Srimad Bhagawad Gita Chapter 15

shrImadbhagavadgItA mUlam - pa~nchadasho.adhyAyaH

shloka 1

OM shrI paramAtmane namaH

atha pa~nchadasho.adhyAyaH |

puruShottamaprAptiyogaH

shrIbhagavAnuvAcha

UrdhvamUlamadhaHshAkhamashvatthaM prAhuravyayam |

ChandAMsi yasya parNAni yastaM veda sa vedavit || 1 ||

adhashchordhvaM prasRRitAstasya shAkhA guNapravRRiddhA viShayapravAlAH|

adhashcha mUlAnyanusantatAni karmAnubandhIni manuShyaloke || 2 ||

na rUpamasyeha tathopalabhyate nAnto na chAdirna cha sampratiShThA|

ashvatthamenaM suvirUDhamUlamasa~NgashastreNa dRRiDhena ChittvA || 3 ||

tataH padaM tatparimArgitavyaM yasmingatA na nivartanti bhUyaH|

tameva chAdyaM puruShaM prapadye yataH pravRRittiH prasRRitA purANI || 4 ||

nirmAnamohA jitasa~NgadoShA adhyAtmanityA vinivRRittakAmAH|

dvandvairvimuktAH sukhaduHkhasanjnairgachChantyamUDhAH padamavyayaM tat || 5 ||

na tadbhAsayate sUryo na shashA~Nko na pAvakaH |

yadgatvA na nivartante taddhAma paramaM mama || 6 ||

mamaivAMsho jIvaloke jIvabhUtaH sanAtanaH |

manaHShaShThAnIndriyANi prakRRitisthAni karShati || 7 ||

sharIraM yadavApnoti yachchApyutkrAmatIshvaraH |

gRRihItvaitAni saMyAti vAyurgandhAnivAshayAt || 8 ||

shrotraM chakShuH sparshanaM cha rasanaM ghrANameva cha |

adhiShThAya manashchAyaM viShayAnupasevate || 9 ||

utkrAmantaM sthitaM vApi bhu~njAnaM vA guNAnvitam |

vimUDhA nAnupashyanti pashyanti j~nAnachakShuShaH || 10 ||

yatanto yoginashchainaM pashyantyAtmanyavasthitam |

yatanto.apyakRRitAtmAno nainaM pashyantyachetasaH || 11 ||

yadAdityagataM tejo jagadbhAsayate.akhilam |

yachchandramasi yachchAgnau tattejo viddhi mAmakam || 12 ||

gAmAvishya cha bhUtAni dhArayAmyahamojasA |

puShNAmi chauShadhIH sarvAH somo bhUtvA rasAtmakaH || 13 ||

ahaM vaishvAnaro bhUtvA prANinAM dehamAshritaH |

prANApAnasamAyuktaH pachAmyannaM chaturvidham || 14 ||

sarvasya chAhaM hRRidi sanniviShTo mattaH smRRitirj~nAnamapohanaM cha|

vedaishcha sarvairahameva vedyo vedAntakRRidvedavideva chAham || 15 ||

dvAvimau puruShau loke kSharashchAkShara eva cha |

kSharaH sarvANi bhUtAni kUTastho.akShara uchyate || 16 ||

uttamaH puruShastvanyaH paramAtmetyudhAhRRitaH |

yo lokatrayamAvishya bibhartyavyaya IshvaraH || 17 ||

yasmAtkSharamatIto.ahamakSharAdapi chottamaH |

ato.asmi loke vede cha prathitaH puruShottamaH || 18 ||

yo mAmevamasammUDho jAnAti puruShottamam |

sa sarvavidbhajati mAM sarvabhAvena bhArata || 19 ||

iti guhyatamaM shAstramidamuktaM mayAnagha |

etadbuddhvA buddhimAnsyAtkRRitakRRityashcha bhArata || 20 ||

OM tatsaditi shrImadbhagavadgItAsUpaniShatsu brahmavidyAyAM yogashAstre

shrIkRRiShNArjunasaMvAde puruShottamayogo nAma pa~nchadasho.adhyAyaH ||15 ||