Sri Rama Bhujanga Prayaata Stotram

shrI rAma bhuja~Nga prayAta stotram

shloka 1

vishuddhaM paraM sachchidAnandarUpaM

guNAdhAramAdhArahInaM vareNyam |

mahAntaM vibhAntaM guhAntaM guNAntaM

sukhAntaM svayaM dhAma rAmaM prapadye || 1 ||

shivaM nityamekaM vibhuM tArakAkhyaM

sukhAkAramAkArashUnyaM sumAnyam |

maheshaM kaleshaM sureshaM pareshaM

nareshaM nirIshaM mahIshaM prapadye || 2 ||

yadAvarNayatkarNamUle.antakAle

shivo rAma rAmeti rAmeti kAshyAm |

tadekaM paraM tArakabrahmarUpaM

bhaje.ahaM bhaje.ahaM bhaje.ahaM bhaje.aham || 3 ||

mahAratnapIThe shubhe kalpamUle

sukhAsInamAdityakoTiprakAsham |

sadA jAnakIlakShmaNopetamekaM

sadA rAmachandraM bhaje.ahaM bhaje.aham || 4 ||

kvaNadratnama~njIrapAdAravindaM

lasanmekhalAchArupItAmbarADhyam |

mahAratnahArollasatkaustubhA~NgaM

nadachchancharImanjarIlolamAlam || 5 ||

lasachchandrikAsmerashoNAdharAbhaM

samudyatpata~NgendukoTiprakAsham |

namadbrahmarudrAdikoTIraratna

sphuratkAntinIrAjanArAdhitA~Nghrim || 6 ||

puraH prAnjalInAnjaneyAdibhaktAn

svachinmudrayA bhadrayA bodhayantam |

bhaje.ahaM bhaje.ahaM sadA rAmachandraM

tvadanyaM na manye na manye na manye || 7 ||

yadA matsamIpaM kRRitAntaH sametya

prachaNDaprakopairbhaTairbhIShayenmAm |

tadAviShkaroShi tvadIyaM svarUpaM

sadApatpraNAshaM sakodaNDabANam || 8 ||

nije mAnase mandire sannidhehi

prasIda prasIda prabho rAmachandra |

sasaumitriNA kaikayInandanena

svashaktyAnubhaktyA cha saMsevyamAna || 9 ||

svabhaktAgragaNyaiH kapIshairmahIshai-

-ranIkairanekaishcha rAma prasIda |

namaste namo.astvIsha rAma prasIda

prashAdhi prashAdhi prakAshaM prabho mAm || 10 ||

tvamevAsi daivaM paraM me yadekaM

suchaitanyametattvadanyaM na manye |

yato.abhUdameyaM viyadvAyutejo

jalorvyAdikAryaM charaM chAcharaM cha || 11 ||

namaH sachchidAnandarUpAya tasmai

namo devadevAya rAmAya tubhyam |

namo jAnakIjIviteshAya tubhyaM

namaH puNDarIkAyatAkShAya tubhyam || 12 ||

namo bhaktiyuktAnuraktAya tubhyaM

namaH puNyapu~njaikalabhyAya tubhyam |

namo vedavedyAya chAdyAya puMse

namaH sundarAyendirAvallabhAya || 13 ||

namo vishvakartre namo vishvahartre

namo vishvabhoktre namo vishvamAtre |

namo vishvanetre namo vishvajetre

namo vishvapitre namo vishvamAtre || 14 ||

namaste namaste samastaprapa~ncha-

-prabhogaprayogapramANapravINa |

madIyaM manastvatpadadvandvasevAM

vidhAtuM pravRRittaM suchaitanyasiddhyai || 15 ||

shilApi tvadaNghrikShamAsaNgireNu

prasAdAddhi chaitanyamAdhatta rAma |

narastvatpadadvandvasevAvidhAnA-

-tsuchaitanyametIti kiM chitramatra || 16 ||

pavitraM charitraM vichitraM tvadIyaM

narA ye smarantyanvahaM rAmachandra |

bhavantaM bhavAntaM bharantaM bhajanto

labhante kRRitAntaM na pashyantyato.ante || 17 ||

sa puNyaH sa gaNyaH sharaNyo mamAyaM

naro veda yo devachUDAmaNiM tvAm |

sadAkAramekaM chidAnandarUpaM

manovAgagamyaM paraM dhAma rAma || 18 ||

prachaNDapratApaprabhAvAbhibhUta-

-prabhUtArivIra prabho rAmachandra |

balaM te kathaM varNyate.atIva bAlye

yato.akhaNDi chaNDIshakodaNDadaNDam || 19 ||

dashagrIvamugraM saputraM samitraM

sariddurgamadhyastharakShogaNesham |

bhavantaM vinA rAma vIro naro vA

suro vA.amaro vA jayetkastrilokyAm || 20 ||

sadA rAma rAmeti rAmAmRRitaM te

sadArAmamAnandaniShyandakandam |

pibantaM namantaM sudantaM hasantaM

hanUmantamantarbhaje taM nitAntam || 21 ||

sadA rAma rAmeti rAmAmRRitaM te

sadArAmamAnandaniShyandakandam |

pibannanvahaM nanvahaM naiva mRRityo-

-rbibhemi prasAdAdasAdAttavaiva || 22 ||

asItAsametairakodaNDabhUShai-

-rasaumitrivandyairachaNDapratApaiH |

ala~NkeshakAlairasugrIvamitrai-

-rarAmAbhidheyairalaM daivatairnaH || 23 ||

avIrAsanasthairachinmudrikADhyai-

-rabhaktA~njaneyAditattvaprakAshaiH |

amandAramUlairamandAramAlai-

-rarAmAbhidheyairalaM daivatairnaH || 24 ||

asindhuprakopairavandyapratApai-

-rabandhuprayANairamandasmitADhyaiH |

adaNDapravAsairakhaNDaprabodhai-

-rarAmAbhidheyairalaM daivatairnaH || 25 ||

hare rAma sItApate rAvaNAre

kharAre murAre.asurAre pareti |

lapantaM nayantaM sadAkAlamevaM

samAlokayAlokayAsheShabandho || 26 ||

namaste sumitrAsuputrAbhivandya

namaste sadA kaikayInandaneDya |

namaste sadA vAnarAdhIshavandya

namaste namaste sadA rAmachandra || 27 ||

prasIda prasIda prachaNDapratApa

prasIda prasIda prachaNDArikAla |

prasIda prasIda prapannAnukampin

prasIda prasIda prabho rAmachandra || 28 ||

bhuja~NgaprayAtaM paraM vedasAraM

mudA rAmachandrasya bhaktyA cha nityam |

paThansantataM chintayansvAntara~Nge

sa eva svayaM rAmachandraH sa dhanyaH || 29 ||

iti shrImachChaNkarAchArya kRRitaM shrI rAma bhujaNgaprayAta stotram |