Sri Meenakshi Stotram

zrI mInAkSI stotram

zloka 1

zrIvidye zivavAmabhAganilaye zrIrAjarAjArcite

zrInAthAdigurusvarUpavibhave cintAmaNIpIThike |

zrIvANIgirijAnutAGghrikamale zrIzAmbhavi zrIzive

madhyAhne malayadhvajAdhipasute mAM pAhi mInAmbike || 1 ||

cakrasthe'capale carAcarajagannAthe jagatpUjite

ArtAlIvarade natAbhayakare vakSojabhArAnvite |

vidye vedakalApamaulividite vidyullatAvigrahe

mAtaH pUrNasudhArasArdrahRdaye mAM pAhi mInAmbike || 2 ||

koTIrAGgadaratnakuNDaladhare kodaNDabANAJcite

kokAkArakucadvayoparilasatprAlambahArAJcite |

ziJjannUpurapAdasArasamaNIzrIpAdukAlaGkRte

maddAridryabhujaGgagAruDakhage mAM pAhi mInAmbike || 3 ||

brahmezAcyutagIyamAnacarite pretAsanAntasthite

pAzodaGkuzacApabANakalite bAlenducUDAJcite |

bAle bAlakuraGgalolanayane bAlArkakoTyujjvale

mudrArAdhitadaivate munisute mAM pAhi mInAmbike || 4 ||

gandharvAmarayakSapannaganute gaGgAdharAliGgite

gAyatrIgaruDAsane kamalaje suzyAmale susthite |

khAtIte khaladArupAvakazikhe khadyotakoTyujjvale

mantrArAdhitadaivate munisute mAM pAhI mInAmbike || 5 ||

nAde nAradatumburAdyavinute nAdAntanAdAtmike

nitye nIlalatAtmike nirupame nIvArazUkopame |

kAnte kAmakale kadambanilaye kAmezvarAGkasthite

madvidye madabhISTakalpalatike mAM pAhi mInAmbike || 6 ||

vINAnAdanimIlitArdhanayane visrastacUlIbhare

tAmbUlAruNapallavAdharayute tATaGkahArAnvite |

zyAme candrakalAvataMsakalite kastUrikAphAlike

pUrNe pUrNakalAbhirAmavadane mAM pAhi mInAmbike || 7 ||

zabdabrahmamayI carAcaramayI jyotirmayI vAGmayI

nityAnandamayI niraJjanamayI tattvammayI cinmayI |

tattvAtItamayI parAtparamayI mAyAmayI zrImayI

sarvaizvaryamayI sadAzivamayI mAM pAhi mInAmbike || 8 ||

iti zrImatparamahaMsaparivrAjakAcAryasya zrIgovindabhagavatpUjyapAdaziSyasya zrImacchaGkarabhagavataH kRtau mInAkSI stotram |