Sri Suktam
શ્રી સૂક્તમ્
Sri Suktam
શ્રી સૂક્તમ્
શ્લોક 1
ઓમ્ ॥ હિર॑ણ્યવર્ણાં॒ હરિ॑ણીં સુ॒વર્ણ॑રજ॒તસ્ર॑જામ્ ।
ચ॒ન્દ્રાં હિ॒રણ્મ॑યીં-લઁ॒ક્ષ્મી-ઞ્જાત॑વેદો મ॒માવ॑હ ॥
તા-મ્મ॒ આવ॑હ॒ જાત॑વેદો લ॒ક્ષ્મીમન॑પગા॒મિની᳚મ્ ।
યસ્યાં॒ હિર॑ણ્યં-વિઁ॒ન્દેય॒-ઙ્ગામશ્વ॒-મ્પુરુ॑ષાન॒હમ્ ॥
અ॒શ્વ॒પૂ॒ર્વાં ર॑થમ॒ધ્યાં હ॒સ્તિના॑દ-પ્ર॒બોધિ॑નીમ્ ।
શ્રિય॑-ન્દે॒વીમુપ॑હ્વયે॒ શ્રીર્મા॑ દે॒વીર્જુ॑ષતામ્ ॥
કાં॒સો᳚સ્મિ॒ તાં હિર॑ણ્યપ્રા॒કારા॑મા॒ર્દ્રા-ઞ્જ્વલ॑ન્તી-ન્તૃ॒પ્તા-ન્ત॒ર્પય॑ન્તીમ્ ।
પ॒દ્મે॒ સ્થિ॒તા-મ્પ॒દ્મવ॑ર્ણા॒-ન્તામિ॒હોપ॑હ્વયે॒ શ્રિયમ્ ॥
ચ॒ન્દ્રા-મ્પ્ર॑ભા॒સાં-યઁ॒શસા॒ જ્વલ॑ન્તીં॒ શ્રિયં॑-લોઁ॒કે દે॒વજુ॑ષ્ટામુદા॒રામ્ ।
તા-મ્પ॒દ્મિની॑મીં॒ શર॑ણમ॒હ-મ્પ્રપ॑દ્યે-ઽલ॒ક્ષ્મીર્મે॑ નશ્યતા॒-ન્ત્વાં-વૃઁ॑ણે ॥
આ॒દિ॒ત્યવ॑ર્ણે॒ તપ॒સો-ઽધિ॑જા॒તો વન॒સ્પતિ॒સ્તવ॑ વૃ॒ક્ષો-ઽથ॑ બિ॒લ્વઃ ।
તસ્ય॒ ફલા॑નિ॒ તપ॒સાનુ॑દન્તુ મા॒યાન્ત॑રા॒યાશ્ચ॑ બા॒હ્યા અ॑લ॒ક્ષ્મીઃ ॥
ઉપૈ॑તુ॒ મા-ન્દે॑વસ॒ખઃ કી॒ર્તિશ્ચ॒ મણિ॑ના સ॒હ ।
પ્રા॒દુ॒ર્ભૂ॒તો-ઽસ્મિ॑ રાષ્ટ્રે॒-ઽસ્મિન્ કી॒ર્તિ॒મૃ॑દ્ધિ-ન્દ॒દાતુ॑ મે ॥
ક્ષુ॒ત્પિ॒પા॒સામ॑લા-ઞ્જ્યે॒ષ્ઠામ॒લ॒ક્ષી-ર્ના॑શયા॒મ્યહમ્ ।
અભૂ॑તિ॒મસ॑મૃદ્ધિ॒-ઞ્ચ સ॒ર્વા॒-ન્નિર્ણુ॑દ મે॒ ગૃહાત્ ॥
ગ॒ન્ધ॒દ્વા॒રા-ન્દુ॑રાધ॒ર્ષા॒-ન્નિ॒ત્યપુ॑ષ્ટા-ઙ્કરી॒ષિણી᳚મ્ ।
ઈ॒શ્વરીગ્ં॑ સર્વ॑ભૂતા॒ના॒-ન્તામિ॒હોપ॑હ્વયે॒ શ્રિયમ્ ॥
મન॑સઃ॒ કામ॒માકૂ॑તિં-વાઁ॒ચ-સ્સ॒ત્યમ॑શીમહિ ।
પ॒શૂ॒નાગ્ં રૂ॒પમન્ય॑સ્ય॒ મયિ॒ શ્રી-શ્શ્ર॑યતાં॒-યઁશઃ॑ ॥
ક॒ર્દમે॑ન પ્ર॑જાભૂ॒તા॒ મ॒યિ॒ સમ્ભ॑વ ક॒ર્દમ ।
શ્રિયં॑-વાઁ॒સય॑ મે કુ॒લે॒ મા॒તર॑-મ્પદ્મ॒માલિ॑નીમ્ ॥
આપઃ॑ સૃ॒જન્તુ॑ સ્નિ॒ગ્ધા॒નિ॒ ચિ॒ક્લી॒ત વ॑સ મે॒ ગૃહે ।
નિ ચ॑ દે॒વી-મ્મા॒તરં॒ શ્રિયં॑-વાઁ॒સય॑ મે કુ॒લે ॥
આ॒ર્દ્રા-મ્પુ॒ષ્કરિ॑ણી-મ્પુ॒ષ્ટિં॒ પિ॒ઙ્ગ॒લા-મ્પ॑દ્મમા॒લિનીમ્ ।
ચ॒ન્દ્રાં હિ॒રણ્મ॑યીં-લઁ॒ક્ષ્મી-ઞ્જાત॑વેદો મ॒માવ॑હ ॥
આ॒ર્દ્રાં-યઁઃ॒ કરિ॑ણીં-યઁ॒ષ્ટિં॒ સુ॒વ॒ર્ણાં હે॑મમા॒લિનીમ્ ।
સૂ॒ર્યાં હિ॒રણ્મ॑યીં-લઁ॒ક્ષ્મી॒-ઞ્જાત॑વેદો મ॒માવ॑હ ॥
તા-મ્મ॒ આવ॑હ॒ જાત॑વેદો લ॒ક્ષીમન॑પગા॒મિની᳚મ્ ।
યસ્યાં॒ હિર॑ણ્ય॒-મ્પ્રભૂ॑ત॒-ઙ્ગાવો॑ દા॒સ્યો-ઽશ્વા᳚ન્, વિ॒ન્દેય॒-મ્પુરુ॑ષાન॒હમ્ ॥
યશ્શુચિઃ॑ પ્રયતો ભૂ॒ત્વા॒ જુ॒હુયા॑-દાજ્ય॒-મન્વ॑હમ્ ।
શ્રિયઃ॑ પ॒ઞ્ચદ॑શર્ચ-ઞ્ચ શ્રી॒કામ॑સ્સત॒ત॒-ઞ્જ॑પેત્ ॥
આનન્દઃ કર્દ॑મશ્ચૈ॒વ ચિક્લી॒ત ઇ॑તિ વિ॒શ્રુતાઃ ।
ઋષ॑ય॒સ્તે ત્ર॑યઃ પુત્રા-સ્સ્વ॒યં॒ શ્રીરે॑વ દે॒વતા ॥
પદ્માનને પ॑દ્મ ઊ॒રૂ॒ પ॒દ્માક્ષી પ॑દ્મસ॒મ્ભવે ।
ત્વ-મ્મા᳚-મ્ભ॒જસ્વ॑ પદ્મા॒ક્ષી યે॒ન સૌખ્યં॑-લઁભા॒મ્યહમ્ ॥
અ॒શ્વદા॑યી ચ ગોદા॒યી॒ ધ॒નદા॑યી મ॒હાધ॑ને ।
ધન॑-મ્મે॒ જુષ॑તા-ન્દે॒વી સ॒ર્વકા॑માર્થ॒ સિદ્ધ॑યે ॥
પુત્રપૌત્ર ધન-ન્ધાન્યં હસ્ત્યશ્વાજાવિગો રથમ્ ।
પ્રજાના-મ્ભવસિ માતા આયુષ્મન્ત-ઙ્કરોતુ મામ્ ॥
ચન્દ્રાભાં-લઁક્ષ્મીમીશાનાં સૂર્યાભાં᳚ શ્રિયમીશ્વરીમ્ ।
ચન્દ્ર સૂર્યાગ્નિ સર્વાભાં શ્રી મહાલક્ષ્મી-મુપાસ્મહે ॥
ધન-મગ્નિ-ર્ધનં-વાઁયુ-ર્ધનં સૂર્યો॑ ધનં-વઁસુઃ ।
ધનમિન્દ્રો બૃહસ્પતિ-ર્વરુ॑ણ-ન્ધનમ॑શ્નુતે ॥
વૈનતેય સોમ-મ્પિબ સોમ॑-મ્પિબતુ વૃત્રહા ।
સોમ॒-ન્ધનસ્ય સોમિનો॒ મહ્ય॑-ન્દદાતુ સોમિની॑ ॥
ન ક્રોધો ન ચ માત્સ॒ર્ય-ન્ન લોભો॑ નાશુભા મતિઃ ।
ભવન્તિ કૃત પુણ્યાના-મ્ભ॒ક્તાનાં શ્રી સૂ᳚ક્ત-ઞ્જપેત્સદા ॥
વર્ષ᳚ન્તુ॒ તે વિ॑ભાવ॒રિ॒ દિ॒વો અભ્રસ્ય વિદ્યુ॑તઃ ।
રોહ᳚ન્તુ સર્વ॑બીજાન્યવ બ્રહ્મ દ્વિ॒ષો᳚ જ॑હિ ॥
પદ્મપ્રિયે પદ્મિનિ પદ્મહસ્તે પદ્માલયે પદ્મ-દલાયતાક્ષી ।
વિશ્વપ્રિયે વિષ્ણુ મનોનુકૂલે ત્વત્પાદપદ્મ-મ્મયિ સન્નિધત્સ્વ ॥
યા સા પદ્માસનસ્થા વિપુલકટિતટી પદ્મપત્રાયતાક્ષી ।
ગમ્ભીરા વર્તનાભિ-સ્સ્તનભરનમિતા શુભ્ર વસ્તોત્તરીયા ॥
લક્ષ્મી-ર્દિવ્યૈ-ર્ગજેન્દ્રૈ-ર્મણિગણ ખચિતૈ-સ્સ્નાપિતા હેમકુમ્ભૈઃ ।
નિત્યં સા પદ્મહસ્તા મમ વસતુ ગૃહે સર્વ માઙ્ગલ્યયુક્તા ॥
લક્ષ્મી-ઙ્ક્ષીર સમુદ્ર રાજતનયાં શ્રીરઙ્ગ ધામેશ્વરીમ્ ।
દાસીભૂત સમસ્ત દેવ વનિતાં-લોઁકૈક દીપાઙ્કુરામ્ ।
શ્રીમન્મન્દ કટાક્ષ લબ્ધ વિભવ બ્રહ્મેન્દ્ર ગઙ્ગાધરામ્ ।
ત્વા-ન્ત્રૈલોક્ય કુટુમ્બિનીં સરસિજાં-વઁન્દે મુકુન્દપ્રિયામ્ ॥
સિદ્ધલક્ષ્મી-ર્મોક્ષલક્ષ્મી-ર્જયલક્ષ્મી-સ્સરસ્વતી ।
શ્રીલક્ષ્મી-ર્વરલક્ષ્મીશ્ચ પ્રસન્ના મમ સર્વદા ॥
વરાઙ્કુશૌ પાશમભીતિ મુદ્રામ્ ।
કરૈર્વહન્તી-ઙ્કમલાસનસ્થામ્ ।
બાલાર્કકોટિ પ્રતિભા-ન્ત્રિનેત્રામ્ ।
ભજે-ઽહમમ્બા-ઞ્જગદીશ્વરી-ન્તામ્ ॥
સર્વમઙ્ગલ માઙ્ગલ્યે શિવે સર્વાર્થ સાધિકે ।
શરણ્યે ત્ય્રમ્બકે દેવી નારાયણિ નમોસ્તુતે ॥
ઓ-મ્મ॒હા॒દે॒વ્યૈ ચ॑ વિ॒દ્મહે॑ વિષ્ણુપ॒ત્ની ચ॑ ધીમહિ ।
તન્નો॑ લક્ષ્મીઃ પ્રચો॒દયા᳚ત્ ॥
શ્રી-ર્વર્ચ॑સ્વ॒-માયુ॑ષ્ય॒-મારો᳚ગ્ય॒-માવી॑ધા॒ત્-શોભ॑માન-મ્મહી॒યતે᳚ ।
ધા॒ન્ય-ન્ધ॒ન-મ્પ॒શુ-મ્બ॒હુપુ॑ત્રલા॒ભં શ॒તસં᳚વઁત્સ॒ર-ન્દી॒ર્ઘમાયુઃ॑ ॥
ૐ શાન્તિ॒-શ્શાન્તિ॒-શ્શાન્તિઃ॑ ॥