SrI Srisaila Mallikarjuna Suprabhatam

zrI zrIzaila mallikArjuna suprabhAtam

zloka 1

prAtassmarAmi gaNanAthamanAthabandhuM

sindUrapUraparizobhitagaNDayugmam |

uddaNDavighnaparikhaNDanacaNDadaNDa-

mAkhaNDalAdisuranAyakavRndavandyam || 1||

kalAbhyAM cUDAlaGkRtazazikalAbhyAM nijatapaH

phalAbhyAM bhakteSu prakaTitaphalAbhyAM bhavatu me |

zivAbhyAmAstIkatribhuvanazivAbhyAM hRdi puna-

rbhavAbhyAmAnandasphuradanubhavAbhyAM natiriyam || 2||

namaste namaste mahAdeva! zambho!

namaste namaste dayApUrNasindho!

namaste namaste prapannAtmabandho!

namaste namaste namaste maheza || 3||

zazvacchrIgirimUrdhani trijagatAM rakSAkRtau lakSitAM

sAkSAdakSatasatkaTAkSasaraNizrImatsudhAvarSiNIm |

somArdhAGkitamastakAM praNamatAM nissImasampatpradAM

suzlokAM bhramarAmbikAM smitamukhIM zambhossakhIM tvAM stumaH || 4||

mAtaH! prasIda, sadayA bhava, bhavyazIle !

lIlAlavAkulitadaityakulApahAre !

zrIcakrarAjanilaye ! zrutigItakIrte !

zrIzailanAthadayite ! tava suprabhAtam || 5||

zambho ! surendranuta ! zaGkara ! zUlapANe !

candrAvataMsa ! ziva ! zarva ! pinAkapANe !

gaGgAdhara ! kratupate ! garuDadhvajApta !

zrImallikArjuna vibho ! tava suprabhAtam || 6||

vizveza ! vizvajanasevita ! vizvamUrte !

vizvambhara ! tripurabhedana ! vizvayone !

phAlAkSa ! bhavyaguNa ! bhogivibhUSaNeza !

zrImallikArjuna vibho ! tava suprabhAtam || 7||

kalyANarUpa ! karuNAkara ! kAlakaNTha !

kalpadrumaprasavapUjita ! kAmadAyin !

durnItidaityadalanodyata ! deva deva !

zrImallikArjuna vibho ! tava suprabhAtam || 8||

gaurImanohara ! gaNezvarasevitAGghre !

gandharvayakSasurakinnaragItakIrte !

gaNDAvalambiphaNikuNDalamaNDitAsya !

zrImallikArjuna vibho ! tava suprabhAtam || 9||

nAgendrabhUSaNa ! nirIhita ! nirvikAra !

nirmAya ! nizcala ! nirargala ! nAgabhedin |

nArAyaNIpriya ! nateSTada ! nirmalAtman !

zrIparvatAdhipa ! vibho ! tava suprabhAtam || 10||

sRSTaM tvayaiva jagadetadazeSamIza !

rakSAvidhizca vidhigocara ! tAvakInaH |

saMhArazaktirapi zaGkara ! kiGkarI te

zrIzailazekhara vibho ! tava suprabhAtam || 11||

ekastvameva bahudhA bhava ! bhAsi loke

nizzaGkadhIrvRSabhaketana ! mallinAtha !

zrIbhrAmarIpraya ! sukhAzraya ! lokanAtha !

zrIzailazekhara vibho ! tava suprabhAtam || 12||

pAtAlagAGgajalamajjananirmalAGgAH

bhasmatripuNDrasamalaGkRtaphAlabhAgAH |

gAyanti devamunibhaktajanA bhavantaM

zrImallikArjuna vibho ! tava suprabhAtam || 13||

sArasvatAmbuyutabhogavatIzritAyAH

brahmezaviSNugiricumbitakRSNaveNyAH |

sopAnamArgamadhiruhya bhajanti bhaktAH

zrImallikArjuna vibho ! tava suprabhAtam || 14||

zrImallikArjunamahezvarasuprabhAta-

stotraM paThanti bhuvi ye manujAH prabhAte |

te sarva saukhyamanubhUya parAnavApyaM

zrIzAmbhavaM padamavApya mudaM labhante || 15||

iti zrImallikArjunasuprabhAtaM sampUrNam |