Sri Lakshmi Sahasra Nama Stotram

shrI lakShmI sahasranAma stotraM

shloka 1

nAmnAM sAShTasahasra~ncha brUhi gArgya mahAmate |

mahAlakShmyA mahAdevyA bhuktimuktyarthasiddhaye || 1 ||

gArgya uvAcha

sanatkumAramAsInaM dvAdashAdityasannibham |

apRRichChanyogino bhaktyA yoginAmarthasiddhaye || 2 ||

sarvalaukikakarmabhyo vimuktAnAM hitAya vai |

bhuktimuktipradaM japyamanubrUhi dayAnidhe || 3 ||

sanatkumAra bhagavansarvaj~no.asi visheShataH |

Astikyasiddhaye nRRINAM kShipradharmArthasAdhanam || 4 ||

khidyanti mAnavAssarve dhanAbhAvena kevalam |

siddhyanti dhanino.anyasya naiva dharmArthakAmanAH || 5 ||

dAridryadhvaMsinI nAma kena vidyA prakIrtitA |

kena vA brahmavidyA.api kena mRRityuvinAshinI || 6 ||

sarvAsAM sArabhUtaikA vidyAnAM kena kIrtitA |

pratyakShasiddhidA brahman tAmAchakShva dayAnidhe || 7 ||

sanatkumAra uvAcha

sAdhu pRRiShTaM mahAbhAgAssarvalokahitaiShiNaH |

mahatAmeSha dharmashcha nAnyeShAmiti me matiH || 8 ||

brahmaviShNumahAdevamahendrAdimahAtmabhiH |

samproktaM kathayAmyadya lakShmInAmasahasrakam || 9 ||

yasyochchAraNamAtreNa dAridryAnmuchyate naraH |

kiM punastajjapAjjApI sarveShTArthAnavApnuyAt || 10 ||

asya shrIlakShmIdivyasahasranAmastotramahAmantrasya AnandakardamachiklItendirAsutAdayo mahAtmAno maharShayaH anuShTupChandaH viShNumAyA shaktiH mahAlakShmIH parAdevatA shrImahAlakShmIprasAdadvArA sarveShTArthasiddhyarthe jape viniyogaH |

dhyAnam

padmanAbhapriyAM devIM padmAkShIM padmavAsinIm |

padmavaktrAM padmahastAM vande padmAmaharnisham || 1 ||

pUrNenduvadanAM divyaratnAbharaNabhUShitAm |

varadAbhayahastADhyAM dhyAyechchandrasahodarIm || 2 ||

ichChArUpAM bhagavatassachchidAnandarUpiNIm |

sarvaj~nAM sarvajananIM viShNuvakShassthalAlayAm |

dayAlumanishaM dhyAyetsukhasiddhisvarUpiNIm || 3 ||

stotram

nityAgatAnantanityA nandinI janara~njanI |

nityaprakAshinI chaiva svaprakAshasvarUpiNI || 1 ||

mahAlakShmIrmahAkAlI mahAkanyA sarasvatI |

bhogavaibhavasandhAtrI bhaktAnugrahakAriNI || 2 ||

IshAvAsyA mahAmAyA mahAdevI maheshvarI |

hRRillekhA paramA shaktirmAtRRikAbIjarUpiNI || 3 ||

nityAnandA nityabodhA nAdinI janamodinI |

satyapratyayanI chaiva svaprakAshAtmarUpiNI || 4 ||

tripurA bhairavI vidyA haMsA vAgIshvarI shivA |

vAgdevI cha mahArAtriH kAlarAtristrilochanA || 5 ||

bhadrakAlI karAlI cha mahAkAlI tilottamA |

kAlI karAlavaktrAntA kAmAkShI kAmadA shubhA || 6 ||

chaNDikA chaNDarUpeshA chAmuNDA chakradhAriNI |

trailokyajayinI devI trailokyavijayottamA || 7 ||

siddhalakShmIH kriyAlakShmIrmokShalakShmIH prasAdinI |

umA bhagavatI durgA chAndrI dAkShAyaNI shivA || 8 ||

pratya~NgirA dharAvelA lokamAtA haripriyA |

pArvatI paramA devI brahmavidyApradAyinI || 9 ||

arUpA bahurUpA cha virUpA vishvarUpiNI |

panchabhUtAtmikA vANI panchabhUtAtmikA parA || 10 ||

kAlI mA pa~nchikA vAgmI haviHpratyadhidevatA |

devamAtA sureshAnA devagarbhA.ambikA dhRRitiH || 11 ||

sa~NkhyA jAtiH kriyAshaktiH prakRRitirmohinI mahI |

yaj~navidyA mahAvidyA guhyavidyA vibhAvarI || 12 ||

jyotiShmatI mahAmAtA sarvamantraphalapradA |

dAridryadhvaMsinI devI hRRidayagranthibhedinI || 13 ||

sahasrAdityasa~NkAshA chandrikA chandrarUpiNI |

gAyatrI somasambhUtissAvitrI praNavAtmikA || 14 ||

shA~NkarI vaiShNavI brAhmI sarvadevanamaskRRitA |

sevyadurgA kuberAkShI karavIranivAsinI || 15 ||

jayA cha vijayA chaiva jayantI chA.aparAjitA |

kubjikA kAlikA shAstrI vINApustakadhAriNI || 16 ||

sarvaj~nashaktishshrIshaktirbrahmaviShNushivAtmikA |

iDApi~NgalikAmadhyamRRiNAlItanturUpiNI || 17 ||

yaj~neshAnI prathA dIkShA dakShiNA sarvamohinI |

aShTA~NgayoginI devI nirbIjadhyAnagocharA || 18 ||

sarvatIrthasthitA shuddhA sarvaparvatavAsinI |

vedashAstraprabhA devI ShaDa~NgAdipadakramA || 19 ||

shivA dhAtrI shubhAnandA yaj~nakarmasvarUpiNI |

vratinI menakA devI brahmANI brahmachAriNI || 20 ||

ekAkSharaparA tArA bhavabandhavinAshinI |

vishvambharA dharAdhArA nirAdhArA.adhikasvarA || 21 ||

rAkA kuhUramAvAsyA pUrNimA.anumatirdyutiH |

sinIvAlI shivA.avashyA vaishvadevI pisha~NgilA || 22 ||

pippalA cha vishAlAkShI rakShoghnI vRRiShTikAriNI |

duShTavidrAviNI devI sarvopadravanAshinI || 23 ||

shAradA sharasandhAnA sarvashastrasvarUpiNI |

yuddhamadhyasthitA devI sarvabhUtaprabha~njanI || 24 ||

ayuddhA yuddharUpA cha shAntA shAntisvarUpiNI |

ga~NgA sarasvatIveNIyamunAnarmadApagA || 25 ||

samudravasanAvAsA brahmANDashroNimekhalA |

pa~nchavaktrA dashabhujA shuddhasphaTikasannibhA || 26 ||

raktA kRRiShNA sitA pItA sarvavarNA nirIshvarI |

kAlikA chakrikA devI satyA tu vaTukAsthitA || 27 ||

taruNI vAruNI nArI jyeShThAdevI sureshvarI |

vishvambharAdharA kartrI galArgalavibha~njanI || 28 ||

sandhyArAtrirdivAjyotsnA kalAkAShThA nimeShikA |

urvI kAtyAyanI shubhrA saMsArArNavatAriNI || 29 ||

kapilA kIlikA.ashokA mallikAnavamallikA | [ mallikAnavamAlikA ]

devikA nandikA shAntA bhanjikA bhayabhanjikA || 30 ||

kaushikI vaidikI devI saurI rUpAdhikA.atibhA |

digvastrA navavastrA cha kanyakA kamalodbhavA || 31 ||

shrIssaumyalakShaNA.atItadurgA sUtraprabodhikA |

shraddhA medhA kRRitiH praj~nA dhAraNA kAntireva cha || 32 ||

shrutiH smRRitirdhRRitirdhanyA bhUtiriShTirmanIShiNI |

viraktirvyApinI mAyA sarvamAyAprabha~njanI || 33 ||

mAhendrI mantriNI siMhI chendrajAlasvarUpiNI |

avasthAtrayanirmuktA guNatrayavivarjitA || 34 ||

IShaNAtrayanirmuktA sarvarogavivarjitA |

yogidhyAnAntagamyA cha yogadhyAnaparAyaNA || 35 ||

trayIshikhA visheShajnA vedAntajnAnarUpiNI |

bhAratI kamalA bhAShA padmA padmavatI kRRitiH || 36 ||

gautamI gomatI gaurI IshAnA haMsavAhinI |

nArAyaNI prabhAdhArA jAhnavI sha~NkarAtmajA || 37 ||

chitraghaNTA sunandA shrIrmAnavI manusambhavA |

stambhinI kShobhiNI mArI bhrAmiNI shatrumAriNI || 38 ||

mohinI dveShiNI vIrA aghorA rudrarUpiNI |

rudraikAdashinI puNyA kalyANI lAbhakAriNI || 39 ||

devadurgA mahAdurgA svapnadurgA.aShTabhairavI |

sUryachandrAgnirUpA cha grahanakShatrarUpiNI || 40 ||

bindunAdakalAtItA bindunAdakalAtmikA |

dashavAyujayAkArA kalAShoDashasaMyutA || 41 ||

kAshyapI kamalAdevI nAdachakranivAsinI |

mRRiDAdhArA sthirA guhyA devikA chakrarUpiNI || 42 ||

avidyA shArvarI bhu~njA jambhAsuranibarhiNI |

shrIkAyA shrIkalA shubhrA karmanirmUlakAriNI || 43 ||

AdilakShmIrguNAdhArA pa~nchabrahmAtmikA parA |

shrutirbrahmamukhAvAsA sarvasampattirUpiNI || 44 ||

mRRitasa~njIvanI maitrI kAminI kAmavarjitA |

nirvANamArgadA devI haMsinI kAshikA kShamA || 45 ||

saparyA guNinI bhinnA nirguNA khaNDitAshubhA |

svAminI vedinI shakyA shAmbarI chakradhAriNI || 46 ||

daNDinI muNDinI vyAghrI shikhinI somasaMhatiH |

chintAmaNishchidAnandA pa~nchabANaprabodhinI || 47 ||

bANashreNissahasrAkShI sahasrabhujapAdukA |

sandhyAvalistrisandhyAkhyA brahmANDamaNibhUShaNA || 48 ||

vAsavI vAruNIsenA kulikA mantrara~njanI |

jitaprANasvarUpA cha kAntA kAmyavarapradA || 49 ||

mantrabrAhmaNavidyArthA nAdarUpA haviShmatI |

AtharvaNiH shrutiH shUnyA kalpanAvarjitA satI || 50 ||

sattAjAtiH pramA.ameyA.apramitiH prANadA gatiH |

avarNA pa~nchavarNA cha sarvadA bhuvaneshvarI || 51 ||

trailokyamohinI vidyA sarvabhartrI kSharA.akSharA |

hiraNyavarNA hariNI sarvopadravanAshinI || 52 ||

kaivalyapadavIrekhA sUryamaNDalasaMsthitA |

somamaNDalamadhyasthA vahnimaNDalasaMsthitA || 53 ||

vAyumaNDalamadhyasthA vyomamaNDalasaMsthitA |

chakrikA chakramadhyasthA chakramArgapravartinI || 54 ||

kokilAkulachakreshA pakShatiH pa~NktipAvanI |

sarvasiddhAntamArgasthA ShaDvarNAvaravarjitA || 55 ||

shararudraharA hantrI sarvasaMhArakAriNI |

puruShA pauruShI tuShTissarvatantraprasUtikA || 56 ||

ardhanArIshvarI devI sarvavidyApradAyinI |

bhArgavI yAjuShIvidyA sarvopaniShadAsthitA || 57 || [ bhujuShIvidyA ]

vyomakeshAkhilaprANA pa~nchakoshavilakShaNA |

panchakoshAtmikA pratyakpanchabrahmAtmikA shivA || 58 ||

jagajjarAjanitrI cha pa~nchakarmaprasUtikA |

vAgdevyAbharaNAkArA sarvakAmyasthitAsthitiH || 59 ||

aShTAdashachatuShShaShThipIThikA vidyayA yutA |

kAlikAkarShaNashyAmA yakShiNI kinnareshvarI || 60 ||

ketakI mallikA.ashokA vArAhI dharaNI dhruvA |

nArasiMhI mahogrAsyA bhaktAnAmArtinAshinI || 61 ||

antarbalA sthirA lakShmIrjarAmaraNanAshinI |

shrIra~njitA mahAkAyA somasUryAgnilochanA || 62 ||

aditirdevamAtA cha aShTaputrA.aShTayoginI |

aShTaprakRRitiraShTAShTavibhrAjadvikRRitAkRRitiH || 63 ||

durbhikShadhvaMsinI devI sItA satyA cha rukmiNI |

khyAtijA bhArgavI devI devayonistapasvinI || 64 ||

shAkambharI mahAshoNA garuDoparisaMsthitA |

siMhagA vyAghragA devI vAyugA cha mahAdrigA || 65 ||

akArAdikShakArAntA sarvavidyAdhidevatA |

mantravyAkhyAnanipuNA jyotishshAstraikalochanA || 66 ||

iDApi~NgalikAmadhyAsuShumnA granthibhedinI |

kAlachakrAshrayopetA kAlachakrasvarUpiNI || 67 ||

vaishAradI matishshreShThA variShThA sarvadIpikA |

vainAyakI varArohA shroNivelA bahirvaliH || 68 ||

jambhinI jRRimbhiNI jambhakAriNI gaNakArikA |

sharaNI chakrikA.anantA sarvavyAdhichikitsakI || 69 ||

devakI devasa~NkAshA vAridhiH karuNAkarA |

sharvarI sarvasampannA sarvapApaprabha~njanI || 70 ||

ekamAtrA dvimAtrA cha trimAtrA cha tathA.aparA |

ardhamAtrA parA sUkShmA sUkShmArthA.arthaparA.aparA || 71 ||

ekavIrA visheShAkhyA ShaShThIdevI manasvinI |

naiShkarmyA niShkalAlokA j~nAnakarmAdhikA guNA || 72 ||

sabandhvAnandasandohA vyomAkArA.anirUpitA |

gadyapadyAtmikA vANI sarvAla~NkArasaMyutA || 73 ||

sAdhubandhapadanyAsA sarvauko ghaTikAvaliH |

ShaTkarmA karkashAkArA sarvakarmavivarjitA || 74 ||

AdityavarNA chAparNA kAminI vararUpiNI |

brahmANI brahmasantAnA vedavAgIshvarI shivA || 75 ||

purANanyAyamImAMsAdharmashAstrAgamashrutA |

sadyovedavatI sarvA haMsI vidyAdhidevatA || 76 ||

vishveshvarI jagaddhAtrI vishvanirmANakAriNI |

vaidikI vedarUpA cha kAlikA kAlarUpiNI || 77 ||

nArAyaNI mahAdevI sarvatattvapravartinI |

hiraNyavarNarUpA cha hiraNyapadasambhavA || 78 ||

kaivalyapadavI puNyA kaivalyaj~nAnalakShitA |

brahmasampattirUpA cha brahmasampattikAriNI || 79 ||

vAruNI vAruNArAdhyA sarvakarmapravartinI |

ekAkSharaparA.a.ayuktA sarvadAridryabha~njinI || 80 ||

pAshA~NkushAnvitA divyA vINAvyAkhyAkShasUtrabhRRit |

ekamUrtistrayImUrtirmadhukaiTabhabha~njinI || 81 ||

sANkhyA sANkhyavatI jvAlA jvalantI kAmarUpiNI |

jAgratI sarvasampattissuShuptA sveShTadAyinI || 82 ||

kapAlinI mahAdaMShTrA bhrukuTI kuTilAnanA |

sarvAvAsA suvAsA cha bRRihatyaShTishcha shakvarI || 83 ||

ChandogaNapratiShThA cha kalmAShI karuNAtmikA |

chakShuShmatI mahAghoShA khaDgacharmadharA.ashaniH || 84 ||

shilpavaichitryavidyotA sarvatobhadravAsinI |

achintyalakShaNAkArA sUtrabhAShyanibandhanA || 85 ||

sarvavedArthasampattissarvashAstrArthamAtRRikA |

akArAdikShakArAntasarvavarNakRRitasthalA || 86 ||

sarvalakShmIssadAnandA sAravidyA sadAshivA |

sarvaj~nA sarvashaktishcha khecharIrUpagochChritA || 87 ||

aNimAdiguNopetA parA kAShThA parA gatiH |

haMsayuktavimAnasthA haMsArUDhA shashiprabhA || 88 ||

bhavAnI vAsanAshaktirAkRRitisthAkhilA.akhilA |

tantraheturvichitrANgI vyomagaNgAvinodinI || 89 ||

varShA cha vArShikA chaiva RRigyajussAmarUpiNI |

mahAnadInadIpuNyA.agaNyapuNyaguNakriyA || 90 ||

samAdhigatalabhyArthA shrotavyA svapriyA ghRRiNA |

nAmAkSharaparA devI upasarganakhA~nchitA || 91 ||

nipAtorudvayIja~NghA mAtRRikA mantrarUpiNI |

AsInA cha shayAnA cha tiShThantI dhAvanAdhikA || 92 ||

lakShyalakShaNayogADhyA tAdrUpyagaNanAkRRitiH |

saikarUpA naikarUpA sendurUpA tadAkRRitiH || 93 ||

samAsataddhitAkArA vibhaktivachanAtmikA |

svAhAkArA svadhAkArA shrIpatyardhA~NganandinI || 94 ||

gambhIrA gahanA guhyA yonili~NgArdhadhAriNI |

sheShavAsukisaMsevyA chapalA varavarNinI || 95 ||

kAruNyAkArasampattiH kIlakRRinmantrakIlikA |

shaktibIjAtmikA sarvamantreShTAkShayakAmanA || 96 ||

AgneyI pArthivA ApyA vAyavyA vyomaketanA |

satyaj~nAnAtmikA.a.anandA brAhmI brahma sanAtanI || 97 ||

avidyAvAsanA mAyAprakRRitissarvamohinI |

shaktirdhAraNashaktishcha chidachichChaktiyoginI || 98 ||

vaktrAruNA mahAmAyA marIchirmadamardinI |

virAT svAhA svadhA shuddhA nIrUpAstissubhaktigA || 99 ||

nirUpitAdvayIvidyA nityAnityasvarUpiNI |

vairAjamArgasa~nchArA sarvasatpathadarshinI || 100 ||

jAlandharI mRRiDAnI cha bhavAnI bhavabha~njanI |

traikAlikajnAnatantustrikAlajnAnadAyinI || 101 ||

nAdAtItA smRRitiH praj~nA dhAtrIrUpA tripuShkarA |

parAjitAvidhAnaj~nA visheShitaguNAtmikA || 102 ||

hiraNyakeshinI hemabrahmasUtravichakShaNA |

asaNkhyeyaparArdhAntasvaravyanjanavaikharI || 103 ||

madhujihvA madhumatI madhumAsodayA madhuH |

mAdhavI cha mahAbhAgA meghagambhIranisvanA || 104 ||

brahmaviShNumaheshAdij~nAtavyArthavisheShagA |

nAbhau vahnishikhAkArA lalATe chandrasannibhA || 105 ||

bhrUmadhye bhAskarAkArA sarvatArAkRRitirhRRidi |

kRRittikAdibharaNyantanakShatreShTyArchitodayA || 106 ||

grahavidyAtmikA jyotirjyotirvinmatijIvikA |

brahmANDagarbhiNI bAlA saptAvaraNadevatA || 107 ||

vairAjottamasAmrAjyA kumArakushalodayA |

bagalA bhramarAmbA cha shivadUtI shivAtmikA || 108 ||

meruvindhyAdisaMsthAnA kAshmIrapuravAsinI |

yoganidrA mahAnidrA vinidrA rAkShasAshritA || 109 ||

suvarNadA mahAgaNgA panchAkhyA pa~nchasaMhatiH |

suprajAtA suvIrA cha supoShA supatishshivA || 110 ||

sugRRihA raktabIjAntA hatakandarpajIvikA |

samudravyomamadhyasthA samabindusamAshrayA || 111 ||

saubhAgyarasajIvAtussArAsAravivekadRRik |

trivalyAdisupuShTA~NgA bhAratI bharatAshritA || 112 ||

nAdabrahmamayIvidyA j~nAnabrahmamayIparA |

brahmanADI niruktishcha brahmakaivalyasAdhanam || 113 ||

kAlikeyamahodAravIryavikramarUpiNI |

vaDavAgnishikhAvaktrA mahAkavalatarpaNA || 114 ||

mahAbhUtA mahAdarpA mahAsArA mahAkratuH |

panjabhUtamahAgrAsA panchabhUtAdhidevatA || 115 ||

sarvapramANA sampattissarvarogapratikriyA |

brahmANDAntarbahirvyAptA viShNuvakShovibhUShiNI || 116 ||

shA~NkarI vidhivaktrasthA pravarA varahetukI |

hemamAlA shikhAmAlA trishikhA panchalochanA || 117 || [ panchamochanA ]

sarvAgamasadAchAramaryAdA yAtubha~njanI |

puNyashlokaprabandhADhyA sarvAntaryAmirUpiNI || 118 ||

sAmagAnasamArAdhyA shrotrakarNarasAyanam |

jIvalokaikajIvAturbhadrodAravilokanA || 119 ||

taTitkoTilasatkAntistaruNI harisundarI |

mInanetrA cha sendrAkShI vishAlAkShI suma~NgalA || 120 ||

sarvamaNgalasampannA sAkShAnmaNgaladevatA |

dehahRRiddIpikA dIptirjihvapApapraNAshinI || 121 ||

ardhachandrollasaddaMShTrA yaj~navATIvilAsinI |

mahAdurgA mahotsAhA mahAdevabalodayA || 122 ||

DAkinIDyA shAkinIDyA sAkinIDyA samastajuT |

nira~NkushA nAkivandyA ShaDAdhArAdhidevatA || 123 ||

bhuvanaj~nAninishshreNI bhuvanAkAravallarI |

shAshvatI shAshvatAkArA lokAnugrahakAriNI || 124 ||

sArasI mAnasI haMsI haMsalokapradAyinI |

chinmudrAla~NkRRitakarA koTisUryasamaprabhA || 125 ||

sukhaprANishirorekhA sadadRRiShTapradAyinI |

sarvasA~NkaryadoShaghnI grahopadravanAshinI || 126 ||

kShudrajantubhayaghnI cha viSharogAdibha~njanI |

sadAshAntA sadAshuddhA gRRihachChidranivAriNI || 127 ||

kalidoShaprashamanI kolAhalapurasthitA |

gaurI lAkShaNikI mukhyA jaghanyAkRRitivarjitA || 128 ||

mAyA vidyA mUlabhUtA vAsavI viShNuchetanA |

vAdinI vasurUpA cha vasuratnaparichChadA || 129 ||

ChAndasI chandrahRRidayA mantrasvachChandabhairavI |

vanamAlA vaijayantI pa~nchadivyAyudhAtmikA || 130 ||

pItAmbaramayI cha~nchatkaustubhA harikAminI |

nityA tathyA ramA rAmA ramaNI mRRityubha~njanI || 131 ||

jyeShThA kAShThA dhaniShThAntA sharA~NgI nirguNapriyA |

maitreyA mitravindA cha sheShyasheShakalAshayA || 132 ||

vArANasIvAsalabhyA chAryAvartajanastutA | [ vArANasIvAsaratA ]

jagadutpattisaMsthAnasaMhAratrayakAraNam || 133 ||

tvamamba viShNusarvasvaM namaste.astu maheshvari |

namaste sarvalokAnAM jananyai puNyamUrtaye || 134 ||

siddhalakShmIrmahAkAli mahalakShmi namo.astu te |

sadyojAtAdipanchAgnirUpA panchakapa~nchakam || 135 ||

yantralakShmIrbhavatyAdirAdyAdye te namo namaH |

sRRiShTyAdikAraNAkAravitate doShavarjite || 136 ||

jagallakShmIrjaganmAtarviShNupatni namo.astu te |

navakoTimahAshaktisamupAsyapadAmbuje || 137 ||

kanatsauvarNaratnADhya sarvAbharaNabhUShite |

anantAnityamahiShIprapa~ncheshvaranAyaki || 138 ||

atyuchChritapadAntasthe paramavyomanAyaki |

nAkapRRiShThagatArAdhye viShNulokavilAsini || 139 ||

vaikuNTharAjamahiShi shrIra~NganagarAshrite |

ra~NganAyaki bhUputri kRRiShNe varadavallabhe || 140 ||

koTibrahmAdisaMsevye koTirudrAdikIrtite |

mAtulu~NgamayaM kheTaM sauvarNachaShakaM tathA || 141 ||

padmadvayaM pUrNakumbhaM kIra~ncha varadAbhaye |

pAshamaNkushakaM shaNkhaM chakraM shUlaM kRRipANikAm || 142 ||

dhanurbANau chAkShamAlAM chinmudrAmapi bibhratI |

aShTAdashabhuje lakShmIrmahAShTAdashapIThage || 143 ||

bhUminIlAdisaMsevye svAmichittAnuvartini |

padme padmAlaye padmi pUrNakumbhAbhiShechite || 144 ||

indirendindirAbhAkShi kShIrasAgarakanyake |

bhArgavi tvaM svatantrechChA vashIkRRitajagatpatiH || 145 ||

maNgalaM maNgalAnAM tvaM devatAnAM cha devatA |

tvamuttamottamAnAM cha tvaM shreyaH paramAmRRitam || 146 ||

dhanadhAnyAbhivRRiddhishcha sArvabhaumasukhochChrayA |

AndolikAdisaubhAgyaM mattebhAdimahodayaH || 147 ||

putrapautrAbhivRRiddhishcha vidyAbhogabalAdikam |

AyurArogyasampattiraShTaishvaryaM tvameva hi || 148 ||

parameshavibhUtishcha sUkShmAtsUkShmatarAgatiH |

sadayApA~NgasandattabrahmendrAdipadasthitiH || 149 ||

avyAhatamahAbhAgyaM tvamevAkShobhyavikramaH |

samanvayashcha vedAnAmavirodhastvameva hi || 150 ||

niHshreyasapadaprAptisAdhanaM phalameva cha |

shrImantrarAjarAj~nI cha shrIvidyA kShemakAriNI || 151 ||

shrImbIjajapasantuShTA aiM hrIM shrIM bIjapAlikA |

prapattimArgasulabhA viShNuprathamaki~NkarI || 152 ||

klINkArArthasavitrI cha saumaNgalyAdhidevatA |

shrIShoDashAkSharIvidyA shrIyantrapuravAsinI || 153 ||

sarvamaNgalamANgalye shive sarvArthasAdhike |

sharaNye tryambake gaurI nArAyaNi namo.astu te || 154 ||

punaH punarnamaste.astu sAShTA~NgamayutaM punaH |

sanatkumAra uvAcha-

evaM stutA mahAlakShmIrbrahmarudrAdibhissuraiH |

namadbhirArtairdInaishcha nissvatvairbhogavarjitaiH || 1 ||

jyeShThA juShTaishcha nishshrIkaissaMsArAtsvaparAyaNaiH |

viShNupatnI dadau teShAM darshanaM dRRiShTitarpaNam || 2 ||

sharatpUrNendukoTyAbhadhavalApA~NgavIkShaNaiH |

sarvAnsattvasamAviShTAn chakre hRRiShTA varaM dadau || 3 ||

mahAlakShmIruvAcha-

nAmnAM sAShTasahasraM me pramAdAdvApi yassakRRit |

kIrtayettatkule satyaM vasAmyAchandratArakam || 4 ||

kiM punarniyamAjjapturmadekasharaNasya cha |

mAtRRivatsAnukampAhaM poShakI syAmaharnisham || 5 ||

mannAma stavatAM loke durlabhaM nAsti chintitam |

matprasAdena sarve.api svasveShTArthamavApsyatha || 6 ||

luptavaiShNavadharmasya madvrateShvavakIrNinaH |

bhaktiprapattihInasya vandyo nAmnAM stavo.api me || 7 ||

tasmAdavashyaM tairdoShairvihInaH pApavarjitaH |

japetsAShTasahasraM me nAmnAM pratyahamAdarAt || 8 ||

sAkShAdalakShmIputro.api durbhAgyo.apyalaso.api vA |

aprayatno.api mUDho.api vikalaH patito.api cha || 9 ||

avashyaM prApnuyAdbhAgyaM matprasAdena kevalam |

spRRiheyamachirAddevA varadAnAya jApinaH |

dadAmi sarvamiShTArthaM lakShmIti smaratAM dhruvam || 10 ||

sanatkumAra uvAcha-

ityuktvA.antardadhe lakShmIrvaiShNavI bhagavatkalA |

iShTApUrtaM cha sukRRitaM bhAgadheyaM cha chintitam || 11 ||

svaM svaM sthAnaM cha bhogaM cha vijayaM lebhire surAH |

tadetat pravadAmyadya lakShmInAmasahasrakam |

yoginaH paThata kShipraM chintitArthAnavApsyatha || 12 ||

gArgya uvAcha-

sanatkumAroyogIndra ityuktvA sa dayAnidhiH |

anugRRihya yayau kShipraM tAMshcha dvAdashayoginaH || 13 ||

tasmAdetadrahasyaM cha gopyaM japyaM prayatnataH |

aShTamyAM cha chaturdashyAM navamyAM bhRRiguvAsare || 14 ||

paurNamAsyAmamAyAM cha parvakAle visheShataH |

japedvA nityakAryeShu sarvAnkAmAnavApnuyAt || 15 ||

iti shrIskandapurANe sanatkumArasaMhitAyAM lakShmIsahasranAmastotraM sampUrNam ||