Sri Narasimha Mantra Rajapada Stotram

zrI nRsiMha mantrarAjapAda stotram

zloka 1

pArvatyuvAca |

mantrANAM paramaM mantraM guhyAnAM guhyameva ca |

brUhi me nArasiMhasya tattvaM mantrasya durlabham ||

zaGkara uvAca |

vRttotphullavizAlAkSaM vipakSakSayadIkSitam |

ninAdatrastavizvANDaM viSNumugraM namAmyaham || 1 ||

sarvairavadhyatAM prAptaM sabalaughaM diteH sutam |

nakhAgraiH zakalIcakre yastaM vIraM namAmyaham || 2 ||

padAvaSTabdhapAtAlaM mUrdhA''viSTatriviSTapam |

bhujapraviSTASTadizaM mahAviSNuM namAmyaham || 3 ||

jyotIMSyarkendunakSatrajvalanAdInyanukramAt |

jvalanti tejasA yasya taM jvalantaM namAmyaham || 4 ||

sarvendriyairapi vinA sarvaM sarvatra sarvadA |

yo jAnAti namAmyAdyaM tamahaM sarvatomukham || 5 ||

naravat siMhavaccaiva yasya rUpaM mahAtmanaH |

mahAsaTaM mahAdaMSTraM taM nRsiMhaM namAmyaham || 6 ||

yannAmasmaraNAdbhItAH bhUtavetAlarAkSasAH |

rogAdyAzca praNazyanti bhISaNaM taM namAmyaham || 7 ||

sarve'pi yaM samAzritya sakalaM bhadramaznute |

zriyA ca bhadrayA juSTo yastaM bhadraM namAmyaham || 8 ||

sAkSAt svakAle samprAptaM mRtyuM zatrugaNAnvitam |

bhaktAnAM nAzayedyastu mRtyumRtyuM namAmyaham || 9 ||

namaskArAtmakaM yasmai vidhAyAtmanivedanam |

tyaktaduHkho'khilAn kAmAnaznantaM taM namAmyaham || 10 ||

dAsabhUtAH svataH sarve hyAtmAnaH paramAtmanaH |

ato'hamapi te dAsaH iti matvA namAmyaham || 11 ||

zaGkareNAdarAt proktaM padAnAM tattvamuttamam |

trisandhyaM yaH paThettasya zrIvidyA''yuzca vardhate || 12 ||

iti zrIzaGkarakRta zrI nRsiMha mantrarAjapada stotram |