Subrahmanya Bhujanga Prayata Stotram

subrahmaṇya bhujaṅga prayāta stotram

Śloka 1

bhaje'haṃ kumāraṃ bhavānīkumāraṃ

galollāsihāraṃ namatsadvihāram |

ripustomapāraṃ nṛsiṃhāvatāraṃ

sadānirvikāraṃ guhaṃ nirvicāram || 1 ||

namāmīśaputraṃ japāśoṇagātraṃ

surārātiśatruṃ ravīndvagninetram |

mahābarhipatraṃ śivāsyābjamitraṃ

prabhāsvatkalatraṃ purāṇaṃ pavitram || 2 ||

anekārkakoṭi-prabhāvajjvalaṃ taṃ

manohāri māṇikya bhūṣojjvalaṃ tam |

śritānāmabhīṣṭaṃ niśāntaṃ nitāntaṃ

bhaje ṣaṇmukhaṃ taṃ śaraccandrakāntam || 3 ||

kṛpāvāri kallolabhāsvatkaṭākṣaṃ

virājanmanohāri śoṇāmbujākṣam |

prayogapradānapravāhaikadakṣaṃ

bhaje kāntikāntaṃ parastomarakṣam || 4 ||

sukastūrisindūrabhāsvallalāṭaṃ

dayāpūrṇacittaṃ mahādevaputram |

ravīndūllasadratnarājatkirīṭaṃ

bhaje krīḍitākāśa gaṅgādrikūṭam || 5 ||

sukundaprasūnāvalīśobhitāṅgaṃ

śaratpūrṇacandraprabhākāntikāntam |

śirīṣaprasūnābhirāmaṃ bhavantaṃ

bhaje devasenāpatiṃ vallabhaṃ tam || 6 ||

sulāvaṇyasatsūryakoṭipratīkaṃ

prabhuṃ tārakāriṃ dviṣaḍbāhumīśam |

nijāṅkaprabhādivyamānāpadīśaṃ

bhaje pārvatīprāṇaputraṃ sukeśam || 7 ||

ajaṃ sarvalokapriyaṃ lokanāthaṃ

guhaṃ śūrapadmādidambholidhāram |

sucāruṃ sunāsāpuṭaṃ saccaritraṃ

bhaje kārtikeyaṃ sadā bāhuleyam || 8 ||

śarāraṇyasambhūtamindrādivandyaṃ

dviṣaḍbāhusaṅkhyāyudhaśreṇiramyam |

marutsārathiṃ kukkuṭeśaṃ suketuṃ

bhaje yogihṛtpadmamadhyādhivāsam || 9 ||

viriñcīndravallīśa deveśamukhyaṃ

praśastāmarastomasaṃstūyamānam |

diśa tvaṃ dayālo śriyaṃ niścalāṃ me

vinā tvāṃ gatiḥ kā prabho me prasīda || 10 ||

padāmbhojasevā samāyātabṛndā-

rakaśreṇikoṭīrabhāsvallalāṭam |

kalatrollasatpārśvayugmaṃ vareṇyaṃ

bhaje devamādyantahīnaprabhāvam || 11 ||

bhavāmbhodhimadhye taraṅge patantaṃ

prabho māṃ sadā pūrṇadṛṣṭyā samīkṣya |

bhavadbhaktināvoddhara tvaṃ dayālo

sugatyantaraṃ nāsti deva prasīda || 12 ||

gale ratnabhūṣaṃ tanau mañjuveṣaṃ

kare jñānaśaktiṃ darasmeramāsye |

kaṭinyastapāṇiṃ śikhisthaṃ kumāraṃ

bhaje'haṃ guhādanyadevaṃ na manye || 13 ||

dayāhīnacittaṃ paradrohapātraṃ

sadā pāpaśīlaṃ gurorbhaktihīnam |

ananyāvalambaṃ bhavannetrapātraṃ

kṛpāśīla māṃ bho pavitraṃ kuru tvam || 14 ||

mahāsena gāṅgeya vallīsahāya

prabho tārakāre ṣaḍāsyāmareśa |

sadā pāyasānnapradātarguheti

smariṣyāmi bhaktyā sadāhaṃ vibho tvām || 15 ||

pratāpasya bāho namadvīrabāho

prabho kārtikeyeṣṭakāmapradeti |

yadā ye paṭhante bhavantaṃ tadevaṃ

prasannastu teṣāṃ bahuśrīṃ dadāsi || 16 ||

apārātidāridryavārāśimadhye

bhramantaṃ janagrāhapūrṇe nitāntam |

mahāsena māmuddhara tvaṃ kaṭākṣā-

valokena kiñcitprasīda prasīda || 17 ||

sthirāṃ dehi bhaktiṃ bhavatpādapadme

śriyaṃ niścalāṃ dehi mahyaṃ kumāra |

guhaṃ candratāraṃ suvaṃśābhivṛddhiṃ

kuru tvaṃ prabho me manaḥ kalpasālaḥ || 18 ||

namaste namaste mahāśaktipāṇe

namaste namaste lasadvajrapāṇe |

namaste namaste kaṭinyastapāṇe

namaste namaste sadābhīṣṭapāṇe || 19 ||

namaste namaste mahāśaktidhārin

namaste surāṇāṃ mahāsaukhyadāyin |

namaste sadā kukkuṭeśākhyaka tvaṃ

samastāparādhaṃ vibho me kṣamasva || 20 ||

kumārātparaṃ karmayogaṃ na jāne

kumārātparaṃ karmaśīlaṃ na jāne |

ya eko munīnāṃ hṛdabjādhivāsaḥ

śivāṅkaṃ samāruhya satpīṭhakalpam || 21 ||

viriñcāya mantropadeśaṃ cakāra

pramodena so'yaṃ tanotu śriyaṃ me |

yamāhuḥ paraṃ veda śūreṣu mukhyaṃ

sadā yasya śaktyā jagatbhītabhītā || 22 ||

yamāśritya devāḥ sthiraṃ svargapālāḥ

sadoṅkārarūpaṃ cidānandamīḍe |

guhastotrametat kṛtaṃ tārakāre

bhujaṅgaprayātena hṛdyena kāntam || 23 ||

janā ye paṭhante mahābhaktiyuktāḥ

pramodena sāyaṃ prabhāte viśeṣaḥ |

na janmarkṣayoge yadā te rudāntā

manovāñchitān sarvakāmān labhante || 23 ||

iti śrī subrahmaṇya bhujaṅga prayāta stotram |