ಶ್ರೀ ಶ್ರೀನಿವಾಸ ಗದ್ಯಮ್

ಶ್ರೀ ಶ್ರೀನಿವಾಸ ಗದ್ಯಮ್

ಶ್ರೀಮದಖಿಲಮಹೀಮಣ್ಡಲಮಣ್ಡನಧರಣೀಧರ ಮಣ್ಡಲಾಖಣ್ಡಲಸ್ಯ,

ವಾನಿಖಿಲಸುರಾಸುರವನ್ದಿತ ವರಾಹಕ್ಷೇತ್ರ ವಿಭೂಷಣಸ್ಯ,

ಶೇಷಾಚಲ ಗರುಡಾಚಲ ಸಿಂಹಾಚಲ ವೃಷಭಾಚಲ ನಾರಾಯಣಾಚಲಾಞ್ಜನಾಚಲಾದಿ ಶಿಖರಿಮಾಲಾಕುಲಸ್ಯ,

ನಾಥಮುಖ ಬೋಧನಿಧಿವೀಥಿಗುಣಸಾಭರಣ ಸತ್ತ್ವನಿಧಿ ತತ್ತ್ವನಿಧಿ ಭಕ್ತಿಗುಣಪೂರ್ಣ ಶ್ರೀಶೈಲಪೂರ್ಣ

ಗುಣವಶಂವದ ಪರಮಪುರುಷಕೃಪಾಪೂರ ವಿಭ್ರಮದತುಙ್ಗಶೃಙ್ಗ ಗಲದ್ಗಗನಗಙ್ಗಾಸಮಾಲಿಙ್ಗಿತಸ್ಯ,

ಸೀಮಾತಿಗ ಗುಣ ರಾಮಾನುಜಮುನಿ ನಾಮಾಙ್ಕಿತ ಬಹು ಭೂಮಾಶ್ರಯ ಸುರಧಾಮಾಲಯ ವನರಾಮಾಯತ ವನಸೀಮಾಪರಿವೃತ ವಿಶಙ್ಕಟತಟ

ನಿರನ್ತರ ವಿಜೃಮ್ಭಿತ ಭಕ್ತಿರಸ ನಿರ್ಘರಾನನ್ತಾರ್ಯಾಹಾರ್ಯ ಪ್ರಸ್ರವಣಧಾರಾಪೂರ ವಿಭ್ರಮದ ಸಲಿಲಭರಭರಿತ ಮಹಾತಟಾಕ ಮಣ್ಡಿತಸ್ಯ,

ಕಲಿಕರ್ದಮ ಮಲಮರ್ದನ ಕಲಿತೋದ್ಯಮ ವಿಲಸದ್ಯಮ ನಿಯಮಾದಿಮ ಮುನಿಗಣನಿಷೇವ್ಯಮಾಣ

ಪ್ರತ್ಯಕ್ಷೀಭವನ್ನಿಜಸಲಿಲ ಸಮಜ್ಜನ ನಮಜ್ಜನ ನಿಖಿಲಪಾಪನಾಶನಾ ಪಾಪನಾಶನ ತೀರ್ಥಾಧ್ಯಾಸಿತಸ್ಯ,

ಮುರಾರಿಸೇವಕ ಜರಾದಿಪೀಡಿತ ನಿರಾರ್ತಿಜೀವನ ನಿರಾಶ ಭೂಸುರ ವರಾತಿಸುನ್ದರ ಸುರಾಙ್ಗನಾರತಿ ಕರಾಙ್ಗಸೌಷ್ಠವ

ಕುಮಾರತಾಕೃತಿ ಕುಮಾರತಾರಕ ಸಮಾಪನೋದಯ ದನೂನಪಾತಕ ಮಹಾಪದಾಮಯ ವಿಹಾಪನೋದಿತ ಸಕಲಭುವನ ವಿದಿತ ಕುಮಾರಧಾರಾಭಿಧಾನ ತೀರ್ಥಾಧಿಷ್ಠಿತಸ್ಯ,

ಧರಣಿತಲ ಗತಸಕಲ ಹತಕಲಿಲ ಶುಭಸಲಿಲ ಗತಬಹುಲ ವಿವಿಧಮಲ ಹತಿಚತುರ

ರುಚಿರತರ ವಿಲೋಕನಮಾತ್ರ ವಿದಲಿತ ವಿವಿಧ ಮಹಾಪಾತಕ ಸ್ವಾಮಿಪುಷ್ಕರಿಣೀ ಸಮೇತಸ್ಯ,

ಬಹುಸಙ್ಕಟ ನರಕಾವಟ ಪತದುತ್ಕಟ ಕಲಿಕಙ್ಕಟ ಕಲುಷೋದ್ಭಟ ಜನಪಾತಕ ವಿನಿಪಾತಕ

ರುಚಿನಾಟಕ ಕರಹಾಟಕ ಕಲಶಾಹೃತ ಕಮಲಾರತ ಶುಭಮಞ್ಜನ ಜಲಸಜ್ಜನ

ಭರಭರಿತ ನಿಜದುರಿತ ಹತಿನಿರತ ಜನಸತತ ನಿರಸ್ತನಿರರ್ಗಲ ಪೇಪೀಯಮಾನ ಸಲಿಲ ಸಮ್ಭೃತ ವಿಶಙ್ಕಟ ಕಟಾಹತೀರ್ಥ ವಿಭೂಷಿತಸ್ಯ,

ಏವಮಾದಿಮ ಭೂರಿಮಞ್ಜಿಮ ಸರ್ವಪಾತಕ ಗರ್ವಹಾಪಕ ಸಿನ್ಧುಡಮ್ಬರ ಹಾರಿಶಮ್ಬರ ವಿವಿಧವಿಪುಲ ಪುಣ್ಯತೀರ್ಥನಿವಹ ನಿವಾಸಸ್ಯ,

ಶ್ರೀಮತೋ ವೇಙ್ಕಟಾಚಲಸ್ಯ ಶಿಖರಶೇಖರಮಹಾಕಲ್ಪಶಾಖೀ,

ಖರ್ವೀಭವದತಿ ಗರ್ವೀಕೃತ ಗುರುಮೇರ್ವೀಶಗಿರಿ ಮುಖೋರ್ವೀಧರ ಕುಲದರ್ವೀಕರ ದಯಿತೋರ್ವೀಧರ ಶಿಖರೋರ್ವೀ

ಸತತ ಸದೂರ್ವೀಕೃತಿ ಚರಣಘನ ಗರ್ವಚರ್ವಣನಿಪುಣ ತನುಕಿರಣಮಸೃಣಿತ ಗಿರಿಶಿಖರ ಶೇಖರತರುನಿಕರ ತಿಮಿರಃ,

ವಾಣೀಪತಿಶರ್ವಾಣೀ ದಯಿತೇನ್ದ್ರಾಣಿಶ್ವರ ಮುಖ ನಾಣೀಯೋರಸವೇಣೀ

ನಿಭಶುಭವಾಣೀ ನುತಮಹಿಮಾಣೀ ಯ ಸ್ತನ ಕೋಣೀ ಭವದಖಿಲ ಭುವನಭವನೋದರಃ,

ವೈಮಾನಿಕಗುರು ಭೂಮಾಧಿಕ ಗುಣ ರಾಮಾನುಜ ಕೃತಧಾಮಾಕರ ಕರಧಾಮಾರಿ ದರಲಲಾಮಾಚ್ಛಕನಕ

ದಾಮಾಯಿತ ನಿಜರಾಮಾಲಯ ನವಕಿಸಲಯಮಯ ತೋರಣಮಾಲಾಯಿತ ವನಮಾಲಾಧರಃ,

ಕಾಲಾಮ್ಬುದ ಮಾಲಾನಿಭ ನೀಲಾಲಕ ಜಾಲಾವೃತ ಬಾಲಾಬ್ಜ ಸಲೀಲಾಮಲ ಫಾಲಾಙ್ಕಸಮೂಲಾಮೃತ

ಧಾರಾದ್ವಯಾವಧೀರಣ ಧೀರಲಲಿತತರ ವಿಶದತರ ಘನ ಘನಸಾರ ಮಯೋರ್ಧ್ವಪುಣ್ಡ್ರ ರೇಖಾದ್ವಯರುಚಿರಃ,

ಸುವಿಕಸ್ವರ ದಲಭಾಸ್ವರ ಕಮಲೋದರ ಗತಮೇದುರ ನವಕೇಸರ ತತಿಭಾಸುರ

ಪರಿಪಿಞ್ಜರ ಕನಕಾಮ್ಬರ ಕಲಿತಾದರ ಲಲಿತೋದರ ತದಾಲಮ್ಬ ಜಮ್ಭರಿಪು ಮಣಿಸ್ತಮ್ಭ

ಗಮ್ಭೀರಿಮದಮ್ಭಸ್ತಮ್ಭ ಸಮುಜ್ಜೃಮ್ಭಮಾಣ ಪೀವರೋರುಯುಗಲ ತದಾಲಮ್ಬ ಪೃಥುಲ

ಕದಲೀ ಮುಕುಲ ಮದಹರಣಜಙ್ಘಾಲ ಜಙ್ಘಾಯುಗಲಃ,

ನವ್ಯದಲ ಭವ್ಯಮಲ ಪೀತಮಲ ಶೋಣಿಮಲಸನ್ಮೃದುಲ ಸತ್ಕಿಸಲಯಾಶ್ರುಜಲಕಾರಿ ಬಲ ಶೋಣತಲ

ಪದಕಮಲ ನಿಜಾಶ್ರಯ ಬಲಬನ್ದೀಕೃತ ಶರದಿನ್ದುಮಣ್ಡಲೀ

ವಿಭ್ರಮದಾದಭ್ರ ಶುಭ್ರ ಪುನರ್ಭವಾಧಿಷ್ಠಿತಾಙ್ಗುಲೀಗಾಢ ನಿಪೀಡಿತ ಪದ್ಮಾವನಃ,

ಜಾನುತಲಾವಧಿ ಲಮ್ಬ ವಿಡಮ್ಬಿತ ವಾರಣ ಶುಣ್ಡಾದಣ್ಡ ವಿಜೃಮ್ಭಿತ ನೀಲಮಣಿಮಯ ಕಲ್ಪಕಶಾಖಾ

ವಿಭ್ರಮದಾಯಿ ಮೃಣಾಲಲತಾಯಿತ ಸಮುಜ್ಜ್ವಲತರ ಕನಕವಲಯ ವೇಲ್ಲಿತೈಕತರ ಬಾಹುದಣ್ಡಯುಗಲಃ,

ಯುಗಪದುದಿತ ಕೋಟಿ ಖರಕರ ಹಿಮಕರ ಮಣ್ಡಲ ಜಾಜ್ವಲ್ಯಮಾನ ಸುದರ್ಶನ ಪಾಞ್ಚಜನ್ಯ

ಸಮುತ್ತುಙ್ಗಿತ ಶೃಙ್ಗಾಪರ ಬಾಹುಯುಗಲಃ,

ಅಭಿನವಶಾಣ ಸಮುತ್ತೇಜಿತ ಮಹಾಮಹಾ ನೀಲಖಣ್ಡ ಮದಖಣ್ಡನ ನಿಪುಣ

ನವೀನ ಪರಿತಪ್ತ ಕಾರ್ತಸ್ವರ ಕವಚಿತ ಮಹನೀಯ ಪೃಥುಲ ಸಾಲಗ್ರಾಮ ಪರಮ್ಪರಾ ಗುಮ್ಭಿತ

ನಾಭಿಮಣ್ಡಲ ಪರ್ಯನ್ತ ಲಮ್ಬಮಾನ ಪ್ರಾಲಮ್ಬದೀಪ್ತಿ ಸಮಾಲಮ್ಬಿತ ವಿಶಾಲ ವಕ್ಷಃಸ್ಥಲಃ,

ಗಙ್ಗಾಝರ ತುಙ್ಗಾಕೃತಿ ಭಙ್ಗಾವಲಿ ಭಙ್ಗಾವಹ ಸೌಧಾವಲಿ ಬಾಧಾವಹ ಧಾರಾ

ನಿಭ ಹಾರಾವಲಿ ದೂರಾಹತ ಗೇಹಾನ್ತರ ಮೋಹಾವಹ ಮಹಿಮ ಮಸೃಣಿತ ಮಹಾತಿಮಿರಃ,

ಪಿಙ್ಗಾಕೃತಿ ಭೃಙ್ಗಾರ ನಿಭಾಙ್ಗಾರ ದಲಾಙ್ಗಾಮಲ ನಿಷ್ಕಾಸಿತ ದುಷ್ಕಾರ್ಯಘ

ನಿಷ್ಕಾವಲಿ ದೀಪಪ್ರಭ ನೀಪಚ್ಛವಿ ತಾಪಪ್ರದ ಕನಕಮಾಲಿಕಾ ಪಿಶಙ್ಗಿತ ಸರ್ವಾಙ್ಗಃ,

ನವದಲಿತ ದಲವಲಿತ ಮೃದುಲಲಿತ ಕಮಲತತಿ ಮದವಿಹತಿ ಚತುರತರ

ಪೃಥುಲತರ ಸರಸತರ ಕನಕಸರಮಯ ರುಚಿರಕಣ್ಠಿಕಾ ಕಮನೀಯಕಣ್ಠಃ,

ವಾತಾಶನಾಧಿಪತಿ ಶಯನ ಕಮನ ಪರಿಚರಣ ರತಿಸಮೇತಾಖಿಲ ಫಣಧರ

ತತಿ ಮತಿಕರವರ ಕನಕಮಯ ನಾಗಾಭರಣ ಪರಿವೀತಾಖಿಲಾಙ್ಗಾ ವಗಮಿತ ಶಯನ ಭೂತಾಹಿರಾಜ ಜಾತಾತಿಶಯಃ,

ರವಿಕೋಟೀ ಪರಿಪಾಟೀ ಧರಕೋಟೀ ರವರಾಟೀ ಕಿತವೀಟೀ ರಸಧಾಟೀ

ಧರಮಣಿಗಣಕಿರಣ ವಿಸರಣ ಸತತವಿಧುತ ತಿಮಿರಮೋಹ ಗಾರ್ಭಗೇಹಃ,

ಅಪರಿಮಿತ ವಿವಿಧಭುವನ ಭರಿತಾಖಣ್ಡ ಬ್ರಹ್ಮಾಣ್ಡಮಣ್ಡಲ ಪಿಚಣ್ಡಿಲಃ,

ಆರ್ಯಧುರ್ಯಾನನ್ತಾರ್ಯ ಪವಿತ್ರ ಖನಿತ್ರಪಾತ ಪಾತ್ರೀಕೃತ

ನಿಜಚುಬುಕ ಗತವ್ರಣಕಿಣ ವಿಭೂಷಣ ವಹನಸೂಚಿತ ಶ್ರಿತಜನ ವತ್ಸಲತಾತಿಶಯಃ,

ಮಡ್ಡುಡಿಣ್ಡಿಮ ಢಮರು ಜರ್ಘರ ಕಾಹಲೀ ಪಟಹಾವಲೀ ಮೃದುಮದ್ದಲಾದಿ ಮೃದಙ್ಗ ದುನ್ದುಭಿ

ಢಕ್ಕಿಕಾಮುಖ ಹೃದ್ಯ ವಾದ್ಯಕ ಮಧುರಮಙ್ಗಲ ನಾದಮೇದುರ

ನಾಟಾರಭಿ ಭೂಪಾಲ ಬಿಲಹರಿ ಮಾಯಾಮಾಲವ ಗೌಲ ಅಸಾವೇರೀ ಸಾವೇರೀ ಶುದ್ಧಸಾವೇರೀ ದೇವಗಾನ್ಧಾರೀ

ಧನ್ಯಾಸೀ ಬೇಗಡ ಹಿನ್ದುಸ್ತಾನೀ ಕಾಪೀ ತೋಡಿ ನಾಟಕುರುಞ್ಜೀ ಶ್ರೀರಾಗ

ಸಹನ ಅಠಾಣ ಸಾರಙ್ಗೀ ದರ್ಬಾರು ಪನ್ತುವರಾಲೀ ವರಾಲೀ ಕಲ್ಯಾಣೀ ಭೂರಿಕಲ್ಯಾಣೀ ಯಮುನಾಕಲ್ಯಾಣೀ

ಹುಶೇನೀ ಜಞ್ಝೋಠೀ ಕೌಮಾರೀ ಕನ್ನಡ ಖರಹರಪ್ರಿಯಾ

ಕಲಹಂಸ ನಾದನಾಮಕ್ರಿಯಾ ಮುಖಾರೀ ತೋಡೀ ಪುನ್ನಾಗವರಾಲೀ ಕಾಮ್ಭೋಜೀ ಭೈರವೀ

ಯದುಕುಲಕಾಮ್ಭೋಜೀ ಆನನ್ದಭೈರವೀ ಶಙ್ಕರಾಭರಣ ಮೋಹನ ರೇಗುಪ್ತೀ ಸೌರಾಷ್ಟ್ರೀ ನೀಲಾಮ್ಬರೀ ಗುಣಕ್ರಿಯಾ

ಮೇಘಗರ್ಜನೀ ಹಂಸಧ್ವನಿ ಶೋಕವರಾಲೀ ಮಧ್ಯಮಾವತೀ ಜೇಞ್ಜುರುಟೀ ಸುರಟೀ ದ್ವಿಜಾವನ್ತೀ ಮಲಯಾಮ್ಬರೀ

ಕಾಪೀಪರಶು ಧನಾಸಿರೀ ದೇಶಿಕತೋಡೀ ಆಹಿರೀ ವಸನ್ತಗೌಲೀ ಸನ್ತು ಕೇದಾರಗೌಲ

ಕನಕಾಙ್ಗೀ ರತ್ನಾಙ್ಗೀ ಗಾನಮೂರ್ತೀ ವನಸ್ಪತೀ ವಾಚಸ್ಪತೀ ದಾನವತೀ ಮಾನರೂಪೀ ಸೇನಾಪತೀ

ಹನುಮತ್ತೋಡೀ ಧೇನುಕಾ ನಾಟಕಪ್ರಿಯಾ ಕೋಕಿಲಪ್ರಿಯಾ ರೂಪವತೀ ಗಾಯಕಪ್ರಿಯಾ

ವಕುಲಾಭರಣ ಚಕ್ರವಾಕ ಸೂರ್ಯಕಾನ್ತ ಹಾಟಕಾಮ್ಬರೀ

ಝಙ್ಕಾರಧ್ವನೀ ನಟಭೈರವೀ ಕೀರವಾಣೀ ಹರಿಕಾಮ್ಭೋದೀ ಧೀರಶಙ್ಕರಾಭರಣ ನಾಗಾನನ್ದಿನೀ ಯಾಗಪ್ರಿಯಾದಿ

ವಿಸೃಮರ ಸರಸ ಗಾನರುಚಿರ ಸನ್ತತ ಸನ್ತನ್ಯಮಾನ ನಿತ್ಯೋತ್ಸವ ಪಕ್ಷೋತ್ಸವ ಮಾಸೋತ್ಸವ

ಸಂವತ್ಸರೋತ್ಸವಾದಿ ವಿವಿಧೋತ್ಸವ ಕೃತಾನನ್ದಃ ಶ್ರೀಮದಾನನ್ದನಿಲಯ ವಿಮಾನವಾಸಃ,

ಸತತ ಪದ್ಮಾಲಯಾ ಪದಪದ್ಮರೇಣು ಸಞ್ಚಿತವಕ್ಷಸ್ತಲ ಪಟವಾಸಃ,

ಶ್ರೀಶ್ರೀನಿವಾಸಃ ಸುಪ್ರಸನ್ನೋ ವಿಜಯತಾಂ.

ಶ್ರೀ​ಅಲರ್ಮೇಲ್ಮಙ್ಗಾ ನಾಯಿಕಾಸಮೇತಃ ಶ್ರೀಶ್ರೀನಿವಾಸ ಸ್ವಾಮೀ ಸುಪ್ರೀತಃ ಸುಪ್ರಸನ್ನೋ ವರದೋ ಭೂತ್ವಾ, ಪವನ ಪಾಟಲೀ ಪಾಲಾಶ ಬಿಲ್ವ ಪುನ್ನಾಗ ಚೂತ ಕದಲೀ ಚನ್ದನ ಚಮ್ಪಕ ಮಞ್ಜುಲ ಮನ್ದಾರ ಹಿಞ್ಜುಲಾದಿ ತಿಲಕ ಮಾತುಲುಙ್ಗ ನಾರಿಕೇಲ ಕ್ರೌಞ್ಚಾಶೋಕ ಮಾಧೂಕಾಮಲಕ ಹಿನ್ದುಕ ನಾಗಕೇತಕ ಪೂರ್ಣಕುನ್ದ ಪೂರ್ಣಗನ್ಧ ರಸ ಕನ್ದ ವನ ವಞ್ಜುಲ ಖರ್ಜೂರ ಸಾಲ ಕೋವಿದಾರ ಹಿನ್ತಾಲ ಪನಸ ವಿಕಟ ವೈಕಸವರುಣ ತರುಘಮರಣ ವಿಚುಲಙ್ಕಾಶ್ವತ್ಥ ಯಕ್ಷ ವಸುಧ ವರ್ಮಾಧ ಮನ್ತ್ರಿಣೀ ತಿನ್ತ್ರಿಣೀ ಬೋಧ ನ್ಯಗ್ರೋಧ ಘಟವಟಲ ಜಮ್ಬೂಮತಲ್ಲೀ ವೀರತಚುಲ್ಲೀ ವಸತಿ ವಾಸತೀ ಜೀವನೀ ಪೋಷಣೀ ಪ್ರಮುಖ ನಿಖಿಲ ಸನ್ದೋಹ ತಮಾಲ ಮಾಲಾ ಮಹಿತ ವಿರಾಜಮಾನ ಚಷಕ ಮಯೂರ ಹಂಸ ಭಾರದ್ವಾಜ ಕೋಕಿಲ ಚಕ್ರವಾಕ ಕಪೋತ ಗರುಡ ನಾರಾಯಣ ನಾನಾವಿಧ ಪಕ್ಷಿಜಾತಿ ಸಮೂಹ ಬ್ರಹ್ಮ ಕ್ಷತ್ರಿಯ ವೈಶ್ಯ ಶೂದ್ರ ನಾನಾಜಾತ್ಯುದ್ಭವ ದೇವತಾ ನಿರ್ಮಾಣ ಮಾಣಿಕ್ಯ ವಜ್ರ ವೈಢೂರ್ಯ ಗೋಮೇಧಿಕ ಪುಷ್ಯರಾಗ ಪದ್ಮರಾಗೇನ್ದ್ರ ನೀಲ ಪ್ರವಾಲಮೌಕ್ತಿಕ ಸ್ಫಟಿಕ ಹೇಮ ರತ್ನಖಚಿತ ಧಗದ್ಧಗಾಯಮಾನ ರಥ ಗಜ ತುರಗ ಪದಾತಿ ಸೇನಾ ಸಮೂಹ ಭೇರೀ ಮದ್ದಲ ಮುರವಕ ಝಲ್ಲರೀ ಶಙ್ಖ ಕಾಹಲ ನೃತ್ಯಗೀತ ತಾಲವಾದ್ಯ ಕುಮ್ಭವಾದ್ಯ ಪಞ್ಚಮುಖವಾದ್ಯ ಅಹಮೀಮಾರ್ಗನ್ನಟೀವಾದ್ಯ ಕಿಟಿಕುನ್ತಲವಾದ್ಯ ಸುರಟೀಚೌಣ್ಡೋವಾದ್ಯ ತಿಮಿಲಕವಿತಾಲವಾದ್ಯ ತಕ್ಕರಾಗ್ರವಾದ್ಯ ಘಣ್ಟಾತಾಡನ ಬ್ರಹ್ಮತಾಲ ಸಮತಾಲ ಕೊಟ್ಟರೀತಾಲ ಢಕ್ಕರೀತಾಲ ಎಕ್ಕಾಲ ಧಾರಾವಾದ್ಯ ಪಟಹಕಾಂಸ್ಯವಾದ್ಯ ಭರತನಾಟ್ಯಾಲಙ್ಕಾರ ಕಿನ್ನೆರ ಕಿಮ್ಪುರುಷ ರುದ್ರವೀಣಾ ಮುಖವೀಣಾ ವಾಯುವೀಣಾ ತುಮ್ಬುರುವೀಣಾ ಗಾನ್ಧರ್ವವೀಣಾ ನಾರದವೀಣಾ ಸ್ವರಮಣ್ಡಲ ರಾವಣಹಸ್ತವೀಣಾಸ್ತಕ್ರಿಯಾಲಙ್ಕ್ರಿಯಾಲಙ್ಕೃತಾನೇಕವಿಧವಾದ್ಯ ವಾಪೀಕೂಪತಟಾಕಾದಿ ಗಙ್ಗಾಯಮುನಾ ರೇವಾವರುಣಾ

ಶೋಣನದೀಶೋಭನದೀ ಸುವರ್ಣಮುಖೀ ವೇಗವತೀ ವೇತ್ರವತೀ ಕ್ಷೀರನದೀ ಬಾಹುನದೀ ಗರುಡನದೀ ಕಾವೇರೀ ತಾಮ್ರಪರ್ಣೀ ಪ್ರಮುಖಾಃ ಮಹಾಪುಣ್ಯನದ್ಯಃ ಸಜಲತೀರ್ಥೈಃ ಸಹೋಭಯಕೂಲಙ್ಗತ ಸದಾಪ್ರವಾಹ ಋಗ್ಯಜುಸ್ಸಾಮಾಥರ್ವಣ ವೇದಶಾಸ್ತ್ರೇತಿಹಾಸ ಪುರಾಣ ಸಕಲವಿದ್ಯಾಘೋಷ ಭಾನುಕೋಟಿಪ್ರಕಾಶ ಚನ್ದ್ರಕೋಟಿ ಸಮಾನ ನಿತ್ಯಕಲ್ಯಾಣ ಪರಮ್ಪರೋತ್ತರೋತ್ತರಾಭಿವೃದ್ಧಿರ್ಭೂಯಾದಿತಿ ಭವನ್ತೋ ಮಹಾನ್ತೋzನುಗೃಹ್ಣನ್ತು, ಬ್ರಹ್ಮಣ್ಯೋ ರಾಜಾ ಧಾರ್ಮಿಕೋzಸ್ತು, ದೇಶೋಯಂ ನಿರುಪದ್ರವೋzಸ್ತು, ಸರ್ವೇ ಸಾಧುಜನಾಸ್ಸುಖಿನೋ ವಿಲಸನ್ತು, ಸಮಸ್ತಸನ್ಮಙ್ಗಲಾನಿ ಸನ್ತು, ಉತ್ತರೋತ್ತರಾಭಿವೃದ್ಧಿರಸ್ತು, ಸಕಲಕಲ್ಯಾಣ ಸಮೃದ್ಧಿರಸ್ತು ॥

ಹರಿಃ ಓಮ್ ॥