Srimad Bhagawad Gita Chapter 10

shrImadbhagavadgItA mUlam - dashamo.adhyAyaH

shloka 1

OM shrIparamAtmane namaH

atha dashamo.adhyAyaH |

vibhUtiyogaH

shrIbhagavAnuvAcha

bhUya eva mahAbAho shRRiNu me paramaM vachaH |

yatte.ahaM prIyamANAya vakShyAmi hitakAmyayA || 1 ||

na me viduH suragaNAH prabhavaM na maharShayaH |

ahamAdirhi devAnAM maharShINAM cha sarvashaH || 2 ||

yo mAmajamanAdiM cha vetti lokamaheshvaram |

asammUDhaH sa martyeShu sarvapApaiH pramuchyate || 3 ||

buddhirj~nAnamasammohaH kShamA satyaM damaH shamaH |

sukhaM duHkhaM bhavo.abhAvo bhayaM chAbhayameva cha || 4 ||

ahiMsA samatA tuShTistapo dAnaM yasho.ayashaH |

bhavanti bhAvA bhUtAnAM matta eva pRRithagvidhAH || 5 ||

maharShayaH sapta pUrve chatvAro manavastathA |

madbhAvA mAnasA jAtA yeShAM loka imAH prajAH || 6 ||

etAM vibhUtiM yogaM cha mama yo vetti tattvataH |

so.avikampena yogena yujyate nAtra saMshayaH || 7 ||

ahaM sarvasya prabhavo mattaH sarvaM pravartate |

iti matvA bhajante mAM budhA bhAvasamanvitAH || 8 ||

machchittA madgataprANA bodhayantaH parasparam |

kathayantashcha mAM nityaM tuShyanti cha ramanti cha || 9 ||

teShAM satatayuktAnAM bhajatAM prItipUrvakam |

dadAmi buddhiyogaM taM yena mAmupayAnti te || 10 ||

teShAmevAnukampArthamahamaj~nAnajaM tamaH |

nAshayAmyAtmabhAvastho j~nAnadIpena bhAsvatA || 11 ||

arjuna uvAcha

paraM brahma paraM dhAma pavitraM paramaM bhavAn |

puruShaM shAshvataM divyamAdidevamajaM vibhum || 12 ||

AhustvAmRRiShayaH sarve devarShirnAradastathA |

asito devalo vyAsaH svayaM chaiva bravIShi me || 13 ||

sarvametadRRitaM manye yanmAM vadasi keshava |

na hi te bhagavanvyaktiM vidurdevA na dAnavAH || 14 ||

svayamevAtmanAtmAnaM vettha tvaM puruShottama |

bhUtabhAvana bhUtesha devadeva jagatpate || 15 ||

vaktumarhasyasheSheNa divyA hyAtmavibhUtayaH |

yAbhirvibhUtibhirlokAnimAMstvaM vyApya tiShThasi || 16 ||

kathaM vidyAmahaM yogiMstvAM sadA parichintayan |

keShu keShu cha bhAveShu chintyo.asi bhagavanmayA || 17 ||

vistareNAtmano yogaM vibhUtiM cha janArdana |

bhUyaH kathaya tRRiptirhi shRRiNvato nAsti me.amRRitam || 18 ||

shrIbhagavAnuvAcha

hanta te kathayiShyAmi divyA hyAtmavibhUtayaH |

prAdhAnyataH kurushreShTha nAstyanto vistarasya me || 19 ||

ahamAtmA guDAkesha sarvabhUtAshayasthitaH |

ahamAdishcha madhyaM cha bhUtAnAmanta eva cha || 20 ||

AdityAnAmahaM viShNurjyotiShAM raviraMshumAn |

marIchirmarutAmasmi nakShatrANAmahaM shashI || 21 ||

vedAnAM sAmavedo.asmi devAnAmasmi vAsavaH |

indriyANAM manashchAsmi bhUtAnAmasmi chetanA || 22 ||

rudrANAM sha~NkarashchAsmi vittesho yakSharakShasAm |

vasUnAM pAvakashchAsmi meruH shikhariNAmaham || 23 ||

purodhasAM cha mukhyaM mAM viddhi pArtha bRRihaspatim |

senAnInAmahaM skandaH sarasAmasmi sAgaraH || 24 ||

maharShINAM bhRRigurahaM girAmasmyekamakSharam |

yajnAnAM japayajno.asmi sthAvarANAM himAlayaH || 25 ||

ashvatthaH sarvavRRikShANAM devarShINAM cha nAradaH |

gandharvANAM chitrarathaH siddhAnAM kapilo muniH || 26 ||

uchchaiHshravasamashvAnAM viddhi mAmamRRitodbhavam |

airAvataM gajendrANAM narANAM cha narAdhipam || 27 ||

AyudhAnAmahaM vajraM dhenUnAmasmi kAmadhuk |

prajanashchAsmi kandarpaH sarpANAmasmi vAsukiH || 28 ||

anantashchAsmi nAgAnAM varuNo yAdasAmaham |

pitRRINAmaryamA chAsmi yamaH saMyamatAmaham || 29 ||

prahlAdashchAsmi daityAnAM kAlaH kalayatAmaham |

mRRigANAM cha mRRigendro.ahaM vainateyashcha pakShiNAm || 30 ||

pavanaH pavatAmasmi rAmaH shastrabhRRitAmaham |

jhaShANAM makarashchAsmi srotasAmasmi jAhnavI || 31 ||

sargANAmAdirantashcha madhyaM chaivAhamarjuna |

adhyAtmavidyA vidyAnAM vAdaH pravadatAmaham || 32 ||

akSharANAmakAro.asmi dvandvaH sAmAsikasya cha |

ahamevAkShayaH kAlo dhAtAhaM vishvatomukhaH || 33 ||

mRRityuH sarvaharashchAhamudbhavashcha bhaviShyatAm |

kIrtiH shrIrvAkcha nArINAM smRRitirmedhA dhRRitiH kShamA || 34 ||

bRRihatsAma tathA sAmnAM gAyatrI ChandasAmaham |

mAsAnAM mArgashIrSho.ahamRRitUnAM kusumAkaraH || 35 ||

dyUtaM ChalayatAmasmi tejastejasvinAmaham |

jayo.asmi vyavasAyo.asmi sattvaM sattvavatAmaham || 36 ||

vRRiShNInAM vAsudevo.asmi pANDavAnAM dhana~njayaH |

munInAmapyahaM vyAsaH kavInAmushanA kaviH || 37 ||

daNDo damayatAmasmi nItirasmi jigIShatAm |

maunaM chaivAsmi guhyAnAM jnAnaM jnAnavatAmaham || 38 ||

yachchApi sarvabhUtAnAM bIjaM tadahamarjuna |

na tadasti vinA yatsyAnmayA bhUtaM charAcharam || 39 ||

nAnto.asti mama divyAnAM vibhUtInAM parantapa |

eSha tUddeshataH prokto vibhUtervistaro mayA || 40 ||

yadyadvibhUtimatsattvaM shrImadUrjitameva vA |

tattadevAvagachCha tvaM mama tejoM.ashasambhavam || 41 ||

athavA bahunaitena kiM j~nAtena tavArjuna |

viShTabhyAhamidaM kRRitsnamekAMshena sthito jagat || 42 ||

OM tatsaditi shrImadbhagavadgItAsUpaniShatsu brahmavidyAyAM yogashAstre

shrIkRRiShNArjunasaMvAde vibhUtiyogo nAma dashamo.adhyAyaH ||10 ||