Srimad Bhagawad Gita Chapter 17

shrImadbhagavadgItA mUlam - saptadasho.adhyAyaH

shloka 1

OM shrI paramAtmane namaH

atha saptadasho.adhyAyaH |

shraddhAtrayavibhAgayogaH

arjuna uvAcha

ye shAstravidhimutsRRijya yajante shraddhayAnvitAH |

teShAM niShThA tu kA kRRiShNa sattvamAho rajastamaH || 1 ||

shrIbhagavAnuvAcha

trividhA bhavati shraddhA dehinAM sA svabhAvajA |

sAttvikI rAjasI chaiva tAmasI cheti tAM shRRiNu || 2 ||

sattvAnurUpA sarvasya shraddhA bhavati bhArata |

shraddhAmayo.ayaM puruSho yo yachChraddhaH sa eva saH || 3 ||

yajante sAttvikA devAnyakSharakShAMsi rAjasAH |

pretAnbhUtagaNAMshchAnye yajante tAmasA janAH || 4 ||

ashAstravihitaM ghoraM tapyante ye tapo janAH |

dambhAha~NkArasaMyuktAH kAmarAgabalAnvitAH || 5 ||

karShayantaH sharIrasthaM bhUtagrAmamachetasaH |

mAM chaivAntaHsharIrasthaM tAnviddhyAsuranishchayAn || 6 ||

AhArastvapi sarvasya trividho bhavati priyaH |

yaj~nastapastathA dAnaM teShAM bhedamimaM shRRiNu || 7 ||

AyuHsattvabalArogyasukhaprItivivardhanAH |

rasyAH snigdhAH sthirA hRRidyA AhArAH sAttvikapriyAH || 8 ||

kaTvamlalavaNAtyuShNatIkShNarUkShavidAhinaH |

AhArA rAjasasyeShTA duHkhashokAmayapradAH || 9 ||

yAtayAmaM gatarasaM pUti paryuShitaM cha yat |

uchChiShTamapi chAmedhyaM bhojanaM tAmasapriyam || 10 ||

aphalAkANkShibhiryajno vidhidRRiShTo ya ijyate |

yaShTavyameveti manaH samAdhAya sa sAttvikaH || 11 ||

abhisandhAya tu phalaM dambhArthamapi chaiva yat |

ijyate bharatashreShTha taM yaj~naM viddhi rAjasam || 12 ||

vidhihInamasRRiShTAnnaM mantrahInamadakShiNam |

shraddhAvirahitaM yaj~naM tAmasaM parichakShate || 13 ||

devadvijaguruprAj~napUjanaM shauchamArjavam |

brahmacharyamahiMsA cha shArIraM tapa uchyate || 14 ||

anudvegakaraM vAkyaM satyaM priyahitaM cha yat |

svAdhyAyAbhyasanaM chaiva vA~NmayaM tapa uchyate || 15 ||

manaH prasAdaH saumyatvaM maunamAtmavinigrahaH |

bhAvasaMshuddhirityetattapo mAnasamuchyate || 16 ||

shraddhayA parayA taptaM tapastattrividhaM naraiH |

aphalAkA~NkShibhiryuktaiH sAttvikaM parichakShate || 17 ||

satkAramAnapUjArthaM tapo dambhena chaiva yat |

kriyate tadiha proktaM rAjasaM chalamadhruvam || 18 ||

mUDhagrAheNAtmano yatpIDayA kriyate tapaH |

parasyotsAdanArthaM vA tattAmasamudAhRRitam || 19 ||

dAtavyamiti yaddAnaM dIyate.anupakAriNe |

deshe kAle cha pAtre cha taddAnaM sAttvikaM smRRitam || 20 ||

yattu prattyupakArArthaM phalamuddishya vA punaH |

dIyate cha parikliShTaM taddAnaM rAjasaM smRRitam || 21 ||

adeshakAle yaddAnamapAtrebhyashcha dIyate |

asatkRRitamavaj~nAtaM tattAmasamudAhRRitam || 22 ||

OM tatsaditi nirdesho brahmaNastrividhaH smRRitaH |

brAhmaNAstena vedAshcha yaj~nAshcha vihitAH purA || 23 ||

tasmAdomityudAhRRitya yaj~nadAnatapaHkriyAH |

pravartante vidhAnoktAH satataM brahmavAdinAm || 24 ||

tadityanabhisandhAya phalaM yaj~natapaHkriyAH |

dAnakriyAshcha vividhAH kriyante mokShakA~NkShibhiH || 25 ||

sadbhAve sAdhubhAve cha sadityetatprayujyate |

prashaste karmaNi tathA sachChabdaH pArtha yujyate || 26 ||

yaj~ne tapasi dAne cha sthitiH saditi chochyate |

karma chaiva tadarthIyaM sadityevAbhidhIyate || 27 ||

ashraddhayA hutaM dattaM tapastaptaM kRRitaM cha yat |

asadityuchyate pArtha na cha tatprepya no iha || 28 ||

OM tatsaditi shrImadbhagavadgItAsUpaniShatsu brahmavidyAyAM yogashAstre

shrIkRRiShNArjunasaMvAde shraddhAtrayavibhAgayogo nAma saptadasho.adhyAyaH ||17 ||