Sri Siddha Lakshmi Stotram

zrI siddhalakSmI stotram

zloka 1

asya zrIsiddhalakSmIstotramantrasya hiraNyagarbha RSiH anuSTup chandaH, zrImahAkAlImahAlakSmImahAsarasvatyo devatAH zrIM bIjaM hrIM zaktiH klIM kIlakaM mama sarvaklezapIDAparihArArthaM sarvaduHkhadAridryanAzanArthaM sarvakAryasiddhyarthaM zrIsiddhilakSmIstotra pAThe viniyogaH ||

RSyAdinyAsaH

OM hiraNyagarbha RSaye namaH zirasi |

anuSTupchandase namo mukhe |

zrImahAkAlImahAlakSmImahAsarasvatIdevatAbhyo namo hRdiH |

zrIM bIjAya namo guhye |

hrIM zaktaye namaH pAdayoH |

klIM kIlakAya namo nAbhau |

viniyogAya namaH sarvAGgeSu ||

karanyAsaH

OM zrIM siddhalakSmyai aGguSThAbhyAM namaH |

OM hrIM viSNutejase tarjanIbhyAM namaH |

OM klIM amRtAnandAyai madhyamAbhyAM namaH |

OM zrIM daityamAlinyai anAmikAbhyAM namaH |

OM hrIM tejaH prakAzinyai kaniSThikAbhyAM namaH |

OM klIM brAhmyai vaiSNavyai rudrANyai karatala karapRSThAbhyAM namaH ||

aGganyAsaH

OM zrIM siddhalakSmyai hRdayAya namaH |

OM hrIM viSNutejase zirase svAhA |

OM klIM amRtAnandAyai zikhAyai vaSaT |

OM zrIM daityamAlinyai kavacAya hum |

OM hrIM tejaH prakAzinyai netratrayAya vauSaT |

OM klIM brAhmyai vaiSNavyai rudrANyai astrAya phaT ||

OM zrIM hrIM klIM zrIM siddhalakSmyai namaH iti digbandhaH ||

atha dhyAnam

brAhmIM ca vaiSNavIM bhadrAM SaDbhujAM ca caturmukhIm |

trinetrAM khaDgatrizUlapadmacakragadAdharAm || 1 ||

pItAmbaradharAM devIM nAnAlaGkArabhUSitAm |

tejaHpuJjadharIM zreSThAM dhyAyedbAlakumArikAm || 2 ||

atha stotram

oGkAraM lakSmIrUpaM tu viSNuM vAgbhavamavyayam |

viSNumAnandamavyaktaM hrIGkAraM bIjarUpiNIm || 3 ||

klIM amRtAnandinIM bhadrAM satyAnandadAyinIm |

zrIM daityazamanIM zaktiM mAlinIM zatrumardinIm || 4 ||

tejaH prakAzinIM devIM varadAM zubhakAriNIm |

brAhmIM ca vaiSNavIM raudrIM kAlikArUpazobhinIm || 5 ||

akAre lakSmIrUpaM tu ukAre viSNumavyayam |

makAraH puruSo'vyakto devI praNava ucyate || 6 ||

sUryakoTipratIkAzaM candrakoTisamaprabham |

tanmadhye nikaraM sUkSmaM brahmarupaM vyavasthitam || 7 ||

oGkAraM paramAnandaM sadaiva surasundarIm |

siddhalakSmI mokSalakSmI AdyalakSmI namo'stu te || 8 ||

zrIGkAraM paramaM siddhaM sarvabuddhipradAyakam |

saubhAgyA'mRtA kamalA satyalakSmI namo'stu te || 9 ||

hrIGkAraM paramaM zuddhaM paramaizvaryadAyakam |

kamalA dhanadA lakSmI bhogalakSmI namo'stu te || 10 ||

klIGkAraM kAmarUpiNyaM kAmanAparipUrtidam |

capalA caJcalA lakSmI kAtyAyanI namo'stu te || 11 ||

zrIGkAraM siddhirUpiNyaM sarvasiddhipradAyakam |

padmAnanAM jaganmAtre aSTalakSmIM namo'stu te || 12 ||

sarvamaGgalamAGgalye zive sarvArthasAdhike |

zaraNye tryambake gauri nArAyaNI namo'stu te || 13 ||

prathamaM tryambakA gaurI dvitIyaM vaiSNavI tathA |

tRtIyaM kamalA proktA caturthaM sundarI tathA || 14 ||

paJcamaM viSNuzaktizca SaSThaM kAtyAyanI tathA |

vArAhI saptamaM caiva hyaSTamaM harivallabhA || 15 ||

navamaM khaDginI proktA dazamaM caiva devikA |

ekAdazaM siddhalakSmIrdvAdazaM haMsavAhinI || 16 ||

uttaranyAsaH

OM zrIM siddhalakSmyai hRdayAya namaH |

OM hrIM viSNutejase zirase svAhA |

OM klIM amRtAnandAyai zikhAyai vaSaT |

OM zrIM daityamAlinyai kavacAya hum |

OM hrIM tejaH prakAzinyai netratrayAya vauSaT |

OM klIM brAhmyai vaiSNavyai rudrANyai astrAya phaT ||

OM zrIM hrIM klIM zrIM siddhalakSmyai namaH iti digvimokaH ||

atha phalazRtiH

etat stotravaraM devyA ye paThanti sadA narAH |

sarvApadbhyo vimucyante nAtra kAryA vicAraNA || 17 ||

ekamAsaM dvimAsaM ca trimAsaM ca catusthathA |

paJcamAsaM ca SaNmAsaM trikAlaM yaH sadA paThet || 18 ||

brAhmaNaH klezito duHkhI dAridryabhayapIDitaH |

janmAntara sahasrotthairmucyate sarvakilbaSaiH || 19 ||

daridro labhate lakSmImaputraH putravAn bhavet |

dhanyo yazasvI zatrughno vahnicaurabhayeSu ca || 20 ||

zAkinI bhUta vetAla sarpa vyAghra nipAtane |

rAjadvAre sabhAsthAne kArAgRhanibandhane || 21 ||

IzvareNa kRtaM stotraM prANinAM hitakArakam |

stuvantu brAhmaNAH nityaM dAridryaM na ca bAdhate || 22 ||

sarvapApaharA lakSmIH sarvasiddhipradAyinIm |

sAdhakAH labhate sarvaM paThet stotraM nirantaram || 23 ||

prArthanA

yA zrIH padmavane kadambazikhare rAjagRhe kuJjare

zvete cAzvayute vRSe ca yugale yajJe ca yUpasthite |

zaGkhe daivakule narendrabhavane gaGgAtaTe gokule

sA zrIstiSThatu sarvadA mama gRhe bhUyAt sadA nizcalA ||

yA sA padmAsanasthA vipulakaTitaTI padmapatrAyatAkSI

gambhIrAvartanAbhiH stanabharanamitA zuddhavastrottarIyA |

lakSmIrdivyairgajendrairmaNigaNakhacitaiH snApitA hemakumbhaiH

nityaM sA padmahastA mama vasatu gRhe sarvamAGgalyayuktA ||

iti zrIbrahmapurANe IzvaraviSNusaMvAde zrI siddhalakSmI stotram ||