zrI sUrya zatakam

|| sUryazatakam ||

mahAkavizrImayUrapraNItam

|| zrI gaNezAya namaH ||

jambhArAtIbhakumbhodbhavamiva dadhataH sAndrasindUrareNuM

raktAH siktA ivaughairudayagiritaTIdhAtudhArAdravasya | var saktaiH

AyAntyA tulyakAlaM kamalavanarucevAruNA vo vibhUtyai

bhUyAsurbhAsayanto bhuvanamabhinavA bhAnavo bhAnavIyAH || 1 ||

bhaktiprahvAya dAtuM mukulapuTakuTIkoTarakroDalInAM

lakSmImAkraSTukAmA iva kamalavanoddhATanaM kurvate ye |

kAlAkArAndhakArAnanapatitajagatsAdhvasadhvaMsakalyAH

kalyANaM vaH kriyAsuH kisalayarucayaste karA bhAskarasya || 2 ||

garbheSvambhoruhANAM zikhariSu ca zitAgreSu tulyaM patantaH

prArambhe vAsarasya vyuparatisamaye caikarUpAstathaiva |

niSparyAyaM pravRttAstribhuvanabhavanaprAGgaNe pAntu yuSmA-

nUSmANaM santatAdhvazramajamiva bhRzaM bibhrato bradhnapAdAH || 3 ||

prabhrazyatyuttarIyatviSi tamasi samuddIkSya vItAvRtInprA-

gjantUMstantUnyathA yAnatanu vitanute tigmarocirmarIcIn |

te sAndrIbhUya sadyaH kramavizadadazAzAdazAlIvizAlaM

zazvatsampAdayanto'mbaramamalamalaM maGgalaM vo dizantu || 4 ||

nyakkurvannoSadhIze muSitaruci zucevauSadhIH proSitAbhA

bhAsvadgrAvodgatena prathamamiva kRtAbhyudgatiH pAvakena |

pakSacchedavraNAsRksruta iva dRSado darzayanprAtaradre-

rAtAmrastIvrabhAnoranabhimatanude stAdgabhastyudgamo vaH || 5 ||

zIrNaghrANAGghripANInvraNibhirapaghanairghargharAvyaktaghoSAn

dIrghAghrAtAnaghaughai punarapi ghaTayatyeka ullAghayan yaH |

gharmAMzostasya vo'ntardviguNaghanaghRNAnighnanirvighnavRtte-

rdattArghAH siddhasaGghairvidadhatu ghRNayaH zIghramaMhovidhAtam || 6 ||

bibhrANA vAmanatvaM prathamamatha tathaivAMzavaH prAMzavo vaH

krAntAkAzAntarAlAstadanu dazadizaH pUrayantastato'pi |

dhvAntAdAcchidya devadviSa iva balito vizvamAzvaznuvAnAH var devadruha

kRcchrANyucchrAyahelopahasitaharayo hAridazvA harantu || 7 ||

udgADhenAruNimnA vidadhati bahulaM ye'ruNasyAruNatvaM

mUrdhoddhUtau khalInakSatarudhiraruco ye rathAzvAnaneSu |

zailAnAM zekharatvaM zritazikharizikhAstanvate ye dizantu var zikharazikhAH

preGkhantaH khe kharAMzoH khacitadinamukhAste mayUkhAH sukhaM vaH || 8 ||

dattAnandAH prajAnAM samucitasamayAkRSTasRSTaiH payobhiH var akliSTasRSTaiH

pUrvAhNe viprakIrNA dizi dizi viramatyahni saMhArabhAjaH |

dIptAMzordIrghaduHkhaprabhavabhavabhayodanvaduttAranAvo

gAvo vaH pAvanAnAM paramaparimitAM prItimutpAdayantu || 9 ||

bandhadhvaMsaikahetuM zirasi natirasAbaddhasandhyAJjalInAM

lokAnAM ye prabodhaM vidadhati vipulAmbhojakhaNDAzayeva |

yuSmAkaM te svacittaprathitapRthutaraprArthanAkalpavRkSAH var prathima

kalpantAM nirvikalpaM dinakarakiraNAH ketavaH kalmaSasya || 10 ||

dhArA rAyo dhanAyApadi sapadi karAlambabhUtAH prapAte

tattvAlokaikadIpAstridazapatipuraprasthitau vIthya eva |

nirvANodyogiyogipragamanijatanudvAri vetrAyamANA-

strAyantAM tIvrabhAnordivasamukhasukhA razmayaH kalmaSAdvaH || 11 ||

var tIvrabhAsaH var kazmalAdvaH

prAci prAgAcarantyo'naticiramacale cArucUDAmaNitvaM

muJcantyo rocanAmbhaH pracuramiva dizAmuccakaizcarcanAya |

cATUtkaizcakranAmnAM caturamavicalairlocanairarcyamAnA- var suciraM

zceSTantAM cintitAnAmucitamacaramAzcaNDarocIruco vaH || 12 ||

ekaM jyotirdRzau dve trijagati gaditAnyabjajAsyaizcaturbhi-

rbhUtAnAM paJcamaM yAnyalamRtuSu tathA SaTsu nAnAvidhAni |

yuSmAkaM tAni saptatridazamuninutAnyaSTadigbhAJji bhAno-

ryAnti prAhNe navatvaM daza dadhatu zivaM dIdhitInAM zatAni || 13 || var dadatu

AvRttibhrAntavizvAH zramamiva dadhataH zoSiNaH svoSmaNeva

grISme dAvAgnitaptA iva rasamasakRdye dharitryA dhayanti |

te prAvRSyAttapAnAtizayaruja ivodvAntatoyA himartau

mArtaNDasyApracaNDAzciramazubhabhide'bhISavo vo bhavantu || 14 ||

tanvAnA digvadhUnAM samadhikamadhurAlokaramyAmavasthA-

mAruDhaprauDhilezotkalitakapilimAlaGkRtiH kevalaiva |

ujjRmbhAmbhojanetradyutini dinamukhe kiJcidudbhidyamAnA

zmazruzreNIva bhAsAM dizatu dazazatI zarma gharmatviSo vaH || 15 ||

maulIndormaiSa moSIddyutimiti vRSabhAGkena yaH zaGkineva

pratyagrodghATitAmbhoruhakuharaguhAsusthiteneva dhAtrA |

kRSNena dhvAntakRSNasvatanuparibhavatrasnuneva stuto'laM

trANAya stAttanIyAnapi timiraripoH sa tviSAmudgamo vaH || 16 ||

vistIrNaM vyoma dIrghAH sapadi daza dizo vyastavelAmbhaso'bdhIn

kurvadbhirdRzyanAnAnaganagaranagAbhogapRthvIM ca pRthvIm |

padminyucchvAsyate yairuSasi jagadapi dhvaMsayitvA tamisrA-

musrA visraMsayantu drutamanabhimataM te sahasratviSo vaH || 17 || var visrAvayantu

astavyastatvazUnyo nijaruciranizAnazvaraH kartumIzo

vizvaM vezmeva dIpaH pratihatatimiraM yaH pradezasthito'pi |

dikkAlApekSayAsau tribhuvanamaTatastigmabhAnornavAkhyAM

yAtaH zAtakratavyAM dizi dizatu zivaM so'rciSAmudgamo vaH || 18 ||

mAgAnmlAniM mRNAlI mRduriti dayayevApraviSTo'hilokaM

lokAlokasya pArzvaM pratapati na paraM yastadAkhyArthameva |

UrdhvaM brahmANDakhaNDasphuTanabhayaparityaktadairghyo dyusImni

svechAvazyAvakAzAvadhiravatu sa vastApano rociroghaH || 19 ||

azyAmaH kAla eko na bhavati bhuvanAnto'pi vIte'ndhakAre var vItAndhakAraH

sadyaH prAleyapAdo na vilayamacalazcandramA apyupaiti |

bandhaH siddhAJjalInAM na hi kumudavanasyApi yatrojjihAne

tatprAtaH prekSaNIyaM dizatu dinapaterdhAma kAmAdhikaM vaH || 20 ||

yatkAntiM paGkajAnAM na harati kurute pratyutAdhikyaramyAM var pratyutAtIva ramyAM

no dhatte tArakAbhAM tirayati nitarAmAzu yannityameva | var nAdhatte

kartuM nAlaM nimeSaM divasamapi paraM yattadekaM trilokyA-

zcakSuH sAmAnyacakSurvisadRzamaghabhidbhAsvatastAnmaho vaH || 21 ||

kSmAM kSepIyaH kSapAmbhaHziziratarajalasparzatarSAdRteva

drAgAzA netumAzAdviradakarasaraHpuSkarANIva bodham |

prAtaH prollaGghya viSNoH padamapi ghRNayevAtivegAddavIya-

syuddAma dyotamAnA dahatu dinapaterdurnimittaM dyutirvaH || 22 ||

no kalpApAyavAyoradayarayadalatkSmAdharasyApi gamyA var zamyA

gADhodgIrNojjvalazrIrahani na rahitA no tamaHkajjalena |

prAptotpattiH pataGgAnna punarupagatA moSamuSNatviSo vo

vartiH saivAnyarUpA sukhayatu nikhiladvIpadIpasya dIptiH || 23 ||

niHzeSAzAvapUrapravaNaguruguNazlAghanIyasvarUpA

paryAptaM nodayAdau dinagamasamayopaplave'pyunnataiva |

atyantaM yAnabhijJA kSaNamapi tamasA sAkamekatra vastuM

bradhnasyeddhA rucirvo ruciriva rucitasyAptaye vastunostu || 24 || var cirurasya, rucirasya

vibhrANaH zaktimAzu prazamitabalavattArakaurjityagurvIM

kurvANo lIlayAdhaH zikhinamapi lasaccandrakAntAvabhAsam |

AdadhyAdandhakAre ratimatizayinImAvahanvIkSaNAnAM var AdeyAdIkSaNAnAM

bAlo lakSmImapArAmapara iva guho'harpaterAtapo vaH || 25 ||

jyotsnAMzAkarSapANDudyuti timiramaSIzeSakalmASamISa-

jjRmbhodbhUtena piGgaM sarasijarajasA sandhyayA zoNazociH |

prAtaHprArambhakAle sakalamapi jagaccitramunmIlayantI

kAntistIkSNatviSo'kSNAM mudamupanayatAttUlikevAtulAM vaH || 26 ||

AyAntI kiM sumeroH saraNiraruNitA pAdmarAgaiH parAgai-

rAhosvitsvasya mAhArajanaviracitA vaijayantI rathasya |

mAJjiSThI praSThavAhAvalividhutazirazcAmarAlI nu lokai- var cAmarAlIva

rAzaGkyAlokitaivaM savituraghanude stAtprabhAtaprabhA vaH || 27 ||

dhvAntadhvaMsaM vidhatte na tapati rucimannAtirUpaM vyanakti

nyaktvaM nItvApi naktaM na vitaratitarAM tAvadahnastviSaM yaH | var nyaktAmahni

sa prAtarmA viraMsIdasakalapaTimA pUrayanyuSmadAzA-

mAzAkAzAvakAzAvataraNataruNaprakramo'rkaprakAzaH || 28 ||

tIvraM nirvANaheturyadapi ca vipulaM yatprakarSeNa cANu

pratyakSaM yatparokSaM yadiha yadaparaM nazvaraM zAzvataM ca |

yatsarvasya prasiddhaM jagati katipaye yogino yadvidanti

jyotistaddviprakAraM savituravatu vo bAhyamAbhyantaraM ca || 29 ||

ratnAnAM maNDanAya prabhavati niyatoddezalabdhAvakAzaM

vahnerdArvAdi dagdhuM nijajaDimatayA kartumAnandamindoH |

yacca trailokyabhUSAvidhiraghadahanaM hlAdi vRSTyAzu tadvo var yattu

bAhulyotpAdyakAryAdhikataramavatAdekamevArkatejaH || 30 ||

mIlaccakSurvijihmazruti jaDarasanaM nighnitaghrANavRtti

svavyApArAkSamatvakparimuSitamanaH zvAsamAtrAvazeSam |

visrastAGgaM patitvA svapadapaharatAdazriyaM vo'rkajanmA var apriyaM

kAlavyAlAvalIDhaM jagadagada ivotthApayanprAkpratApaH || 31 ||

niHzeSaM naizamambhaH prasabhamapanudannazrulezAnukAri

stokastokApanItAruNaruciracirAdastadoSAnuSaGgaH |

dAtA dRSTiM prasannAM tribhuvananayanasyAzu yuSmadviruddhaM

vadhyAdbradhnasya siddhAJjanavidhiraparaH prAktano'rciHpracAraH || 32 ||

bhUtvA jambhasya bhettuH kakubhi paribhavArambhabhUH zubhrabhAno- var sthitvA

rbibhrANA babhrubhAvaM prasabhamabhinavAmbhojajRmbhApragalbhA |

bhUSA bhUyiSThazobhA tribhuvanabhavanasyAsya vaibhAkarI prAg-

vibhrAntA bhrAjamAnA vibhavatu vibhavodbhUtaye sA vibhA vaH || 33 || var nirbhAnti, vibhrAnti

saMsaktaM siktamUlAdabhinavabhuvanodyAnakautUhalinyA

yAminyA kanyayevAmRtakarakalazAvarjitenAmRtena |

arkAlokaH kriyAdvo mudamudayazirazcakravAlAlavAlA-

dudyanbAlapravAlapratimarucirahaHpAdapaprAkprarohaH || 34 ||

bhinnaM bhAsAruNasya kvacidabhinavayA vidrumANAM tviSeva

tvaGnnakSatraratnadyutinikarakarAlAntarAlaM kvacicca |

nAntarniHzeSakRSNazriyamudadhimiva dhvAntarAziM pibanstA-

daurvaH pUrvo'pyapUrvo'gniriva bhavadaghapluSTaye'rkAvabhAsaH || 35 ||

gandharvairgadyapadyavyatikaritavacohRdyamAtodyavAdyai-

rAdyairyo nAradAdyairmunibhirabhinuto vedavedyairvibhidya |

var vItavedyairvividya, vedavidbhirvibhidya

AsAdyApadyate yaM punarapi ca jagadyauvanaM sadya udya-

nnuddyoto dyotitadyaurdyatu divasakRto'sAvavadyAni vo'dya || 36 ||

AvAnaizcandrakAntaizcyutatimiratayA tAnavAttArakANA- var AvAntaiH

meNAGkAlokalopAdupahatamahasAmoSadhInAM layena |

ArAdutprekSyamANA kSaNamudayataTAntarhitasyAhimAMzo-

rAbhA prAbhAtikI vo'vatu na tu nitarAM tAvadAvirbhavantI || 37 ||

sAnau sA naudaye nAruNitadalapunaryauvanAnAM vanAnA- var lasadyauvanAnAM

mAlImAlIDhapUrvA parihRtakuharopAntanimnA tanimnA |

bhA vo'bhAvopazAntiM dizatu dinapaterbhAsamAnA samAnA-

rAjI rAjIvareNoH samasamayamudetIva yasyA vayasyA || 38 ||

ujjRmbhAmbhoruhANAM prabhavati payasAM yA zriye noSNatAyai

puSNAtyAlokamAtraM na tu dizati dRzAM dRzyamAnA vidhAtam |

pUrvAdrereva pUrvaM divamanu ca punaH pAvanI diGmukhAnA- var tataH

menAMsyainI vibhAsau nudatu nutipadaikAspadaM prAktanI vaH || 39 ||

vAcAM vAcaspaterapyacalabhiducitAcAryakANAM prapaJcai-

rvairaJcAnAM tathoccAritacaturRcAM cAnanAnAM caturNAm | var rucira

ucyetArcAsu vAcyacyutizucicaritaM yasya noccairvivicya var arcAsvavAcya

prAcyaM varcazcakAsacciramupacinutAttasya caNDArciSo vaH || 40 || var zriyaM

mUrdhnyadrerdhAturAgastaruSu kisalayo vidrumaughaH samudre

var – kisalayAdvidrumaughAtsamudre

diGmAtaGgottamAGgeSvabhinavanihitaH sAndrasindUrareNuH |

var vihitaH, nihitAtsandrasindUrareNoH

sImni vyomnazca hemnaH surazikharibhuvo jAyate yaH prakAzaH

zoNimnAsau kharAMzoruSasi dizatu vaH zarma zobhaikadezaH || 41 ||

astAdrIzottamAGge zritazazini tamaHkAlakUTe nipIte

yAti vyaktiM purastAdaruNakisalaye pratyuSaHpArijAte |

udyantyAraktapItAmbaravizadatarodvIkSitA tIkSNabhAno-

var ruciratarodvIkSitA var tIvrabhAsaH

rlakSmIrlakSmIrivAstu sphuTakamalapuTApAzrayA zreyase vaH || 42 || var puTopAzraya

nodanvAJjanmabhUmirna tadudarabhuvo bAndhavAH kaustubhAdyA

yasyAH padmaM na pANau na ca narakaripUraHsthalI vAsavezma |

tejorUpAparaiva triSu bhuvanataleSvAdadhAnA vyavasthAM var tribhuvanabhavane

sA zrIH zreyAMsi dizyAdaziziramahaso maNDalAgrodgatA vaH || 43 ||

|| iti dyutivarNanam || var tejovarNanam

|| atha azvavarNanam ||

rakSantvakSuNNahemopalapaTalamalaM lAghavAdutpatantaH

pAtaGgAH paGgvavajJAjitapavanajavA vAjinaste jaganti |

yeSAM vItAnyacihnonnayamapi vahatAM mArgamAkhyAti merA-

vudyannuddAmadIptirdyumaNimaNizilAvedikAjAtavedAH || 44 ||

pluSTAH pRSTheM'zupAtairatinikaTatayA dattadAhAtirekai-

rekAhAkrAntakRtsnatridivapathapRthuzvAsazoSAH zrameNa |

tIvrodanyAstvarantAmahitavihataye saptayaH saptasapte-

rabhyAzAkAzagaGgAjalasaralagalAvAGnatAgrAnanA vaH || 45 || var galavarjitAgrAnanAH

matvAnyAnpArzvato'zvAn sphaTikataTadRSaddRSTadehA dravantI

vyaste'hanyastasandhyeyamiti mRdupadA padmarAgopaleSu |

sAdRzyAdRzyamUrtirmarakatakaTake kliSTasUtA sumero-

rmUrdhanyAvRttilabdhadhruvagatiravatu bradhnavAhAvalirvaH || 46 || var druta

helAlolaM vahantI viSadharadamanasyAgrajenAvakRSTA

svarvAhinyAH sudUraM janitajavajayA syandanasya syadena |

nirvyAjaM tAyamAne haritimani nije sphItaphenAhitazrI- var sphItaphenAsmitazrIH

razreyAMsyazvapaGktiH zamayatu yamunevAparA tApanI vaH || 47 ||

mArgopAnte sumerornuvati kRtanatau nAkadhAmnAM nikAye

vIkSya vrIDAnatAnAM pratikuharamukhaM kinnarINAM mukhAni |

sUte'sUyatyapISajjaDagati vahatAM kandharArdhairvaladbhi- var kandharAgraiH

rvAhAnAM vyasyatAdvaH samamasamaharerheSitaM kalmaSANi || 48 ||

dhunvanto nIradAlIrnijaruciharitAH pArzvayoH pakSatulyA-

stAlUttAnaiH khalInaiH khacitamukharucazcyotatA lohitena |

uDDIyeva vrajanto viyati gativazAdarkavAhAH kriyAsuH

kSemaM hemAdrihRdyadrumazikharaziraHzreNizAkhAzukA vaH || 49 ||

|| ityazvavarNanam ||

|| atha aruNavarNanam ||

prAtaH zailAgraraGge rajanijavanikApAyasaMlakSyalakSmI-

rvikSiptApUrvapuSpAJjalimuDunikaraM sUtradhArAyamANaH |

yAmeSvaGkeSvivAhnaH kRtaruciSu caturSveva jAtapratiSThA- var yAtaH pratiSThAM

mavyAtprastAvayanvo jagadaTanamahAnATikAM sUryasUtaH || 50 ||

AkrAntyA vAhyamAnaM pazumiva hariNA vAhako'gryo harINAM

bhrAmyantaM pakSapAtAjjagati samaruciH sarvakarmaikasAkSI |

zatruM netrazrutInAmavajayati vayojyeSThabhAve same'pi

sthAmnAM dhAmnAM nidhiryaH sa bhavadaghanude nUtanaH stAdanUruH || 51 ||

dattArghairdUranamrairviyati vinayato vIkSitaH siddhasArthaiH var siddhasAdhyaiH

sAnAthyaM sArathirvaH sa dazazataruceH sAtirekaM karotu |

ApIya prAtareva pratatahimapayaHsyandinIrindubhAso

yaH kASThAdIpano'gre jaDita iva bhRzaM sevate pRSThato'rkam || 52 ||

muJcanrazmIndinAdau dinagamasamaye saMharaMzca svatantra-

stotraprakhyAtavIryo'virataharipadAkrAntibaddhAbhiyogaH | var vitata

kAlotkarSAllaghutvaM prasabhamadhipatau yojayanyo dvijAnAM

sevAprItena pUSNAtmasama iva kRtastrAyatAM so'ruNo vaH || 53 || var svasama

zAtaH zyAmAlatAyAH parazuriva tamo'raNyavahnerivArciH var dAhe davAbhaH

prAcyevAgre grahItuM grahakumudavanaM prAgudasto'grahastaH |

var prAcIvAgre, grahakumudaruciM

aikyaM bhindandyubhUmyoravadhiriva vidhAteva vizvaprabodhe

vAhAnAM vo vinetA vyapanayatu vipannAma dhAmAdhipasya || 54 ||

paurastyastoyadartoH pavana iva patatpAvakasyeva dhUmo var patan

vizvasyevAdisargaH praNava iva paraM pAvano vedarAzeH

sandhyAnRtyotsavecchoriva madanaripornandinAndIninAdaH

saurasyAgre sukhaM vo vitaratu vinatAnandanaH syandanasya || 55 || var syandano vaH

paryAptaM taptacAmIkarakaTakataTe zliSTazItetarAMzA-

vAsIdatsyandanAzvAnukRtimarakate padmarAgAyamANaH | var azvAnukRtamarakate

yaH sotkarSAM vibhUSAM kuruta iva kulakSmAbhRdIzasya mero-

renAMsyahnAya dUraM gamayatu sa guruH kAdraveyadviSo vaH || 56 ||

nItvAzvAnsapta kakSA iva niyamavazaM vetrakalpapratoda- var kakSyA

stUrNaM dhvAntasya rAzAvitarajana ivotsArite dUrabhAji |

pUrvaM praSTho rathasya kSitibhRdadhipatIndarzayaMstrAyatAM va-

strailokyAsthAnadAnodyatadivasapateH prAkpratIhArapAlaH || 57 ||

vajriJjAtaM vikAsIkSaNakamalavanaM bhAsi nAbhAsi vahne! var no bhAsi

tAtaM natvAzvapArzvAnnaya yama! mahiSaM rAkSasA vIkSitAH stha |

saptInsiJca pracetaH! pavana! bhaja javaM vittapAveditastvaM

vande zarveti jalpanpratidizamadhipAnpAtu pUSNo'graNIrvaH || 58 ||

pAzAnAzAntapAlAdaruNa varuNato mA grahIH pragrahArthaM

tRSNAM kRSNasya cakre jahihi nahi ratho yAti me naikacakraH |

yoktuM yugyaM kimuccaiHzravasamabhilaSasyaSTamaM vRtrazatro- var tvASTrazatroH

styaktAnyApekSavizvopakRtiriva raviH zAsti yaM so'vatAdvaH || 59 ||

no mUrcchAcchinnavAJchaH zramavivazavapurnaiva nApyAsyazoSI

pAnthaH pathyetarANi kSapayatu bhavatAM bhAsvato'gresaraH saH |

yaH saMzritya trilokImaTati paTutaraistApyamAno mayUkhai-

rArAdArAmalekhAmiva haritamaNizyAmalAmazvapaGktim || 60 || var haritatRNa

sIdanto'ntarnimajjajjaDakhuramusalAH saikate nAkanadyAH

skandantaH kandarAlIH kanakazikhariNo mekhalAsu skhalantaH |

dUraM dUrvAsthalotkA marakatadRSadi sthAsnavo yanna yAtAH

pUSNo'zvAH pUrayaMstaistadavatu javanairhuGkRtenAgrago vaH || 61 || var prerayan huGkRtairagraNIH

|| ityaruNavarNanam || var sUtavarNanam

|| atha rathavarNanam ||

pInoraHpreritAbhraizcaramakhurapuTAgrasthitaiH prAtaradrA-

vAdIrghAGgairudasto haribhirapagatAsaGganiHzabdacakraH |

uttAnAnUrumUrdhAvanatihaThabhavadvipratIpapraNAmaH

prAhNe zreyo vidhattAM savituravataranvyomavIthIM ratho vaH || 62 || var preyo

dhvAntaughadhvaMsadIkSAvidhipaTu vahatA prAksahasraM karANA- var vidhiguru drAksahasraM

maryamNA yo garimNaH padamatulamupAnIyatAdhyAsanena |

sa zrAntAnAM nitAntaM bharamiva marutAmakSamANAM visoDhuM

skandhAtskandhaM vrajanvo vRjinavijitaye bhAsvataH syandano'stu || 63 ||

yoktrIbhUtAnyugasya grasitumiva puro dandazUkAndadhAno

dvedhAvyastAmbuvAhAvalivihitabRhatpakSavikSepazobhaH |

sAvitraH syandano'sau niratizayarayaprINitAnUrurenaH-

kSepIyo vo garutmAniva haratu harIcchAvidheyapracAraH || 64 ||

ekAhenaiva dIrghAM tribhuvanapadavIM laGghayan yo laghiSThaH var kRstnAM

pRSThe merorgarIyAn dalitamaNidRSattviMSi piMSaJzirAMsi |

sarvasyaivopariSTAdatha ca punaradhastAdivAstAdrimUrndhi

bradhnasyAvyAtsa evaM duradhigamaparispandanaH syandano vaH || 65 ||

dhUrdhvastAgryagrahANi dhvajapaTapavanAndolitendUni dUraM var dUrAt

rAhau grAsAbhilASAdanusarati punardattacakravyathAni |

zrAntAzvazvAsahelAdhutavibudhadhunInirjharAmbhAMsi bhadraM

deyAsurvo davIyo divi divasapateH syandanaprasthitAni || 66 ||

akSe rakSAM nibadhya pratisaravalayairyojayantyo yugAgraM

dhUHstambhe dagdhadhUpAH prahitasumanaso gocare kUbarasya |

carcAzcakre carantyo malayajapayasA siddhavadhvastrisandhyaM var carcAM

vandante yaM dyumArge sa nudatu duritAnyaMzumatsyandano vaH || 67 ||

utkIrNasvarNareNudrutakhuradalitA pArzvayoH zazvadazvai- var reNurdruta

razrAntabhrAntacakrakramanikhilamilanneminimnA bhareNa |

merormUrdhanyaghaM vo vighaTayatu raverekavIthI rathasya

svoSmodaktAmburiktaprakaTitapulinoddhUsarA svardhunIva || 68 || var svoSmodastAmbu

nantuM nAkAlayAnAmanizamanuyatAM paddhatiH paGktireva var upayatAM

kSodo nakSatrarAzeradayarayamilaccakrapiSTasya dhUliH |

heSahlAdo harINAM surazikharidarIH pUrayanneminAdo var nAdo

yasyAvyAttIvrabhAnoH sa divi bhuvi yathA vyaktacihno ratho vaH || 69 ||

niHspandAnAM vimAnAvalivitatadivAM devavRndArakANAM var valitadizA

vRndairAnandasAndrodyamamapi vahatAM vindatAM vandituM no |

mandAkinyAmamandaH pulinabhRti mRdurmandare mandirAbhe var mandarAbhe

mandArairmaNDitAraM dadhadari dinakRtsyandanaH stAnmude vaH || 70 ||

cakrI cakrArapaGktiM harirapi ca harIn dhUrjaTirdhUrdhvajAntA-

nakSaM nakSatranAtho'ruNamapi varuNaH kUbarAgraM kuberaH |

raMhaH saGghaH surANAM jagadupakRtaye nityayuktasya yasya

stauti prItiprasanno'nvahamahimaruceH so'vatAtsyandano vaH || 71 || var ruca

netrAhInena mUle vihitaparikaraH siddhasAdhyairmarudbhiH

pAdopAnte stuto'laM baliharirabhasAkarSaNAbaddhavegaH |

bhrAmyanvyomAmburAzAvazizirakiraNasyandanaH santataM vo

dizyAllakSmImapArAmatulitamahimevAparo mandarAdriH || 72 || var atulyAM

|| iti rathavarNanam ||

|| atha maNDalavarNanam ||

yajjyAyo bIjamahnAmapahatatimiraM cakSuSAmaJjanaM ya- var jyAyo yadbIjamahnAmapahRta

ddvAraM yanmuktibhAjAM yadakhilabhuvanajyotiSAmekamokaH |

yadvRSTyambhonidhAnaM dharaNirasasudhApAnapAtraM mahadya-

ddizyAdIzasya bhAsAM tadadhIkalamalaM maGgalaM maNDalaM vaH || 73 || var devasya

bhAnoH tadadhikamamalaM maNDalaM maGgalaM

velAvardhiSNu sindhoH paya iva khamivArdhodgatAgyragrahoDu

stokodbhinnasvacihnaprasavamiva madhorAsyamasyanmanAMsi | var mahAMsi

prAtaH pUSNo'zubhAni prazamayatu ziraHzekharIbhUtamadreH

paurastyasyodgabhastistimitatamatamaHkhaNDanaM maNDalaM vaH || 74 ||

pratyuptastaptahemojjvalaruciracalaH padmarAgeNa yena

jyAyaH kiJjalkapuJjo yadalikulaziterambarendIvarasya |

kAlavyAlasya cihnaM mahitatamamahomUrndhi ratnaM mahadya-

ddIptAMzoH prAtaravyAttadavikalajaganmaNDanaM maNDalaM vaH || 75 ||

kastrAtA tArakANAM patati tanuravazyAyabinduryathendu-

rvidrANA dRksmarArerurasi muraripoH kaustubho nodgabhastiH |

vahneH sApahnaveva dyutirudayagate yatra tanmaNDalaM vo

mArtaNDIyaM punItAddivi bhuvi ca tamAMsIva mRSNanmahAMsi || 76 ||

yatprAcyAM prAkcakAsti prabhavati ca yataH prAcyasAvujjihAnA-

diddhaM madhye yadahno bhavati tatarucA yena cotpAdyate'haH |

yatparyAyeNa lokAnavati ca jagatAM jIvitaM yacca tadvo

vizvAnugrAhi vizvaM sRjadapi ca ravermaNDalaM muktaye'stu || 77 ||

zuSyantyUDhAnukArA makaravasatayo mAravINAM sthalInAM

yenottaptAH sphuTantastaDiti tilatulAM yAntyagendrA yugAnte | var caTiti

taccaNDAMzorakANDatribhuvanadahanAzaGkayA dhAma kRcchAt var kRtsnaM

saMhRtyAlokamAtraM pralaghu vidadhataH stAnmude maNDalaM vaH || 78 || var AhRtyAlokamAtraM pratanu

udyaddyUdyAnavApyAM bahulatamatamaHpaGkapUraM vidArya var bahala

prodbhinnaM patrapArzveSvaviralamaruNacchAyayA visphurantyA |

kalyANAni kriyAdvaH kamalamiva mahanmaNDalaM caNDabhAno- var caNDarazmeH

ranvItaM tRptihetorasakRdalikulAkAriNA rAhuNA yat || 79 ||

cakSurdakSadviSo yanna tu dahati puraH pUrayatyeva kAmaM var na dahati nitarAM punaH

nAstaM juSTaM marudbhiryadiha niyaminAM yAnapAtraM bhavAbdhau |

yadvItazrAnti zazvadbhramadapi jagatAM bhrAntimabhrAnti hanti

bradhnasyAkhyAdviruddhakriyamatha ca hitAdhAyi tanmaNDalaM vaH || 80 ||

|| iti maNDalavarNanam ||

|| atha sUryavarNanam |

siddhaiH siddhAntamizraM zritavidhi vibudhaizcAraNaizcATugarbhaM

gItyA gandharvamukhyairmuhurahipatibhiryAtudhAnairyatAtma |

sArdhaM sAdhyairmunIndrairmuditamatamano mokSibhiH pakSapAtA- var mokSubhiH

tprAtaH prArabhyamANastutiravatu ravirvizvavandyodayo vaH || 81 ||

bhAsAmAsannabhAvAdadhikatarapaTozcakravAlasya tApA-

cchedAdacchinnagacchatturagakhurapuTanyAsaniHzaGkaTaGkaiH | var nyasta

niHsaGgasyandanAGgabhramaNanikaSaNAtpAtu vastriprakAraM var triprakAraiH

taptAMzustatparIkSApara iva paritaH paryaTanhATakAdrim || 82 ||

no zuSkaM nAkanadyA vikasitakanakAmbhojayA bhrAjitaM tu var kanakAmbhoruhA

pluSTA naivopabhogyA bhavati bhRzataraM nandanodyAnalakSmIH |

no zRGgANi drutAni drutamamaragireH kAladhautAni dhautA-

nIddhaM dhAma dyumArge mradayati dayayA yatra so'rko'vatAdvaH || 83 ||

dhvAntasyaivAntaheturna bhavati malinaikAtmanaH pApmano'pi

prAkpAdopAntabhAjAM janayati na paraM paGkajAnAM prabodham |

kartA niHzreyasAnAmapi na tu khalu yaH kevalaM vAsarANAM

so'vyAdekodyamecchAvihitabahubRhadvizvakAryo'ryamA vaH || 84 ||

loTa~lloSTAviceSTaH zritazayanatalo niHsahIbhUtadehaH

sandehI prANitavye sapadi daza dizaH prekSamANo'ndhakArAH |

niHzvAsAyAsaniSThaH paramaparavazo jAyate jIvalokaH var cirataravazo

zokenevAnyalokAnudayakRti gate yatra so'rko'vatAdvaH || 85 || var lokAbhyudaya

krAmallolo'pi lokAstadupakRtikRtAvAzritaH sthairyakoTiM

nRRNAM dRSTiM vijihmAM vidadhadapi karotyantaratyantabhadrAm |

yastApasyApi heturbhavati niyaminAmekanirvANadAyI

bhUyAtsa prAgavasthAdhikatarapariNAmodayo'rkaH zriye vaH || 86 ||

vyApannarturna kAlo vyabhicarati phalaM nauSadhIrvRSTiriSTA

naiSTaistRpyanti devA na hi vahati marunnirmalAbhAni bhAni |

AzAH zAntA na bhindantyavadhimudadhayo bibhrati kSmAbhRtaH kSmAM

yasmiMstrailokyamevaM na calati tapati stAtsa sUryaH zriye vaH || 87 ||

kailAse kRttivAsA viharati virahatrAsadehoDhakAntaH

zrAntaH zete mahAhAvadhijaladhi vinA chadmanA padmanAbhaH |

yogodyogaikatAno gamayati sakalaM vAsaraM svaM svayambhU-

rbhUritrailokyAcintAbhRti bhuvanavibhau yatra bhAsvAnsa vo'vyAt || 88 ||

etadyanmaNDalaM khe tapati dinakRtastA Rco'rcIMSi yAni

dyotante tAni sAmAnyayamapi puruSo maNDale'NuryajUMSi |

evaM yaM veda vedatritayamayamayaM vedavedI samagro

vargaH svargApavargaprakRtiravikRtiH so'stu sUryaH zriye vaH || 89 ||

nAkaukaHpratyanIkakSatipaTumahasAM vAsavAgresarANAM

sarveSAM sAdhu pAtAM jagadidamaditerAtmajatve same'pi |

yenAdityAbhidhAnaM niratizayaguNairAtmani nyastamastu var guNenAtmani

stutyastrailokyavandyaistridazamunigaNaiH soM'zumAn zreyase vaH || 90 ||

bhUmiM dhAmno'bhivRSTyA jagati jalamayIM pAvanIM saMsmRtAva- var dhAmno'tha

pyAgneyIM dAhazaktyA muhurapi yajamAnAM yathAprArthitArthaiH | var yajamAnAtmikAM

lInAmAkAza evAmRtakaraghaTitAM dhvAntapakSasya parva-

NvevaM sUryo'STabhedAM bhava iva bhavataH pAtu bibhratsvamUrtim || 91 ||

prAkkAlonnidrapadmAkaraparimalanAvirbhavatpAdazobho

bhaktyA tyaktorukhedodgati divi vinatAsUnunA nIyamAnaH |

saptAzvAptAparAntAnyadhikamadharayanyo jaganti stuto'laM

devairdevaH sa pAyAdapara iva murArAtirahnAM patirvaH || 92 ||

yaH sraSTA'pAM purastAdacalavarasamabhyunnaterhetureko

lokAnAM yastrayANAM sthita upari paraM durvilaGghyena dhAmnA | var ca trayANAM

sadyaH siddhyai prasannadyutizubhacaturAzAmukhaH stAdvibhakto var zuci

dvedhA vedhA ivAviSkRtakamalaruciH so'rciSAmAkaro vaH || 93 ||

sAdridyUrvInadIzA dizati daza dizo darzayanprAgdRzo yaH var drAk dRzo

sAdRzyaM dRzyate no sadazazatadRzi traidaze yasya deze |

dIptAMzurvaH sa dizyAdazivayugadazAdarzitadvAdazAtmA

zaM zAstyazvAMzca yasyAzayavidatizayAddandazUkAzanAdyaH || 94 ||

tIrthAni vyarthakAni hRdanadasarasInirjharAmbhojinInAM

nodanvanto nudanti pratibhayamazubhazvabhrapAtAnubandhi |

Apo nAkApagAyA api kaluSamuSo majjatAM naiva yatra var svargApagAyAH

trAtuM yAte'nyalokAn sa dizatu divasasyaikaheturhitaM vaH || 95 || var lokaM

etatpAtAlapaGkaplutamiva tamasaivaikamudgADhamAsI-

daprajJAtApratarkyaM niravagati tathAlakSaNaM suptamantaH |

yAdRksRSTeH purastAnnizi nizi sakalaM jAyate tAdRgeva

trailokyaM yadviyogAdavatu ravirasau sargatulyodayo vaH || 96 ||

dvIpe yo'stAcalo'sminbhavati khalu sa evAparatrodayAdri-

ryA yAminyujjvalendudyutiriha divaso'nyatra tIvrAtapaH sA |

yadvazyau dezakAlAviti niyamayato no tu yaM dezakAlA- var nu

vavyAtsa svaprabhutvAhitabhuvanahito heturahnAmino vaH || 97 ||

vyagrairagryagrahendugrasanaguru bharairno samagrairudagraiH var gurutaraiH

pratyagrairISadugrairudayagirigato gogaNairgaurayan gAm |

udgADhArcirvilInAmaranagaranagagrAvagarbhAmivAhnA-

magre zreyo vidhatte glapayatu gahanaM sa grahagrAmaNIrvaH || 98 ||

yoniH sAmnAM vidhAtA madhuripurajito dhUrjaTiH zaGkaro'sau

mRtyuH kAlo'lakAyAH patirapi dhanadaH pAvako jAtavedAH |

itthaM saJjJA DavitthAdivadamRtabhujAM yA yadRcchApravRttA-

stAsAmeko'bhidheyastadanuguNaguNairyaH sa sUryo'vatAdvaH || 99 || var gaNaiH

devaH kiM bAndhavaH syAtpriyasuhRdathavA''cArya Ahosvidaryo var AryaH

rakSA cakSurnu dIpo gururuta janako jIvitaM bIjamojaH |

evaM nirNIyate yaH ka iva na jagatAM sarvathA sarvadA'sau var sarvadAH

sarvAkAropakArI dizatu dazazatAbhISurabhyarthitaM vaH || 100 ||

zlokA lokasya bhUtyai zatamiti racitAH zrImayUreNa bhaktyA

yuktazcaitAnpaThedyaH sakRdapi puruSaH sarvapApairvimuktaH |

ArogyaM satkavitvaM matimatulabalaM kAntimAyuHprakarSaM

vidyAmaizvaryamarthaM sutamapi labhate so'tra sUryaprasAdAt || 101 ||

iti zrImayUrakavipraNItaM sUryazatakaM samAptam |