shrI rAdhA kRRipA kaTAkSha stotram

munIndra–vRRinda–vandite triloka–shoka–hAriNi

prasanna-vaktra-paNkaje niku~nja-bhU-vilAsini

vrajendra–bhAnu–nandini vrajendra–sUnu–sa~Ngate

kadA kariShyasIha mAM kRRipAkaTAkSha–bhAjanam ||1||

ashoka–vRRikSha–vallarI vitAna–maNDapa–sthite

pravAlabAla–pallava prabhAruNA~Nghri–komale |

varAbhayasphuratkare prabhUtasampadAlaye

kadA kariShyasIha mAM kRRipAkaTAkSha–bhAjanam ||2||

anaNga-raNga maNgala-prasaNga-bhaNgura-bhruvAM

savibhramaM sasambhramaM dRRiganta–bANapAtanaiH |

nirantaraM vashIkRRitapratItanandanandane

kadA kariShyasIha mAM kRRipAkaTAkSha–bhAjanam ||3||

taDit–suvarNa–champaka –pradIpta–gaura–vigrahe

mukha–prabhA–parAsta–koTi–shAradendumaNDale |

vichitra-chitra sa~ncharachchakora-shAva-lochane

kadA kariShyasIha mAM kRRipAkaTAkSha–bhAjanam ||4||

madonmadAti–yauvane pramoda–mAna–maNDite

priyAnurAga–ra~njite kalA–vilAsa – paNDite |

ananyadhanya–ku~njarAjya–kAmakeli–kovide

kadA kariShyasIha mAM kRRipAkaTAkSha–bhAjanam ||5||

asheSha–hAvabhAva–dhIrahIrahAra–bhUShite

prabhUtashAtakumbha–kumbhakumbhi–kumbhasustani |

prashastamanda–hAsyachUrNa pUrNasaukhya –sAgare

kadA kariShyasIha mAM kRRipAkaTAkSha–bhAjanam ||6||

mRRiNAla-vAla-vallarI taraNga-raNga-dorlate

latAgra–lAsya–lola–nIla–lochanAvalokane |

lalallulanmilanmanoj~na–mugdha–mohinAshrite

kadA kariShyasIha mAM kRRipAkaTAkSha–bhAjanam ||7||

suvarNamalikA~nchita –trirekha–kambu–kaNThage

trisUtra–ma~NgalI-guNa–triratna-dIpti–dIdhite |

salola–nIlakuntala–prasUna–guchCha–gumphite

kadA kariShyasIha mAM kRRipAkaTAkSha–bhAjanam ||8||

nitamba–bimba–lambamAna–puShpamekhalAguNe

prashastaratna-kiNkiNI-kalApa-madhya manjule |

karIndra–shuNDadaNDikA–varohasaubhagoruke

kadA kariShyasIha mAM kRRipAkaTAkSha–bhAjanam ||9||

aneka–mantranAda–ma~nju nUpurArava–skhalat

samAja–rAjahaMsa–vaMsha–nikvaNAti–gaurave |

vilolahema–vallarI–viDambichAru–cha~Nkrame

kadA kariShyasIha mAM kRRipAkaTAkSha–bhAjanam ||10||

ananta–koTi–viShNuloka–namra–padmajArchite

himAdrijA–pulomajA–viri~nchajA-varaprade |

apAra–siddhi–RRiddhi–digdha–satpadA~NgulI-nakhe

kadA kariShyasIha mAM kRRipAkaTAkSha–bhAjanam ||11||

makheshvari kriyeshvari svadheshvari sureshvari

triveda–bhAratIshvari pramANa–shAsaneshvari |

rameshvari kShameshvari pramoda–kAnaneshvari

vrajeshvari vrajAdhipe shrIrAdhike namostute ||12||

itI mamadbhutaM-stavaM nishamya bhAnunandinI

karotu santataM janaM kRRipAkaTAkSha-bhAjanam |

bhavettadaiva sa~nchita trirUpa–karma nAshanaM

labhettadA vrajendra–sUnu–maNDala–praveshanam ||13||

rAkAyAM cha sitAShTamyAM dashamyAM cha vishuddhadhIH |

ekAdashyAM trayodashyAM yaH paThetsAdhakaH sudhIH ||14||

yaM yaM kAmayate kAmaM taM tamApnoti sAdhakaH |

rAdhAkRRipAkaTAkSheNa bhaktiHsyAt premalakShaNA ||15||

Urudaghne nAbhidaghne hRRiddaghne kaNThadaghnake |

rAdhAkuNDajale sthitA yaH paThet sAdhakaH shatam ||16||

tasya sarvArtha siddhiH syAd vAksAmarthyaM tathA labhet |

aishvaryaM cha labhet sAkShAddRRishA pashyati rAdhikAm ||17||

tena sa tatkShaNAdeva tuShTA datte mahAvaram |

yena pashyati netrAbhyAM tat priyaM shyAmasundaram ||18||

nityalIlA–praveshaM cha dadAti shrI-vrajAdhipaH |

ataH parataraM prArthyaM vaiShNavasya na vidyate ||19||

|| iti shrImadUrdhvAmnAye shrIrAdhikAyAH kRRipAkaTAkShastotraM sampUrNam ||