Srimad Bhagawad Gita Chapter 3

ශ්රීමද්භගවද්ගීතා මූලම් - තෘතීයෝ(අ)ධ්යායඃ

ශ්ලොක 1

ඕං ශ්රී පරමාත්මනේ නමඃ

අථ තෘතීයෝ(අ)ධ්යායඃ .

කර්මයෝගඃ

අර්ජුන උවාච

ජ්යායසී චේත්කර්මණස්තේ මතා බුද්ධිර්ජනාර්දන .

තත්කිං කර්මණි ඝෝරේ මාං නියෝජයසි කේශව .. 1 ..

ව්යාමිශ්රේණේව වාක්යේන බුද්ධිං මෝහයසීව මේ .

තදේකං වද නිශ්චිත්ය යේන ශ්රේයෝ(අ)හමාප්නුයාම් .. 2 ..

ශ්රීභගවානුවාච

ලෝකේ(අ)ස්මින්ද්විවිධා නිෂ්ඨා පුරා ප්රෝක්තා මයානඝ .

ජ්ඤානයෝගේන සාඞ්ඛ්යානාං කර්මයෝගේන යෝගිනාම් .. 3 ..

න කර්මණාමනාරම්භාන්නෛෂ්කර්ම්යං පුරුෂෝ(අ)ශ්නුතේ .

න ච සන්න්යසනාදේව සිද්ධිං සමධිගච්ඡති .. 4 ..

න හි කශ්චිත්ක්ෂණමපි ජාතු තිෂ්ඨත්යකර්මකෘත් .

කාර්යතේ හ්යවශඃ කර්ම සර්වඃ ප්රකෘතිජෛර්ගුණෛඃ .. 5 ..

කර්මේන්ද්රියාණි සංයම්ය ය ආස්තේ මනසා ස්මරන් .

ඉන්ද්රියාර්ථාන්විමූඪාත්මා මිථ්යාචාරඃ ස උච්යතේ .. 6 ..

යස්ත්වින්ද්රියාණි මනසා නියම්යාරභතේ(අ)ර්ජුන .

කර්මේන්ද්රියෛඃ කර්මයෝගමසක්තඃ ස විශිෂ්යතේ .. 7 ..

නියතං කුරු කර්ම ත්වං කර්ම ජ්යායෝ හ්යකර්මණඃ .

ශරීරයාත්රාපි ච තේ න ප්රසිද්ධ්යේදකර්මණඃ .. 8 ..

යජ්ඤාර්ථාත්කර්මණෝ(අ)න්යත්ර ලෝකෝ(අ)යං කර්මබන්ධනඃ .

තදර්ථං කර්ම කෞන්තේය මුක්තසඞ්ගඃ සමාචර .. 9 ..

සහයජ්ඤාඃ ප්රජාඃ සෘෂ්ට්වා පුරෝවාච ප්රජාපතිඃ .

අනේන ප්රසවිෂ්යධ්වමේෂ වෝ(අ)ස්ත්විෂ්ටකාමධුක් .. 10 ..

දේවාන්භාවයතානේන තේ දේවා භාවයන්තු වඃ .

පරස්පරං භාවයන්තඃ ශ්රේයඃ පරමවාප්ස්යථ .. 11 ..

ඉෂ්ටාන්භෝගාන්හි වෝ දේවා දාස්යන්තේ යජ්ඤභාවිතාඃ .

තෛර්දත්තානප්රදායෛභ්යෝ යෝ භුඞ්ක්තේ ස්තේන ඒව සඃ .. 12 ..

යජ්ඤශිෂ්ටාශිනඃ සන්තෝ මුච්යන්තේ සර්වකිල්බිෂෛඃ .

භුඤ්ජතේ තේ ත්වඝං පාපා යේ පචන්ත්යාත්මකාරණාත් .. 13 ..

අන්නාද්භවන්ති භූතානි පර්ජන්යාදන්නසම්භවඃ .

යජ්ඤාද්භවති පර්ජන්යෝ යජ්ඤඃ කර්මසමුද්භවඃ .. 14 ..

කර්ම බ්රහ්මෝද්භවං විද්ධි බ්රහ්මාක්ෂරසමුද්භවම් .

තස්මාත්සර්වගතං බ්රහ්ම නිත්යං යජ්ඤේ ප්රතිෂ්ඨිතම් .. 15 ..

ඒවං ප්රවර්තිතං චක්රං නානුවර්තයතීහ යඃ .

අඝායුරින්ද්රියාරාමෝ මෝඝං පාර්ථ ස ජීවති .. 16 ..

යස්ත්වාත්මරතිරේව ස්යාදාත්මතෘප්තශ්ච මානවඃ .

ආත්මන්යේව ච සන්තුෂ්ටස්තස්ය කාර්යං න විද්යතේ .. 17 ..

නෛව තස්ය කෘතේනාර්ථෝ නාකෘතේනේහ කශ්චන .

න චාස්ය සර්වභූතේෂු කශ්චිදර්ථව්යපාශ්රයඃ .. 18 ..

තස්මාදසක්තඃ සතතං කාර්යං කර්ම සමාචර .

අසක්තෝ හ්යාචරන්කර්ම පරමාප්නෝති පූරුෂඃ .. 19 ..

කර්මණෛව හි සංසිද්ධිමාස්ථිතා ජනකාදයඃ .

ලෝකසඞ්ග්රහමේවාපි සම්පශ්යන්කර්තුමර්හසි .. 20 ..

යද්යදාචරති ශ්රේෂ්ඨස්තත්තදේවේතරෝ ජනඃ .

ස යත්ප්රමාණං කුරුතේ ලෝකස්තදනුවර්තතේ .. 21 ..

න මේ පාර්ථාස්ති කර්තව්යං ත්රිෂු ලෝකේෂු කිඤ්චන .

නානවාප්තමවාප්තව්යං වර්ත ඒව ච කර්මණි .. 22 ..

යදි හ්යහං න වර්තේයං ජාතු කර්මණ්යතන්ද්රිතඃ .

මම වර්ත්මානුවර්තන්තේ මනුෂ්යාඃ පාර්ථ සර්වශඃ .. 23 ..

උත්සීදේයුරිමේ ලෝකා න කුර්යාං කර්ම චේදහම් .

සඞ්කරස්ය ච කර්තා ස්යාමුපහන්යාමිමාඃ ප්රජාඃ .. 24 ..

සක්තාඃ කර්මණ්යවිද්වාංසෝ යථා කුර්වන්ති භාරත .

කුර්යාද්විද්වාංස්තථාසක්තශ්චිකීර්ෂුර්ලෝකසඞ්ග්රහම් .. 25 ..

න බුද්ධිභේදං ජනයේදජ්ඤානාං කර්මසඞ්ගිනාම් .

ජෝෂයේත්සර්වකර්මාණි විද්වාන්යුක්තඃ සමාචරන් .. 26 ..

ප්රකෘතේඃ ක්රියමාණානි ගුණෛඃ කර්මාණි සර්වශඃ .

අහඞ්කාරවිමූඪාත්මා කර්තාහමිති මන්යතේ .. 27 ..

තත්ත්වවිත්තු මහාබාහෝ ගුණකර්මවිභාගයෝඃ .

ගුණා ගුණේෂු වර්තන්ත ඉති මත්වා න සජ්ජතේ .. 28 ..

ප්රකෘතේර්ගුණසම්මූඪාඃ සජ්ජන්තේ ගුණකර්මසු .

තානකෘත්ස්නවිදෝ මන්දාන්කෘත්ස්නවින්න විචාලයේත් .. 29 ..

මයි සර්වාණි කර්මාණි සන්න්යස්යාධ්යාත්මචේතසා .

නිරාශීර්නිර්මමෝ භූත්වා යුධ්යස්ව විගතජ්වරඃ .. 30 ..

යේ මේ මතමිදං නිත්යමනුතිෂ්ඨන්ති මානවාඃ .

ශ්රද්ධාවන්තෝ(අ)නසූයන්තෝ මුච්යන්තේ තේ(අ)පි කර්මභිඃ .. 31 ..

යේ ත්වේතදභ්යසූයන්තෝ නානුතිෂ්ඨන්ති මේ මතම් .

සර්වජ්ඤානවිමූඪාංස්තාන්විද්ධි නෂ්ටානචේතසඃ .. 32 ..

සදෘශං චේෂ්ටතේ ස්වස්යාඃ ප්රකෘතේර්ජ්ඤානවානපි .

ප්රකෘතිං යාන්ති භූතානි නිග්රහඃ කිං කරිෂ්යති .. 33 ..

ඉන්ද්රියස්යේන්ද්රියස්යාර්ථේ රාගද්වේෂෞ ව්යවස්ථිතෞ .

තයෝර්න වශමාගච්ඡේත්තෞ හ්යස්ය පරිපන්ථිනෞ .. 34 ..

ශ්රේයාන්ස්වධර්මෝ විගුණඃ පරධර්මාත්ස්වනුෂ්ඨිතාත් .

ස්වධර්මේ නිධනං ශ්රේයඃ පරධර්මෝ භයාවහඃ .. 35 ..

අර්ජුන උවාච

අථ කේන ප්රයුක්තෝ(අ)යං පාපං චරති පූරුෂඃ .

අනිච්ඡන්නපි වාර්ෂ්ණේය බලාදිව නියෝජිතඃ .. 36 ..

ශ්රීභගවානුවාච

කාම ඒෂ ක්රෝධ ඒෂ රජෝගුණසමුද්භවඃ .

මහාශනෝ මහාපාප්මා විද්ධ්යේනමිහ වෛරිණම් .. 37 ..

ධූමේනාව්රියතේ වහ්නිර්යථාදර්ශෝ මලේන ච .

යථෝල්බේනාවෘතෝ ගර්භස්තථා තේනේදමාවෘතම් .. 38 ..

ආවෘතං ජ්ඤානමේතේන ජ්ඤානිනෝ නිත්යවෛරිණා .

කාමරූපේණ කෞන්තේය දුෂ්පූරේණානලේන ච .. 39 ..

ඉන්ද්රියාණි මනෝ බුද්ධිරස්යාධිෂ්ඨානමුච්යතේ .

ඒතෛර්විමෝහයත්යේෂ ජ්ඤානමාවෘත්ය දේහිනම් .. 40 ..

තස්මාත්ත්වමින්ද්රියාණ්යාදෞ නියම්ය භරතර්ෂභ .

පාප්මානං ප්රජහි හ්යේනං ජ්ඤානවිජ්ඤානනාශනම් .. 41 ..

ඉන්ද්රියාණි පරාණ්යාහුරින්ද්රියේභ්යඃ පරං මනඃ .

මනසස්තු පරා බුද්ධිර්යෝ බුද්ධේඃ පරතස්තු සඃ .. 42 ..

ඒවං බුද්ධේඃ පරං බුද්ධ්වා සංස්තභ්යාත්මානමාත්මනා .

ජහි ශත්රුං මහාබාහෝ කාමරූපං දුරාසදම් .. 43 ..

ඕං තත්සදිති ශ්රීමද්භගවද්ගීතාසූපනිෂත්සු බ්රහ්මවිද්යායාං යෝගශාස්ත්රේ

ශ්රීකෘෂ්ණාර්ජුනසංවාදේ කර්මයෝගෝ නාම තෘතීයෝ(අ)ධ්යායඃ ..3 ..