ശ്രീ മഹിഷാസുര മര്ദിനീ സ്തോത്രമ് (അയിഗിരി നന്ദിനി)

ശ്രീ മഹിഷാസുര മര്ദിനീ സ്തോത്രമ് (അയിഗിരി നന്ദിനി)

ശ്ലോക 1

അയി ഗിരിനന്ദിനി നന്ദിതമേദിനി വിശ്വവിനോദിനി നന്ദിനുതേ

ഗിരിവരവിന്ധ്യശിരോധിനിവാസിനി വിഷ്ണുവിലാസിനി ജിഷ്ണുനുതേ ।

ഭഗവതി ഹേ ശിതികണ്ഠകുടുമ്ബിനി ഭൂരികുടുമ്ബിനി ഭൂരികൃതേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

ശ്ലോക 2

സുരവരവര്ഷിണി ദുര്ധരധര്ഷിണി ദുര്മുഖമര്ഷിണി ഹര്ഷരതേ

ത്രിഭുവനപോഷിണി ശങ്കരതോഷിണി കല്മഷമോഷിണി ഘോരരതേ । [കില്ബിഷ-, ഘോഷ-]

ദനുജനിരോഷിണി ദിതിസുതരോഷിണി ദുര്മദശോഷിണി സിന്ധുസുതേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 1 ॥

ശ്ലോക 3

അയി ജഗദമ്ബ മദമ്ബ കദമ്ബവനപ്രിയവാസിനി ഹാസരതേ

ശിഖരി ശിരോമണി തുങ്ഗഹിമാലയ ശൃങ്ഗനിജാലയ മധ്യഗതേ ।

മധുമധുരേ മധുകൈടഭഗഞ്ജിനി കൈടഭഭഞ്ജിനി രാസരതേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 2 ॥

ശ്ലോക 4

അയി ശതഖണ്ഡ വിഖണ്ഡിതരുണ്ഡ വിതുണ്ഡിതശുണ്ഡ ഗജാധിപതേ

രിപുഗജഗണ്ഡ വിദാരണചണ്ഡ പരാക്രമശുണ്ഡ മൃഗാധിപതേ ।

നിജഭുജദണ്ഡ നിപാതിതഖണ്ഡ വിപാതിതമുണ്ഡ ഭടാധിപതേ [-ചണ്ഡ]

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 3 ॥

ശ്ലോക 5

അയി രണദുര്മദ ശത്രുവധോദിത ദുര്ധരനിര്ജര ശക്തിഭൃതേ

ചതുരവിചാരധുരീണ മഹാശിവ ദൂതകൃത പ്രമഥാധിപതേ ।

ദുരിതദുരീഹ ദുരാശയ ദുര്മതി ദാനവദൂത കൃതാന്തമതേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 4 ॥

ശ്ലോക 6

അയി ശരണാഗത വൈരിവധൂവര വീരവരാഭയദായകരേ

ത്രിഭുവന മസ്തക ശൂലവിരോധി ശിരോധികൃതാമല ശൂലകരേ ।

ദുമിദുമിതാമര ദുന്ദുഭിനാദ മഹോ മുഖരീകൃത തിഗ്മകരേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 5 ॥

ശ്ലോക 7

അയി നിജഹുങ്കൃതിമാത്ര നിരാകൃത ധൂമ്രവിലോചന ധൂമ്രശതേ

സമരവിശോഷിത ശോണിതബീജ സമുദ്ഭവശോണിത ബീജലതേ ।

ശിവ ശിവ ശുമ്ഭ നിശുമ്ഭ മഹാഹവ തര്പിത ഭൂത പിശാചരതേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 6 ॥

ശ്ലോക 8

ധനുരനുസങ്ഗ രണക്ഷണസങ്ഗ പരിസ്ഫുരദങ്ഗ നടത്കടകേ

കനക പിശങ്ഗ പൃഷത്കനിഷങ്ഗരസദ്ഭട ശൃങ്ഗ ഹതാവടുകേ ।

കൃതചതുരങ്ഗ ബലക്ഷിതിരങ്ഗ ഘടദ്ബഹുരങ്ഗ രടദ്ബടുകേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 7 ॥

ശ്ലോക 9

സുരലലനാ തതഥേയി തഥേയി കൃതാഭിനയോദര നൃത്യരതേ

കൃത കുകുഥഃ കുകുഥോ ഗഡദാദികതാല കുതൂഹല ഗാനരതേ ।

ധുധുകുട ധുക്കുട ധിന്ധിമിത ധ്വനി ധീര മൃദങ്ഗ നിനാദരതേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 8 ॥

ശ്ലോക 10

ജയ ജയ ജപ്യ ജയേ ജയ ശബ്ദപരസ്തുതി തത്പര വിശ്വനുതേ

ഭണ ഭണ ഭിഞ്ജിമി ഭിങ്കൃതനൂപുര സിഞ്ജിതമോഹിത ഭൂതപതേ । [ഝ-, ഝിം-]

നടിതനടാര്ധ നടീനടനായക നാടിതനാട്യ സുഗാനരതേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 9 ॥

ശ്ലോക 11

അയി സുമനഃ സുമനഃ സുമനഃ സുമനഃ സുമനോഹര കാന്തിയുതേ

ശ്രിത രജനീ രജനീ രജനീ രജനീ രജനീകര വക്ത്രവൃതേ ।

സുനയന വിഭ്രമര ഭ്രമര ഭ്രമര ഭ്രമര ഭ്രമരാധിപതേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 10 ॥

ശ്ലോക 12

സഹിത മഹാഹവ മല്ലമ തല്ലിക മല്ലിത രല്ലക മല്ലരതേ

വിരചിത വല്ലിക പല്ലിക മല്ലിക ഭില്ലിക ഭില്ലിക വര്ഗ വൃതേ ।

സിതകൃത ഫുല്ലസമുല്ലസിതാരുണ തല്ലജ പല്ലവ സല്ലലിതേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 11 ॥

ശ്ലോക 13

അവിരലഗണ്ഡഗലന്മദമേദുര മത്തമതങ്ഗജ രാജപതേ

ത്രിഭുവനഭൂഷണ ഭൂതകലാനിധി രൂപപയോനിധി രാജസുതേ ।

അയി സുദതീജന ലാലസമാനസ മോഹനമന്മഥ രാജസുതേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 12 ॥

ശ്ലോക 14

കമലദലാമല കോമലകാന്തി കലാകലിതാമല ഭാലലതേ

സകലവിലാസ കലാനിലയ ക്രമകേലിചലത്കലഹംസകുലേ ।

അലികുല സങ്കുല കുവലയ മണ്ഡല മൌലിമിലദ്ഭകുലാലി കുലേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 13 ॥

ശ്ലോക 15

കരമുരലീരവ വീജിത കൂജിത ലജ്ജിതകോകില മഞ്ജുമതേ

മിലിത പുലിന്ദ മനോഹര ഗുഞ്ജിത രഞ്ജിതശൈല നികുഞ്ജഗതേ ।

നിജഗുണഭൂത മഹാശബരീഗണ സദ്ഗുണസമ്ഭൃത കേലിതലേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 14 ॥

ശ്ലോക 16

കടിതടപീത ദുകൂലവിചിത്ര മയൂഖതിരസ്കൃത ചന്ദ്രരുചേ

പ്രണതസുരാസുര മൌലിമണിസ്ഫുര ദംശുലസന്നഖ ചന്ദ്രരുചേ ।

ജിതകനകാചല മൌലിപദോര്ജിത നിര്ഭരകുഞ്ജര കുമ്ഭകുചേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 15 ॥

ശ്ലോക 17

വിജിത സഹസ്രകരൈക സഹസ്രകരൈക സഹസ്രകരൈകനുതേ

കൃത സുരതാരക സങ്ഗരതാരക സങ്ഗരതാരക സൂനുസുതേ ।

സുരഥസമാധി സമാനസമാധി സമാധി സമാധി സുജാതരതേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 16 ॥

ശ്ലോക 18

പദകമലം കരുണാനിലയേ വരിവസ്യതി യോഽനുദിനം സ ശിവേ

അയി കമലേ കമലാനിലയേ കമലാനിലയഃ സ കഥം ന ഭവേത് ।

തവ പദമേവ പരമ്പദമിത്യനുശീലയതോ മമ കിം ന ശിവേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 17 ॥

ശ്ലോക 19

കനകലസത്കല സിന്ധുജലൈരനുസിഞ്ചിനുതേ ഗുണരങ്ഗഭുവം

ഭജതി സ കിം ന ശചീകുചകുമ്ഭ തടീപരിരമ്ഭ സുഖാനുഭവമ് ।

തവ ചരണം ശരണം കരവാണി നതാമരവാണി നിവാസി ശിവം

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 18 ॥

ശ്ലോക 20

തവ വിമലേന്ദുകുലം വദനേന്ദുമലം സകലം നനു കൂലയതേ

കിമു പുരുഹൂത പുരീന്ദുമുഖീ സുമുഖീഭിരസൌ വിമുഖീക്രിയതേ ।

മമ തു മതം ശിവനാമധനേ ഭവതീ കൃപയാ കിമുത ക്രിയതേ

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 19 ॥

ശ്ലോക 21

അയി മയി ദീനദയാലുതയാ കൃപയൈവ ത്വയാ ഭവിതവ്യമുമേ

അയി ജഗതോ ജനനീ കൃപയാസി യഥാസി തഥാഽനുഭിതാസിരതേ ।

യദുചിതമത്ര ഭവത്യുരരി കുരുതാദുരുതാപമപാകുരു തേ [മേ]

ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ

॥ 20 ॥

ശ്ലോക 22

ഇതി ശ്രീ മഹിഷാസുരമര്ദിനി സ്തോത്രമ് ॥