Srimad Bhagawad Gita Chapter 4

ශ්රීමද්භගවද්ගීතා මූලම් - චතුර්ථෝ(අ)ධ්යායඃ

ශ්ලොක 1

ඕං ශ්රී පරමාත්මනේ නමඃ

අථ චතුර්ථෝ(අ)ධ්යායඃ .

ජ්ඤානයෝගඃ

ශ්රීභගවානුවාච

ඉමං විවස්වතේ යෝගං ප්රෝක්තවානහමව්යයම් .

විවස්වාන්මනවේ ප්රාහ මනුරික්ෂ්වාකවේ(අ)බ්රවීත් .. 1 ..

ඒවං පරම්පරාප්රාප්තමිමං රාජර්ෂයෝ විදුඃ .

ස කාලේනේහ මහතා යෝගෝ නෂ්ටඃ පරන්තප .. 2 ..

ස ඒවායං මයා තේ(අ)ද්ය යෝගඃ ප්රෝක්තඃ පුරාතනඃ .

භක්තෝ(අ)සි මේ සඛා චේති රහස්යං හ්යේතදුත්තමම් .. 3 ..

අර්ජුන උවාච

අපරං භවතෝ ජන්ම පරං ජන්ම විවස්වතඃ .

කථමේතද්විජානීයාං ත්වමාදෞ ප්රෝක්තවානිති .. 4 ..

ශ්රීභගවානුවාච

බහූනි මේ ව්යතීතානි ජන්මානි තව චාර්ජුන .

තාන්යහං වේද සර්වාණි න ත්වං වේත්ථ පරන්තප .. 5 ..

අජෝ(අ)පි සන්නව්යයාත්මා භූතානාමීශ්වරෝ(අ)පි සන් .

ප්රකෘතිං ස්වාමධිෂ්ඨාය සම්භවාම්යාත්මමායයා .. 6 ..

යදා යදා හි ධර්මස්ය ග්ලානිර්භවති භාරත .

අභ්යුත්ථානමධර්මස්ය තදාත්මානං සෘජාම්යහම් .. 7 ..

පරිත්රාණාය සාධූනාං විනාශාය ච දුෂ්කෘතාම් .

ධර්මසංස්ථාපනාර්ථාය සම්භවාමි යුගේ යුගේ .. 8 ..

ජන්ම කර්ම ච මේ දිව්යමේවං යෝ වේත්ති තත්ත්වතඃ .

ත්යක්ත්වා දේහං පුනර්ජන්ම නෛති මාමේති සෝ(අ)ර්ජුන .. 9 ..

වීතරාගභයක්රෝධා මන්මයා මාමුපාශ්රිතාඃ .

බහවෝ ජ්ඤානතපසා පූතා මද්භාවමාගතාඃ .. 10 ..

යේ යථා මාං ප්රපද්යන්තේ තාංස්තථෛව භජාම්යහම් .

මම වර්ත්මානුවර්තන්තේ මනුෂ්යාඃ පාර්ථ සර්වශඃ .. 11 ..

කාඞ්ක්ෂන්තඃ කර්මණාං සිද්ධිං යජන්ත ඉහ දේවතාඃ .

ක්ෂිප්රං හි මානුෂේ ලෝකේ සිද්ධිර්භවති කර්මජා .. 12 ..

චාතුර්වර්ණ්යං මයා සෘෂ්ටං ගුණකර්මවිභාගශඃ .

තස්ය කර්තාරමපි මාං විද්ධ්යකර්තාරමව්යයම් .. 13 ..

න මාං කර්මාණි ලිම්පන්ති න මේ කර්මඵලේ ස්පෘහා .

ඉති මාං යෝ(අ)භිජානාති කර්මභිර්න ස බධ්යතේ .. 14 ..

ඒවං ජ්ඤාත්වා කෘතං කර්ම පූර්වෛරපි මුමුක්ෂුභිඃ .

කුරු කර්මෛව තස්මාත්ත්වං පූර්වෛඃ පූර්වතරං කෘතම් .. 15 ..

කිං කර්ම කිමකර්මේති කවයෝ(අ)ප්යත්ර මෝහිතාඃ .

තත්තේ කර්ම ප්රවක්ෂ්යාමි යජ්ජ්ඤාත්වා මෝක්ෂ්යසේ(අ)ශුභාත් .. 16 ..

කර්මණෝ හ්යපි බෝද්ධව්යං බෝද්ධව්යං ච විකර්මණඃ .

අකර්මණශ්ච බෝද්ධව්යං ගහනා කර්මණෝ ගතිඃ .. 17 ..

කර්මණ්යකර්ම යඃ පශ්යේදකර්මණි ච කර්ම යඃ .

ස බුද්ධිමාන්මනුෂ්යේෂු ස යුක්තඃ කෘත්ස්නකර්මකෘත් .. 18 ..

යස්ය සර්වේ සමාරම්භාඃ කාමසඞ්කල්පවර්ජිතාඃ .

ජ්ඤානාග්නිදග්ධකර්මාණං තමාහුඃ පණ්ඩිතං බුධාඃ .. 19 ..

ත්යක්ත්වා කර්මඵලාසඞ්ගං නිත්යතෘප්තෝ නිරාශ්රයඃ .

කර්මණ්යභිප්රවෘත්තෝ(අ)පි නෛව කිඤ්චිත්කරෝති සඃ .. 20 ..

නිරාශීර්යතචිත්තාත්මා ත්යක්තසර්වපරිග්රහඃ .

ශාරීරං කේවලං කර්ම කුර්වන්නාප්නෝති කිල්බිෂම් .. 21 ..

යදෘච්ඡාලාභසන්තුෂ්ටෝ ද්වන්ද්වාතීතෝ විමත්සරඃ .

සමඃ සිද්ධාවසිද්ධෞ ච කෘත්වාපි න නිබධ්යතේ .. 22 ..

ගතසඞ්ගස්ය මුක්තස්ය ජ්ඤානාවස්ථිතචේතසඃ .

යජ්ඤායාචරතඃ කර්ම සමග්රං ප්රවිලීයතේ .. 23 ..

බ්රහ්මාර්පණං බ්රහ්ම හවිර්බ්රහ්මාග්නෞ බ්රහ්මණා හුතම් .

බ්රහ්මෛව තේන ගන්තව්යං බ්රහ්මකර්මසමාධිනා .. 24 ..

දෛවමේවාපරේ යජ්ඤං යෝගිනඃ පර්යුපාසතේ .

බ්රහ්මාග්නාවපරේ යජ්ඤං යජ්ඤේනෛවෝපජුහ්වති .. 25 ..

ශ්රෝත්රාදීනීන්ද්රියාණ්යන්යේ සංයමාග්නිෂු ජුහ්වති .

ශබ්දාදීන්විෂයානන්ය ඉන්ද්රියාග්නිෂු ජුහ්වති .. 26 ..

සර්වාණීන්ද්රියකර්මාණි ප්රාණකර්මාණි චාපරේ .

ආත්මසංයමයෝගාග්නෞ ජුහ්වති ජ්ඤානදීපිතේ .. 27 ..

ද්රව්යයජ්ඤාස්තපෝයජ්ඤා යෝගයජ්ඤාස්තථාපරේ .

ස්වාධ්යායජ්ඤානයජ්ඤාශ්ච යතයඃ සංශිතව්රතාඃ .. 28 ..

අපානේ ජුහ්වති ප්රාණං ප්රාණේ(අ)පානං තථාපරේ .

ප්රාණාපානගතී රුද්ධ්වා ප්රාණායාමපරායණාඃ .. 29 ..

අපරේ නියතාහාරාඃ ප්රාණාන්ප්රාණේෂු ජුහ්වති .

සර්වේ(අ)ප්යේතේ යජ්ඤවිදෝ යජ්ඤක්ෂපිතකල්මෂාඃ .. 30 ..

යජ්ඤශිෂ්ටාමෘතභුජෝ යාන්ති බ්රහ්ම සනාතනම් .

නායං ලෝකෝ(අ)ස්ත්යයජ්ඤස්ය කුතෝ(අ)න්යඃ කුරුසත්තම .. 31 ..

ඒවං බහුවිධා යජ්ඤා විතතා බ්රහ්මණෝ මුඛේ .

කර්මජාන්විද්ධි තාන්සර්වානේවං ජ්ඤාත්වා විමෝක්ෂ්යසේ .. 32 ..

ශ්රේයාන්ද්රව්යමයාද්යජ්ඤාජ්ජ්ඤානයජ්ඤඃ පරන්තප .

සර්වං කර්මාඛිලං පාර්ථ ජ්ඤානේ පරිසමාප්යතේ .. 33 ..

තද්විද්ධි ප්රණිපාතේන පරිප්රශ්නේන සේවයා .

උපදේක්ෂ්යන්ති තේ ජ්ඤානං ජ්ඤානිනස්තත්ත්වදර්ශිනඃ .. 34 ..

යජ්ජ්ඤාත්වා න පුනර්මෝහමේවං යාස්යසි පාණ්ඩව .

යේන භූතාන්යශේෂේණ ද්රක්ෂ්යස්යාත්මන්යථෝ මයි .. 35 ..

අපි චේදසි පාපේභ්යඃ සර්වේභ්යඃ පාපකෘත්තමඃ .

සර්වං ජ්ඤානප්ලවේනෛව වෘජිනං සන්තරිෂ්යසි .. 36 ..

යථෛධාංසි සමිද්ධෝ(අ)ග්නිර්භස්මසාත්කුරුතේ(අ)ර්ජුන .

ජ්ඤානාග්නිඃ සර්වකර්මාණි භස්මසාත්කුරුතේ තථා .. 37 ..

න හි ජ්ඤානේන සදෘශං පවිත්රමිහ විද්යතේ .

තත්ස්වයං යෝගසංසිද්ධඃ කාලේනාත්මනි වින්දති .. 38 ..

ශ්රද්ධාවාँල්ලභතේ ජ්ඤානං තත්පරඃ සංයතේන්ද්රියඃ .

ජ්ඤානං ලබ්ධ්වා පරාං ශාන්තිමචිරේණාධිගච්ඡති .. 39 ..

අජ්ඤශ්චාශ්රද්දධානශ්ච සංශයාත්මා විනශ්යති .

නායං ලෝකෝ(අ)ස්ති න පරෝ න සුඛං සංශයාත්මනඃ .. 40 ..

යෝගසන්න්යස්තකර්මාණං ජ්ඤානසඤ්ඡින්නසංශයම් .

ආත්මවන්තං න කර්මාණි නිබධ්නන්ති ධනඤ්ජය .. 41 ..

තස්මාදජ්ඤානසම්භූතං හෘත්ස්ථං ජ්ඤානාසිනාත්මනඃ .

ඡිත්ත්වෛනං සංශයං යෝගමාතිෂ්ඨෝත්තිෂ්ඨ භාරත .. 42 ..

ඕං තත්සදිති ශ්රීමද්භගවද්ගීතාසූපනිෂත්සු බ්රහ්මවිද්යායාං යෝගශාස්ත්රේ

ශ්රීකෘෂ්ණාර්ජුනසංවාදේ ජ්ඤානකර්මසන්න්යාසයෝගෝ නාම චතුර්ථෝ(අ)ධ්යායඃ ..4 ..