇతీవ బ్రువన్గన్ధశైలాధిరూఢః

స దేవో ముదే మే సదా షణ్ముఖోఽస్తు

॥ 5 ॥

శ్లోక 7

మహామ్భోధితీరే మహాపాపచోరే

మునీన్ద్రానుకూలే సుగన్ధాఖ్యశైలే ।

గుహాయాం వసన్తం స్వభాసా లసన్తం

జనార్తిం హరన్తం శ్రయామో గుహం తమ్

॥ 6 ॥

శ్లోక 8

లసత్స్వర్ణగేహే నృణాం కామదోహే

సుమస్తోమసఞ్ఛన్నమాణిక్యమఞ్చే ।

సముద్యత్సహస్రార్కతుల్యప్రకాశం

సదా భావయే కార్తికేయం సురేశమ్

॥ 7 ॥

శ్లోక 9

రణద్ధంసకే మఞ్జులేఽత్యన్తశోణే

మనోహారిలావణ్యపీయూషపూర్ణే ।

మనఃషట్పదో మే భవక్లేశతప్తః

సదా మోదతాం స్కన్ద తే పాదపద్మే

॥ 8 ॥

శ్లోక 10

సువర్ణాభదివ్యామ్బరైర్భాసమానాం

క్వణత్కిఙ్కిణీమేఖలాశోభమానామ్ ।

లసద్ధేమపట్టేన విద్యోతమానాం

కటిం భావయే స్కన్ద తే దీప్యమానామ్

॥ 9 ॥

శ్లోక 11

పులిన్దేశకన్యాఘనాభోగతుఙ్గ-

స్తనాలిఙ్గనాసక్తకాశ్మీరరాగమ్ ।

నమస్యామ్యహం తారకారే తవోరః

స్వభక్తావనే సర్వదా సానురాగమ్

॥ 10 ॥

శ్లోక 12

విధౌ క్లృప్తదణ్డాన్స్వలీలాధృతాణ్డా-

న్నిరస్తేభశుణ్డాన్ద్విషత్కాలదణ్డాన్ ।

హతేన్ద్రారిషణ్డాన్జగత్రాణశౌణ్డా-

న్సదా తే ప్రచణ్డాన్శ్రయే బాహుదణ్డాన్

॥ 11 ॥

శ్లోక 13

సదా శారదాః షణ్మృగాఙ్కా యది స్యుః

సముద్యన్త ఏవ స్థితాశ్చేత్సమన్తాత్ ।

సదా పూర్ణబిమ్బాః కలఙ్కైశ్చ హీనా-

స్తదా త్వన్ముఖానాం బ్రువే స్కన్ద సామ్యమ్

॥ 12 ॥

శ్లోక 14

స్ఫురన్మన్దహాసైః సహంసాని చఞ్చ-

త్కటాక్షావలీభృఙ్గసఙ్ఘోజ్జ్వలాని ।

సుధాస్యన్దిబిమ్బాధరాణీశసూనో

తవాలోకయే షణ్ముఖామ్భోరుహాణి

॥ 13 ॥

శ్లోక 15

విశాలేషు కర్ణాన్తదీర్ఘేష్వజస్రం

దయాస్యన్దిషు ద్వాదశస్వీక్షణేషు ।

మయీషత్కటాక్షః సకృత్పాతితశ్చే-

ద్భవేత్తే దయాశీల కా నామ హానిః

॥ 14 ॥

శ్లోక 16

సుతాఙ్గోద్భవో మేఽసి జీవేతి షడ్ధా

జపన్మన్త్రమీశో ముదా జిఘ్రతే యాన్ ।

జగద్భారభృద్భ్యో జగన్నాథ తేభ్యః

కిరీటోజ్జ్వలేభ్యో నమో మస్తకేభ్యః

॥ 15 ॥

శ్లోక 17

స్ఫురద్రత్నకేయూరహారాభిరామ-

శ్చలత్కుణ్డలశ్రీలసద్గణ్డభాగః ।

కటౌ పీతవాసాః కరే చారుశక్తిః

పురస్తాన్మమాస్తాం పురారేస్తనూజః

॥ 16 ॥

శ్లోక 18

ఇహాయాహి వత్సేతి హస్తాన్ప్రసార్యా-

హ్వయత్యాదరాచ్ఛఙ్కరే మాతురఙ్కాత్ ।

సముత్పత్య తాతం శ్రయన్తం కుమారం

హరాశ్లిష్టగాత్రం భజే బాలమూర్తిమ్

॥ 17 ॥

శ్లోక 19

కుమారేశసూనో గుహ స్కన్ద సేనా-

పతే శక్తిపాణే మయూరాధిరూఢ ।

పులిన్దాత్మజాకాన్త భక్తార్తిహారిన్

ప్రభో తారకారే సదా రక్ష మాం త్వమ్

॥ 18 ॥

శ్లోక 20

ప్రశాన్తేన్ద్రియే నష్టసఞ్జ్ఞే విచేష్టే

కఫోద్గారివక్త్రే భయోత్కమ్పిగాత్రే ।

ప్రయాణోన్ముఖే మయ్యనాథే తదానీం

ద్రుతం మే దయాలో భవాగ్రే గుహ త్వమ్

॥ 19 ॥

శ్లోక 21

కృతాన్తస్య దూతేషు చణ్డేషు కోపా-

ద్దహచ్ఛిన్ద్ధి భిన్ద్ధీతి మాం తర్జయత్సు ।

మయూరం సమారుహ్య మా భైరితి త్వం

పురః శక్తిపాణిర్మమాయాహి శీఘ్రమ్

॥ 20 ॥

శ్లోక 22

ప్రణమ్యాసకృత్పాదయోస్తే పతిత్వా

ప్రసాద్య ప్రభో ప్రార్థయేఽనేకవారమ్ ।

న వక్తుం క్షమోఽహం తదానీం కృపాబ్ధే

న కార్యాన్తకాలే మనాగప్యుపేక్షా

॥ 21 ॥

శ్లోక 23

సహస్రాణ్డభోక్తా త్వయా శూరనామా

హతస్తారకః సింహవక్త్రశ్చ దైత్యః ।

మమాన్తర్హృదిస్థం మనఃక్లేశమేకం

న హంసి ప్రభో కిం కరోమి క్వ యామి

॥ 22 ॥

శ్లోక 24

అహం సర్వదా దుఃఖభారావసన్నో

భవాన్దీనబన్ధుస్త్వదన్యం న యాచే ।

భవద్భక్తిరోధం సదా క్లృప్తబాధం

మమాధిం ద్రుతం నాశయోమాసుత త్వమ్

॥ 23 ॥

శ్లోక 25

అపస్మారకుష్టక్షయార్శః ప్రమేహ-

జ్వరోన్మాదగుల్మాదిరోగా మహాన్తః ।

పిశాచాశ్చ సర్వే భవత్పత్రభూతిం

విలోక్య క్షణాత్తారకారే ద్రవన్తే

॥ 24 ॥

శ్లోక 26

దృశి స్కన్దమూర్తిః శ్రుతౌ స్కన్దకీర్తి-

ర్ముఖే మే పవిత్రం సదా తచ్చరిత్రమ్ ।

కరే తస్య కృత్యం వపుస్తస్య భృత్యం

గుహే సన్తు లీనా మమాశేషభావాః

॥ 25 ॥

శ్లోక 27

మునీనాముతాహో నృణాం భక్తిభాజా-

మభీష్టప్రదాః సన్తి సర్వత్ర దేవాః ।

నృణామన్త్యజానామపి స్వార్థదానే

గుహాద్దేవమన్యం న జానే న జానే

॥ 26 ॥

శ్లోక 28

కలత్రం సుతా బన్ధువర్గః పశుర్వా

నరో వాథ నారీ గృహే యే మదీయాః ।

యజన్తో నమన్తః స్తువన్తో భవన్తం

స్మరన్తశ్చ తే సన్తు సర్వే కుమార

॥ 27 ॥

శ్లోక 29

మృగాః పక్షిణో దంశకా యే చ దుష్టా-

స్తథా వ్యాధయో బాధకా యే మదఙ్గే ।

భవచ్ఛక్తితీక్ష్ణాగ్రభిన్నాః సుదూరే

వినశ్యన్తు తే చూర్ణితక్రౌఞ్చశైల

॥ 28 ॥

శ్లోక 30

జనిత్రీ పితా చ స్వపుత్రాపరాధం

సహేతే న కిం దేవసేనాధినాథ ।

అహం చాతిబాలో భవాన్ లోకతాతః

క్షమస్వాపరాధం సమస్తం మహేశ

॥ 29 ॥

శ్లోక 31

నమః కేకినే శక్తయే చాపి తుభ్యం

నమశ్ఛాగ తుభ్యం నమః కుక్కుటాయ ।

నమః సిన్ధవే సిన్ధుదేశాయ తుభ్యం

పునః స్కన్దమూర్తే నమస్తే నమోఽస్తు

॥ 30 ॥

శ్లోక 32

జయానన్దభూమం జయాపారధామం

జయామోఘకీర్తే జయానన్దమూర్తే ।

జయానన్దసిన్ధో జయాశేషబన్ధో

జయ త్వం సదా ముక్తిదానేశసూనో

॥ 31 ॥

శ్లోక 33

భుజఙ్గాఖ్యవృత్తేన క్లృప్తం స్తవం యః

పఠేద్భక్తియుక్తో గుహం సమ్ప్రణమ్య ।

స పుత్రాన్కలత్రం ధనం దీర్ఘమాయు-

ర్లభేత్స్కన్దసాయుజ్యమన్తే నరః సః

॥ 32 ॥

శ్లోక 34