Srimad Bhagawad Gita Chapter 16

shrImadbhagavadgItA mUlam - ShoDasho.adhyAyaH

shloka 1

OM shrI paramAtmane namaH

atha ShoDasho.adhyAyaH |

daivAsurasampadvibhAgayogaH

shrIbhagavAnuvAcha

abhayaM sattvasaMshuddhirj~nAnayogavyavasthitiH |

dAnaM damashcha yaj~nashcha svAdhyAyastapa Arjavam || 1 ||

ahiMsA satyamakrodhastyAgaH shAntirapaishunam |

dayA bhUteShvaloluptvaM mArdavaM hrIrachApalam || 2 ||

tejaH kShamA dhRRitiH shauchamadroho nAtimAnitA |

bhavanti sampadaM daivImabhijAtasya bhArata || 3 ||

dambho darpo.abhimAnashcha krodhaH pAruShyameva cha |

aj~nAnaM chAbhijAtasya pArtha sampadamAsurIm || 4 ||

daivI sampadvimokShAya nibandhAyAsurI matA |

mA shuchaH sampadaM daivImabhijAto.asi pANDava || 5 ||

dvau bhUtasargau loke.asmindaiva Asura eva cha |

daivo vistarashaH prokta AsuraM pArtha me shRRiNu || 6 ||

pravRRittiM cha nivRRittiM cha janA na vidurAsurAH |

na shauchaM nApi chAchAro na satyaM teShu vidyate || 7 ||

asatyamapratiShThaM te jagadAhuranIshvaram |

aparasparasambhUtaM kimanyatkAmahaitukam || 8 ||

etAM dRRiShTimavaShTabhya naShTAtmAno.alpabuddhayaH |

prabhavantyugrakarmANaH kShayAya jagato.ahitAH || 9 ||

kAmamAshritya duShpUraM dambhamAnamadAnvitAH |

mohAdgRRihItvAsadgrAhAnpravartante.ashuchivratAH || 10 ||

chintAmaparimeyAM cha pralayAntAmupAshritAH |

kAmopabhogaparamA etAvaditi nishchitAH || 11 ||

AshApAshashatairbaddhAH kAmakrodhaparAyaNAH |

Ihante kAmabhogArthamanyAyenArthasa~nchayAn || 12 ||

idamadya mayA labdhamimaM prApsye manoratham |

idamastIdamapi me bhaviShyati punardhanam || 13 ||

asau mayA hataH shatrurhaniShye chAparAnapi |

Ishvaro.ahamahaM bhogI siddho.ahaM balavAnsukhI || 14 ||

ADhyo.abhijanavAnasmi ko.anyosti sadRRisho mayA |

yakShye dAsyAmi modiShya ityaj~nAnavimohitAH || 15 ||

anekachittavibhrAntA mohajAlasamAvRRitAH |

prasaktAH kAmabhogeShu patanti narake.ashuchau || 16 ||

AtmasambhAvitAH stabdhA dhanamAnamadAnvitAH |

yajante nAmayaj~naiste dambhenAvidhipUrvakam || 17 ||

aha~NkAraM balaM darpaM kAmaM krodhaM cha saMshritAH |

mAmAtmaparadeheShu pradviShanto.abhyasUyakAH || 18 ||

tAnahaM dviShataH krUrAnsaMsAreShu narAdhamAn |

kShipAmyajasramashubhAnAsurIShveva yoniShu || 19 ||

AsurIM yonimApannA mUDhA janmani janmani |

mAmaprApyaiva kaunteya tato yAntyadhamAM gatim || 20 ||

trividhaM narakasyedaM dvAraM nAshanamAtmanaH |

kAmaH krodhastathA lobhastasmAdetattrayaM tyajet || 21 ||

etairvimuktaH kaunteya tamodvAraistribhirnaraH |

AcharatyAtmanaH shreyastato yAti parAM gatim || 22 ||

yaH shAstravidhimutsRRijya vartate kAmakArataH |

na sa siddhimavApnoti na sukhaM na parAM gatim || 23 ||

tasmAchChAstraM pramANaM te kAryAkAryavyavasthitau |

j~nAtvA shAstravidhAnoktaM karma kartumihArhasi || 24 ||

OM tatsaditi shrImadbhagavadgItAsUpaniShatsu brahmavidyAyAM yogashAstre

shrIkRRiShNArjunasaMvAde daivAsurasampadvibhAgayogo nAma ShoDasho.adhyAyaH ||16 ||