Sri Suktam
శ్రీ సూక్తమ్
Sri Suktam
శ్రీ సూక్తమ్
శ్లోక 1
ఓమ్ ॥ హిర॑ణ్యవర్ణాం॒ హరి॑ణీం సు॒వర్ణ॑రజ॒తస్ర॑జామ్ ।
చ॒న్ద్రాం హి॒రణ్మ॑యీం-లఁ॒క్ష్మీ-ఞ్జాత॑వేదో మ॒మావ॑హ ॥
తా-మ్మ॒ ఆవ॑హ॒ జాత॑వేదో ల॒క్ష్మీమన॑పగా॒మినీ᳚మ్ ।
యస్యాం॒ హిర॑ణ్యం-విఁ॒న్దేయ॒-ఙ్గామశ్వ॒-మ్పురు॑షాన॒హమ్ ॥
అ॒శ్వ॒పూ॒ర్వాం ర॑థమ॒ధ్యాం హ॒స్తినా॑ద-ప్ర॒బోధి॑నీమ్ ।
శ్రియ॑-న్దే॒వీముప॑హ్వయే॒ శ్రీర్మా॑ దే॒వీర్జు॑షతామ్ ॥
కాం॒సో᳚స్మి॒ తాం హిర॑ణ్యప్రా॒కారా॑మా॒ర్ద్రా-ఞ్జ్వల॑న్తీ-న్తృ॒ప్తా-న్త॒ర్పయ॑న్తీమ్ ।
ప॒ద్మే॒ స్థి॒తా-మ్ప॒ద్మవ॑ర్ణా॒-న్తామి॒హోప॑హ్వయే॒ శ్రియమ్ ॥
చ॒న్ద్రా-మ్ప్ర॑భా॒సాం-యఁ॒శసా॒ జ్వల॑న్తీం॒ శ్రియం॑-లోఁ॒కే దే॒వజు॑ష్టాముదా॒రామ్ ।
తా-మ్ప॒ద్మినీ॑మీం॒ శర॑ణమ॒హ-మ్ప్రప॑ద్యే-ఽల॒క్ష్మీర్మే॑ నశ్యతా॒-న్త్వాం-వృఁ॑ణే ॥
ఆ॒ది॒త్యవ॑ర్ణే॒ తప॒సో-ఽధి॑జా॒తో వన॒స్పతి॒స్తవ॑ వృ॒క్షో-ఽథ॑ బి॒ల్వః ।
తస్య॒ ఫలా॑ని॒ తప॒సాను॑దన్తు మా॒యాన్త॑రా॒యాశ్చ॑ బా॒హ్యా అ॑ల॒క్ష్మీః ॥
ఉపై॑తు॒ మా-న్దే॑వస॒ఖః కీ॒ర్తిశ్చ॒ మణి॑నా స॒హ ।
ప్రా॒దు॒ర్భూ॒తో-ఽస్మి॑ రాష్ట్రే॒-ఽస్మిన్ కీ॒ర్తి॒మృ॑ద్ధి-న్ద॒దాతు॑ మే ॥
క్షు॒త్పి॒పా॒సామ॑లా-ఞ్జ్యే॒ష్ఠామ॒ల॒క్షీ-ర్నా॑శయా॒మ్యహమ్ ।
అభూ॑తి॒మస॑మృద్ధి॒-ఞ్చ స॒ర్వా॒-న్నిర్ణు॑ద మే॒ గృహాత్ ॥
గ॒న్ధ॒ద్వా॒రా-న్దు॑రాధ॒ర్షా॒-న్ని॒త్యపు॑ష్టా-ఙ్కరీ॒షిణీ᳚మ్ ।
ఈ॒శ్వరీగ్ం॑ సర్వ॑భూతా॒నా॒-న్తామి॒హోప॑హ్వయే॒ శ్రియమ్ ॥
మన॑సః॒ కామ॒మాకూ॑తిం-వాఁ॒చ-స్స॒త్యమ॑శీమహి ।
ప॒శూ॒నాగ్ం రూ॒పమన్య॑స్య॒ మయి॒ శ్రీ-శ్శ్ర॑యతాం॒-యఁశః॑ ॥
క॒ర్దమే॑న ప్ర॑జాభూ॒తా॒ మ॒యి॒ సమ్భ॑వ క॒ర్దమ ।
శ్రియం॑-వాఁ॒సయ॑ మే కు॒లే॒ మా॒తర॑-మ్పద్మ॒మాలి॑నీమ్ ॥
ఆపః॑ సృ॒జన్తు॑ స్ని॒గ్ధా॒ని॒ చి॒క్లీ॒త వ॑స మే॒ గృహే ।
ని చ॑ దే॒వీ-మ్మా॒తరం॒ శ్రియం॑-వాఁ॒సయ॑ మే కు॒లే ॥
ఆ॒ర్ద్రా-మ్పు॒ష్కరి॑ణీ-మ్పు॒ష్టిం॒ పి॒ఙ్గ॒లా-మ్ప॑ద్మమా॒లినీమ్ ।
చ॒న్ద్రాం హి॒రణ్మ॑యీం-లఁ॒క్ష్మీ-ఞ్జాత॑వేదో మ॒మావ॑హ ॥
ఆ॒ర్ద్రాం-యఁః॒ కరి॑ణీం-యఁ॒ష్టిం॒ సు॒వ॒ర్ణాం హే॑మమా॒లినీమ్ ।
సూ॒ర్యాం హి॒రణ్మ॑యీం-లఁ॒క్ష్మీ॒-ఞ్జాత॑వేదో మ॒మావ॑హ ॥
తా-మ్మ॒ ఆవ॑హ॒ జాత॑వేదో ల॒క్షీమన॑పగా॒మినీ᳚మ్ ।
యస్యాం॒ హిర॑ణ్య॒-మ్ప్రభూ॑త॒-ఙ్గావో॑ దా॒స్యో-ఽశ్వా᳚న్, వి॒న్దేయ॒-మ్పురు॑షాన॒హమ్ ॥
యశ్శుచిః॑ ప్రయతో భూ॒త్వా॒ జు॒హుయా॑-దాజ్య॒-మన్వ॑హమ్ ।
శ్రియః॑ ప॒ఞ్చద॑శర్చ-ఞ్చ శ్రీ॒కామ॑స్సత॒త॒-ఞ్జ॑పేత్ ॥
ఆనన్దః కర్ద॑మశ్చై॒వ చిక్లీ॒త ఇ॑తి వి॒శ్రుతాః ।
ఋష॑య॒స్తే త్ర॑యః పుత్రా-స్స్వ॒యం॒ శ్రీరే॑వ దే॒వతా ॥
పద్మాననే ప॑ద్మ ఊ॒రూ॒ ప॒ద్మాక్షీ ప॑ద్మస॒మ్భవే ।
త్వ-మ్మా᳚-మ్భ॒జస్వ॑ పద్మా॒క్షీ యే॒న సౌఖ్యం॑-లఁభా॒మ్యహమ్ ॥
అ॒శ్వదా॑యీ చ గోదా॒యీ॒ ధ॒నదా॑యీ మ॒హాధ॑నే ।
ధన॑-మ్మే॒ జుష॑తా-న్దే॒వీ స॒ర్వకా॑మార్థ॒ సిద్ధ॑యే ॥
పుత్రపౌత్ర ధన-న్ధాన్యం హస్త్యశ్వాజావిగో రథమ్ ।
ప్రజానా-మ్భవసి మాతా ఆయుష్మన్త-ఙ్కరోతు మామ్ ॥
చన్ద్రాభాం-లఁక్ష్మీమీశానాం సూర్యాభాం᳚ శ్రియమీశ్వరీమ్ ।
చన్ద్ర సూర్యాగ్ని సర్వాభాం శ్రీ మహాలక్ష్మీ-ముపాస్మహే ॥
ధన-మగ్ని-ర్ధనం-వాఁయు-ర్ధనం సూర్యో॑ ధనం-వఁసుః ।
ధనమిన్ద్రో బృహస్పతి-ర్వరు॑ణ-న్ధనమ॑శ్నుతే ॥
వైనతేయ సోమ-మ్పిబ సోమ॑-మ్పిబతు వృత్రహా ।
సోమ॒-న్ధనస్య సోమినో॒ మహ్య॑-న్దదాతు సోమినీ॑ ॥
న క్రోధో న చ మాత్స॒ర్య-న్న లోభో॑ నాశుభా మతిః ।
భవన్తి కృత పుణ్యానా-మ్భ॒క్తానాం శ్రీ సూ᳚క్త-ఞ్జపేత్సదా ॥
వర్ష᳚న్తు॒ తే వి॑భావ॒రి॒ ది॒వో అభ్రస్య విద్యు॑తః ।
రోహ᳚న్తు సర్వ॑బీజాన్యవ బ్రహ్మ ద్వి॒షో᳚ జ॑హి ॥
పద్మప్రియే పద్మిని పద్మహస్తే పద్మాలయే పద్మ-దలాయతాక్షీ ।
విశ్వప్రియే విష్ణు మనోనుకూలే త్వత్పాదపద్మ-మ్మయి సన్నిధత్స్వ ॥
యా సా పద్మాసనస్థా విపులకటితటీ పద్మపత్రాయతాక్షీ ।
గమ్భీరా వర్తనాభి-స్స్తనభరనమితా శుభ్ర వస్తోత్తరీయా ॥
లక్ష్మీ-ర్దివ్యై-ర్గజేన్ద్రై-ర్మణిగణ ఖచితై-స్స్నాపితా హేమకుమ్భైః ।
నిత్యం సా పద్మహస్తా మమ వసతు గృహే సర్వ మాఙ్గల్యయుక్తా ॥
లక్ష్మీ-ఙ్క్షీర సముద్ర రాజతనయాం శ్రీరఙ్గ ధామేశ్వరీమ్ ।
దాసీభూత సమస్త దేవ వనితాం-లోఁకైక దీపాఙ్కురామ్ ।
శ్రీమన్మన్ద కటాక్ష లబ్ధ విభవ బ్రహ్మేన్ద్ర గఙ్గాధరామ్ ।
త్వా-న్త్రైలోక్య కుటుమ్బినీం సరసిజాం-వఁన్దే ముకున్దప్రియామ్ ॥
సిద్ధలక్ష్మీ-ర్మోక్షలక్ష్మీ-ర్జయలక్ష్మీ-స్సరస్వతీ ।
శ్రీలక్ష్మీ-ర్వరలక్ష్మీశ్చ ప్రసన్నా మమ సర్వదా ॥
వరాఙ్కుశౌ పాశమభీతి ముద్రామ్ ।
కరైర్వహన్తీ-ఙ్కమలాసనస్థామ్ ।
బాలార్కకోటి ప్రతిభా-న్త్రినేత్రామ్ ।
భజే-ఽహమమ్బా-ఞ్జగదీశ్వరీ-న్తామ్ ॥
సర్వమఙ్గల మాఙ్గల్యే శివే సర్వార్థ సాధికే ।
శరణ్యే త్య్రమ్బకే దేవీ నారాయణి నమోస్తుతే ॥
ఓ-మ్మ॒హా॒దే॒వ్యై చ॑ వి॒ద్మహే॑ విష్ణుప॒త్నీ చ॑ ధీమహి ।
తన్నో॑ లక్ష్మీః ప్రచో॒దయా᳚త్ ॥
శ్రీ-ర్వర్చ॑స్వ॒-మాయు॑ష్య॒-మారో᳚గ్య॒-మావీ॑ధా॒త్-శోభ॑మాన-మ్మహీ॒యతే᳚ ।
ధా॒న్య-న్ధ॒న-మ్ప॒శు-మ్బ॒హుపు॑త్రలా॒భం శ॒తసం᳚వఁత్స॒ర-న్దీ॒ర్ఘమాయుః॑ ॥
ఓం శాన్తి॒-శ్శాన్తి॒-శ్శాన్తిః॑ ॥