ಶ್ರೀ ಮಹಿಷಾಸುರ ಮರ್ದಿನೀ ಸ್ತೋತ್ರಮ್ (ಅಯಿಗಿರಿ ನನ್ದಿನಿ)

ಶ್ರೀ ಮಹಿಷಾಸುರ ಮರ್ದಿನೀ ಸ್ತೋತ್ರಮ್ (ಅಯಿಗಿರಿ ನನ್ದಿನಿ)

ಶ್ಲೋಕ 1

ಅಯಿ ಗಿರಿನನ್ದಿನಿ ನನ್ದಿತಮೇದಿನಿ ವಿಶ್ವವಿನೋದಿನಿ ನನ್ದಿನುತೇ

ಗಿರಿವರವಿನ್ಧ್ಯಶಿರೋಧಿನಿವಾಸಿನಿ ವಿಷ್ಣುವಿಲಾಸಿನಿ ಜಿಷ್ಣುನುತೇ ।

ಭಗವತಿ ಹೇ ಶಿತಿಕಣ್ಠಕುಟುಮ್ಬಿನಿ ಭೂರಿಕುಟುಮ್ಬಿನಿ ಭೂರಿಕೃತೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

ಶ್ಲೋಕ 2

ಸುರವರವರ್ಷಿಣಿ ದುರ್ಧರಧರ್ಷಿಣಿ ದುರ್ಮುಖಮರ್ಷಿಣಿ ಹರ್ಷರತೇ

ತ್ರಿಭುವನಪೋಷಿಣಿ ಶಙ್ಕರತೋಷಿಣಿ ಕಲ್ಮಷಮೋಷಿಣಿ ಘೋರರತೇ । [ಕಿಲ್ಬಿಷ-, ಘೋಷ-]

ದನುಜನಿರೋಷಿಣಿ ದಿತಿಸುತರೋಷಿಣಿ ದುರ್ಮದಶೋಷಿಣಿ ಸಿನ್ಧುಸುತೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 1 ॥

ಶ್ಲೋಕ 3

ಅಯಿ ಜಗದಮ್ಬ ಮದಮ್ಬ ಕದಮ್ಬವನಪ್ರಿಯವಾಸಿನಿ ಹಾಸರತೇ

ಶಿಖರಿ ಶಿರೋಮಣಿ ತುಙ್ಗಹಿಮಾಲಯ ಶೃಙ್ಗನಿಜಾಲಯ ಮಧ್ಯಗತೇ ।

ಮಧುಮಧುರೇ ಮಧುಕೈಟಭಗಞ್ಜಿನಿ ಕೈಟಭಭಞ್ಜಿನಿ ರಾಸರತೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 2 ॥

ಶ್ಲೋಕ 4

ಅಯಿ ಶತಖಣ್ಡ ವಿಖಣ್ಡಿತರುಣ್ಡ ವಿತುಣ್ಡಿತಶುಣ್ಡ ಗಜಾಧಿಪತೇ

ರಿಪುಗಜಗಣ್ಡ ವಿದಾರಣಚಣ್ಡ ಪರಾಕ್ರಮಶುಣ್ಡ ಮೃಗಾಧಿಪತೇ ।

ನಿಜಭುಜದಣ್ಡ ನಿಪಾತಿತಖಣ್ಡ ವಿಪಾತಿತಮುಣ್ಡ ಭಟಾಧಿಪತೇ [-ಚಣ್ಡ]

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 3 ॥

ಶ್ಲೋಕ 5

ಅಯಿ ರಣದುರ್ಮದ ಶತ್ರುವಧೋದಿತ ದುರ್ಧರನಿರ್ಜರ ಶಕ್ತಿಭೃತೇ

ಚತುರವಿಚಾರಧುರೀಣ ಮಹಾಶಿವ ದೂತಕೃತ ಪ್ರಮಥಾಧಿಪತೇ ।

ದುರಿತದುರೀಹ ದುರಾಶಯ ದುರ್ಮತಿ ದಾನವದೂತ ಕೃತಾನ್ತಮತೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 4 ॥

ಶ್ಲೋಕ 6

ಅಯಿ ಶರಣಾಗತ ವೈರಿವಧೂವರ ವೀರವರಾಭಯದಾಯಕರೇ

ತ್ರಿಭುವನ ಮಸ್ತಕ ಶೂಲವಿರೋಧಿ ಶಿರೋಧಿಕೃತಾಮಲ ಶೂಲಕರೇ ।

ದುಮಿದುಮಿತಾಮರ ದುನ್ದುಭಿನಾದ ಮಹೋ ಮುಖರೀಕೃತ ತಿಗ್ಮಕರೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 5 ॥

ಶ್ಲೋಕ 7

ಅಯಿ ನಿಜಹುಙ್ಕೃತಿಮಾತ್ರ ನಿರಾಕೃತ ಧೂಮ್ರವಿಲೋಚನ ಧೂಮ್ರಶತೇ

ಸಮರವಿಶೋಷಿತ ಶೋಣಿತಬೀಜ ಸಮುದ್ಭವಶೋಣಿತ ಬೀಜಲತೇ ।

ಶಿವ ಶಿವ ಶುಮ್ಭ ನಿಶುಮ್ಭ ಮಹಾಹವ ತರ್ಪಿತ ಭೂತ ಪಿಶಾಚರತೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 6 ॥

ಶ್ಲೋಕ 8

ಧನುರನುಸಙ್ಗ ರಣಕ್ಷಣಸಙ್ಗ ಪರಿಸ್ಫುರದಙ್ಗ ನಟತ್ಕಟಕೇ

ಕನಕ ಪಿಶಙ್ಗ ಪೃಷತ್ಕನಿಷಙ್ಗರಸದ್ಭಟ ಶೃಙ್ಗ ಹತಾವಟುಕೇ ।

ಕೃತಚತುರಙ್ಗ ಬಲಕ್ಷಿತಿರಙ್ಗ ಘಟದ್ಬಹುರಙ್ಗ ರಟದ್ಬಟುಕೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 7 ॥

ಶ್ಲೋಕ 9

ಸುರಲಲನಾ ತತಥೇಯಿ ತಥೇಯಿ ಕೃತಾಭಿನಯೋದರ ನೃತ್ಯರತೇ

ಕೃತ ಕುಕುಥಃ ಕುಕುಥೋ ಗಡದಾದಿಕತಾಲ ಕುತೂಹಲ ಗಾನರತೇ ।

ಧುಧುಕುಟ ಧುಕ್ಕುಟ ಧಿನ್ಧಿಮಿತ ಧ್ವನಿ ಧೀರ ಮೃದಙ್ಗ ನಿನಾದರತೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 8 ॥

ಶ್ಲೋಕ 10

ಜಯ ಜಯ ಜಪ್ಯ ಜಯೇ ಜಯ ಶಬ್ದಪರಸ್ತುತಿ ತತ್ಪರ ವಿಶ್ವನುತೇ

ಭಣ ಭಣ ಭಿಞ್ಜಿಮಿ ಭಿಙ್ಕೃತನೂಪುರ ಸಿಞ್ಜಿತಮೋಹಿತ ಭೂತಪತೇ । [ಝ-, ಝಿಂ-]

ನಟಿತನಟಾರ್ಧ ನಟೀನಟನಾಯಕ ನಾಟಿತನಾಟ್ಯ ಸುಗಾನರತೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 9 ॥

ಶ್ಲೋಕ 11

ಅಯಿ ಸುಮನಃ ಸುಮನಃ ಸುಮನಃ ಸುಮನಃ ಸುಮನೋಹರ ಕಾನ್ತಿಯುತೇ

ಶ್ರಿತ ರಜನೀ ರಜನೀ ರಜನೀ ರಜನೀ ರಜನೀಕರ ವಕ್ತ್ರವೃತೇ ।

ಸುನಯನ ವಿಭ್ರಮರ ಭ್ರಮರ ಭ್ರಮರ ಭ್ರಮರ ಭ್ರಮರಾಧಿಪತೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 10 ॥

ಶ್ಲೋಕ 12

ಸಹಿತ ಮಹಾಹವ ಮಲ್ಲಮ ತಲ್ಲಿಕ ಮಲ್ಲಿತ ರಲ್ಲಕ ಮಲ್ಲರತೇ

ವಿರಚಿತ ವಲ್ಲಿಕ ಪಲ್ಲಿಕ ಮಲ್ಲಿಕ ಭಿಲ್ಲಿಕ ಭಿಲ್ಲಿಕ ವರ್ಗ ವೃತೇ ।

ಸಿತಕೃತ ಫುಲ್ಲಸಮುಲ್ಲಸಿತಾರುಣ ತಲ್ಲಜ ಪಲ್ಲವ ಸಲ್ಲಲಿತೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 11 ॥

ಶ್ಲೋಕ 13

ಅವಿರಲಗಣ್ಡಗಲನ್ಮದಮೇದುರ ಮತ್ತಮತಙ್ಗಜ ರಾಜಪತೇ

ತ್ರಿಭುವನಭೂಷಣ ಭೂತಕಲಾನಿಧಿ ರೂಪಪಯೋನಿಧಿ ರಾಜಸುತೇ ।

ಅಯಿ ಸುದತೀಜನ ಲಾಲಸಮಾನಸ ಮೋಹನಮನ್ಮಥ ರಾಜಸುತೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 12 ॥

ಶ್ಲೋಕ 14

ಕಮಲದಲಾಮಲ ಕೋಮಲಕಾನ್ತಿ ಕಲಾಕಲಿತಾಮಲ ಭಾಲಲತೇ

ಸಕಲವಿಲಾಸ ಕಲಾನಿಲಯ ಕ್ರಮಕೇಲಿಚಲತ್ಕಲಹಂಸಕುಲೇ ।

ಅಲಿಕುಲ ಸಙ್ಕುಲ ಕುವಲಯ ಮಣ್ಡಲ ಮೌಲಿಮಿಲದ್ಭಕುಲಾಲಿ ಕುಲೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 13 ॥

ಶ್ಲೋಕ 15

ಕರಮುರಲೀರವ ವೀಜಿತ ಕೂಜಿತ ಲಜ್ಜಿತಕೋಕಿಲ ಮಞ್ಜುಮತೇ

ಮಿಲಿತ ಪುಲಿನ್ದ ಮನೋಹರ ಗುಞ್ಜಿತ ರಞ್ಜಿತಶೈಲ ನಿಕುಞ್ಜಗತೇ ।

ನಿಜಗುಣಭೂತ ಮಹಾಶಬರೀಗಣ ಸದ್ಗುಣಸಮ್ಭೃತ ಕೇಲಿತಲೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 14 ॥

ಶ್ಲೋಕ 16

ಕಟಿತಟಪೀತ ದುಕೂಲವಿಚಿತ್ರ ಮಯೂಖತಿರಸ್ಕೃತ ಚನ್ದ್ರರುಚೇ

ಪ್ರಣತಸುರಾಸುರ ಮೌಲಿಮಣಿಸ್ಫುರ ದಂಶುಲಸನ್ನಖ ಚನ್ದ್ರರುಚೇ ।

ಜಿತಕನಕಾಚಲ ಮೌಲಿಪದೋರ್ಜಿತ ನಿರ್ಭರಕುಞ್ಜರ ಕುಮ್ಭಕುಚೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 15 ॥

ಶ್ಲೋಕ 17

ವಿಜಿತ ಸಹಸ್ರಕರೈಕ ಸಹಸ್ರಕರೈಕ ಸಹಸ್ರಕರೈಕನುತೇ

ಕೃತ ಸುರತಾರಕ ಸಙ್ಗರತಾರಕ ಸಙ್ಗರತಾರಕ ಸೂನುಸುತೇ ।

ಸುರಥಸಮಾಧಿ ಸಮಾನಸಮಾಧಿ ಸಮಾಧಿ ಸಮಾಧಿ ಸುಜಾತರತೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 16 ॥

ಶ್ಲೋಕ 18

ಪದಕಮಲಂ ಕರುಣಾನಿಲಯೇ ವರಿವಸ್ಯತಿ ಯೋಽನುದಿನಂ ಸ ಶಿವೇ

ಅಯಿ ಕಮಲೇ ಕಮಲಾನಿಲಯೇ ಕಮಲಾನಿಲಯಃ ಸ ಕಥಂ ನ ಭವೇತ್ ।

ತವ ಪದಮೇವ ಪರಮ್ಪದಮಿತ್ಯನುಶೀಲಯತೋ ಮಮ ಕಿಂ ನ ಶಿವೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 17 ॥

ಶ್ಲೋಕ 19

ಕನಕಲಸತ್ಕಲ ಸಿನ್ಧುಜಲೈರನುಸಿಞ್ಚಿನುತೇ ಗುಣರಙ್ಗಭುವಂ

ಭಜತಿ ಸ ಕಿಂ ನ ಶಚೀಕುಚಕುಮ್ಭ ತಟೀಪರಿರಮ್ಭ ಸುಖಾನುಭವಮ್ ।

ತವ ಚರಣಂ ಶರಣಂ ಕರವಾಣಿ ನತಾಮರವಾಣಿ ನಿವಾಸಿ ಶಿವಂ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 18 ॥

ಶ್ಲೋಕ 20

ತವ ವಿಮಲೇನ್ದುಕುಲಂ ವದನೇನ್ದುಮಲಂ ಸಕಲಂ ನನು ಕೂಲಯತೇ

ಕಿಮು ಪುರುಹೂತ ಪುರೀನ್ದುಮುಖೀ ಸುಮುಖೀಭಿರಸೌ ವಿಮುಖೀಕ್ರಿಯತೇ ।

ಮಮ ತು ಮತಂ ಶಿವನಾಮಧನೇ ಭವತೀ ಕೃಪಯಾ ಕಿಮುತ ಕ್ರಿಯತೇ

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 19 ॥

ಶ್ಲೋಕ 21

ಅಯಿ ಮಯಿ ದೀನದಯಾಲುತಯಾ ಕೃಪಯೈವ ತ್ವಯಾ ಭವಿತವ್ಯಮುಮೇ

ಅಯಿ ಜಗತೋ ಜನನೀ ಕೃಪಯಾಸಿ ಯಥಾಸಿ ತಥಾಽನುಭಿತಾಸಿರತೇ ।

ಯದುಚಿತಮತ್ರ ಭವತ್ಯುರರಿ ಕುರುತಾದುರುತಾಪಮಪಾಕುರು ತೇ [ಮೇ]

ಜಯ ಜಯ ಹೇ ಮಹಿಷಾಸುರಮರ್ದಿನಿ ರಮ್ಯಕಪರ್ದಿನಿ ಶೈಲಸುತೇ

॥ 20 ॥

ಶ್ಲೋಕ 22

ಇತಿ ಶ್ರೀ ಮಹಿಷಾಸುರಮರ್ದಿನಿ ಸ್ತೋತ್ರಮ್ ॥