ಸುಬ್ರಹ್ಮಣ್ಯ ಭುಜಙ್ಗ ಸ್ತೋತ್ರಮ್

ಸುಬ್ರಹ್ಮಣ್ಯ ಭುಜಙ್ಗ ಸ್ತೋತ್ರಮ್

ಶ್ಲೋಕ 1

ಸದಾ ಬಾಲರೂಪಾಽಪಿ ವಿಘ್ನಾದ್ರಿಹನ್ತ್ರೀ

ಮಹಾದನ್ತಿವಕ್ತ್ರಾಽಪಿ ಪಞ್ಚಾಸ್ಯಮಾನ್ಯಾ ।

ವಿಧೀನ್ದ್ರಾದಿಮೃಗ್ಯಾ ಗಣೇಶಾಭಿಧಾ ಮೇ

ವಿಧತ್ತಾಂ ಶ್ರಿಯಂ ಕಾಽಪಿ ಕಲ್ಯಾಣಮೂರ್ತಿಃ

ಶ್ಲೋಕ 2

ನ ಜಾನಾಮಿ ಶಬ್ದಂ ನ ಜಾನಾಮಿ ಚಾರ್ಥಂ

ನ ಜಾನಾಮಿ ಪದ್ಯಂ ನ ಜಾನಾಮಿ ಗದ್ಯಮ್ ।

ಚಿದೇಕಾ ಷಡಾಸ್ಯಾ ಹೃದಿ ದ್ಯೋತತೇ ಮೇ

ಮುಖಾನ್ನಿಃಸರನ್ತೇ ಗಿರಶ್ಚಾಪಿ ಚಿತ್ರಮ್

॥ 1 ॥

ಶ್ಲೋಕ 3

ಮಯೂರಾಧಿರೂಢಂ ಮಹಾವಾಕ್ಯಗೂಢಂ

ಮನೋಹಾರಿದೇಹಂ ಮಹಚ್ಚಿತ್ತಗೇಹಮ್ ।

ಮಹೀದೇವದೇವಂ ಮಹಾವೇದಭಾವಂ

ಮಹಾದೇವಬಾಲಂ ಭಜೇ ಲೋಕಪಾಲಮ್

॥ 2 ॥

ಶ್ಲೋಕ 4

ಯದಾ ಸನ್ನಿಧಾನಂ ಗತಾ ಮಾನವಾ ಮೇ

ಭವಾಮ್ಭೋಧಿಪಾರಂ ಗತಾಸ್ತೇ ತದೈವ ।

ಇತಿ ವ್ಯಞ್ಜಯನ್ಸಿನ್ಧುತೀರೇ ಯ ಆಸ್ತೇ

ತಮೀಡೇ ಪವಿತ್ರಂ ಪರಾಶಕ್ತಿಪುತ್ರಮ್

॥ 3 ॥

ಶ್ಲೋಕ 5

ಯಥಾಬ್ಧೇಸ್ತರಙ್ಗಾ ಲಯಂ ಯಾನ್ತಿ ತುಙ್ಗಾ-

ಸ್ತಥೈವಾಪದಃ ಸನ್ನಿಧೌ ಸೇವತಾಂ ಮೇ ।

ಇತೀವೋರ್ಮಿಪಙ್ಕ್ತೀರ್ನೃಣಾಂ ದರ್ಶಯನ್ತಂ

ಸದಾ ಭಾವಯೇ ಹೃತ್ಸರೋಜೇ ಗುಹಂ ತಮ್

॥ 4 ॥

ಶ್ಲೋಕ 6

ಗಿರೌ ಮನ್ನಿವಾಸೇ ನರಾ ಯೇಽಧಿರೂಢಾ-

ಸ್ತದಾ ಪರ್ವತೇ ರಾಜತೇ ತೇಽಧಿರೂಢಾಃ ।

ಇತೀವ ಬ್ರುವನ್ಗನ್ಧಶೈಲಾಧಿರೂಢಃ

ಸ ದೇವೋ ಮುದೇ ಮೇ ಸದಾ ಷಣ್ಮುಖೋಽಸ್ತು

॥ 5 ॥

ಶ್ಲೋಕ 7

ಮಹಾಮ್ಭೋಧಿತೀರೇ ಮಹಾಪಾಪಚೋರೇ

ಮುನೀನ್ದ್ರಾನುಕೂಲೇ ಸುಗನ್ಧಾಖ್ಯಶೈಲೇ ।

ಗುಹಾಯಾಂ ವಸನ್ತಂ ಸ್ವಭಾಸಾ ಲಸನ್ತಂ

ಜನಾರ್ತಿಂ ಹರನ್ತಂ ಶ್ರಯಾಮೋ ಗುಹಂ ತಮ್

॥ 6 ॥

ಶ್ಲೋಕ 8

ಲಸತ್ಸ್ವರ್ಣಗೇಹೇ ನೃಣಾಂ ಕಾಮದೋಹೇ

ಸುಮಸ್ತೋಮಸಞ್ಛನ್ನಮಾಣಿಕ್ಯಮಞ್ಚೇ ।

ಸಮುದ್ಯತ್ಸಹಸ್ರಾರ್ಕತುಲ್ಯಪ್ರಕಾಶಂ

ಸದಾ ಭಾವಯೇ ಕಾರ್ತಿಕೇಯಂ ಸುರೇಶಮ್

॥ 7 ॥

ಶ್ಲೋಕ 9

ರಣದ್ಧಂಸಕೇ ಮಞ್ಜುಲೇಽತ್ಯನ್ತಶೋಣೇ

ಮನೋಹಾರಿಲಾವಣ್ಯಪೀಯೂಷಪೂರ್ಣೇ ।

ಮನಃಷಟ್ಪದೋ ಮೇ ಭವಕ್ಲೇಶತಪ್ತಃ

ಸದಾ ಮೋದತಾಂ ಸ್ಕನ್ದ ತೇ ಪಾದಪದ್ಮೇ

॥ 8 ॥

ಶ್ಲೋಕ 10

ಸುವರ್ಣಾಭದಿವ್ಯಾಮ್ಬರೈರ್ಭಾಸಮಾನಾಂ

ಕ್ವಣತ್ಕಿಙ್ಕಿಣೀಮೇಖಲಾಶೋಭಮಾನಾಮ್ ।

ಲಸದ್ಧೇಮಪಟ್ಟೇನ ವಿದ್ಯೋತಮಾನಾಂ

ಕಟಿಂ ಭಾವಯೇ ಸ್ಕನ್ದ ತೇ ದೀಪ್ಯಮಾನಾಮ್

॥ 9 ॥

ಶ್ಲೋಕ 11

ಪುಲಿನ್ದೇಶಕನ್ಯಾಘನಾಭೋಗತುಙ್ಗ-

ಸ್ತನಾಲಿಙ್ಗನಾಸಕ್ತಕಾಶ್ಮೀರರಾಗಮ್ ।

ನಮಸ್ಯಾಮ್ಯಹಂ ತಾರಕಾರೇ ತವೋರಃ

ಸ್ವಭಕ್ತಾವನೇ ಸರ್ವದಾ ಸಾನುರಾಗಮ್

॥ 10 ॥

ಶ್ಲೋಕ 12

ವಿಧೌ ಕ್ಲೃಪ್ತದಣ್ಡಾನ್ಸ್ವಲೀಲಾಧೃತಾಣ್ಡಾ-

ನ್ನಿರಸ್ತೇಭಶುಣ್ಡಾನ್ದ್ವಿಷತ್ಕಾಲದಣ್ಡಾನ್ ।

ಹತೇನ್ದ್ರಾರಿಷಣ್ಡಾನ್ಜಗತ್ರಾಣಶೌಣ್ಡಾ-

ನ್ಸದಾ ತೇ ಪ್ರಚಣ್ಡಾನ್ಶ್ರಯೇ ಬಾಹುದಣ್ಡಾನ್

॥ 11 ॥

ಶ್ಲೋಕ 13

ಸದಾ ಶಾರದಾಃ ಷಣ್ಮೃಗಾಙ್ಕಾ ಯದಿ ಸ್ಯುಃ

ಸಮುದ್ಯನ್ತ ಏವ ಸ್ಥಿತಾಶ್ಚೇತ್ಸಮನ್ತಾತ್ ।

ಸದಾ ಪೂರ್ಣಬಿಮ್ಬಾಃ ಕಲಙ್ಕೈಶ್ಚ ಹೀನಾ-

ಸ್ತದಾ ತ್ವನ್ಮುಖಾನಾಂ ಬ್ರುವೇ ಸ್ಕನ್ದ ಸಾಮ್ಯಮ್

॥ 12 ॥

ಶ್ಲೋಕ 14

ಸ್ಫುರನ್ಮನ್ದಹಾಸೈಃ ಸಹಂಸಾನಿ ಚಞ್ಚ-

ತ್ಕಟಾಕ್ಷಾವಲೀಭೃಙ್ಗಸಙ್ಘೋಜ್ಜ್ವಲಾನಿ ।

ಸುಧಾಸ್ಯನ್ದಿಬಿಮ್ಬಾಧರಾಣೀಶಸೂನೋ

ತವಾಲೋಕಯೇ ಷಣ್ಮುಖಾಮ್ಭೋರುಹಾಣಿ

॥ 13 ॥

ಶ್ಲೋಕ 15

ವಿಶಾಲೇಷು ಕರ್ಣಾನ್ತದೀರ್ಘೇಷ್ವಜಸ್ರಂ

ದಯಾಸ್ಯನ್ದಿಷು ದ್ವಾದಶಸ್ವೀಕ್ಷಣೇಷು ।

ಮಯೀಷತ್ಕಟಾಕ್ಷಃ ಸಕೃತ್ಪಾತಿತಶ್ಚೇ-

ದ್ಭವೇತ್ತೇ ದಯಾಶೀಲ ಕಾ ನಾಮ ಹಾನಿಃ

॥ 14 ॥

ಶ್ಲೋಕ 16

ಸುತಾಙ್ಗೋದ್ಭವೋ ಮೇಽಸಿ ಜೀವೇತಿ ಷಡ್ಧಾ

ಜಪನ್ಮನ್ತ್ರಮೀಶೋ ಮುದಾ ಜಿಘ್ರತೇ ಯಾನ್ ।

ಜಗದ್ಭಾರಭೃದ್ಭ್ಯೋ ಜಗನ್ನಾಥ ತೇಭ್ಯಃ

ಕಿರೀಟೋಜ್ಜ್ವಲೇಭ್ಯೋ ನಮೋ ಮಸ್ತಕೇಭ್ಯಃ

॥ 15 ॥

ಶ್ಲೋಕ 17

ಸ್ಫುರದ್ರತ್ನಕೇಯೂರಹಾರಾಭಿರಾಮ-

ಶ್ಚಲತ್ಕುಣ್ಡಲಶ್ರೀಲಸದ್ಗಣ್ಡಭಾಗಃ ।

ಕಟೌ ಪೀತವಾಸಾಃ ಕರೇ ಚಾರುಶಕ್ತಿಃ

ಪುರಸ್ತಾನ್ಮಮಾಸ್ತಾಂ ಪುರಾರೇಸ್ತನೂಜಃ

॥ 16 ॥

ಶ್ಲೋಕ 18

ಇಹಾಯಾಹಿ ವತ್ಸೇತಿ ಹಸ್ತಾನ್ಪ್ರಸಾರ್ಯಾ-

ಹ್ವಯತ್ಯಾದರಾಚ್ಛಙ್ಕರೇ ಮಾತುರಙ್ಕಾತ್ ।

ಸಮುತ್ಪತ್ಯ ತಾತಂ ಶ್ರಯನ್ತಂ ಕುಮಾರಂ

ಹರಾಶ್ಲಿಷ್ಟಗಾತ್ರಂ ಭಜೇ ಬಾಲಮೂರ್ತಿಮ್

॥ 17 ॥

ಶ್ಲೋಕ 19

ಕುಮಾರೇಶಸೂನೋ ಗುಹ ಸ್ಕನ್ದ ಸೇನಾ-

ಪತೇ ಶಕ್ತಿಪಾಣೇ ಮಯೂರಾಧಿರೂಢ ।

ಪುಲಿನ್ದಾತ್ಮಜಾಕಾನ್ತ ಭಕ್ತಾರ್ತಿಹಾರಿನ್

ಪ್ರಭೋ ತಾರಕಾರೇ ಸದಾ ರಕ್ಷ ಮಾಂ ತ್ವಮ್

॥ 18 ॥

ಶ್ಲೋಕ 20

ಪ್ರಶಾನ್ತೇನ್ದ್ರಿಯೇ ನಷ್ಟಸಞ್ಜ್ಞೇ ವಿಚೇಷ್ಟೇ

ಕಫೋದ್ಗಾರಿವಕ್ತ್ರೇ ಭಯೋತ್ಕಮ್ಪಿಗಾತ್ರೇ ।

ಪ್ರಯಾಣೋನ್ಮುಖೇ ಮಯ್ಯನಾಥೇ ತದಾನೀಂ

ದ್ರುತಂ ಮೇ ದಯಾಲೋ ಭವಾಗ್ರೇ ಗುಹ ತ್ವಮ್

॥ 19 ॥

ಶ್ಲೋಕ 21

ಕೃತಾನ್ತಸ್ಯ ದೂತೇಷು ಚಣ್ಡೇಷು ಕೋಪಾ-

ದ್ದಹಚ್ಛಿನ್ದ್ಧಿ ಭಿನ್ದ್ಧೀತಿ ಮಾಂ ತರ್ಜಯತ್ಸು ।

ಮಯೂರಂ ಸಮಾರುಹ್ಯ ಮಾ ಭೈರಿತಿ ತ್ವಂ

ಪುರಃ ಶಕ್ತಿಪಾಣಿರ್ಮಮಾಯಾಹಿ ಶೀಘ್ರಮ್

॥ 20 ॥

ಶ್ಲೋಕ 22

ಪ್ರಣಮ್ಯಾಸಕೃತ್ಪಾದಯೋಸ್ತೇ ಪತಿತ್ವಾ

ಪ್ರಸಾದ್ಯ ಪ್ರಭೋ ಪ್ರಾರ್ಥಯೇಽನೇಕವಾರಮ್ ।

ನ ವಕ್ತುಂ ಕ್ಷಮೋಽಹಂ ತದಾನೀಂ ಕೃಪಾಬ್ಧೇ

ನ ಕಾರ್ಯಾನ್ತಕಾಲೇ ಮನಾಗಪ್ಯುಪೇಕ್ಷಾ

॥ 21 ॥

ಶ್ಲೋಕ 23

ಸಹಸ್ರಾಣ್ಡಭೋಕ್ತಾ ತ್ವಯಾ ಶೂರನಾಮಾ

ಹತಸ್ತಾರಕಃ ಸಿಂಹವಕ್ತ್ರಶ್ಚ ದೈತ್ಯಃ ।

ಮಮಾನ್ತರ್ಹೃದಿಸ್ಥಂ ಮನಃಕ್ಲೇಶಮೇಕಂ

ನ ಹಂಸಿ ಪ್ರಭೋ ಕಿಂ ಕರೋಮಿ ಕ್ವ ಯಾಮಿ

॥ 22 ॥

ಶ್ಲೋಕ 24

ಅಹಂ ಸರ್ವದಾ ದುಃಖಭಾರಾವಸನ್ನೋ

ಭವಾನ್ದೀನಬನ್ಧುಸ್ತ್ವದನ್ಯಂ ನ ಯಾಚೇ ।

ಭವದ್ಭಕ್ತಿರೋಧಂ ಸದಾ ಕ್ಲೃಪ್ತಬಾಧಂ

ಮಮಾಧಿಂ ದ್ರುತಂ ನಾಶಯೋಮಾಸುತ ತ್ವಮ್

॥ 23 ॥

ಶ್ಲೋಕ 25

ಅಪಸ್ಮಾರಕುಷ್ಟಕ್ಷಯಾರ್ಶಃ ಪ್ರಮೇಹ-

ಜ್ವರೋನ್ಮಾದಗುಲ್ಮಾದಿರೋಗಾ ಮಹಾನ್ತಃ ।

ಪಿಶಾಚಾಶ್ಚ ಸರ್ವೇ ಭವತ್ಪತ್ರಭೂತಿಂ

ವಿಲೋಕ್ಯ ಕ್ಷಣಾತ್ತಾರಕಾರೇ ದ್ರವನ್ತೇ

॥ 24 ॥

ಶ್ಲೋಕ 26

ದೃಶಿ ಸ್ಕನ್ದಮೂರ್ತಿಃ ಶ್ರುತೌ ಸ್ಕನ್ದಕೀರ್ತಿ-

ರ್ಮುಖೇ ಮೇ ಪವಿತ್ರಂ ಸದಾ ತಚ್ಚರಿತ್ರಮ್ ।

ಕರೇ ತಸ್ಯ ಕೃತ್ಯಂ ವಪುಸ್ತಸ್ಯ ಭೃತ್ಯಂ

ಗುಹೇ ಸನ್ತು ಲೀನಾ ಮಮಾಶೇಷಭಾವಾಃ

॥ 25 ॥

ಶ್ಲೋಕ 27

ಮುನೀನಾಮುತಾಹೋ ನೃಣಾಂ ಭಕ್ತಿಭಾಜಾ-

ಮಭೀಷ್ಟಪ್ರದಾಃ ಸನ್ತಿ ಸರ್ವತ್ರ ದೇವಾಃ ।

ನೃಣಾಮನ್ತ್ಯಜಾನಾಮಪಿ ಸ್ವಾರ್ಥದಾನೇ

ಗುಹಾದ್ದೇವಮನ್ಯಂ ನ ಜಾನೇ ನ ಜಾನೇ

॥ 26 ॥

ಶ್ಲೋಕ 28

ಕಲತ್ರಂ ಸುತಾ ಬನ್ಧುವರ್ಗಃ ಪಶುರ್ವಾ

ನರೋ ವಾಥ ನಾರೀ ಗೃಹೇ ಯೇ ಮದೀಯಾಃ ।

ಯಜನ್ತೋ ನಮನ್ತಃ ಸ್ತುವನ್ತೋ ಭವನ್ತಂ

ಸ್ಮರನ್ತಶ್ಚ ತೇ ಸನ್ತು ಸರ್ವೇ ಕುಮಾರ

॥ 27 ॥

ಶ್ಲೋಕ 29

ಮೃಗಾಃ ಪಕ್ಷಿಣೋ ದಂಶಕಾ ಯೇ ಚ ದುಷ್ಟಾ-

ಸ್ತಥಾ ವ್ಯಾಧಯೋ ಬಾಧಕಾ ಯೇ ಮದಙ್ಗೇ ।

ಭವಚ್ಛಕ್ತಿತೀಕ್ಷ್ಣಾಗ್ರಭಿನ್ನಾಃ ಸುದೂರೇ

ವಿನಶ್ಯನ್ತು ತೇ ಚೂರ್ಣಿತಕ್ರೌಞ್ಚಶೈಲ

॥ 28 ॥

ಶ್ಲೋಕ 30

ಜನಿತ್ರೀ ಪಿತಾ ಚ ಸ್ವಪುತ್ರಾಪರಾಧಂ

ಸಹೇತೇ ನ ಕಿಂ ದೇವಸೇನಾಧಿನಾಥ ।

ಅಹಂ ಚಾತಿಬಾಲೋ ಭವಾನ್ ಲೋಕತಾತಃ

ಕ್ಷಮಸ್ವಾಪರಾಧಂ ಸಮಸ್ತಂ ಮಹೇಶ

॥ 29 ॥

ಶ್ಲೋಕ 31

ನಮಃ ಕೇಕಿನೇ ಶಕ್ತಯೇ ಚಾಪಿ ತುಭ್ಯಂ

ನಮಶ್ಛಾಗ ತುಭ್ಯಂ ನಮಃ ಕುಕ್ಕುಟಾಯ ।

ನಮಃ ಸಿನ್ಧವೇ ಸಿನ್ಧುದೇಶಾಯ ತುಭ್ಯಂ

ಪುನಃ ಸ್ಕನ್ದಮೂರ್ತೇ ನಮಸ್ತೇ ನಮೋಽಸ್ತು

॥ 30 ॥

ಶ್ಲೋಕ 32

ಜಯಾನನ್ದಭೂಮಂ ಜಯಾಪಾರಧಾಮಂ

ಜಯಾಮೋಘಕೀರ್ತೇ ಜಯಾನನ್ದಮೂರ್ತೇ ।

ಜಯಾನನ್ದಸಿನ್ಧೋ ಜಯಾಶೇಷಬನ್ಧೋ

ಜಯ ತ್ವಂ ಸದಾ ಮುಕ್ತಿದಾನೇಶಸೂನೋ

॥ 31 ॥

ಶ್ಲೋಕ 33

ಭುಜಙ್ಗಾಖ್ಯವೃತ್ತೇನ ಕ್ಲೃಪ್ತಂ ಸ್ತವಂ ಯಃ

ಪಠೇದ್ಭಕ್ತಿಯುಕ್ತೋ ಗುಹಂ ಸಮ್ಪ್ರಣಮ್ಯ ।

ಸ ಪುತ್ರಾನ್ಕಲತ್ರಂ ಧನಂ ದೀರ್ಘಮಾಯು-

ರ್ಲಭೇತ್ಸ್ಕನ್ದಸಾಯುಜ್ಯಮನ್ತೇ ನರಃ ಸಃ

॥ 32 ॥

ಶ್ಲೋಕ 34