Srimad Bhagawad Gita Chapter 12

shrImadbhagavadgItA mUlam - dvAdasho.adhyAyaH

shloka 1

OM shrI paramAtmane namaH

atha dvAdasho.adhyAyaH |

bhaktiyogaH

arjuna uvAcha

evaM satatayuktA ye bhaktAstvAM paryupAsate |

ye chApyakSharamavyaktaM teShAM ke yogavittamAH || 1 ||

shrIbhagavAnuvAcha

mayyAveshya mano ye mAM nityayuktA upAsate |

shraddhayA parayopetAste me yuktatamA matAH || 2 ||

ye tvakSharamanirdeshyamavyaktaM paryupAsate |

sarvatragamachintyaM cha kUTasthamachalaM dhruvam || 3 ||

sanniyamyendriyagrAmaM sarvatra samabuddhayaH |

te prApnuvanti mAmeva sarvabhUtahite ratAH || 4 ||

klesho.adhikatarasteShAmavyaktAsaktachetasAm |

avyaktA hi gatirduHkhaM dehavadbhiravApyate || 5 ||

ye tu sarvANi karmANi mayi sannyasya matparAH |

ananyenaiva yogena mAM dhyAyanta upAsate || 6 ||

teShAmahaM samuddhartA mRRityusaMsArasAgarAt |

bhavAmi na chirAtpArtha mayyAveshitachetasAm || 7 ||

mayyeva mana Adhatsva mayi buddhiM niveshaya |

nivasiShyasi mayyeva ata UrdhvaM na saMshayaH || 8 ||

atha chittaM samAdhAtuM na shaknoShi mayi sthiram |

abhyAsayogena tato mAmichChAptuM dhana~njaya || 9 ||

abhyAse.apyasamartho.asi matkarmaparamo bhava |

madarthamapi karmANi kurvansiddhimavApsyasi || 10 ||

athaitadapyashakto.asi kartuM madyogamAshritaH |

sarvakarmaphalatyAgaM tataH kuru yatAtmavAn || 11 ||

shreyo hi jnAnamabhyAsAjjnAnAddhyAnaM vishiShyate |

dhyAnAtkarmaphalatyAgastyAgAchChAntiranantaram || 12 ||

adveShTA sarvabhUtAnAM maitraH karuNa eva cha |

nirmamo niraha~NkAraH samaduHkhasukhaH kShamI || 13 ||

santuShTaH satataM yogI yatAtmA dRRiDhanishchayaH |

mayyarpitamanobuddhiryo madbhaktaH sa me priyaH || 14 ||

yasmAnnodvijate loko lokAnnodvijate cha yaH |

harShAmarShabhayodvegairmukto yaH sa cha me priyaH || 15 ||

anapekShaH shuchirdakSha udAsIno gatavyathaH |

sarvArambhaparityAgI yo madbhaktaH sa me priyaH || 16 ||

yo na hRRiShyati na dveShTi na shochati na kA~NkShati |

shubhAshubhaparityAgI bhaktimAnyaH sa me priyaH || 17 ||

samaH shatrau cha mitre cha tathA mAnApamAnayoH |

shItoShNasukhaduHkheShu samaH sa~NgavivarjitaH || 18 ||

tulyanindAstutirmaunI santuShTo yena kenachit |

aniketaH sthiramatirbhaktimAnme priyo naraH || 19 ||

ye tu dharmyAmRRitamidaM yathoktaM paryupAsate |

shraddadhAnA matparamA bhaktAste.atIva me priyAH || 20 ||

OM tatsaditi shrImadbhagavadgItAsUpaniShatsu brahmavidyAyAM yogashAstre

shrIkRRiShNArjunasaMvAde bhaktiyogo nAma dvAdasho.adhyAyaH ||12 ||